1 ତି ଆଙ୍ଗାୟ୍‌ ବକୁଡ଼ି ଉଞ୍ଜି ଡିନ୍ନାଲୋଙ୍‌ ଇସ୍ରାଏଲନ୍‌ ଆଅଞ୍ଜି ରୁକୁଡାଲନ୍‌ ଆନମ୍‌ଲନ୍‌, ଅକ୍କାନ୍‌ ଜିଜିଲନ୍‌ ଡ ରମ୍ମଙ୍‌ ରମ୍ମଙ୍‌ ଆବବ୍‌ଲୋଙ୍‌ ଲବନ୍‌ ଜଡ୍‌ଲଞ୍ଜି । 2 ଆରି ଇସ୍ରାଏଲ୍‌ କେଜ୍ଜାନ୍‌ ବଡେସାବାୟ୍‌ ଆମନ୍‌ରାଜି ଆମଙ୍‌ ସିଲଡ୍‌ ରମ୍ମଙ୍‌ଆଡଙ୍‌ ଆଙ୍‌ସାଏଞ୍ଜି, ଆରି ତନଙ୍‌ଲେ ରମ୍ମଙ୍‌ ରମ୍ମଙ୍‌ ଆ ଇର୍ସେ ଡ ରମ୍ମଙ୍‌ ରମ୍ମଙ୍‌ ଆ ପୁର୍ବାଃଜୁଜୁଞ୍ଜି ଡୋସା ବର୍ରଞ୍ଜି । 3 ଆରି,ଆନିଞ୍ଜି ରମ୍ମଙ୍‌ ରମ୍ମଙ୍‌ ଆଡ୍ରକୋନେଲୋଙ୍‌ ତନଙ୍‌ଲେ ବଡିନ୍ନାନ୍‌ ୟାହନ୍ତା ଜାୟ୍‌ ପ୍ରବୁନ୍‌ ଆ ଇସ୍ୱରଞ୍ଜି ଆ ବନାଁୟ୍‌ବର୍‌-ବଇ ସିଲଡ୍‌ ପଡ଼େଲଞ୍ଜି ଆରି ବତର ୟାଗି ଗଣ୍ଟା ଜାୟ୍‌ ଆନିଞ୍ଜି ଇର୍ସେନ୍‌ ଏଲୁମ୍‌ଲାୟ୍‌ ଗାମ୍‌ଲେ ବର୍ରନ୍‌ ସଦାପ୍ରବୁ ଇସ୍ୱରନ୍‌ଆଡଙ୍‌ ଲୋମେଞ୍ଜି ।

4 ଆରି, ଲେବିଅଞ୍ଜି, ଜେସୁଅ ଡ ବାନି, କଦ୍‌ମିଏଲ, ସବନିଅ, ବୁନ୍ନି, ସେରେବିଅ, ବାନି ଡ କନାନି ପାଆଚଲୋଙନ୍‌ ତଙ୍‌ଲେ ସଦାପ୍ରବୁ ଇସ୍ୱରନ୍‌ଆଡଙ୍‌ ଆକ୍ରାନ୍‌ ବାବ୍‌ବାବ୍‌ଲେ ଓଡ୍ଡେଏଞ୍ଜି ।

5 ଜେସୁଅନ୍‌ ଡ କଦ୍‌ମିଏଲନ୍‌, ବାନି, ଅସବନିଅନ୍‌, ସେରେବିଅନ୍‌, ଉଦିଅନ୍‌, ସବନିଅନ୍‌ ଡ ପତାୟନ୍‌ ଡ ଲେବିଅଞ୍ଜି ଗାମେଞ୍ଜି, "ଡୋନାବା, ପୁର୍ବାଃନ୍‌ ସିଲଡ୍‌ ପୁର୍ବାଃତେ ଜାୟ୍‌ ଆଏଡ଼ର୍‌ ସଦାପ୍ରବୁ ଇସ୍ୱରବେନ୍‌ଆଡଙ୍‌ ସେନ୍‌ବା, ଆରି ଅଡ଼୍‌କୋନ୍ ଆସନେନ୍ ଡ ସନେଙ୍କେନ୍ ସିଲଡ୍‌ ସୋଡ଼ା ଗନୁଗୁନ୍ ଆଞୁମନ୍ ସନେନନ୍‌ ଡେଏତୋ ।" 6 ଆମନ୍‌ତୁମ୍‌ ସଦାପ୍ରବୁ; ଆମନ୍‌ ରୁଆଙ୍‌, ରୁଆଙନ୍‌ ଆ ରୁଆଙ୍‌ ଡ ମଡ଼ିନ୍‌ ଆଜନବ୍‌ଜି ଅଡ଼୍‌କୋନ୍‌, ସମେଙ୍‌ଡ୍ରାନ୍‌ ଡ ସମେଁୟ୍‌ଣ୍ଡ୍ରାନ୍‌ ଆଅମ୍‌ ଅଡ଼୍‌କୋନ୍‌ ଆଜନବ୍‌ଜି ତୁବେନ୍‌ ଡ ଆମନ୍‌ ତି ଅଡ଼୍‌କୋନ୍‌ ପ୍ରାନାନ୍‌ ତି ଅଡ଼୍‌କୋନ୍‌ ଡକ୍କୋଆ ଡ ରୁଆଙନ୍‌ ଆସିପାଇଜି ଆମ୍ବେନ୍‌ ଲୋମତବେନ୍‌ । 