ଅନ୍ନାଡେସାମରଞ୍ଜି ଆମଙ୍ସିଲଡ୍ ଆନ୍ନାନେନ୍
1 ଅଙ୍ଗାଆଡିଡ୍ ମସାନ୍ ଆ ବଇ ଅବ୍ସର୍ରଙ୍ଲନ୍ ମନ୍ରାଞ୍ଜି ଆମଙ୍ ପଡ଼େଲଞ୍ଜି, ତେତ୍ତେ ଏନ୍ନେଲେ ଆଇଡିଡ୍ ଡକୋଏନ୍ ଅମୋନିୟନ୍ ଡ ମୋୟାବିଅଞ୍ଜି ଆଙ୍ଗିୟ୍ ଇସ୍ୱରନ୍ ଆ ରନୁକ୍କୁ ସିଙନ୍ ଗନ୍ଲେ ଅଃରପ୍ତିଏଜି । 2 ଇନିଆସନ୍ଗାମେଣ୍ଡେନ୍ ଆନିଞ୍ଜି ଅମୋନିୟନ୍ ଡ ମୋୟାବିଅଞ୍ଜିଆଡଞ୍ ଜନୋମନ୍ ଡ ଡାଆନ୍ ପାଙ୍ଲେ ଇସ୍ରାଏଲଞ୍ଜିଆମଙ୍ବା ଅଃନିୟ୍ଲଜି । ବନ୍ଡ ଆନିଞ୍ଜିଆଡଙ୍ ସନୟ୍ପନ୍ ଆସନ୍ ଆ ବିରୁଦଲୋଙଞ୍ଜି ବିଲିଅମନ୍ଆଡଙ୍ ଡବ୍ବୋନ୍ ତିୟେଞ୍ଜି । ଏଲେଜାକ୍କିଁୟ୍ଡେନ୍ ଇସ୍ୱରଲେନ୍ ସନୟ୍ପଙ୍ ଆପାଲ୍ତେଙ୍ ଆସିର୍ବାଦଏନ୍ । 3 ତିଆଡିଡ୍ ଆନିଞ୍ଜି କେନ୍ ଆବନାୟ୍ବର୍ ଅମ୍ଡଙ୍ଡାଲେ ଇସ୍ରାଏଲଞ୍ଜି ଆମଙ୍ସିଲଡ୍ ଅଡ଼୍କୋ ମନ୍ରାନ୍ ମାୟ୍ନେମରଞ୍ଜିଆଡଙ୍ ଆନ୍ନାଏଞ୍ଜି ।
ନିଇମିଆନ୍ ମନନଙନ୍ ଆସନ୍ ଇଃୟମେନ୍
4 ଆମ୍ମୁଙ୍ଆଡିଡ୍ ଇଲିଆସିବନ୍ ରାଓଡ଼ାନ୍, ଇସ୍ୱରନ୍ ଆସରେବାସିଙନ୍ ଅଡ଼୍କୋନ୍ ଆସିନ୍ ଆସୋଡ଼ାମର୍ ଅନ୍ତମ୍ ତବ୍ନଙେନ୍, ଆନିନ୍ ଟୋବିଅନ୍ ଆ କୁତ୍ତାମା ଡକୋଏନ୍ । 5 ଏଲିଆସନ୍ ଟୁବିଅନ୍ ଆସନ୍ ଅବୟ୍ ସୋଡ଼ା ଡରକୋନେ ସିଙନ୍ ତୁବେନ୍, ବନ୍ଡ ତେତ୍ତେ ମନ୍ରାଞ୍ଜି ଆମ୍ମୁଙ୍ ଜନ୍ରୋମନ୍ ରାଓଡ଼ାନ୍ ଆମଙ୍ବା ସୋରୋପାୟେଞ୍ଜି, ଲଞିଡ୍ ତରୁମ୍ମୋଡନ୍ କୁନ୍ଦୁରୁନ୍, ଡ ସିମ୍ମାଞ୍ଜି, କନନ୍ମରନ୍, ଡ ଜଗ୍ଗେସିଙ୍ମରଞ୍ଜି ଆସନ୍ ତନିୟ୍ତିୟ୍ ଜନ୍ରୋମନ୍, ରଙ୍ ଦ୍ରାକ୍ୟାଡାନ୍ ଡ ମିଞଲନ୍ ଦସମାଂସନ୍ ଆରି ରାଓଡ଼ାଞ୍ଜି ଆସନ୍ ତନିୟ୍ତିୟନ୍ ଡକ୍କୋଏଞ୍ଜି । 