1 ଆରି ଅଡ଼୍‌କୋ ମନ୍‌ରା ଆବଅନିୟମନ୍‌ ଆସନ୍‌ ଡାଆଡୁଆରାନ୍ ଆଜନିର୍‌ ଆମୁକ୍କାବା ଆ ସକଲୋଙ୍‌ ରୁକୁଲଞ୍ଜି; ଆରି, ଇସ୍ରାଏଲନ୍‌ଆଡଙ୍‌ ପ୍ରବୁନ୍‌ ଆତ୍ରିୟେନ୍‌ ମସାନ୍‌ ଆ ବନାଁୟ୍‌ବର୍‌ ବଇ ଆପନାଙ୍‌ ଆସନ୍‌ ଆନିଞ୍ଜି ଏଜ୍ରା ଞନଙ୍‌ମରନ୍‌ଆଡଙ୍‌ ବାଞେଞ୍ଜି । 2 ସିଲତ୍ତେ ସାତ ଆଙ୍ଗାୟ୍‌ ଆପର୍ତମ୍ମୁ ଡିନ୍ନାଲୋଙ୍‌, ଏଜ୍ରା ରାଓଡ଼ାନ୍‌ ଓବ୍ବାମରନ୍‌ ଡ ଆଇମରନ୍‌ ଡିଅଙ୍‌ମନ୍‌ରା ଅମ୍‌ଡଙ୍‌ଲେ ଜନାଲେ ରପ୍ତିତଜି, ତି ଅଡ଼୍‌କୋନ୍‌ ଆରନୁକୁ ଆତେମଡ୍‌ବା ତି ଆ ବନାଁୟ୍‌ବର୍‌ ବଇନ୍‌ ପାଙ୍‌ଲାଜି । 3 ସିଲତ୍ତେ ତି ଡାଆନ୍‌ ଆଜନିର୍‌ ଆମୁକ୍କାବା ଆ ସକଲୋଙ୍‌, ଓବ୍ବାମରନ୍‌ ଡ ଆଇମରନ୍‌ ଡିଅଙ୍‌ମନ୍‌ରା ଜନାଲେ ରପ୍ତିତଜି, ତି ଅଡ଼୍‌କୋଞ୍ଜି ଆତେମଡ୍‌ଲୋଙ୍‌ ଡୋତାନ୍‌ ସିଲଡ୍‌ ତମ୍ୱାଓଲେନ୍‌ ଜାୟ୍‌ ତି ଆ ବଇ ସିଲଡ୍‌ ପଡ଼େଲନେ; ଆରି ଅଡ଼୍‌କୋନ୍‌ ମନ୍‌ରା ବନାଁୟ୍‌ବର୍‌ ଆବଇଜି ଡାଲୁଡ୍‌ଲେ ଅମ୍‌ଡଙେଞ୍ଜି ।

4 ଏଜ୍ରା ଞଙ୍‌ଞଙ୍‌ମର୍‌ ତି ଆଲନୁମ୍‌ ଆସନ୍‌ ଆତନୁବ୍‌ ରନାଙ୍‌ତାଲନ୍‌ ଆତୋଣ୍ତୋ ତନଙେନ୍‌; ଆରି ଆର୍ଜଡ଼ୋମ୍‌ସିଗଡ୍‌ ମତତିଅନ୍‌, ସେମା, ଅନଅନ୍‌, ଉରିଅନ୍‌, ଇଲ୍‌କିଅନ୍‌ ଡ ମାସେଅନ୍‌ ତନଙେଞ୍ଜି; ଆରି ଆ ଅର୍କାବଡ଼ିଗଡ୍‌ ପଦାଅନ୍‌, ମିସାଏଲନ୍‌, ମଲ୍‌କିଅନ୍‌, ଅସୁମ, ଅସ୍‌ବଦାନନ୍‌, ଜିକରିଅନ୍‌ ଡ ମସୁଲ୍ଲମ୍‌ ତନଙେଞ୍ଜି । 