7 ଆମନ୍‌ ମା ସଦାପ୍ରବୁ ଇସ୍ୱରନ୍‌, ଆମନ୍‌ ଅବ୍ରାମନ୍‌ଆଡଙ୍‌ ଉର୍‌ ସେଡାନ୍‌ ଆରି କଲ୍‌ଦିଅଞ୍ଜି ଆଡେସା ଉରନ୍‌ ସିଲଡ୍‌ ଆନିନ୍‌ଆଡଙ୍‌ ଅମ୍‌ଡୁଙ୍‌ଲେ ଓରୋଙ୍‌ଲେ ଅବ୍ରାଆମ୍‌ ଏବ୍‌ଞୁମ୍‌ଲାୟ୍‌; 8 ଆମନ୍‌ ତେମଡ୍‌ଲୋଙ୍‌ନମ୍‌ ଆ ଉଗ୍ଗରନ୍‌ ଡର୍ନେଡମ୍‌ ଗିଜେନ୍‌, ଆରି କିଣାନିଅ, ଇତିଅନ୍‌, ଇମୋରିଅନ୍‌ ଡ ପରିସିଅନ୍‌ ଡ ଜିବୁସିଅନ୍‌ ଡ ଗିର୍ଗାସିଅନ୍‌ ଆ ମନ୍‌ରାଜି ଆଡେସା ଆତନିୟ୍‌, ଆଗ୍ରାମ୍‌ଗାମ୍‌, ଆ କେଜ୍ଜାନ୍‌ଆଡଙ୍‌ ତନିୟନ୍‌ ଆସନ୍‌ ଆନିନ୍‌ ସରିନ୍‌ ବାସାଲନ୍‌, ଆରି ବର୍ନେନମ୍‌ ଗବ୍‌ଡେଲେନ୍‌; ଇନିଆସନ୍‌ଗାମେଣ୍ତେନ୍‌ ଆମନ୍‌ ଡରମ୍ମମର୍‌ । 9 ସିଲତ୍ତେ ଆମନ୍‌ ମିସର୍‌ ଡେସାଲୋଙ୍‌ ପୁର୍ବାଃ ଜୁଜୁଲେଞ୍ଜି ଆଡନଣ୍ତାୟ୍‌ ଗିଜେନ୍‌ ଆରି ଲୁଲୁ ସମେଁୟ୍‌ଣ୍ଡ୍ରାନ୍‌ ଆତୁୟାୟ୍‌ ଆୟନେଞ୍ଜି ଅମ୍‌ଡଙେନ୍‌; 10 ଆରି ପାରୋନ୍‌ ଡ ଆକମ୍ୱାରିନ୍‌ ଅଡ଼୍‌କୋନ୍‌ ଆରି ଆଡେସାନ୍‌ ଅଡ଼୍‌କୋନ୍‌ ଆମନ୍‌ରାଜି ଆଡଙ୍‌ ଏର୍ଜାଡ଼ିକାନ୍‌ ଆରମଡ୍‌ ଡ ସାନ୍ନି କାବ୍ବାଡ଼ାନ୍‌ ଅବ୍‌ତୁଜେନ୍‌; ଇନିଆସନ୍‌ଗାମେଣ୍ତେନ୍‌ ମିସରିଅଞ୍ଜି ଆବିରୁଦଲୋଙଞ୍ଜି ଆରବ୍‌ସୋଡ଼ାସୋଡ଼ାଲଞ୍ଜି ଆମନ୍‌ ଜନାଲମ୍‌; ତିଆସନ୍‌ ଆମନ୍‌ ନମି ଆନ୍ତାନ୍‌ ଅଞୁମ୍‌ ଅଡ଼େତେ ଅଡ଼େନେ ଜନାଜି । 11 ଆରି ଆମନ୍‌ ଆତେମ୍ମଡ୍‌ଲୋଙଞ୍ଜି ସମେଁୟ୍‌ଣ୍ଡ୍ରାନ୍‌ ବାଗଏନ୍‌, ସିଲତ୍ତେ ଆନିଞ୍ଜି ଆସର୍‌ ଲବଗଡ୍‌ ତଙିୟ୍‌ଲନ୍‌ ଆଜିର୍ରେଞ୍ଜି ଅନ୍ତମ୍‌ ମଡ୍ଡି ସମେଁୟ୍‌ଣ୍ଡ୍ରାନ୍‌ ଜିରେଞ୍ଜି; ବନ୍‌ଡ ଜରୁ ଡାଆଲୋଙନ୍‌ ଅରେଙନ୍‌ ଅନ୍ତମ୍‌ ଆମନ୍‌ ଆସରଣ୍ତୋଙେଞ୍ଜି ଆମନ୍‌ରାଜିଆଡଙ୍‌ ଜରୁଡମନ୍‌ ଆ ସମେଁୟ୍‌ଣ୍ତ୍ରାଲୋଙ୍‌ ସେଡେଞ୍ଜି । 