गोग कि हार
1 फिर हे इन्सान का बच्चा, गोग का विरुध्द भविष्यवाणी करी खे यो बोल, हे गोग, हे रोश, मेशेक अरु तूबल का प्रधान, परमेश्वर यहोवा यो बोलस हइ: मी तरा विरुध्द हइ. 2 मी तोखे घुमइ खे ली आयु, अरु उत्तर दिशा का दूर दूर देशहोन से लायु, अरु इस्राएल का पहाडहोन पर चडायु. 3 वहा मी तरा डाखोऱ्या हाथ मे धनुष, अरु तरा तिर खे जवना हाथ से गिरइ दियु. 4 तू अपना सब दलहोन अरु अपना सात की सब राष्ट्रहोन का साथ इस्राएल का पहाडहोन पर मारी डाल्यो जाये; मी तोखे अलग-अलग प्रकार का मास खानवाला पक्षीहोन अरु जगली जनवरहोन को खानो बनइ दियु. 5 तू खेत मे गिर्ये, क्योकि मेने ही असो बोल्यो हइ, परमेश्वर यहोवा की या वाणी हइ. 6 मी मागोग मे अरु टापु पर सुरक्षित ऱ्हेनवाला का बिच अंगार लगायु; अरु वे जानी लीये की मी यहोवा आय. 7 मी अपनी प्रजा इस्राएल का बीच अपनो नाम प्रकट कर्ये; अरु अपनो पवित्र नाम फिर नी अपवित्र नी होन दियु; तब राष्ट्र-राष्ट्र का दुनीयाहोन भी जानी लिये मी यहोवा, इस्राएल को पवित्र आय. 8 या घटना होनआली हइ अरु वा जो आये, परमेश्वर यहोवा की या वाणी हइ. यो उ दिन हइ जेकी चर्चा मेने करी हइ. 9 तब इस्राएल का नगरहोन का ऱ्हेनवाला निकल्ये अरु हथियारहोन मे अंगार लगइ खे जलइ दिये, ढाल, भाला, धनुष, अरु तीर, लकडी, भरची, सब खे वे सात साल तक जलाता रिये. 10 येका कारण वे मैदान मे लकडी नी बीननका, नी जंगल मे काट्ये, क्योकि वे हथियाहोन खे ही जलाता रिये, वे अपना लुटनवालाहोन खे ही लुट्ये, अरु अपना छीननवालाहोन से छिन्ये, परमेश्वर यहोवा कि या वाणी हइ.
गोग को गाड्यो जानु
11 उ दिन मी गोग का इस्राएल मे समुदर कि पुर्व का तरप जानवाला कि खइहोन मे मरगट दियु वहा यात्रीहोन के रस्ता रोखी लिये क्युकी गोग अरू ओकी सब गरदी के वही मट्टी दि जाये येकालिये ओके हामोन गोग कि घाट बोली जाये. 12 इस्राएल को कुल ओखे सात महीना तक मट्टी देतो रिये ताकी अपना देश खे शुध्द कर्ये. 13 देश का सब दुनीया मिलीखे ओखे मट्टी दिये; अरु जो टेम मरी महिमा हुये, उ टेम उनको भी नाम बडो हुये, परमेश्वर यहोवा कि यह वाणी हइ. 14 तब वे इन्सानहोन खे वहा काम नियुक्त दिये, जो हमेशा उय काम मे लग्या रिये, अर्थात देश मे घुमी-घामीखे आन जानवालाहोन का संग हुइ खे देश खे शुध्द करन का लिये उनखे जो जमीन का उपर पडी हुइ, मट्टी दिये; अरु सात महीना का बाद भी वे ढुढी ढुढी खे यो काम करता रिये. 15 देश मे आन जानवालाहोन मे से जब कोइ इन्सान की हड्डी देख्ये, तब ओका पास एक चिन्ह खडो कर्ये, यो उ टेम तक बन्यो ऱ्हिये जब तक मट्टी देनवाला ओखे गोग की घाट मे गाडी नी देनका 16 वहा का नगर को नाम भी हमोना हइ. यो देश शुध्द कर्यो जाये. 