1 Mootiin Waan Maraa madaala sobaa jibba;

dhakaa madaalaa ka sirrii te'etti gammada.

2 Koorri yennaa dhufu,

salphinni hin dhufa;

gad ifi qabiisaan ammoo qarummaan dhutti.

3 Worri qajeelaan komii dhabiisaan qajeelfaman;

worri hin addatanne ammoo

maltumma'aan badan.

4 Guyyaa mura'aa durummaan bu'aa hin qaddu;

balchummaan ammoo du'a irraa si hamburti.

5 Worra komii hin qanne

balachummaan karaa isaanii qajeelchiti;

worri hamaan ammoo

hammeennuma ifiitiin jiga.

6 Nama qajeelaa

balchumma'atti isa baasa;

worri hin addatanne ammoo

halchuma ifii hantu'uun qabaman.

7 Nami hamaan yennaa du'u,

addiin isaalle hin baddi;

durummaan inni addatu

womaa isaaf hin baatu.

8 Nami balchaan rakkoo jalaa hin baya;

nami hamaan ammoo

addee isaa rakkinnatti hin gala.

9 Nami hamaan dubbii afaan ifiitiin nama balleessa;

nami balchaan beekkumsa ifiitiin baya.

10 Worra balcha'aaf yennaa milkoottu,

kolbaan qacha'aa hin firinxiixi.

Worri hamaan yennaa badu,

isaan hin ilillisan.

11 Eebba worra balcha'aatiin qachaan tokko guddata;

dubbii afaan worra hama'aatiin ammoo hin bada.

12 Nami qalbii hin qanne nama tuffata;

nami qalbii qabu ammoo cadhi jedha.

13 Nami hamatu dhossaa eegee hin dande'u;

nami addatamaan ammoo dhossaa eega.

14 Gorsitooti yoo hin jiraatin

mootummaan takka hin jiddi;

gorsitooti hedduun yoo jiraatte ammoo

nageyaan jiraatti.

15 Nami alaga'aaf wobii te'u hin rakkata;

nami wobii te'iisa jibbu ammoo

nageyaan hin jiraata.

16 Dubartiin arjaan ulfinna hin dhaggatti;

worri hunnaan nama irratti ka'u ammoo

durummaa qofa dhaggata.

17 Gadhi-laafessi

ifumaaf bu'aa dhaggatta;

gadhi-jabeessi ammoo

ifuma miidha.

18 Nami hamaan bu'aa isa sobu dhaggata;

nami balchumma'aan huju ammoo

gatii addachiittuu dhaggata.

19 Nami dhugumaan balchaa te'e jiru'uun hin le'a;

nami waan hantuu ari'u ammoo hin du'a.

20 Mootiin Waan Maraa

worra yaada micciirama'aa jibba;

worra komii hin qannetti ammoo

hin gammada.

21 Dhugumaan nami hamaan

adoo hin adabamin hin hafu;

worri balchaan ammoo

adabbii jalaa hin baya.

22 Dubartiin shaggittiin qalbii hin qanne,

akka qubee worqi'ii

ta funnaan booyye'ee irra jirtuu ti.

23 Halchaan nama balcha'aa

waan dansaa qofaan muummotti;

halchaan nama hama'aa ammoo

mufi'iin muummotti.

24 Nami gariin toluma karra ifii namaaf kenna;

ammoo irra caalaa duroomaa deema;

nami gariin akka malee donnooma;

ammoo hiyyoommataatuma deema.

25 Nami arjaan hin durooma;

nami dheebuu nama baasulle

ifille'eef dheebuu hin baya.

26 Nama midhaan kuufatee tursu

kolbaan hin abaarti;

nami midhaan baasee

gurguratu ammoo

eebba dhaggata.

27 Nami waan dansaa jabaatee barbaadu,

waan dansaa dhaggata;

nami waan hantuu barbaadu ammoo

waan hantuu dhaggatta.

28 Nami durummaa ifiititti addatu hin jiga;

nami balchaan ammoo

akka baala jiidha'aa hin bisila.

29 Nami maatii ifii rakkisu,

harka duwwaa hin hafa;

gowwaan tajaajilaa qaro'oo hin te'a.

30 Hujiin nama balcha'aa

muka jiru'uu ti;

nami barsiisee lubbuu namaa deebisu qaro'o.

31 Worri balchaan lafa irratti

gatii hujii ifii akkuma dhaggatanu,

worri Waaqa malee le'uu fi

worri cubbaaleyyiille lafa irratti akkasuma

gatii hujii ifii hin dhaggatan.