12 ଆରି ଆମନ୍‌ ତମ୍ୱାନ୍‌ ମେଗସୋଣ୍ତାଙନ୍‌ ବାତ୍ତେ ଡ ତଗଲନ୍‌ ଆଜିର୍ରେଞ୍ଜି ଆତଙର୍‌ଲୋଙ୍‌ ଅନବ୍‌ସାଆରନ୍‌ ଆସନ୍‌ ତଗୋସୋଣ୍ତାଙନ୍‌ ବାତ୍ତେ ଆନିଞ୍ଜିଆଡଙ୍‌ ଅବ୍‌ତଙିଜେଞ୍ଜି । 13 ଆରି ଜାୟ୍‌ ଆମନ୍‌ ସିନୟ ବରୋନ୍‌ ପଡ୍‌ଲନ୍‌ ଆନିଞ୍ଜି ସରିନ୍‌ ରୁଆଙନ୍‌ ସିଲଡ୍‌ କଡାଡ଼ିଲନ୍‌ ଆରି ଆନିଞ୍ଜିଆଡଙ୍‌ ଆଜାଡ଼ି ସାସନନ୍‌ ଡ ଆଜାଡ଼ି ବନାଁୟ୍‌ବରନ୍‌, ମନଙ୍‌ ବନାଞନ୍‌ ଡ ଅନସଜନ୍‌ ତିୟେଞ୍ଜି; 14 ଆରି ଆନିଞ୍ଜିଆଡଙ୍‌ ମଡ଼ିର୍‌ଡମ୍‌ନମ୍‌ ଆ ଲୋଲୋନେ ଡିନ୍ନା ଅବ୍‌ଜନାଏଞ୍ଜି ଆରି କମ୍ୱାରିନମ୍‌ ମସାନ୍‌ ଆସିଲୋଙ୍‌ ଆନିଞ୍ଜିଆଡଙ୍‌ ବନାଞନ୍‌ ଡ ଅନସଜନ୍‌ ଡ ବନାଁୟ୍‌ବରନ୍‌ ତିୟେଞ୍ଜି; 15 ଆରି ଆଡୋଲଜଞ୍ଜି ଆସନବ୍‌ଙ୍ଗାୟ୍‌ ଆସନ୍‌ ଆନିଞ୍ଜିଆଡଙ୍‌ ରୁଆଙନ୍‌ ସିଲଡ୍‌ ଜନୋମନ୍‌ ତିୟେଞ୍ଜି ଆରି ଆଇର୍ଗାଲଞ୍ଜି ଆସନବ୍‌ଙ୍ଗାୟ୍‌ ଆସନ୍‌ ଅରେଙ୍‌ଲୋଙନ୍‌ ସିଲଡ୍‌ ଡାଆନ୍‌ ଅମ୍‌ଡୁଙେନ୍‌, ଆରି ଆମନ୍‌ ଆନିଞ୍ଜିଆଡଙ୍‌ ଅଙ୍ଗା ଆଡେସା ତନିୟନ୍‌ ଆସନ୍‌ ତେକେସିଲନ୍‌, ତି ଆଡେସା ଆଞନାଙ୍‌ ଆସନ୍‌ ଅମ୍ମନ୍‌ ଗନନନ୍‌ ଆସନ୍‌ ବାଞେନ୍‌ । 16 ବନ୍‌ଡ ଆନିଞ୍ଜି ଡ ପୁର୍ବାଃ ଜୋଜୋଲେଞ୍ଜି ଗର୍ବଲଞ୍ଜି ଆରି ରମ୍ମଙ୍‌ ରମ୍ମଙ୍‌ଆଡଙ୍‌ ଆଉଗ୍ଗର୍ ରବ୍‌ଡୋଏଞ୍ଜି ଆରି ବନାଁବର୍‌ଲୋଙ୍‌ମନ୍‌ ଅଡ୍ଡାଲୋଡ୍‌ଲଜି, 17 ଆରି ଆନିଞ୍ଜି ତିଆତେ ପାଡ଼େନେନ୍ ଆସନ୍‌ ଅଃଲଡୟ୍‌ଲଜି, ଆରି ଆମଙଞ୍ଜି ଆମନ୍‌ ଅଙ୍ଗା ସାନ୍ନି କାବ୍ବାଡ଼ାଜି ଲୁମେନ୍‌, ତିଆତେ ଆନିଞ୍ଜି ମନ୍ନେଲେ ଅଃଡ୍‌କ୍କୋଲଜି; ବନ୍‌ଡ ଆନିଞ୍ଜି ରମ୍ମଙ୍‌ ଆମନ୍ନଞ୍ଜି ରବ୍‌ଡୋଏଞ୍ଜି, ଆରି