17 फिर हे इन्सान का बच्चा, परमेश्वर यहोवा यो बोलस हइ: अलग अलग प्रकार का सब पक्षीहोन अरु सब जगली जनवरहोन खे आज्ञा दे, जमा हुइखे आओ, एक जगा पर जमा हुइ जाओ. या बली जो मी तुम्हारा लिये तयार करी रो हइ. ओका लिये आओ, ओखे खाओ. इस्राएल का पहाडहोन पर एक बडो बलिदान हुये. आओ, मास खाओ अरु खून पिओ. 18 तुम शक्तिशाली सैनिकहोन को आग की मास खाये. तुम संसार का प्रधानहोन को खुन पीये. वे बाशान का मेडा, बकरीका बच्चा, बकरा अरु ताजा बैलहोन का जसा हुये. 19 तुम जेत्ती चाहे ओत्ती चर्बी खइ सकस हइ अरु तुम खुन तब तक पी सकस हइ जब तक तुम्हारो पेट नी भरी जाये. तुम मरी बली से खाये अरु पिये जेखे मेने तुम्हारा लिये मार्या हइ. 20 तुम मरी मेज पर घोडा, सवार, शुरवीरहोन, अरु सब प्रकार का योध्दहोन से मगन हुये, प्रभु यहोवा ने यो बोल्यो हइ.
इस्राएल कि नइ स्थापना
21 परमेश्वर ने बोल्यो, "मी दुसरा राज्यहोन खे दिखायु की मेने का कर्यो हइ. वे राज्य म्हरो सम्मान करन लगी जाये! वे मरी वा शक्ति देख्ये जो मेने दुश्मन का विअरुध्द उपयोग करी हइ. 22 उ दिन का बाद इस्राएल को कुल जान्ये की मी उनको परमेश्वर आय. 23 राष्टर्-राष्ट्र का दुनिया भी जानी लिये कि इस्राएल को कुल अपना न्याय का कारण गुलामी मे गयो थो; क्युकी उन्हे मरा से विश्वासघात कऱ्यो कि मेने अपना मुंडो उनका से मोडी लियो अरु उनके उनका बैरीहोन का कुल मे करी दियो, अरु वे सब तलवार से माऱ्या गया. 24 मेने उनकी अशुध्दता अरु गुनाहोन ही का अनुसार उनका से बर्ताव करीके उनका से अपनो मुडो मोडी लियो थो." 25 येकालिये परमेश्वर यहोवा यो बोलस हइ: अब मी याकुब का परिवार खे बन्धुवाइ से निकाल्यु. मेने पुरा इस्राएल का परिवार पर दया करी हइ. अरु अपना पवित्र नाम का लिये मेके जलन हुये. 26 दुनिया तब ओका सब विश्वासघात का कारन जो उन्हे मरा खिलाप कऱ्यो हइ वे लज्जित हुये, अपनी सरम अरू मरा खिलाप दुश्मनी के भुली जाये, वे अपना देश सुरक्षा का सात ऱ्हिये, कोय भी उनके नी डराये. 27 जब मी उनके दुसरा देशहोन से वापस लायु. मी उनखे उनका दुश्मन का देश से जमा कर्यु. तब बहोत सारा राज्य समज्ये की मी येत्तो पवित्र हइ. 28 तब वे जानी लिये कि यहोवा हमारो परमेश्वर हइ, क्युकी मेने उनके राष्ट्र-राष्ट्र मे गुलाम करीके फिर उनका निज देश मे जमा कऱ्या हइ, मी उनका मे से कोय के फिर परदेश मे नी छोडनको. 29 अरु ओका बाद, मी फिर अपना दुनीयाहोन से दुर नी होनको, "मी इस्राएल का कुल मे अपनी आत्मा उतार्यु." परमेश्वर यहोवा की या वाणी थी.