1 एक दिन इस्राएल का कुछ दुनियाहोन मरा पास अइखे मरा सामने बठी गया. 2 यहोवा को यो वचन मरा पास आयो. 3 "हे इन्सान का बेटाहोन ये अदमीहोन ने अपना दिल मे मुर्तिहोन खे रखी हइ अरु अपना अधर्म की ठोकर अपना सामने रखी हइ; फिर का वे मरासे कुछ भी पुछी पाये?" 4 येकालिये तु उनका से बात कर अरु उनका से बोल: जब कोइ इस्राएलीहोन अपना दिल मे मुर्तिहोन खे बसास हइ अरु अपना अधर्म की ठोकर अपना सामने रखीखे उ भविष्यवक्ता का पास जास हइ, ओखे मी यहोवा ओकी बडी मुर्ती पुजा की बातहोन खे ध्यान मे रखी खे ओखे उत्तर दियु. 5 मी येकालिये असो कर्यु ताकी मी वे इस्राएली दुनियाहोन का दिल खे फिर से अपना तरफ करी सक्यु, जो अपनी मुर्तिहोन का लिये मेखे छोडी दियो हइ. 6 "येकालिये इस्राएल का दुनियाहोन से बोल, प्रभु यहोवा यो बोलस हइ: पच्छाताप कर! अपनी मुर्तिहोन से दुर हुइ खे अपना सब घृणित कामहोन खे छोडी दे." 7 क्योकि इस्राएल का कुल मे से अरु उनका बिच र्हेनवालाहोन परदेशीहोन मे से भी कोइ भी हुये, अरु अपना आप खे खुद से अलग करी लेस हइ अरु अपना दिल मे मुर्तिहोन खे बसास हइ अरु अपनो अधर्म की ठोकर अपना सामने रखस हइ, अरु तब मरा से अपनी कोइ बात पुछन का लिये भविष्यवक्ता का पास जास हइ, ते मी यहोवा खुद ओखे उत्तर दियु. 8 मी उ अदमी से विमुख हुइ जायु. अरु ओखे दुसरा का लिये एक चेतावनी अरु एक कहनात बनइ दियु, मी ओखे अपना दुनियाहोन का बिच से हटइ दियु, तब तुम जान्ये की मी यहोवा आय. 9 अरु अगर भविष्यवक्ता ने धोको खइ खे कोइ वचन बोल्यो हइ, ते जानी लेनु की मी यहोवा ने उ भविष्यवक्ता खे धोको दियो हइ. अरु मी अपनो हाथ ओका विरुध्द बडैखे ओखे अपनी प्रजा से नष्ट कर्यु. 10 उनखे उनको अपराध को दंड मिल्ये अरु भविष्यवक्ता भी ओत्तोही दोषी ठहर्ये जेत्तो की उ जो ओका से सलाह लेस हइ. 11 तब इस्राएल का दुनिया मरा पिछे चलनो नि छोड्ये, अरु नी वे फिर कभी अपना सब पापहोन का द्वारा अपना आपखे दुषित कर्ये. वे मरा दुनिया हुये, अरु मी उनको परमेश्वर हुयु, प्रभु यहोवा को यो वचन हइ.

12 तब यहोवा को यो वचन मरा पास आयो. 13 हे इन्सान का बच्चा, अगर कोइ देश विश्वासघात करिखे मरा विरुध्द पाप करस हइ अरु मी उनका विरुध्द अपनो हाथ बडैइ खे ओको खानो पिनो बंद करी देउस हइ अरु ओका पर अकाल भेजीखे ओका दुनियाहोन खे अरु जनवरहोन खे मारी डालुस हइ. 14 अरु चाहे ये तिन लोग नूह, दानिएल अरु अय्यूब भी उनका बिच होता, ते वे अपनो अधर्मी पन का कारण सिर्फ अपना आपखे ही बचइ पाता, प्रभु यहोवा को यो वचन हइ. 15 अगर मी उ देश मे जंगली जनवरहोन खे भेज्यु अरु वे ओखे खुदी देस हइ अरु उ देश उजडी जाये ताकी जंगली जनवरहोन का कारण उ देश मे से हुइ खे कोइ नी जानका 16 ते चाह्ये ओमे वे तिन अदमी हुये, तेभी प्रभु यहोवा को यो वचन हइ, कि मी अपना जिवन की कसम खयखे बोलुस हइ, चाहे वे तिन अदमीहोन भी वहा होता, नी वे बेटाहोन खे अरु नी बेटीहोन खे बचइ सक्ये, वे अखेला ही बचता पर देश उजडी जातो. 17 अगर मी उ देश पर तलवार उठउ अरु यो बोलु, पुरा देश मे तलवार चल्ये, अरु मी उ देश का दुनियाहोन अरु उनका जनवरहोन खे मारी डाल्यु. 18 ते मी अपना जिवन की कसम खयखे बोलुस हइ, प्रभु यहोवा को यो वचन हइ, चाहे अगर ये तीन जन भी वहा होता, नि ते वे बेटाहोन खे अरु नि बेटीहोन खे बचय सक्ये. वे अखेला ही र्हि जाता 19 अगर मी उ देश मे महामारी भेज्यु अरु उ देश का दुनियाहोन अरु उनका जनवरहोन खे मारतो हुयो खुन खे बोहय खे अपनी गुस्सा प्रकट कर्यु. 20 ते मी अपना जिवन की कसम खयखे बोलुस हइ, प्रभु यहोवा को यो वचन हइ, चाहे अगर नूह, दानिएल अरु अय्यूब भी वहा होता, ते नि वे अपना बेटाहोन खे अरु नि बेटीहोन खे बचइ सक्ये. वे अपना अधर्मीपन का कारन खुद खे बचैइ पाता. 21 "क्योकि प्रभु यहोवा बोलस हइ: मी यरुशलेम पर चार प्रकार को दंड लायु, अर्थात तलवार, अकाल, जगली जनवर, अरु महामारी, जेमेसे इन्सान अरु जनवर सब खतम हुइ जाये." 22 फिर भी कुछ दुनिया जिन्दा र्हिये बेटा-बेटीहोन बच्ये जो वहा से निकालीखे तुमारा पास लाये. वे तुम्हारा पास आये, अरु जब तुम उनको आचरन अरु काम खे देख्ये, ते तुम्हखे वा विपत्ति का बारे मे शान्ति मिल्ये जेखे मेने यरुशलेम पर लाया हइ 23 जब तुम उनको आचरन अरु काम देख्ये, तब तुम जान्ये कि येरुशलेम मे मेने जो कुछ कर्यो हइ, उ बिना कारण नी कर्यो हइ, प्रभु यहोवा की या वाणी हइ.