ମିସର୍‌ ଡେସାନ୍‌ ୟର୍ରନ୍‌ ଜିର୍ରେ କମ୍ୱାରିନ୍‌ ଡକୋନେନ୍‌ ଆସନ୍‌ ଗୋଡ଼େନ୍‌ ଅମ୍‌ଡୁଙ୍‌ଡାଲେ ଆଜିଞ୍ଜି ଅବୟ୍‌ ମନ୍‌ରାନ୍‌ଆଡଙ୍‌ ସୋଡ଼ାମର୍‌ ଅମ୍ମେଡାଲେ ତବ୍‌ନଙେଞ୍ଜି; ଡେଲୋଜନଙ୍‌ଡେନ୍‌ ଆମନ୍‌ ମନ୍‌ରାଞ୍ଜିଆଡଙ୍‌ କେମାନ୍‌ ତିୟ୍‌ତଜି, ଆମନ୍‌ ସନାୟୁମ୍‌ଡମ୍‌, ଡନୁଙ୍‌ୟମ୍‌ଡମ୍‌, ବନ୍‌ଡ୍ରାବ୍‌ଲୋଙନ୍‌ ଲବଡ୍ଡିଡମ୍‌ ଆରି ମନ୍‌ରାଞ୍ଜିଆଡଙ୍‌ ଆମନ୍‌ କାନକାରମ୍‌ ଆଗ୍ରାମ୍‌ତେନ୍‌ ଆ ଇସ୍ୱର, ତିଆସନ୍‌ ଆମନ୍‌ ଆନିଞ୍ଜିଆଡଙ୍‌ ଅଃନ୍ନମ୍‌ରେଙ୍‌ଲଜି । 18 ଓଓ, ଏତ୍ତେଲେ ଡ ଆନିଞ୍ଜି ଚଞ୍ଚନ୍‌ ବାତ୍ତେ ଅବୟ୍‌ କୋଙ୍‌ଡାଜନ୍‌ ତୁବେଞ୍ଜି କି ବର୍ରଞ୍ଜି, "ଅଙ୍ଗା କୋଙ୍‌ଡାୟ୍‌ ଆମ୍ୱେଞ୍ଜିଆଡଙ୍‌ ମିସର୍‌ ଡେସାନ୍‌ ସିଲଡ୍‌ ଅମ୍‌ଡୁଙ୍‌ଲେ ଓରୋଙ୍‌ଲବେନ୍‌, ତିଆତେ କେନ୍‌ ଆନିନ୍‌," ଏନ୍ନେଲେ ବର୍ରନ୍‌ ଆନିଞ୍ଜି ପ୍ରବୁନ୍‌ଆଡଙ୍‌ ଅଲ୍ଲଗନ୍‌ଡ୍ରୟ୍‌ ଅମ୍ମେଏଞ୍ଜି । 19 ତିଆଡିଡ୍‌ ଆମନ୍‌ ଆରି ଗୋଗୋୟ୍‌ କାନ୍‌କାରମ୍‌ନମ୍‌ ବାତ୍ତେ ଆନିଞ୍ଜିଆଡଙ୍‌ ଆରିଙ୍‌ରିଙ୍‌ଲୋଙନ୍‌ ଅଃନୁମ୍‌ରେଙ୍‌ଲଜି; ତଙରନ୍‌ ଆନବ୍ବ୍‌ତୁୟ୍‌ ଆସନ୍‌ ତମ୍ୱାନ୍‌ ମେଗସୋଣ୍ତାଙନ୍‌, ଅଡ଼େ ଆନିଞ୍ଜିଆଡଙ୍‌ ସାଆରନ୍‌ ଡ ଜନିର୍‌ ତଙରନ୍‌ ଆନବ୍ବ୍‌ତୁୟ୍‌ ଆସନ୍‌ ତଗଲନ୍‌ ଆଡିଡ୍‌ ତଗୋସୋଣ୍ତାଙନ୍‌ ଆମୁକ୍କାବାଞ୍ଜି ସିଲଡ୍‌ ଅଡ୍ଡେଲନ । 20 ଆମନ୍‌ ଆନିଞ୍ଜିଆଡଙ୍‌ ଞନଙନ୍‌ ଆତନିୟ୍‌ ଆସନ୍‌ ସୁକ୍କା ପରାନ୍ନାନମ୍‌ ତିୟେନ୍‌ ଆରି ମାନ୍ନାନମ୍‌ ଆଜନୋମ୍‌ ଆସନ୍‌ ଆନିଞ୍ଜିଆଡଙ୍‌ ଅଃଡ୍‌ରଙ୍‌ଲଜି ଆରି ଇର୍ଗାଲଞ୍ଜି ଆନବ୍‌ତଡ୍‌ତଡ୍‌ ଆସନ୍‌ ଆନିଞ୍ଜିଆଡଙ୍‌ ଡାଆନ୍‌ ତିୟେଞ୍ଜି । 