यहेज्केल 15

अंगुर कि बेल को उदाहरण

1 यहोवा को यो वचन मरा पास आयो. 2 "हे इन्सान का बच्चा, एक अंगुर की बेल की तुलना एक झाड से कसी करी जास हइ? जंगल का झाडहोन का तुलना मे अंगुर की एक डगान को का मुल्य हइ? 3 का कभी या लकडी से कोइ उपयोगी चीज बनइ गइ हइ? का दुनियाहोन समान टागन का लिये येमेसे खुटी बनास हइ? 4 अरु जब येखे अंगार मे कोइ इंधन का रुप मे डाल्यो जास हइ अरु येका दोइ बाजु अंगार से जली जास हइ अरु बिच को भाग भस्म हुइ जास हइ, तब का वा कोइ भी काम की रि जास हइ? 5 देख, जब वा बनी थी, तब भी वा कोइ काम की नी थी, फिर जब वा अंगार को इंधन हुइ खे भस्म हुइ गइ हइ, तब कोइ काम की हुइ सकस हइ? 6 येकालिये प्रभु यहोवा यो बोलस हइ, जसो जंगल का झाडहोन मे से अंगुर कि बेल खे अंगार का लखड करी देस हइ, वसो ही मी यरुशलेम का निवासिहोन को नास करी दियु. 7 मी उनका विरुध्द हुयु, अरु वे एक अंगार मे से निकली पर दुसरी अंगार मे जलीखे वे नष्ट करी दिये. अरु जब मी उनका से विमुख हुयु, तब तुम दुनियाहोन जानी लिये की मी यहोवा आय. 8 मी उनका देश खे उजाडी दियु, क्योकि उन्हे मरा से विश्वासघात कर्यो हइ, प्रभु यहोवा की या वाणी हइ."