6 ବନ୍ଡ କେନ୍ ଆବନେଡ଼ା ଞେନ୍ ଜିରୁସାଲମଲୋଙନ୍ ଅଡ୍କୋଲିୟ୍, ଇନିଆସନ୍ଗାମେଣ୍ଡେନ୍ ବାବିଲନ୍ ଆରାଜା ଅର୍ତକସ୍ତର 32 ବର୍ସେଙ୍ ଆସ୍ରାସନେନ୍ ଆଡିଡ୍ ଞେନ୍ ରାନ୍ ଆମଙ୍ବା ଇୟେନ୍ । ଆରି ତେନ୍ନେ ସିଲଡ୍ ୟର୍ନେନ୍ ଆସନ୍ ରାଜାନ୍ଆଡଙ୍ ଇୟ୍ଲେ ବର୍ନାୟ୍ 7 ଞେନ୍ ଜିରୁସାଲମନ୍ ୟର୍ରନ୍ ଇଲିଆସିବନ୍, ଟୋବିଅନ୍ ଆସନ୍ ଇସ୍ୱରନ୍ ଆସିଙ୍ ଆତୟ୍ତୟ୍ ଅବୟ୍ ଡରକୋନେସିଙନ୍ ଆତ୍ରୁବେନ୍ ଗିୟ୍ଲାୟ୍ । 8 ତିଆସନ୍ ଞେନ୍ ମାଡ ବରାବଲିଁୟ୍ ଆରି ଟୋବିଅନ୍ ଆଡ୍ରକୋନେସିଙ୍ ସିଲଡ୍ ଅଡ଼୍କୋନ୍ ଅସିଙନ୍ ଆ ଜିନିସଜି ଅମ୍ଡୁଙ୍ଲେ ସେଡାୟ୍ଲାୟ୍ । 9 ତିଆସନ୍ ଞେନ୍ ବାଁୟ୍ଲାୟ୍ଜିଡେନ୍ ଆନିଞ୍ଜି ଡରକୋନେସିଙନ୍ ମବ୍ଡ଼ିର୍ତଜି ଆରି ତେତ୍ତେ ଞେନ୍ ଇସ୍ୱରନ୍ ଆସିଙ୍ଲୋଙ୍ ଆସିମ୍ମାଜି, ଜନ୍ରୋମନ୍ ଡ ଲଙିଡ୍ ତରୁମ୍ମୋଡନ୍ ପାଙ୍ତାୟ୍ ।
10 ଆରି ଞେନ୍ ଗିୟ୍ଲାୟ୍ ଡ ଲେବିଅଞ୍ଜି ଆବାଗା ଆନିଞ୍ଜିଆଡଙ୍ ତନିୟନ୍ ଅଃଡେଲୋ ତାସନ୍ ଅଡ଼୍କୋ ଆ କବ୍ବାଡ଼ାମରଞ୍ଜି ଲେବିଅଞ୍ଜି ଡ କନନ୍ମରଞ୍ଜି ସରେବାସିଙନ୍ ଅମ୍ରେଙ୍ଲେ ରମ୍ମଙ୍ ଆଲବଲୋଙ୍ ଇୟ୍ଲେ ଡକୋନେଜି । 11 ଇନିବା ଇସ୍ୱରନ୍ ଆସିଙ୍ ଅନମ୍ରେଙନ୍ ଡେଏନ୍ କେନ୍ଆତେ ଞେନ୍ ଆମ୍ମୁଙ୍ଗଡ୍ ମରଞ୍ଜିଆଡଙ୍ ବର୍ରାଜି ଆରି ଆନିଞ୍ଜିଆଡଙ୍ ଞେନ୍ ଅବ୍ରୁକ୍କୁଡାଲେ ରମ୍ମଙ୍ ରମ୍ମଙ୍ ଆକାବ୍ବାଡ଼ାଲୋଙନ୍ ଆନିଞ୍ଜିଆଡଙ୍ ତବ୍ଲଙ୍ଲାଜି । 