5 ତିସିଲଡ୍‌ ଅଡ଼୍‌କୋ ମନ୍‌ରାଞ୍ଜି ଆମୁକ୍କାଲୋଙ୍‌ ଏଜ୍ରାନ୍‌ ତି ଆ ବଇ ଆବ୍‌କୁଡେନ୍‌, ତିଆଡିଡ୍‌ ଅଡ଼୍‌କୋ ମନ୍‌ରାନ୍‌ ଗିଜେଞ୍ଜି । ଆରି ଆନିନ୍‌ ବଇନ୍‌ ଆରାବ୍‌କୁଡେନ୍‌ ଆଡିଡ୍‌ ଅଡ଼୍‌କୋ ମନ୍‌ରାଞ୍ଜି ତନଙେଞ୍ଜି । 6 ସିଲତ୍ତେ ଏଜ୍ରାନ୍‌ ସଦାପ୍ରବୁ ଇସ୍ୱରନ୍‌ଆଡଙ୍‌ ସେଙ୍କେରାଏଞ୍ଜି । ଆରି ଅଡ଼୍‌କୋ ମନ୍‌ରାଞ୍ଜି ରମ୍ମଙ୍‌ ରମ୍ମଙ୍‌ ଆସି ତେକେଲେ "ଆମେନ୍‌," "ଆମେନ୍‌" ଗାମ୍‌ଲେ ଜାଲଙେଞ୍ଜି; ଆରି ଆନିଞ୍ଜି ରମ୍ମଙ୍‌ ରମ୍ମଙ୍‌ ବରୁମ୍‌ଲେ ପ୍ରବୁନ୍‌ଆଡଙ୍‌ ତୁଡ଼ୁମ୍‌ଲେ ଲୋମେଞ୍ଜି । 7 ଆରି ଜେସୁଅ ଡ ବାନି ଡ ସେରେବିଅ, ଜାମିନନ୍‌, ଅକ୍‌କୁବନ୍‌, ସବ୍ବତଅ, ଉଦିଅ, ମାସେଅ, କଲିଟ, ଅସରିଅ, ଜୋସାବଦ୍‌, ଆନନ୍‌, ପଲାଅନ୍‌ ଡ ଲେବିଅଞ୍ଜି ମନ୍‌ରାଞ୍ଜିଆଡଙ୍‌ ବନାଁୟ୍‌ବରନ୍‌ ଅବ୍‌ଗନ୍‌ଲୁଡେଞ୍ଜି; ଆରି ମନ୍‌ରାଞ୍ଜି ରମ୍ମଙ୍‌ ରମ୍ମଙ୍‌ ଆଡ୍ରକୋନେଲୋଙ୍‌ ତନଙ୍‌ଲେ ଡକୋଲଞ୍ଜି । 8 ଆରି, ଆନିଞ୍ଜି ରୟ୍‌ଲଙ୍‌ ଇସ୍ୱରନ୍‌ ଆ ବନାଁୟ୍‌ବର୍‌ ବଇ ସିଲଡ୍‌ ପଡ଼େଲଞ୍ଜି ଆରି ଆନିଞ୍ଜି ତି ଆଗ୍ରାମ୍‌ଗାମ୍‌ ଅବ୍‌ଜନାଏଞ୍ଜି, ସିଲତ୍ତେ ମନ୍‌ରାଞ୍ଜି ପଡ଼େନେନ୍‌ ଗନ୍‌ଲୁଡେଞ୍ଜି । 9 ଆରି ସାସନମର୍‌ ନିଇମିଆନ୍‌ ଡ ଞନଙ୍‌ମର୍ରଞ୍ଜି ଡ ରାଓଡ଼ା ଏଜ୍ରା ଡ ମନ୍‌ରାଞ୍ଜି ଆ ଞନଙ୍‌ ଲେବିଅଞ୍ଜି ଅଡ଼୍‌କୋନ୍‌ ଆମନ୍‌ରାଜିଆଡଙ୍‌ ବରେଞ୍ଜି, "ଲଙେ ସଦାପ୍ରବୁ ଇସ୍ୱରବେନ୍‌ ଆସନ୍‌ ମଡ଼ିର୍‌; ଏଡୁକଡଙ୍‌ନେ କି ଏୟେଡଙେ ।" ଇନିଆସନ୍‌ଗାମେଣ୍ତେନ୍‌ ବନାଁୟ୍‌ବରନ୍‌ ଆବର୍ନେ ଆରମ୍‌ଡଙେଞ୍ଜି, ଅଡ଼୍‌କୋ ମନ୍‌ରାଞ୍ଜି ୟେୟେଡାଲଞ୍ଜି । 