21 ଆମନ୍‌ ବାକୁଡ଼ି ବର୍ସେଙ୍‌ ଜାୟ୍‌ ଆରିଙ୍‌ରିଙ୍‌ଲୋଙନ୍‌ ଆନିଞ୍ଜିଆଡଙ୍‌ ତୁର୍ଡାଏଞ୍ଜି, ଆନିଞ୍ଜି ଇନ୍ନିଙ୍‌ ଅବାବ ଅଡ୍ଡେଲଜି; ଆସିନ୍‌ରିଞ୍ଜି ଅପତ୍ତେଲୋ ଆରି ଆତାଲ୍‌ଜଙଞ୍ଜି ଅଃକୋଓଙ୍‌ଲୋ । 22 ଆରି ଆମନ୍‌ ଆନିଞ୍ଜିଆଡଙ୍‌ ଏର୍ଜାଡ଼ିକାନ୍‌ ଆ ରାଜ୍ୟ ଡ କେଜ୍ଜାନ୍‌ ତିୟେନ୍‌ ଆରି ତିଆତେ ଆବନତାଞ୍ଜି ଅନ୍ତମ୍‌ ଗବ୍‌ରିଏନ୍‌; ସିଲତ୍ତେ ଆନିଞ୍ଜି ସିଓନ ଡେସା, ଆଗ୍ରାମ୍‌ଗାମନ୍‌, ଇସେବନ୍‌ ରାଜାନ୍‌ ଆଡେସା ଡ ବାସନନ୍‌ ଓଗ୍‌ ରାଜାନ୍‌ ଆଡେସା ରୁଜେଞ୍ଜି । 23 ଆରି ଆମନ୍‌ ଆଅନଞ୍ଜିଆଡଙ୍‌ ରୁଆଙନ୍‌ ଆତୁତୁୟ୍‌ଜି ଅନ୍ତମ୍‌ ଅବ୍‌ଗୋଗୋଜେନ୍‌ ଆରି ଅଙ୍ଗା ଡେସା ଆନିଞ୍ଜି ଅଦିକାରବାନ୍‌ ଜିର୍ତଜି ଗାମ୍‌ଲେ ଆମନ୍‌ ଆପେୟଞ୍ଜିଆଡଙ୍‌ ବରେନ୍‌, ତି ଆଡେସାଲୋଙ୍‌ ଆନିଞ୍ଜିଆଡଙ୍‌ ଓରୋଙ୍‌ଲାଜି । 24 କେନ୍‌ ଅନ୍ତମ୍‌ ତି ଆଅନଞ୍ଜି ଡେସାଲୋଙନ୍‌ ଜିର୍ରେ ଅଦିକାରଏଞ୍ଜି, ଆରି ଆମନ୍‌ ଆମୁକ୍କାଲୋଙଞ୍ଜି ତି ଆଡେସାବାୟ୍‌ଜି କିଣାନିଅଞ୍ଜି ଅଃବାରେଏଞ୍ଜି ଆରି ଆନିଞ୍ଜି ଏଙ୍ଗାଲେ ରମ୍ମଙ୍‌ ଆଇସ୍ସୁମ୍‌ ଞନ୍‌ଡ୍ରମତଜି, କେନ୍‌ଆସନ୍‌ ଆନିଞ୍ଜିଆଡଙ୍‌ ଡ ଆରାଜାଞ୍ଜିଆଡଙ୍‌ ଡ ଡେସାନ୍‌ ଏର୍ଜାଡ଼ିକାନ୍‌ ଆକେଜ୍ଜାଆଡଙ୍‌ ଆସିଲୋଙଞ୍ଜି ସୋରୋପ୍ପାୟେନ୍‌ । 25 ସିଲତ୍ତେ ଆନିଞ୍ଜି କିନ୍ତାଲନ୍‌ ଆବଡ୍‌ବଡନ୍‌ ଆଗଡ଼ା ଅଡ଼୍‌କୋନ୍‌ ଡ ମନଙ୍‌ ଲବନ୍‌ ପାଙେଞ୍ଜି, ଏର୍ଜାଡ଼ିକାନ୍‌ ମନଙ୍‌ ଜନବ୍‌ଲୋଙନ୍‌ ଆବରିଜନ୍‌ ଆସିଙ୍‌, ଆଗନାୟ୍‌ କୁଆନ୍‌, ଦ୍ରାକ୍ୟାକୋତ୍ତାନ୍‌ ଡ ଜିତକୋତ୍ତାନ୍‌ ଡ ଜବ୍ର ଜଅନୁବଞ୍ଜି ଅଦିକାରଏଞ୍ଜି; ସିଲତ୍ତେ ଆନିଞ୍ଜି ଗାଗାଲନ୍‌ ବୋଓଏଞ୍ଜି ଡ ମରଙେଞ୍ଜି ଆରି ସୋଡ଼ା ତନିୟ୍‌ତିୟ୍‌ଲୋଙ୍‌ନମ୍‌ ସର୍ଡାଲଞ୍ଜି । 