12 ତିସିଲଡ୍ ଅଡ଼୍କୋ ଜିଉଦାଞ୍ଜି ଆ ଜନ୍ରୋମ୍, ଦ୍ରାକ୍ୟାଡାନ୍ ଡ ମିଞଲନ୍ ଦସମାଂସନ୍ ଜନ୍ରୋମ୍ସିଙନ୍ ପାଙ୍ଲାୟ୍ । 13 ଞେନ୍ ସେଲିମିଅ ରାଓଡ଼ାନ୍, ଜନ୍ରୋମ୍ସିଙନ୍ ଆସୋଡ଼ା ପେଦାୟନ୍ ଡ ସାଦୋକନ୍ଆଡଙ୍ ଆମ୍ମୁଗଡ୍ମର୍ ଏମ୍ମେଲେ ତବ୍ନଙ୍ଲାଜି, କେନ୍ ଆନିଞ୍ଜି ଆଜାୟ୍ତା ମତନିଅନ୍ ଆଉଲ୍ଲେଙ୍ ସକ୍କୁରନ୍ ଆଡାଙ୍ଗାଡ଼ାଅନ୍ ଆନନ୍ ଡକୋଲନ୍ । ଇନିଆସନ୍ଗାମେଣ୍ଡେନ୍ ଆନିଞ୍ଜି ଲବଡ୍ଡି ଡ ଡର୍ନେମର୍ ଡକୋଏଞ୍ଜି ତିଆସନ୍ ଆବୋଞାଞ୍ଜି ତନିୟନ୍ ଆଡ୍ରେତେନ୍ ଆକାବ୍ବାଡ଼ା ଆନିଞ୍ଜିଆଡଙ୍ ତନିୟନ୍ ଡେଏନ୍ ।
14 ଏ ଇସ୍ୱରଞେନ୍ ମନ୍ନେଇଁୟ୍, କେନ୍ ଅଡ଼୍କୋନ୍ ଆକାବ୍ବାଡ଼ାଜି ସରେବାସିଙ୍ଲୋଙ୍ନମ୍ ସେନେଙ୍କେନମ୍ ଆସନ୍ ଞେନ୍ ତୁବ୍ଲାୟ୍ ।
15 ତିଆବନେଡ଼ା ଜିଉଦାଞ୍ଜି ଆମଙ୍ଲୋଙ୍ ସିଲଡ୍ ଞେନ୍ ଗିୟ୍ଲାଜି ଲୋଲୋନେ ଡିନ୍ନାଇଙନ୍ ମନ୍ରାଞ୍ଜି ଦ୍ରାକ୍ୟାନ୍ ଆଞଲାନ୍, ବୋୟ୍ଲେ ଆପନାଙ୍, ଗୋଡୋଁଞନ୍ଆଡଙ୍ ତୁମ୍ ଅନବ୍ବ୍ବୋଜନ୍, ଆରି ଦ୍ରାକ୍ୟାଡାନ୍, ଦ୍ରାକ୍ୟାଜନ୍, ଲୁଆଜନ୍ ଡ ଅଡ଼୍କୋନ୍ ଆଜନବ୍ଜି ଜିରୁସାଲମନ୍ ପାଙ୍ଲାଜି କେନ୍ କି ଆତ୍ତେ ଗିଜେଞ୍ଜି; ଆରି ଅଙ୍ଗାଆଡିଡ୍ ଆନିଞ୍ଜି ଜନ୍ରୋମଞ୍ଜି ତମେଞ୍ଜି ତିଆଡିଡ୍ ଞେନ୍ ଆନିଞ୍ଜିଆଡଙ୍ ଅବ୍ଜନାତାଜି । 