10 ଆରି ନିଇମିଆନ୍‌ ଆନିଞ୍ଜିଆଡଙ୍‌ ବରେଞ୍ଜି, "ରମ୍ମଙ୍‌ ରମ୍ମଙ୍‌ ଆତଙର୍‌ଗଡ୍‌ ଜିର୍ବା, ମନଙ୍‌ଜନୋମ୍ଞ୍ଜି ଜୋମ୍‌ବା ଡ ଜବୁଙ୍‌ ଜନବନ୍‌ ଗାବା ଆରି ଆନ୍ନାମର୍ରଞ୍ଜି ଆସନ୍‌ ଇନ୍ନିଙ୍‌ ଏର୍ତନୁବ୍‌, ଆମଙ୍‌ବାନ୍‌ ଅସୋୟ୍‌ ଇନ୍ନିଙ୍‌ ଆପ୍ପାୟ୍‌ବା; ଇନିଆସନ୍‌ଗାମେଣ୍ତେନ୍‌ ଲଙେ ଆଡିନ୍ନା ପ୍ରବୁଲେନ୍‌ ଆସନ୍‌ ମଡ଼ିର୍‌, ଆମ୍ୱେଞ୍ଜି ଏଡୁକଡଙ୍‌ନେ; ସଦାପ୍ରବୁ ଆ ବର୍ରନେଲୋଙ୍‌ ସର୍ଡାନ୍‌ ବୋର୍ସାବେନ୍‌ ।" 11 କେନ୍‌ଅନ୍ତମ୍‌ ଲେବିଅଞ୍ଜି ଅଡ଼୍‌କୋ ମନ୍‌ରାନ୍‌ଆଡଙ୍‌ ଅବ୍‌ରିଙ୍‌ରିଙେଞ୍ଜି, "କଡ଼ିଙ୍‌ଲେ ଡକୋନାବା, ଲଙେ ମଡ଼ିର୍‌ ଡିନ୍ନା ! ଆମ୍ୱେଞ୍ଜି ଏଡୁକଡଙ୍‌ନେ ।" 12 ତିସିଲଡ୍‌ ମନ୍‌ରାଞ୍ଜି ଆମଙ୍‌ବା ଅନପୁଙନ୍‌ ଆଡ୍ରେନ୍‌ ଆବର୍ନେ ଅଡ଼୍‌କୋନ୍‌ ଆଗରନ୍‌ଲୁଡେଞ୍ଜି ଆସନ୍‌ ଅଡ଼୍‌କୋଞ୍ଜି ଗାଏଞ୍ଜି ଡ ଜୋମେଞ୍ଜି ଆରି ଅସୋୟ୍‌ ବନ୍ତାନ୍‌ ଆପ୍ପାୟେଞ୍ଜି ଆରି ଜବ୍ର ସର୍ଡାନେନ୍‌ ଆସନ୍‌ ରମ୍ମଙ୍‌ ରମ୍ମଙ୍‌ ଆତଙର୍‌ଗଡ୍‌ ଜିରେଞ୍ଜି ।

13 ଆରି, ଅନବ୍‌ବାଗୁ ଡିନ୍ନା ଅଡ଼୍‌କୋ ମନ୍‌ରାନ୍‌ ଆପେୟ୍‌କେଜ୍ଜାଜି ଆମୋଡ଼ମଞ୍ଜି, ରାଓଡ଼ାଞ୍ଜି ଡ ଲେବିଅଞ୍ଜି ବନାଁୟ୍‌ବରନ୍‌ ଆବର୍ନେ ଆନିୟମ୍‌ ଆସନ୍‌ ଏଜ୍ରାନ୍‌ ଞନଙ୍‌ମରନ୍‌ ଆମଙ୍‌ବା ରୁକୁଲଞ୍ଜି । 14 ମସାନ୍‌ ଆତ୍ରିଏନ୍‌ ପ୍ରବୁନ୍‌ ଆବନାଁୟ୍‌ବର୍‌ଲୋଙ୍‌ ଆଇଡିଡ୍‌ ଡକୋନ୍‌ ଆନିଞ୍ଜି ଗିଜେଞ୍ଜି ଡ, ସାତ ଆଙ୍ଗାୟ୍‌ ପୁପୁର୍‌ ଆଡିଡ୍‌ ଇସ୍ରାଏଲନ୍‌ ଆଅଞ୍ଜି ତୁପସିଙ୍‌ଲୋଙନ୍‌ ଏଙ୍ଗାଲେ ଡକୋତଞ୍ଜି; 15 ଆରି, ଆଡ୍ରକୋନେଞ୍ଜି ଅଡ଼୍‌କୋନ୍‌ ଆଗଡ଼ାରେଙ୍‌ ଡ ଜିରୁସାଲଲୋଙ୍‌ କେନ୍‌ ଆବର୍ନେ ଅପୁଙ୍‌ବର୍ତଜି, ଆଗ୍ରାମ୍‌ଗାମ୍‌, "ଆମ୍ୱେଞ୍ଜି ଆନିଡନ୍‌ ଅନ୍ତମ୍‌ ତୁପସିଙନ୍‌ ଆତନୁବ୍‌ ଆସନ୍‌ ବରୁନ୍‌ ଇୟ୍‌ଲେ ଜିତ କେଣ୍ତାରନ୍‌ ଡ କିନ୍‌ରେଙ୍‌ ଜିତ କେଣ୍ତାରନ୍‌ ଡ ମଞ୍ଜାତିନ୍‌ ଆକେଣ୍ତାର୍‌ ଡ ସିଣ୍ତିକାରନ୍‌ ଡ ଗୋଗୋୟ୍‌ ଡାଲାନ୍‌ ଡକୋନ୍ ଆନୁବ୍‌ ଆକେଣ୍ତାର୍‌ ପାଙାୟ୍‌ବା ।"

16 ସିଲତ୍ତେ ମନ୍‌ରାଞ୍ଜି ତିଅଡ଼୍‌କୋନ୍‌ ପାଙ୍‌ଲେ ରମ୍ମଙ୍‌ ରମ୍ମଙ୍‌ ଆସନ୍‌ ତୁପସିଙନ୍‌ ତୁବେଞ୍ଜି, ତର୍ଡମ୍‌ ରମ୍ମଙ୍‌ ରମ୍ମଙ୍‌ ଆସିଂ ଆବୁଲେଙ୍‌ ଆତୋଣ୍ତୋ ଡ ଡୁଆରାରେଙ୍‌ ଡ ଇସ୍ୱରନ୍‌ ଆ ଡୁଆରାଲୋଙ୍‌ଅଡ଼୍‌କୋନ୍‌ ଡ ଡାଆ ଗର୍ନେ ସକନ୍‌ ଡ ଇପ୍ରିମ୍‌-ଗରନ୍ନେ ସକଲୋଙ୍‌ ତୁବେଞ୍ଜି । 17 ଆରି, ବଣ୍ତିନ୍‌ ସିଲଡ୍‌ ଆୟର୍ନାଞଞ୍ଜି ଆମନ୍‌ରାଜି ଆରନୁକୁ ଅଡ଼୍‌କୋନ୍‌ ତୁପସିଙନ୍‌ ତୁବ୍‌ଲେ ଡକୋଲଞ୍ଜି; ନୁନନ୍‌ ଆଡାଙ୍ଗାଡ଼ାଅନ୍‌ ଜେସୁଅନ୍‌ ଆଡିନ୍ନା ସିଲଡ୍‌ ଆଙ୍ଗିୟ୍‌ଜା ଇସ୍ରାଏଲନ୍‌ ଆଅଞ୍ଜି ତିଅନ୍ତମ୍‌ ଅଃସର୍ଡାଲଞ୍ଜି । ତିଆସନ୍‌ ଜବ୍ର ସର୍ଡାଲଞ୍ଜି । 18 ଆରି ଏଜ୍ରାନ୍‌ ଆପର୍ତମ୍ମୁ ଡିନ୍ନାନ୍‌ ସିଲଡ୍‌ ଆନଞିଡ୍‌ ଡିନ୍ନା ଜାୟ୍‌ ଆଏଡ଼ର୍‌ ଇସ୍ୱରନ୍‌ ଆ ବନାଁୟ୍‌ବର୍‌ ବଇ ସିଲଡ୍‌ ପଡ଼େଲନେ । ଆରି, ମନ୍‌ରାଞ୍ଜି ସାତ ଡିନ୍ନା ଜାୟ୍‌ ପୁପୁରନ୍‌ ପାଡ଼େଏଞ୍ଜି; ଆରି, ବନାଁୟ୍‌ବରନ୍‌ ଅନ୍ତମ୍‌ ଆଟ ଡିନ୍ନାଲୋଙ୍‌ ସୋଡ଼ା ସବାନ୍‌ ଡେଏନ୍‌ ।