यहेज्केल 31

मिस्र की तुलना देवदार का झाड से

1 ग्याराह साल का तिसरा महीना का पहला दिन खे यहोवा को यो वचन मरा पास आयो: 2 "हे इन्सान का बच्चा, मिस्र को राजा फिरोन अरु ओका दुनिया से बोल अपनी बडइ मे तू कोका जसो हइ." 3 देख, अश्शूर तो लबानोन को एक देवदार झाड थो जेकी अच्छी-अच्छी डगानहोन, गहेरी छाय देस अरु बडी उच्ची थी; अरु ओकी चोटी बद्दल तक पहुचती थी. 4 पाणी ने ओखे बडायो, अरु गहेरो पाणी का कारण उ उच्चो हुयो, जेका से नद्दीहोन ओकी जगह से चारी तरप बोवाती थी; अरु ओकी नालिहोन निकली खे सब झाडहोन का पास पहुचती थी. 5 यो कारण उ येत्तो उच्चो हुइ गो की मैदान का सब झाडहोन से जादा हुइ गइ; ओकी डगानहोन बहोत हुइ, अरु ओकी डगानहोन बहोत लम्बी हुइ गइ, क्योकि जब वे निकली तब उनखे पाणी बहोत मिल्यो. 6 आकाश का पक्षी, ओकी डगानहोन मे घर बनास हइ. ओकी छाय मे जंगल का जनवर होन अपना बच्चाहोन का साथ बठस हइ. संसार की जातहोन भी ओकी छाय मे रेस हइ. 7 उ उच्चो येतो हइ की देखना मे बहोत अच्छो हइ. ओकी लम्बी-लम्बी डगानहोन सुन्दर हइ. ओकी जडहोन जमीन का बहोत अंदर तक गइ हइ, जहा बहोत मात्रा मे पाणी हइ. 8 यो देवदार झाड का तुलना मे परमेश्वर को बगीचा का आगे देवदार जाड कुछ भी नी हइ; अरु नी सनौबर ओकी डगानहोन का समान भी नी था, अरु नी अर्मोन झाड ओका डगान का जसो थो; परमेश्वर को बगीचा का भी झाड सुन्दरता मे ओका बराबर नी था. 9 मे ने ओखे डगानहोन बहोत सुन्दर बनाया था, यहा तक कि अदन का सब झाड जो परमेश्वर का बगीचा मे था, इकासे जलता था. 10 "यो कारण परमेश्वर यहोवा ने यो बोल्यो हइ: ओकी उच्चइ जो बडी गइ हइ, अरु ओकी चोटी जो बद्दलहोन तक पहुची हइ, अरु अपनी उच्चइ का कारण ओको मन घमण्ड से भरी गो." 11 येकालिये जातहोन मे जो ताकतवर हइ, मी ओका ही हाथ ओखे करी दियु, अरु उ सच्ची ओका से बुरो व्यवहार कर्ये. ओका गंदा कामहोन का कारण मे ने ओखे निकाली देयो हइ. 12 परदेशी, जो राष्ट्रहोन मे भयानक दुनीया हइ, वे ओखे काटीखे छोडी दिये, ओकी डगानहोन पहाडहोन पर, अरु सब खइ मे गिराया जाये,अरु ओकी सब डगानहोन देश का सब नालाहोन मे टुट्या पड्या ऱ्हिये, अरु जात-जात का सब दुनीया ओकी छाय खे छोडी खे चली जाये. 13 उ गिर्यो हुयो झाड पर आकाश का सब चिडी ऱ्हेस हइ, अरु ओकी डगानहोन का उपर मैदान का सब जीवजन्तु ऱ्हेन लग्या. 14 यो येकालिये हुयो हइ कि जल का पास का सब झाडहोन मे से कोइ अपनी उच्चइ नी बडानु, नी अपनी चोटी खे बद्दलहोन तक पहुचानु, अरु ओमे से जेत्ता खे पाणी मिलस हइ वे बडी गया हइ अरु उच्चा होना का कारण माथो नी उठानु, क्योकि वे भी सब का सब कबर मे गया हुया इन्सान का जसा मौत खे वश मे करी खे अधोलोक मे डाल्या जाये. 15 "परमेश्वर यहोवा यो बोलस हइ: जो दिन उ अधोलोक मे उतरी गया, उ दिन मेने विलाप करायो अरु गहेरा समुद्र खे झाकी दियो, अरु नद्दीहोन को पाणी रुकी गयो; अरु ओका कारण मेने लबानोन पर उदासी छइ गइ, अरु मैदान का सब झाड मुरझय गया," 16 जब मी ओके कबर मे जानवालो लाश का जसो ओके अधोलोक मे फेकी दियु. तब ओका गिरे धमाका से सब राष्ट्र को दिल काप उठे. अदन का बगीचा का झाड अरु लबानोन का सब से अच्छा झाड, जिनखे भरपूर पाणी मिलस हइ, अधोलोक मे शान्ति की सास लिये. 17 वे भी ओका संग तलवार से मार्या हुया का पास अधोलोक मे उतरी गया. अर्थात वे जो ओका हाथ था, अरु राष्ट्र-राष्ट्र का बिच ओकी छाय मे ऱ्हेता था. 18 "येकालिये महिमा अरु बडाइ का विषय मे अदन का झाडहोन मे से तु कोका जसो हइ? तु तो अदन का अरु झाडहोन का साथ अधोलोक मे उतार्यो जाये, अरु खतनाहीन दुनीयाहोन का बीच तलवार से मार्या हुया का संग पड्यो ऱ्हिये. फिरोन अपनी सब भीड-भाड का साथ यो ही हुये, परमेश्वर यहोवा की या वाणी हइ."