यहेज्केल 35

एदोम खे परमेश्वर को दण्ड

1 यहोवा को यो वचन मरा पास आयो: 2 हे इन्सान का बच्चा, अपनो मुडो सेइर पहाड का तरफ करीखे ओका विरुध्द भविष्यवाणी कर 3 अरु ओका से बोल, परमेश्वर यहोवा यो बोलस हइ: हे सेइर पहाड, मी तरा विरुध्द हइ; अरु अपना हाथ तरा विरुध्द बढइखे तोखे उजाड करी दियु. 4 मी तरा नगरहोन खे खण्डर करी दियु, अरु तु उजाड हुइ जाये; तब तु जानी लिये की मी यहोवा आय. 5 क्योकि तू इस्राएलीहोन से युग-युग की दुश्मनी रखतो थो, अरु उनका दु:ख का टेम जब उनको पाप को दण्ड को टेम आये, तब उनखे तलवार से मार्या जान खे दि दिया. 6 येकालिये परमेश्वर यहोवा की या वाणी हइ: मरा जीवन की कसम खइ खे बोलुस हइ की तरी हत्या करन का लिये तोखे तयार कर्यु अरु खुन तरो पिछो कर्ये; क्योकि तोखे तो खुन से गुस्सा नी हइ, येकालिये खुन तरो पिछो कर्ये. 7 या रिती से मी सेइर पहाड खे उजाड ही उजाड करी दियु, अरु जो ओमे आस हइ, मी ओखे खतम कर्यु. 8 मी ओका पहाड खे मार्या हुया से भरी देयु; जो तलवार से मार्या जाये, वे तुम्हारी पहाडहोन पर अरु तुम्हारी घाटहोन मे अरु नालाहोन मे तलवार से मार्या हुया गीर्ये. 9 मी तोखे हमेशा हमेशा का लिये उजाड करी दियु, अरु तरा नगरहोन फिर नी बसनका. तब तु जानी लिये की मी यहोवा आय. 10 क्योकि तोने बोल्यो हइ, ये दो राष्ट्रहोन अरु ये दो देश मरा हुये; अरु मी ही उनको स्वामी हुइ जायु, मी यहोवा वहा थो. 11 यो कारण, परमेश्वर यहोवा की या वाणी हइ, मरा जीवन की कसम खइ खे बोलुस, तरा कोप का अनुसार, अरु जो गुस्सा तो ने उनका पर अपना नफरत का कारण करी हइ, ओका ही अनुसार मी तरा साथ बर्ताव कर्यु, अरु तब मी तरो न्याय कर्यु, तब मी तुम्हारा मे खुद खे प्रकट कर्यु. 12 तू जान्ये कि मी यहोवा ने वे सभ तुच्छ बातहोन सुनी हइ, जो तोने इस्राएल का पहाडहोन का विषय मे बोल्यो हइ, वे तो उजडी गया हइ, वे हमखे ही दिया गया हइ कि हम उनखे उजाडी डाले. 13 तुम ने अपना मुडा से मरा विरुध्द बडइ करी हइ, अरु मरा विरुध्द बहोत बातहोन बोली हइ; अरु वे सब मेने सुनी हइ. 14 परमेश्वर यहोवा यो बोलस हइ: जब पृथ्वी भर मे खुशी हुये, तब मी तुमखे उजाडी दियु. 15 तु इस्राएल का कुल का नजीक का भाग को उजडी जाना का कारण खुश हुयो, येकालिये मी भी तरा से वसो ही कर्यु; हे सेइर पहाड, हे एदोम का सब देश, तू उजडी जाये. तब वे जानी लिये की मी यहोवा आय.