16 ଆରି ଜିରୁସାଲମଲୋଙନ୍ ସୋରିଅମରଞ୍ଜି ଡକୋଲଞ୍ଜି, ଆନିଞ୍ଜି ଅୟନ୍ ଡ ଅଡ଼୍କୋନ୍ ତନମନ୍ ଆସନ୍ ଜିନିସନ୍ ପାଙ୍ଲେ ଲୋଲୋନେଡିନ୍ନାଇଙନ୍ ଜିଉଦାନ୍ ଡେସାନ୍ ଆପସିୟ୍ଜି ଆମଙ୍ବା ଡ ଜିରୁସାଲମନ୍ଲୋଙନ୍ ତମ୍ତମ୍ଲଞ୍ଜି । 17 ତିଆସନ୍ ଜିଉଦାଡେସାନ୍ ଆମ୍ମୁଙ୍ଗଡ୍ ମରଞ୍ଜି ସରିନ୍ ଏଲ୍ଞାଙ୍ତମ୍ଲାୟ୍ ଆରି ଞେନ୍ ଆନିଞ୍ଜିଆଡଙ୍ ବର୍ରାଜି, "ଲୋଲୋନେଡିନ୍ନାଇଙନ୍ ଏନ୍ନେଗନ୍ ଆକାବ୍ବାଲୁମ୍ଲେ ଆମ୍ବେନ୍ ଏର୍ମଡ଼ିର୍ ଏମ୍ମେତେ ।" 18 ସଜୋଜୋବେଞ୍ଜି ଏନ୍ନେଗନ୍ ଆକାବ୍ବାଡ଼ା ଆର୍ଲୁମେଞ୍ଜି ଆସନ୍ ଇସ୍ୱରଲେନ୍ ଇନ୍ଲେଞ୍ଜିଆଡଙ୍ ଆରି କେନ୍ ଆଡେସା ଆସନ୍ ଡନଣ୍ଡାୟନ୍ ଆପ୍ପାୟ୍ଲାୟ୍ । ଏଲେନିୟ୍ଡେନ୍ ଲୋଲୋନେଡିନ୍ ଏର୍ମଡ଼ିର୍ ଏମ୍ମେଲେ ଇସ୍ରାଏଲଞ୍ଜି ଆମ୍ବା ଆରି ବତର ବନ୍ଡ୍ରାବନ୍ ଏପାଙ୍ତାୟ୍ ।
19 ତିଆସନ୍ ଲୋଲୋନେଡିନ୍ନାନ୍ ଅନ୍ରଙ୍ ଜିରାଞନ୍ ଆମ୍ମୁଙ୍ ଜିରୁସାଲମନ୍ ଡୁଆରାନ୍ ଅଡ଼୍କୋନ୍ ଲୋଙଡ୍ଲେ ଆପ୍ରାଞେନ୍ ଆଡିନ୍ ଅଡ଼୍କୋନ୍ ଆସନଙ୍ ଇଙଡ୍ବା ଗାମ୍ଲେ ବାଞ୍ଲାଜି, ଆରି ଲୋଲୋନେଡିନ୍ନାନ୍ ଅନ୍ରଙ୍ ପଡେନ୍ଜାୟ୍ ସନଙନ୍ ଏରୋଡଙ୍ ଗାମ୍ଲେ ବାଞ୍ଲାଜି । ଆରି ଲୋଲୋନେଡିନ୍ନାଇଙନ୍ ଇନ୍ନିଙ୍ ପାଙ୍ଡଙାଜିତଡ୍ ଗାମ୍ଲେ ଞେନ୍ ମନ୍ରାଞେଞ୍ଜି ଲାଙ୍ଲେନ୍ନେ ଡୁଆରାନ୍ ଜନଗ୍ଗେନ୍ ବାଞ୍ଲାଜି । 20 ବେପ୍ପାରିଞ୍ଜି ଡ ଅଡ଼୍କୋ ଆଜିନିସ ତମ୍ମରଞ୍ଜି ବତର ଅଡ଼େ ବାଗୁତର ଜିରୁସାଲମଲୋଙନ୍ ଡାଣ୍ଡନ୍ ଡକଲଞ୍ଜି । 