मिस्र का राजा की तुलना मगरमंछी से
1 बारा साल का बारावा महिना का पहिला दिन खे यहोवा को यो वचन मरा पास आयो: 2 हे इन्सान का बच्चा, मिस्र का राजा फिरोन का विषय मे विलाप को गीत बनइखे ओखे सुना: राष्ट्र-राष्ट्र मे तरो उल्लेख बाघ का साथ कर्यो गयो हइ, पर तु समुद्र का मगर का जसो हइ; तु अपनी नद्दीहोन मे टुटी पड्यो हइ, अरु ओका पाणी खे पाय से गंदो करी दियो हइ. 3 परमेश्वर यहोवा यो बोलस हइ: मी बहोत सा राष्ट्रहोन का सभा का द्वारा तरा पर अपनी जाल फैलायु अरु वे तोखे मरा महाजाल मे खिची लिये. 4 तब मी तोखे जमीन पर छोड्यु, अरु मैदान मे फेकिखे आकाश का सब पक्षिहोन खे तरा पर बठाडु; अरु तरा गोस से पुरी धरती का जीवजन्तुहोन को पेट भर्ये. 5 मी तरा गोस खे पहाड पर रख्यु, अरु खइहोन खे तरी उचाइ से भरी दियु. 6 मी तरा बोहातो खुन से पहाडहोन अरु जमीन खे सीचतो जायु, अरु नद्दी-नाला तरा खुन से भरी जाये. 7 जो टेम मी तोखे मिटान लग्यु जायु, उ टेम मे आकाश खे झाक्यु अरु तराहोन खे झावरो करी दियु; मी सुर्य खे बद्दल से लुकय दियु, अरु चांद अपनो उजालो नी देनको. 8 आकाश मे जेत्ता उजालो देन वाला तारा अरु आखहोन खे अंधारा से भरी दियु, अरु वे तरा पर नी चमकनका; वे तरा देश खे अंधारा मे डाली दिये, प्रभु यहोवा की या वाणी हइ. 9 "जब मी तरी विनाश की खबर राष्ट्र- राष्ट्र मे अरु तरा अनजान देशहोन मे फैलायु, तब बडा बडा देशहोन का दुनीयाहोन का मन मे डर उपज्ये." 10 मी बहोत सी राष्ट्रहोन खे तरा कारण चकीत करी दियु, अरु जब मी उनका राजाहोन का सामने अपनी तलवार उठायु, तब तरा कारण उनका रोगटा खडा हुइ जाये,अरु तरा गीरना का टेम वे अपना अपना प्राण का लिये कापता ऱ्हिये. 11 क्योकि परमेश्वर यहोवा यो बोलस हइ: बेबीलोन का राजा की तलवार तरा पर चल्ये. 12 मी तरी बडी प्रजा खे ओका सैनिक का हाथ मे दी दियु, अरु वे उनकी तलवार से मार्या जाये. जो सब राष्ट्रहोन मे भयानक हइ.
वे मिस्र का घमण्ड खे तोड्ये, अरु ओकी सब भीड को सत्यानाश हुये. 13 मी ओका सब जनवरहोन खे नद्दीहोन का किनारा से खतम करी दियु; जेका से पाणी इन्सान का पाय से अरु जनवर का खुर से गंधो नी होनको. 14 तब मी ओको पाणी खे साफ करी दियु अरु ओकी नद्दीहोन तेल का जसी बोहाये, परमेश्वर यहोवा की या वाणी हइ. 15 जब मी मिस्र देश खे उजाडी दियु अरु देश से सब चीजहोन खे छीनी लीयु, जब मी वे सब खे मार्यु, जो वहा ऱ्हेस हइ, तब वे जान्ये की मी यहोवा आय. 16 "यो उ विलाप गानो हइ, जेखे वे गाये. राष्ट्र-राष्ट्र की बइहोन यो गानो गाये; मिस्र अरु ओकी सब भीड का विषय मे यो ही विलाप गानो गाये, परमेश्वर यहोवा की या वाणी हइ."
