यहेज्केल 22

यरुशलेम नगर को अपराध

1 यहोवा को यो वचन मरा पास आयो: 2 हे इन्सान का बच्चा, का तुम यो खुन बोहान आलो शहर को न्याय नि करे? तु उनको न्याय नि कर्ये? ओखे ओका सब गंदा कामहोन बतइ दे. 3 अरु बोल: प्रभु यहोवा यो बोलस हइ, हे शहर तु अपना बिच हत्या करस हइ जेकासे तरो टेम आये, अरु अपनी ही हानी करनो अरु अशुध्द होन का लिये मुर्तीहोन बनास हइ. 4 जो हत्या तोने करी हइ, ओमेसे तु दोषी ठहरी हइ, अरु जो मुर्तीहोन तोने बनइ हइ, उनका कारण तु अशुध्द हुइ गइ हइ; तोने अपना आखरी का दिन खे नजीक करी लियो, अरु तरो टेम पुरो हुइ गयो. यो कारण मेने तोखे का दुनीयाहोन का तरफ से नाम रखन को, अरु सब देश मे हसन को कारण बनइ दियो हइ. 5 हे बदनाम शहर, तु उपद्रव से भरी हइ. वे दुनीया, जो तरा पास हइ वे जो तरा से दुर हइ, वे सब के सब तरी हंसी उडाये. 6 देख, इस्राएल के राजकुमार दुनीया अपना-अपना बल का अनुसार तरा मे हत्या करन आला हुया हइ. 7 तरा मे रखीखे उन्हे अपना माय-बाप से अपमान कर्यो हइ; तरा मे र्हिखे उन्हे विदेशिहोन खे सतायो हइ अरु अनाथ अरु विधवा का साथ गलत व्यवहार कर्यो हइ. 8 तुमने मरी पवित्र वस्तु खे तुच्छ समझ्यो अरु मरा आराम दिनहोन खे अशुध्द कर्या हइ. 9 तरा मे निंदा करनआला हइ, जो हत्या करन का लिये दुसरा पर दोस लगास हइ, तरा मे वे दुनीया हइ जो पहाड का पुजा की जगह पर खास हइ, अरु गंदो काम करस हइ. 10 तरा मे वे दुनीया हइ, जो अपना बाप का बिछाना को अपमान करस हइ, तरा मे असा दुनीया हइ जो बइहोन से उनका महिना का दिन मे गंदा काम करन का लिये विवश करस हइ, 11 तरा मे र्हिखे वे पडोसी बइ का साथ घिनौनो काम कर्यो हइ,अरु कोइ ने अपनी बहु का सात गंदो काम कर्यो हइ, अरु कोइ ने अपनी बहीन का सात अरु बेटी का सात गंदो काम कर्यो हइ. 12 तरा मे असा दुनीयाहोन हइ जो हत्या करन का लिये रिसवत लेस हइ, तोने ब्याज अरु गरीबहोन से लाभ कमास हइ, अरु अपना पडोसीहोन खे पीसी-पीसीखे अन्याय से लाभ उठायो हइ, अरु मेखे तोने भुलइ दियो हइ, प्रभु यहोवा की या वाणी हइ. 13 येकालिये जब तक जो लाभ तोने अन्याय से उठायो हइ, अरु अपना बिच हत्या करी हइ, ओका पर मी अपना दोइ हाथ एक साथ माऱ्यु. 14 उ दिन खे तुम्हारा मे साहस र्हिये या तुम्हारा हाथ मजबूत हुये, जब मी तुम्हारो न्याय कर्यु? मी, यहोवा ने बोल्यो हइ अरु मी असो ही कर्यु. 15 मी तरा दुनीयाहोन खे जात-जात मे तितर-बितर करी दियु अरु अलग-अलग देशहोन मे फैलइ दियु; अरु मी तुम्हारी अशुध्दता खे खतम करी दियु. 16 जब तु का दुनीयाहोन का नजर मे अशुध्द हुइ जाये, तब तुम जान्ये कि मी यहोवा आय.