21 ଆନିଞ୍ଜିଆଡଙ୍ ଅଃବ୍ଜନାଡାଲେ ଞେନ୍ ଆନିଞ୍ଜିଆଡଙ୍ ବର୍ରାଜି, "ଆମ୍ବେନ୍ ଇନିବା ଜିରୁସାମ ଆଗଡ଼ା ଆତୟ୍ତୟ୍ ତଗଲନ୍ ଏଡକୋତନ୍ । ଆରି ବତର ଆମ୍ବେଞ୍ଜି ଏଲୁମେଣ୍ଡନ୍, ଞେନ୍ ଆମ୍ବେଞ୍ଜିଆଡଙ୍ ଞମ୍ତବେନ୍ ।" ତିସିଲଡ୍ ଆନିଞ୍ଜି ଲୋଲୋନେଡିନ୍ନାଇଙନ୍ ଅଃନିୟ୍ଲାଜି । 22 ଲେବିଅଞ୍ଜିଆଡଙ୍ ଲୋଲୋନେଡିନ୍ନାଇଙନ୍ ମଡ଼ିର୍ ମନବ୍ଡ଼ିରନ୍ ଆସନ୍ ରମ୍ମଙ୍ ରମ୍ମଙ୍ ମବ୍ଡ଼ିର୍ନେନ୍ ଡ ସନଙଞ୍ଜି ଅଡ଼୍କୋନ୍ ଡନଙ୍ଡଙନ୍ ଆସନ୍ ଞେନ୍ ବାଞ୍ଲାଜି ।
କେନ୍ ଅଡ଼୍କୋନ୍ ଆକାବ୍ବାଡ଼ାନ୍ ଆସନ୍ ଏ ଇସ୍ୱର, ଞେନ୍ଆଡଙ୍ ଇୟମିଁୟ୍, ଞେନ୍ଆଡଙ୍ କାନକାରମ୍ ଗାମ୍ଲେ ଡୁଙ୍ୟମିଁୟ୍ ।
23 ତିଆବନେଡ଼ା ନିୟ୍ ଜିଉଦିଞ୍ଜି ଅସୋଦିଅନ୍, ଅମୋନନ୍ ଡ ମୋୟାବ ଡେସାନ୍ ଆଇବୟ୍ଜି ଆବ୍ରିବାଲଞ୍ଜି ଞେନ୍ ଗିୟ୍ଲାଜି । 24 ଅସୋୟ୍ ମନ୍ରା ଆଅନଞ୍ଜି ଅସୋଦିଅ ଲଙ୍ଲଙନ୍ ବାତ୍ତେ କଡାଡ଼ିଲଞ୍ଜି ଆରି ଜିଉଦିୟ ଲଙ୍ଲଙନ୍ ବାତ୍ତେ କଡାଡ଼ିଲନ୍ ଅଃରପ୍ତିଲଜି ବନ୍ଡ ରମ୍ମଙ୍ କେଜ୍ଜା ଆଲଙ୍ଲଙ୍ ବାତ୍ତେ କଡାଡ଼ିଲଞ୍ଜି । 25 ତିଆସନ୍ ଞେନ୍ ଆନିଞ୍ଜି ସରିନ୍ ଏଲ୍ଞାଙ୍ତମ୍ଲାୟ୍, ଆରି ଆନିଞ୍ଜିଆଡଙ୍ ସୟ୍ପଲାଜି, ଆନିଞ୍ଜିଆଡଙ୍ ଆନା ଆନା ତିଡ୍ଲାଜି, ଆରି ତିବାଲାଜି । ଆରି ଇସ୍ୱରନ୍ ଆଞୁମ୍ଲୋଙ୍ ଅଃପର୍ମାଡ଼ାଜି ଆମ୍ବେନ୍ ଆ ଡାଙ୍ଗଡ଼ାଅନଞ୍ଜିଆଡଙ୍ ଡାଙ୍ଗଡ଼ିଅମ୍ବେନ୍ ଏତିୟ୍ଡଙ୍ଜି ଆରି ଡାଙ୍ଗଡ଼ାଅମ୍ବେଞ୍ଜି ଆସନ୍ ଆ ଡାଙ୍ଗଡ଼ିଅନଞ୍ଜିଆଡଙ୍ ଏୟ୍ନୋରୋଙ୍ଡଜି । 