26 ଡେଲୋଜନଙ୍‌ଡେନ୍‌ ଆନିଞ୍ଜି ଆଲ୍ଲେମର୍‌ଜି ଡେଏଞ୍ଜି ଆରି ବିରୁଦଲୋଙ୍‌ନମ୍‌ ଗୋଡ଼େଲଞ୍ଜି ଆରି ବନାଁୟ୍‌ବର୍‌ନମ୍‌ ଆକୁନ୍‌ଡୋଙ୍‌ବାଞ୍ଜି ସେଡେଞ୍ଜି, ଆରି ଅଙ୍ଗା ପୁର୍ବାଃତେ ବର୍ନେମରଞ୍ଜି ଆନିଞ୍ଜିଆଡଙ୍‌ ଅମଙ୍‌ବାନମ୍‌ ଆରି ବତର ୟର୍ନେନ୍‌ ଆସନ୍‌ ଆନିଞ୍ଜିଆଡଙ୍‌ ଆବର୍ରଞ୍ଜି, ଆନିଞ୍ଜିଆଡଙ୍‌ ରବୁଏଞ୍ଜି ଆରି ଗଃରନ୍‌ରୟ୍‌ଡାନ୍‌ ଆକାବ୍ବାଡ଼ା ଲୁମେଞ୍ଜି । 27 ତିଆସନ୍‌ ଆମନ୍‌ ଆନିଞ୍ଜିଆଡଙ୍‌ ସଙ୍ଗତ୍ତାମରଞ୍ଜି ଆସିଲୋଙ୍‌ ଆ ସ୍ରୋରୋପ୍ପାୟେନ୍‌, ଆନିଞ୍ଜି ଆନିଞ୍ଜିଆଡଙ୍‌ ଡଣ୍ତାୟେଞ୍ଜି; ବନ୍‌ଡ ଡନଣ୍ତାୟନ୍‌ ଆଞରାଙେଞ୍ଜି ଆଡିଡ୍‌ ଆନିଞ୍ଜି ଅମଙ୍‌ବାନମ୍‌ କାକୁର୍ତିଲନ୍ ୟେୟେଡାଲଞ୍ଜି, ଆମନ୍‌ ରୁଆଙନ୍‌ ସିଲଡ୍‌ ତିଆତେ ଅମ୍‌ଡଙେନ୍‌; ଆରି, ସୋଡ଼ା କାନ୍‌କାରମ୍‌ନମ୍‌ ବାତ୍ତେ ଆନିଞ୍ଜିଆଡଙ୍‌ ଆସଙ୍ଗତ୍ତାଞ୍ଜି ଆସି ସିଲଡ୍‌ ଆନିଞ୍ଜିଆଡଙ୍‌ ଡୋବେଞ୍ଜି । 28 ବନ୍‌ଡ ଆନିଞ୍ଜି ଲୋଲୋନେନ୍‌ ଆଞରାଙେଞ୍ଜି ସିଲଡ୍‌ଲ୍ଲନ୍‌ ଆରି ବତର ଗନିୟ୍‌ଗିୟ୍‌ଲୋଙ୍‌ନମ୍‌ ଇର୍ସେ କାବ୍ବାଡ଼ାନ୍‌ ଲୁମେଞ୍ଜି; ତିଆସନ୍‌ ଆମନ୍‌ ଆନିଞ୍ଜିଆଡଙ୍‌ ଆବନେରାଞ୍ଜି ଆସିଲୋଙ୍‌ ସୋରୋପ୍ପାୟେନ୍‌, ଆନିଞ୍ଜି ଆନିଞ୍ଜିଆଡଙ୍ ସାସନଏଞ୍ଜି, ଡେଲୋଜନଙ୍‌ଡେନ୍‌ ଅଙ୍ଗା ଆଡିଡ୍‌ ଆନିଞ୍ଜି ୟର୍ରନ୍‌ ଅମଙ୍‌ବାନମ୍‌ ୟେଏଞ୍ଜି, ତିଆଡିଡ୍‌ ଆମନ୍‌ ରୁଆଙନ୍‌ ସିଲଡ୍‌ ତିଆତେ ଅମ୍‌ଡଙେନ୍‌; ଆରି, ଜବ୍ର ତର ଆମନ୍‌ କାନ୍‌କାରମ୍‌ନମ୍‌ ବାତ୍ତେ ଆନିଞ୍ଜିଆଡଙ୍‌ ଡୋବେନ୍‌ । 29 ଆରି, ଆନିଞ୍ଜିଆଡଙ୍‌ ଆରି ବତର ବନାଁୟ୍‌ବର୍‌ନମ୍‌ ଅନ୍ତମ୍‌ ଆତଙର୍‌ଗଡ୍‌ ଆନୋରୋଙ୍‌ ଆସନ୍‌ ଆନିଞ୍ଜିଆଡଙ୍‌ ଅବ୍‌ଜାଗର୍ତଏଞ୍ଜି; ଡେଲୋଜନଙ୍‌ଡେନ୍‌ ଆନିଞ୍ଜି ଗର୍ବଲଞ୍ଜି ଆରି ବନାଁୟ୍‌ବର୍‌ନମ୍‌ ଅଡ୍ଡାଲୋଡ୍‌ଲଜି, ବନ୍‌ଡ ଅଙ୍ଗାତେ ମନ୍‌ରାନ୍‌ ମାନ୍ନେଏନ୍‌ଡେନ୍‌ ଅମେଙ୍‌ତେ, ତି ସାସନନମ୍‌ ଆ ବିରୁଦଲୋଙ୍‌ ଇର୍ସେନ୍‌ ଲୁମେଞ୍ଜି, ଆରି ଅଃଡ୍ଡାଲୁଡ୍‌ଲଜି ଡ ରମ୍ମଙ୍‌ ରମ୍ମଙ୍‌ ମନ୍ନ ରବ୍ବ୍‌ଡୋଏଞ୍ଜି ଆରି ଅନମ୍‌ଡଙନ୍‌ ଆସନ୍ ଅନଡ଼େଲଜି । 30 ଡେଲୋଜନଙ୍‌ଡେନ୍‌ ଜବ୍ର ବର୍ସେଙ୍‌ ଜାୟ୍‌ ଆବର୍ନେଞ୍ଜି ସଏଏନ୍‌, ଆରି ପୁରାଡ଼ାନମ୍‌ ବାତ୍ତେ ପୁର୍ବାଃତେ ବର୍ନେମରଞ୍ଜି ସନ୍‌ଲେ ଆନିଞ୍ଜିଆଡଙ୍‌ ଅବ୍‌ଜାଗର୍ତଏଞ୍ଜି; ବନ୍‌ଡ ଆନିଞ୍ଜି ଅନମ୍‌ଡଙନ୍‌ ଆସନ୍‌ ଅସାଏଞ୍ଜି; ତିଆସନ୍‌ ଆମନ୍‌ ଆନିଞ୍ଜିଆଡଙ୍‌ ବଡେସାବାୟ୍‌ ଆକେଜ୍ଜାଜି ଆସିଲୋଙ୍‌ ସୋରୋପ୍ପାୟେନ୍‌ । 31 ଡେଲୋଜନଙ୍‌ଡେନ୍‌ ଆମନ୍‌ ଜବ୍ର ସନାୟୁମ୍‌ଡମ୍‌ନମ୍‌ ଆସନ୍ ଆନିଞ୍ଜିଆଡଙ୍‌ ଅଃନବ୍‌ଗୁରୁଡ୍ଡେଲଜି, ଅଡ଼େ ଆନିଞ୍ଜିଆଡଙ୍‌ ଅଃନ୍ନମ୍‌ରେଙ୍‌ଲଜି; ଇନିଆସନ୍‌ଗାମେଣ୍ତେନ୍‌ ଆମନ୍‌ କାନ୍‌କାରମ୍‌ଡାମର୍‌ ଆରି ସନାୟୁମ୍‌ମର୍‌ ଇସ୍ୱର । 32 ତିଆସନ୍‌ ଏ ଇସ୍ୱରଲେନ୍‌, ଜବ୍ର ସୋଡ଼ା, ରନପ୍ତିଡମ୍‌ ଆରି ବରନ୍ତଙନ୍‌ ଆ ଇସ୍ୱର, ଆମନ୍‌ ଅନସଜନ୍‌ ଡ ସନାୟୁମନ୍‌ ମାନ୍ନେତେ, ଅସୁରିଅ ରାଜାଞ୍ଜି ଆବେଡ଼ା ସିଲଡ୍‌ ଲଙେ ଜାୟ୍‌ ଆଉପ୍ରେଙ୍‌ଲୋଙଞ୍ଜି, ରାଜାଲେଞ୍ଜି ଆଉପ୍ରେଙ୍‌ଲୋଙ୍‌, ସୋଡ଼ାମର୍‌ଲେଞ୍ଜି ଆଉପ୍ରେଙ୍‌ଲୋଙ୍‌ ଡ ରାଓଡ଼ାଲେଞ୍ଜି ଆଉପ୍ରେଙ୍‌ଲୋଙ୍‌ ଡ ପୁର୍ବାଃତେ ବର୍ନେମରଞ୍ଜି ଆଉପ୍ରେଙ୍‌ଲୋଙ୍‌ ଡ ଆପେୟ୍‌ଲେଞ୍ଜି ଆଉପ୍ରେଙ୍‌ଲୋଙ୍‌ ଅଡ଼୍‌କୋ ମନ୍‌ରାନମ୍‌ଞ୍ଜି ଆଉପ୍ରେଙ୍‌ଲୋଙ୍‌ ଇନି ଇନିଜି ପନରଡନ୍‌ ଗଡେଏନ୍‌, ତିଅଡ଼୍‌କୋନ୍‌ ଗନିୟ୍‌ଗିୟ୍‌ଲୋଙ୍‌ନମ୍‌ ସନ୍ନାଡମ୍‌ ଗିୟ୍‌ତାଡଙେ ତଡ୍‌ । 