मर्यावाला होन को संसार
17 फिर बारावा साल का पहीला महीना का पंद्रावा दिन खे यहोवा को यो वचन मरा पास आयो: 18 हे इन्सान का बच्चा, मिस्र की भीड का लिये हाय-हाय कर, अरु ओखे शक्तिशाली राष्ट्रहोन की बेटीहोन खे वे दुनीयाहोन का साथ कबर मे गड्या हुया का पास अधोलोक मे उतार. 19 उनका से बोल: का तुमखे लगस हइ कि तुम कोइ तरप से जादा सुंदर हइ? तुमखे मर्यावाला होन का पास ही जानु हइ अरु वहा अधर्मीहोन का बिच ही सोनु हइ. 20 "वे तलवार से मर्या हुया का बिच गिर्ये, उनका लिये तलवार ही म्यान से निकाली गइ हइ; येकालिये मिस्र खे ओकी भीड का साथ घीसी खे ली जाओ." 21 शक्तिशाली ओका से अरु ओका सहायकहोन से अधोलोक मे बात कर्ये; वे खतनाहिन दुनीया तलवार से मर्या गया हइ. 22 अपनी सब सभा का साथ अश्शूर भी वहा हइ, ओकी कबर को चारी तरफ हइ; सब का सब तलवार से मार्या गया हइ. 23 ओकी कबर गड्डा का कोना मे बनी हइ, अरु ओकी कबर का चारी तरफ ओकी सभा हइ; वे सब जिन्हे जिन्दा दुनीयाहोन का देश मे आतंक मचायो हइ, अब वे तलवार से मर्या पड्या हइ. 24 "वहा एलाम हइ, अरु ओकी कबर का चारी तरफ ओकी सब भीड हइ; वे सब का सब तलवार से मार्या गया हइ, वे न्यायीपन अधोलोक मे उत्तरी गया हइ; वे जीवनलोक मे डर पैदा करस हइ, पर अब कबर मे अरु गड्या हुया का संग मर्या हुया अरु अपमानीत पड्या हइ." 25 ओकी सब भीड का साथ ओखे मार्या हुया का बिच मे बिछानो मिल्यो हइ, ओकी कबर ओका ही चारी तरफ हइ, वे सब का सब खतनाहिन हइ जो तलवार से मार्या गया हइ; उन्हे जीनवलोक मे डर पैदा कर्यो थो, तरप अब कबर मे अरु गड्या हुया का संग उनका मुडा मे अपमान छायो हुयो हइ; अरु वे मर्या हुया का बिच रख्या गया हइ. 26 वहा सब भीड का साथ मेशेक अरु तूबल हइ, उनका चारी तरफ कबर हइ; वे सब का सब खतनारहीत तलवार से मार्या गया हइ, क्योकि जीवनलोक मे डर पैदा करस हइ. 27 वे गिर्या हुया खतनारहीत का संग वे पड्या नी रेन का जो अपना अपना युध्द का हथियार लिये हये अधोलोक मे उतरी गा हइ, वहा उनकी तलवार उनका माथा का निचे रखी हइ; अरु उनको न्याय का काम उनका हड्डाहोन मे हइ; क्योकि जीवनलोक मे उनका से शूरवीहोन खे डर पैदा करस हइ. 28 येकालिये तु भी खतनारहीत का साथ हुइ खे तलवार से मार्या हुया का संग पड्या रिये. 29 वहा एदोम अरु ओको राजो अरु ओका सब प्रधान हइ, जो शक्तिशाली होन का बावजुत भी वे तलवार से मार्या हुया का संग रख्या हइ; गड्डा मे गया हुया खतनारहीत का संग पड्या हइ. 30 "वहा उत्तर दिशा का सब प्रधान अरु सब सीदोनी भी हइ जो मर्या हुया का संग अधोलोक मे उतरी गया; उन्हे अपनी शक्तिहोन से डर पैदा कर्यो थो, वे अब वे कलंकित हुया अरु तलवार से अरु मर्या हुया का संग वे भी खतनारहीत हुइ खे पड्या हइ, अरु कबर मे अरु गड्या हुया का संग उनका मुडा पर भी अपमान छायो हुयो हइ." 31 "इनखे देखी खे फिरोन ने भी अपनी सब भीड का विषय मे शान्ति पाये, हा फिरोन अरु ओकी सब सेना जो तलवार से मरी गया हइ, प्रभु यहोवा की या वाणी हइ. 32 क्योकि मेने ओका कारण जीवनलोक मे डर पैदा कर्यो थो; येकालिये उ सब भीड का साथ तलवार से अरु मर्या हुया सब खतनारहीत का बिच गाड्यो जाये, प्रभु यहोवा की या वाणी हइ."