26 ଇସ୍ରାଏଲନ୍ ଆରାଜା ସଲୋମନନ୍ ଅନ୍ତମ୍ କେଜ୍ଜାଲୋଙନ୍ ଆନ୍ନିଙ୍ ଅଃଡ୍ଡକ୍କୋଲୋ ଆରି "ଇସ୍ୱରନ୍ ଆନିନ୍ଆସନ୍ ଡନୁଙ୍ୟମ୍ଞେନ୍ ଡକୋଏନ୍, ଆରି ଇସ୍ୱରନ୍ ସମ୍ପରା ଇସ୍ରାଏଜନ୍ ଏମ୍ମେଏନ୍ ବନ୍ଡ ବଡେସାବୟ୍ଜି ଆନିନ୍ଆଡଙ୍ ଏନ୍ନେଲେ ଇର୍ସେ କାବ୍ବାଡ଼ାନ୍ ଅବ୍ଲୁମ୍ଲୁମେଞ୍ଜି । 27 ତିଆସନ୍ ବଡେସା ଆଇବୟ୍ଆଡଙ୍ ବିବାଡାଲନ୍ ଇସ୍ୱରଲେନ୍ଆଡଙ୍ ବିରୁଦଲେ ବନାଁୟ୍ବରନ୍ ଆଲ୍ଲେତେ ଆରି ଇର୍ସେକାବ୍ବାଡ଼ା ବର୍ବେନ୍ ପଙ୍ ଞେନ୍ ଅମ୍ଡଙାୟ୍ ?"
28 ତିଲୋଙ୍ ଇଲିଆସିବନ୍ ରାଓଡ଼ାନ୍ ଆ ଡାଙ୍ଗଡ଼ାଅନ୍ ଡକୋଏନ୍, ବନ୍ଡ ଜିଉୟାଦନ୍ ଆ ଡାଙ୍ଗଡ଼ାଅନ୍ ସନ୍ବଲ୍ଟନ୍ ଆରେୟାମ୍ ଓରୋଣିଅନ ଡକୋଏନ୍; ତିଆସନ୍ ଞେନ୍ ଅମଙ୍ଞେନ୍ ସିଲଡ୍ ଆନିନ୍ଆଡଙ୍ ଗଙ୍ତିଡ୍ଲାୟ୍ ।
29 ଏ ଇସ୍ୱର, ଆନିଞ୍ଜିଆଡଙ୍ ଇୟମାଜି, ଇନିଆସନ୍ଗାମେଣ୍ଡେନ୍ ଆନିଞ୍ଜି ରାଓଡ଼ାନ୍ କାବ୍ବାଡ଼ାନ୍ ଆରି ଲେବିଅଞ୍ଜି ଆ ବନାୟ୍ବର୍ ଏର୍ମଡ଼ିର୍ ଏମ୍ମେଏଞ୍ଜି ।
30 ବଡେସାବାଜି ସିଲଡ୍ ଆନିଞ୍ଜିଆଡଙ୍ ଞେନ୍ ମବ୍ଡ଼ିର୍ଲାଜି; ଅଡ଼୍କୋନ୍ ଆକାବ୍ବାଡ଼ା ଅନ୍ତମ୍ ରାଓଡ଼ାଞ୍ଜି ଡ ଲେବିଅଞ୍ଜି ଆକାବ୍ବାଡ଼ାଲୋଙ୍ ତବ୍ନଙ୍ଲାଜି; 31 ସମାନବେଡ଼ାନ୍ ଅରାନ୍ ଆପର୍ତମ୍ମୁଜନ୍ ତନିୟ୍ତିୟନ୍ ଆସନ୍ ମନ୍ରାନ୍ ତବ୍ନଙ୍ଲାୟ୍ ଆରି ।
ଏ ଇସ୍ୱର, କେନ୍ ଅଡ଼୍କୋନ୍ ମନଙ୍ ଆକାବ୍ବାଡ଼ା ଆସନ୍, ଞେନ୍ଆଡଙ୍ ଇଃୟମ୍ଲେ ଆସିର୍ବାଦଇଁୟ୍ ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)