अम्मोन का दुनियाहोन का विरुध्द भविष्यवाणी
1 यहोवा को वचन मरा पास आयो: 2 "हे इन्सान का बच्चा, अम्मोनिहोन का तरफ मुडो करिखे उनका विषय मे भविष्यवाणी कर. 3 ओने बोल्यो, हे अम्मोनिहोन, परमेश्वर यहोवा को वचन सुन, परमेश्वर यहोवा यो बोलस हइ कि तुमने जो मरा पवित्र जगह खे अपवित्र कर्यो, अरु इस्राएल का देश जब उजडी गयो, अरु यहुदा का दुनीया जब वे बन्दी बनइखे ली जाया गया. 4 यो कारण देखो मी तुम खे पूर्व देश का दुनीयाहोन का अधिकार मे करना पर हइ; अरु वे तरा बिच अपनी झोपडी डाल्ये अरु अपनो घर बनाये; वे तरा फल खाये अरु तरो दुध पीये. 5 मी रब्बा नगर का ऊँटहोन खे रेन अरु अम्मोनिहोन का देश खे भेड-बकरिहोन को बठन की जगह करी दियु; तब तुम जानी लिये की मी यहोवा आय. 6 क्योकि परमेश्वर यहोवा यो बोलस हइ: तुम ने जो इस्राएल को देश का कारण ताली बजइ अरु नाच्या, अरु अपना मन को अभिमान से खुश हुया. 7 यो कारण देख, मे ने अपनो हाथ तरा उपर बडायो हइ; अरु तोखे से लुटय दियु, अरु देश देश का दुनीयाहोन मे से तोखे मिटय दियु; अरु देश देश से खतम करी दियु. मी तरो सत्यानाश करी डाल्यु; तब तु जानी लिये कि मी यहोवा आय.
मोआब का विरुध्द भविष्यवाणी
8 "परमेश्वर यहोवा यो बोलस हइ: मोआब अरु सेइर जो बोलस हइ, देखो, यहुदा को कुल अरु सब राष्टहोन का जसा हुइ गयो. 9 यो कारण देख, मोआब का देश का किनारा नगरहोन खे बेत्यशीमोत, बालमोन, अरु किर्यातैम, जो उ देश का गौरव हइ, उनकी रस्ता खोलीखे 10 उनखे पुर्व देश का दुनीयाहोन का वश मे असो करी दियु कि वे अम्मोनिहोन पर चढाइ कर्ये; अरु मी अम्मोनिहोन खे याहा तक उनका अधिकार मे करी दियु कि का बीच उनकी याद फिर नी ऱ्हिये. 11 मी मोआब खे भी दण्ड दियु. तब वे जानी लिये कि मी यहोवा आय.
एदोम का विरुध्द भविष्यवाणी
12 "परमेश्वर यहोवा यो भी बोलस हइ: एदोम ने जो यहुदा को कुल से पलटइ लियो, अरु उनका से बदलो लीखे बडो दोषी हुइ गयो हइ, 13 यो कारण परमेश्वर यहोवा यो बोलस हइ, मी एदोम का देश का विरुध्द अपनो हाथ बढइखे उन मे से अदमी अरु जनवर दोइ खे मिटायु; अरु तेमान से ली खे ददान तक ओखे उजाडी दियु; अरु वे तलवार से मार्या जाये. 14 मेने अपनी प्रजा इस्राएल का द्वारा एदोम से अपनो बदलो लीयु; अरु वे उ देश मे मरो कोप अरु गुस्सा का अनुसार काम कर्ये. तब वे मरी बदला खे जान्ये, परमेश्वर यहोवा की या वाणी हइ.
पलिश्तिहोन का विरुध्द भविष्यवाणी
15 "परमेश्वर यहोवा यो बोलस हइ: क्योकि पलिश्ती दुनीयाहोन ने बदलालियास, या अपनी युग युग की दुश्मनी का कारण अपना मन का अभिमान से बदलो लियो कि नाश कर्ये, 16 यो कारण परमेश्वर यहोवा यो बोलस हइ, देख, मी पलिश्तिहोन का विरुध्द अपनो हाथ बढान ही आलो हइ, अरु करेतिहोन खे मिटय डाल्यु; अरु समुद्र का किनारा पर र्हेन वाला दुनीयाहोन खे खतम करी डाल्यु. 17 मी उनका से भयंकर मुकद्दमो लडीके अरु अपना कोप मे हुइ खे उनखे दंड दियु. तब वे जान्ये कि मी यहोवा हु, जब मी उनका से बदलो लियु."