यहेज्केल 12

यहुदा को गुलामी मे जान को प्रतीक

1 यहोवा को यो वचन मरा पास आयो. 2 हे इन्सान का बच्चा, तुम विद्रोही दुनियाहोन का बिच मे र्हिया हइ, उनखे आख तो हइ, पन देखे नी, अरु कान तो हइ पन सुने नी, क्योकी वे विद्रोही दुनिया हइ. 3 येकालिये हे इन्सान का बच्चा, दिन खे बधुवा का जसा तयार करी खे उनखे देखते हुये उठी जानु, उनखे देखते हुये अपनी जगा छोडीखे दुसरा जगा खे जानु. यद्यपि वे विद्रोही दुनिया हइ, फिर भी, सभव हइ की वे ध्यान दिये. 4 येकालिये तु दिन का टेम, उनखे देखते मे बधुआइ को समान खे बाहेर ली आनु, तब संजा का टेम, जब वे देखी रा हुये, तब बंधुआइ मे जानआला का जसा निकली जानु. 5 जब वे देखी रा हुये तब दिवाल खे फोडी खे ओमे से अपनो सामान बाहेर ली जानु. 6 उनखे देखते ही समान खे खादा पर रखी खे अंधारा मे उनखे बाहेर निकालनु, अपना मुडा खे झाकी खे रखनु ताकी तु अपना देश खे नी देखी सक्ये, क्योकी मने तुमखे इस्राएल का लिये एक चिन्ह ठहरायो हइ. 7 वा आज्ञा का अनुसार मने वसो ही कर्यो हइ. दिन खे मेने अपनो समान बाहेर ली आयो. तब संजा का टेम, मेने दिवाल खे अपना हाथ से फोडी. अंधारा मे अपनो समान बाहेर ली गयो, अरु उनखे अपना खादा पर उठइ खे दुनियाहोन खे देखते मी चली गयो. 8 सुबह यहोवा को यो वचन मरा पास आयो. 9 हे इन्सान का बच्चा, तोने देख्यो की इस्राएल का कुल ने, उ विद्रोही कुल ने तरा से यो भी नी पुछ्यो कि तु का करी रो हइ? 10 तु उनका से बोल, यो प्रभावसाली वचन यरुशलेम को प्रधान अदमी अरु इस्राएल का सब कुल का विषय मे हइ जेका बिच मे वे र्हेस हइ 11 तु उनका से बोल, मी तुम्हारा लिये एक चिन्ह हइ. "जसो मेने कर्यो हइ, ठिक वसो ही उनका साथ भी कर्यो जाये. ‘वे बंदी का रुप मे बधूवाइ मे चली जाये.’ " 12 उनका बिच मे जो प्रधान हइ, उ अन्धारा मे अपना खादा पर सामान उठायो हुयो निकल्ये; उ अपनो सामान निकालना का लिये दिवाल खे फोड्ये, अरु अपनो मुडो झाक्यो हुयो र्हिये ताकी ओखे देश दिखइ नी दे. 13 मी ओका लिये अपनो जाल बिछायु, अरु उ मरा फंदा मे फसी जाये; मी ओखे कसदीहोन का देश का बेबीलोन मे लीके आयु, पर उ येखे देखी नी सकनको, अरु उ मरी जाये. 14 मी ओका आस-पास का सब दुनियाहोन खे तितर-बितर करी दियु ओका कर्मचारी अरु ओकी सब सेना अरु तलवार खीचीखे उनको पिछो कर्यु. 15 जब मी उनका राष्टहोन मे अरु देशहोन मे तितर-बितर करी दियु, तब वे जान्ये की मी यहोवा आय. 16 पर मी उनका मे से कुछ खे तलवार की मार, अकाल अरु महामारी से बचायु, ताकी वे राष्ट का बिच, जहा वे जाये, वहा वे अपना सब घृणित कामहोन खे मानी लिये, तब वे जान्ये की मी यहोवा आय.

कापते हुये भविष्यद्धक्ता को चिन्ह

17 यहोवा को यो वचन मरा पास पहुच्यो. 18 "हे इन्सान का बच्चा, कापते हुये अपनी रोटी खानु अरु थरथराते अरु डरी के पाणी पिनु. 19 अरु यो देश का दुनियाहोन से यो बोलनु, की प्रभु यहोवा यरुशलेम अरु इस्राएल का देश मे रेहनआला का विषय मे यो बोलनु हइ: वे चिंन्ता का मन से अपनो खानो खाये अरु निराश मन से अपनो पाणी पिये, क्योकी देश मे रेनआला सब दुनियाहोन की हिंसा का कारण देश की सब चिजहोन ली ली जाये. 20 बस्या हुया नगर उजाडी दिया जाये अरु देश उजाड हुइ जाये, तब तुम जान्ये की मी यहोवा आय."

लोकप्रिय कहावत अलोकप्रिय संदेश

21 फिर यहोवा को यो वचन मरा पास आयो. 22 "हे इन्सान का बच्चा, यो का कहावत हइ जो तुम दुनिया इस्राएल का देश बोल्यो जातो थो, ‘दिन बितता जै रा हइ, अरु दर्शन की कोइ बात पुरी नी हुइ’? 23 येकालिये तु उनका से बोल, ‘प्रभु यहोवा यो बोलस, नी यो कहावत को अंत करन आलो हइ, अरु वे फिर कभी इस्राएल मे या कहावत को प्रयोग नी करन का,’ उनका से बोल, वे दिन नजीक हइ जब हर एक दर्शन पुरो हुये. 24 क्योकि इस्राएल का कुल मे नि तो अरु जादा झुठा दर्शन की बात हुये अरु नि कोइ चिकनी-चोपडी बातहोन कभी बोली नि जाये . 25 क्योकि जो भी बोल्ये, मी, यहोवा ही बोल्यु, अरु उ बिना देर को पुरो हुये. क्योकि हे विद्रोही दुनियाहोन, तुम्हारा ही दिनहोन मे, जो कुछ मी बोलुस हइ, ओखे मी पुरो कर्यु, प्रभु यहोवा को यो बोलस हइ." 26 फिर यहोवा को यो वचन मरा पास आयो, 27 "हे इन्सान का बच्चा, इस्राएल का दुन्या बोली रा हइ, ‘जो दर्शन वे देखी रा हइ, उ अब से लिखे बहुत साल बाद पुरो हुये, अरु जो भविष्यवाणी करस हइ, उ अब लिखे बहुत टेम बाद की बात करी रो हइ.’ 28 येकालिये उनखे बोल, प्रभु यहोवा को यो बोलनो हइ: म्हरो बोल्यो गयो कोइ भी वचन खे पुरा होना मे अरु देर नी होन की; जो भी मी बोल्यु , उ पुरो हुये प्रभु यहोवा को योही बोलनो हइ."