यहेजखेल ने अपना बाल काट्या
1 "हे इन्सान का बच्चा, अपना हाथ मे एक तेज तलवार ले अरु ओको उपयोग एक नइ का अस्तरा का जसो अपना माथा का बाल मुडनो अरु दाडी करना मे कर. येका बाद तु तोलन को काटो लेनु, अरु वे बाल काष भाग करनु." 2 जब तुम्हारा घेराबंदी का दिन खतम हुइ जाये, तब एक भाग खे नगर का बिच मे जलइ देनु, अरु दुसरा भाग खे नगर का चारी तरफ तलवार से तुकडा तुकडा करी देनु. अरु तीसरा भाग खे हवा मे उडइ देनु. अरु तलवार खिची खे ओका पिछे चल्यु. 3 तब इनमे से थोडा बाल लिखे अपना कपडा का छेव मे बाधी देनु. 4 इनमे से भी कुछ बाल अलग करनु, अरु उनखे अंगार मे डाली देनु. ओमे से अंगार की एक ज्वाला निकल्ये, अरु इस्राएल का पुरा कुल मे फेली जाये. 5 प्रभु यहोवा यो बोलस हइ: या स्थिती यरुशलेम की हइ. जेमे मेने जात-जात का दुनियाहोन का बिच मे रख्यो हइ, अरु यो चारी तरफ से देशहोन से घिर्या हइ. 6 ओने मरा नियमहोन का खिलाप बुरो काम करीखे दुसरा राष्टहोन, चारी तरप का देश का दुनिया से जादा बुराइ करी हइ, ओने मरा कानुन के बेकार जान्यो हइ अरु मरा नियम पर नी चल्या हइ. 7 "येकालिये प्रभु यहोवा यो बोलस हइ: तुम अपना चारी तरफ का राष्ट्रहोन से जादा उद्दड हुइ गया हइ अरु मरा नियमहोन या कानुनहोन का पिच्छे नी चल्या हइ. अरु ते अरु तुम अपना चारी तरफ का राष्ट्रहोन का नियम का अनुसार भी नी कर्यो." 8 येकालिये प्रभु यहोवा यो बोलस हइ: हे येरुशलेम, मी खुद तुम्हारा विरुध्द हइ, अरु मी राष्ट्र का सामने ही तुमखे दंड दियु. 9 तरा सब घिनोना काम का कारन मी तरा बिच असो कर्यु, जसो अब तक नी कर्यो हइ, अरु नी भविष्य मे फिर कर्यु. 10 येकालिये, तुम्हारा ही बिच माय बाप अपना बच्चाहोन खे खाये अरु बच्चा अपना माय बाप खे खइ जाये. मी तुमखे दंड दियु अरु तुम्हारा बच्या हुया दुनियाहोन खे मी चारी दिशाहोन मे बिखरइ दियु. 11 येकालिये परम प्रधान यहोवा मेरी जिवन कि कसम येकालिये कि तोने मरा पवित्र जगा के अपनी सब घिनोनी मुर्तीहोन का कामहोन से अशुध्द कऱ्यो हइ, मी तोके घटायु, अरु तरा पर दया कि नजर नी कऱ्यु, अरु तरा पर कुछ भी तरस नी कऱ्यु. 12 तुम्हारा एक भाग दुनिया तुम्हारा हि बिच मे महामारी या अकाल से मर्ये, एक भाग तलवार से तुम्हारा दिवाल का बिच मार्या जाये; अरु एक भाग खे मी चारही तरफ तितर-बितर करी दियु अरु तलवार खीची खे उनका पिच्छे चल्यु. 13 यो प्रकार से म्हरो गुसा शान्त हुये, अरु उनका खिलाप म्हरो कोप शान्त हुये, अरु म्हरो प्रतिशोध पुरो हुये. अरु जब उनका पर म्हरो कोप खतम हुइ जाये, तब वे जान्ये की मी, यहोवा जलन मे ओने यो सब बोल्यो हइ. 14 मी तुम्हखे उजाडी दियु अरु तुम्हारा चारी तरफ का पडोसी राष्ट्रहोन का बिच अरु वे जो वहा से हुइ खे जास हइ, उनका नजर मे, मी तुम खे घृणा को पात्र बनइ दियु. 15 जब मी तुम खे अपना गुस्सा अरु कोप का साथ तुम खे दंड दियु, तब तुम अपना चारी तरफ का राष्ट्रहोन का लिये एक कलंक, निदा चेतावनी, अपमान को पात्र बनी जाये. मी यहोवा ने यो बोल्यो हइ. 16 जब मी तुम्हारा पर अकाल को घात अरु विनाशकारी तीर छोड्यु, ते तुमखे नाश करन का लिये असो कर्यु. मी तुम्हारा उपर बार-बार अकाल लायु अरु तुम्हारो खानो पिनो बंद करी दियु. 17 मी तुम्हारा बिच मे अकाल अरु जंगली जनवर भेज्यु अरु वे तोखे निसन्तान करी दिये. महामारी अरु रक्तपात तुम्हारा बिच हुय, अरु मी तुम्हारा पर तलवार चलायु. मी यहोवा ने यो बोल्यो हइ.