1 Fakkeenni Solomoonii

ka asii gad jiru:

ilmi qaroon abbaa ifii gammachiisa;

ilmi gowwaan haadha ifii gaddisiisa.

2 Qabeenni karaa hin malleen dhaggame

bu'aa hin qabu;

balchummaan ammoo

du'a jalaa nama baatti.

3 Mootiin Waan Maraa worri balchaan

akka beelotanu hin godhu;

worra hamaa ammoo waan halchane

akka isaan hin dhagganne hin godha.

4 Harki boosenni nama hiyyoonsa;

harki jabaatee huju ammoo nama duroonsa.

5 Worri yenna'aan midhaan galfatu qaro'o;

worri yennaa midhaan galfatiisaa rafu ammoo

hin salphata.

6 Eebbi mataa balchootaa irra jira;

worri hunnaan nama irratti ka'u dubbii dansa'aan

hunnaan nama irratti ka'iisa ifii gollatan.

7 Yaadannoon nama balcha'aa eebbaaf hin teeti;

maqaan nama hama'aa ammoo hin dedhama.

8 Nami gadhaa ifii keessatti qaro'oo seera fudhata;

nami gowwaan dubbattichi ammoo

gara badi'ii deema.

9 Nami haqaan ideemu nageyaan le'a;

nami karaa micciiramaa gula deemu ammoo

hin saaxilama.

10 Nami ilaan qiphifatu rakkinna fida;

nami gowwaan dubbattichi ammoo

gara badi'ii deema.

11 Afaan nama balcha'aa madda jiru'uu ti;

worri hunnaan nama irratti ka'u ammoo

dubbii dansa'aan

hunnaan nama irratti ka'iisa ifii gollatan.

12 Jibbi lola kaasa;

jaalalli ammoo yakkaa mara golla.

13 Qarummaan afaan qaroole'ee irra jirti;

adabbiin ammoo dudda

gowwoole'ee irra jirti.

14 Qarooleen beekkumsa tuulatti;

dubbiin gowwa'aa ammoo badii fiddi.

15 Qabeenni dureeyyi'iif qachaa dalleya dhaka'aa qabu;

hiyyummaan ammoo badii hiyyeeyyi'ii ti.

16 Gatiin eloo balcha'aa jiru'u;

bu'aan nama hama'aa adabbi'i.

17 Nami gorsa fudhatu karaa jiru'uu namatti mudhisa;

nami xixicha tuffatu ammoo

karaa irraa nama milissa.

18 Nami jibba ifii dhoffatu dharaamessa;

nami hamii odeessu gowwa'a.

19 Jechoota bacaa keessaa,

cubbuun hin dhabantu;

nami arraba ifii eegatu ammoo qaro'o.

20 Dubbiin nama balcha'aa akka meetii qullu'uu ti;

yaadi nama hama'aa ammoo gatii hin qabu.

21 Afaan nama balcha'aa nama hedduu areera;

worri gowwaan ammoo

qalbii dhabiisaan du'a.

22 Eebbi Mootii Waan Maraa durummaa kenna;

inni rakkinna isi'itti hin dabalu.

23 Nami gowwaan waan hantuu hujiisatti gammada;

nami hubantii qabu ammoo

qarumma'atti gammada.

24 Nama hamaa waan inni guddoo sodaatutti itti dhufa;

nama balchaa ammoo

waan inni guddoo halchutti isaaf kennama.

25 Hobonbolattiin yennaa kaatu,

worra hamaa haxoottee dabarti;

worri balchaan ammoo

haga bara baraa

jabaatee dhaabbata.

26 Wonni dhangaggowu ilkaan,

aarrille ila akkuma rakkisu,

nami booseyille

nama isa ergatu rakkisa.

27 Mootii Waan Maraa sodaatiis jiruu dheeressa;

woggaan nama hama'aa ammoo gabaaddu'u.

28 Addiin worra balcha'aa gammada;

addiin worra hama'aa bu'aa hin qaddu.

29 Karaan Mootii Waan Maraa

worra balcha'aaf gollaa jaddu'u;

worra hantuu hujuuf ammoo badi'i.

30 Worri balchaan ijjumaa hin munyuuqu;

worri hamaan ammoo lafa irratti hin hafu.

31 Afaan worra balcha'aa qarummaa dubbata;

arrabi dubbii micciiru ammoo hin murama.

32 Afaan worra balcha'aa dubbii toltu beeka;

afaan worra hama'aa ammoo micciiriisa qofa beeka.