परमेश्वर कि गुस्सा कि अंगार

17 तब यहोवा को यो वचन मरा पास आयो. 18 हे इन्सान का बच्चा, इस्राएल का दुनीया मरा लिये धातु को मैल बनी गया हइ, वे सब भट्टी मे छोड्या गया तांबो, टिन, लोखड अरु काच हइ, वे चांदी का मैल हइ. 19 येकालिये प्रभु यहोवा यो बोलस हइ, क्योकि तुम सब धातु का मैल हुइ गया हइ, येकालिये मी तुमखे यरुशलेम का अंदर जमा कर्यु. 20 जसो चांदी, तांबो, लोखड, काच, अरु टिन खे भट्टी मे जमा करीखे भडकती अंगार मे पिघाल्यो जास हइ, ओसो ही मी तुमखे अपना क्रोध अरु कोप मे हुइ खे अंदर डाली खे पिघलायु. 21 मी तुमखे जमा कर्यु अरु तुम्हारा पर अपनो भडक्यो कोप मे अइखे अंगार से फुक्यु, अरु तुम ओका अंदर पिघली जाये. 22 जसी चांदी भट्टी मे पिघाली जास हइ ओसो ही तुम ओका अंदर पिघली जाये, अरु तब तुम जान्ये की मी, यहोवा ने तुम्हारा पर अपनो कोप भडकायो हइ.

इस्राएल का अगुवा को पाप

23 यहोवा को यो वचन मरा पास आयो: 24 हे इन्सान का बच्चा, उ देश से बोल, तु एक असो देश हइ, जो अशुध्द नी हुयो , या जेका पर कोप का दिन बारिस नी हुइ हइ, 25 जसो गरजतो शेर अपना शिकार खे फाडी डालस हइ, वे दुन्याहोन खे मारी डालस हइ अरु उनको खजानो अरु बहुमुल्य चिज खे लि लेस हइ अरु उनका अंदर ही भोत सी बइहोन खे विधवा बनय डालस हइ. 26 उनसे याजकहोन मरी व्यवस्था को उल्लघंन करस हइ अरु मरा पवित्र चिजहोन खे अपवित्र करस हइ; वे पवित्र अरु सामान्य चिजहोन का बिच कोइ फर्क नी करे; वे सिखास हइ की शुध्द अरु अशुध्द मे कोइ फर्क नी हइ; वे मरा आराम दिन खे मानना से इनकार करस हइ, जेका से मी उनका बिच अपवित्र ठैरुस हइ. 27 उनको प्रधान लाडग्योहोन का जसो शिकार पकडस हइ; वे खुन बोहास हइ अरु अन्याय करन का लिये दुनीयाहोन खे मारी डालस हइ. 28 ओका भविष्यबतान आलाहोन झुठो दर्शन अरु शुकुन का द्वारा उनका लिये वे कामहोन पर लिप-छाप करस हइ, वे बोलस हइ, प्रभु यहोवा यो बोलस हइ, 29 देश का साधारण दुनीया भी अत्याचार करस हइ अरु परायो धन छिनस हइ, वे गोर गरिब खे पिसस हइ अरु न्याय कि चिन्ता छोडीखे परदेशी पर अत्याचार करस हइ. 30 मी उनका बिच असो अदमी खे ढुडी रो थो, जो दिवाल खे बनाये अरु जहा दिवार गिरी गइ वहा खडो हुये सके, जब मरी गुस्सा देश के खतम करना पर हुये ते ओकी रक्षा करी सके, पर असो कोय नी मिल्यो. 31 यो कारण मने उनका पर अपनो कोप भडकायो अरु अपनी भयंकर क्रोध से जलयखे खतम करी दियो हइ; मेने उनकी चाल उनका ही माथा पर डाली दियु , प्रभु यहोवा कि या वाणी हइ.