33 ଡେଲୋଜନଙ୍‌ଡେନ୍‌ ଇନ୍‌ଲେଞ୍ଜି ଆସନ୍‌ ଇନି ଇନିଜି ଗଡେଏନ୍‌, ତିଅଡ଼୍‌କୋଲୋଙନ୍‌ ଆମନ୍‌ ଡରମ୍ମଡମ୍‌; ଇନିଆସନ୍‌ଗାମେଣ୍ତେନ୍‌ ଆମନ୍‌ ଆଜାଡ଼ିନ୍‌ ବାତ୍ତେ ଞଣ୍ତ୍ରମେନ୍‌, ବନ୍‌ଡ ଇନ୍‌ଲେଞ୍ଜି ଇର୍ସେ କାବ୍ବାଡ଼ାନ୍‌ ଏଲୁମ୍‌ଲାୟ୍‌ । 34 ଆରି ରାଜାଲେଞ୍ଜି, ସୋଡ଼ାମର୍‌ଲେଞ୍ଜି, ରାଓଡ଼ାଲେଞ୍ଜି ଅଡ଼େ ଆପ୍ପେୟ୍‌ଲେଞ୍ଜି ବନାଁୟ୍‌ବର୍‌ନମ୍‌ ଅଃମ୍ମାନ୍ନେଲଜି, ଅଡ଼େ ଆମନ୍‌ ଅଙ୍ଗା ବନାଁଞ୍‌ ଡ ସାକିନ୍‌ ବାତ୍ତେ ଆନାଞ୍ଜିଆଡଙ୍‌ ଜାଗର୍ତେଞ୍ଜି, ବନ୍‌ଡ ଅଃନ୍ନମ୍‌ଡଙ୍‌ଲଜି । 35 ତିଆସନ୍‌ ଆନିଞ୍ଜି ରମ୍ମଙ୍‌ ଆରାଜ୍ୟଲୋଙଞ୍ଜି, ଆନିଞ୍ଜିଆଡଙ୍‌ ଆମନ୍‌ ଆତ୍ରିୟେନ୍‌ ଜବ୍ର ସନାୟୁମ୍‌ଲୋଙନ୍‌ ଡ ଆତେମଡ୍ଡ୍‌ଲୋଙଞ୍ଜି ତନିୟ୍‌ନମ୍‌ ଆ ଲନାଆଙ୍‌ ଡ ମନଙ୍‌ ଡେସାଲୋଙନ୍‌ ଆମନ୍‌ଆଡଙ୍‌ ଅସେବାଲମ୍‌ଞ୍ଜି, ଅଡ଼େ ରମ୍ମଙ୍‌ ରମ୍ମଙ୍‌ ଆଇର୍ସେ କାବ୍ବାଡ଼ାନ୍‌ ସିଲଡ୍‌ ଅଃୟର୍ରନାଜି । 36 ଗିଜା ଲଙେ ଇନ୍‌ଲେଞ୍ଜି କମ୍ୱାରିମର୍‌ ଡେଲଲେନ୍‌! ଆରି ଆମନ୍‌ ପୁର୍ବାଃ ଜୋଜୋଲେଞ୍ଜିଆଡଙ୍‌ ଅଙ୍ଗା ଡେସା ଆ ଜଅ ଡ ମନଙ୍‌ ଜନବନ୍‌ ଆଜନୋମ୍‌ ଆସନ୍‌ ତିୟେନ୍‌, ଗିଜା, ତି ଆଡେସାଲୋଙ୍‌ ଇନ୍‌ଲେଞ୍ଜି କମ୍ୱାରିମର୍‌ ଡେଲଲେନ୍‌ । 37 ଆରି, ଇର୍ସେଲେନ୍‌ ଆସନ୍‌ ଆମନ୍‌ ଅଙ୍ଗା ରାଜାଜିଆଡଙ୍‌ ଉପ୍ରେଙ୍‌ଲେନ୍‌ ରାଜାଗଡନ୍‌ ଆସନ୍‌ ତବ୍‌ନଙେନ୍‌, ଆନିଞ୍ଜି ତି ଆଡେସା ଜବ୍ର ଜଅନ୍‌ ଅବ୍‌ଜଅଲେ ଜୋମ୍‌ତଜି; ଆରି ନିୟ୍ ଡଅଙ୍‌ଲୋଙ୍‌ଲେନ୍‌ ଆଉପ୍ରେଙ୍‌ଲୋଙ୍‌ ଡ ଜନ୍ତୁଲେଞ୍ଜି ଆଇସ୍ସୁମ୍‌ଡମଞ୍ଜି ଞର୍ରମ୍‌ତଜି, ଆରି ଇନ୍‌ଲେଞ୍ଜି ସୋଡ଼ା ଡନଣ୍ତାୟ୍‌ଲୋଙନ୍‌ ଡକୋ; 38 କେନ୍‌ ଅଡ଼୍‌କୋନ୍‌ ଗଟେଏନ୍‌ ଜନଙ୍‌ଡେନ୍‌ ଇନ୍‌ଲେଞ୍ଜି ଅବୟ୍‌ ଆଜାଡ଼ି ଅନସଜନ୍‌ ତୁବ୍‌ଲେ ଏଇଡ୍‌ତାୟ୍‌; ଆରି ଆମ୍ମୁଙ୍‌ଗଡ୍‌ମର୍ବେଞ୍ଜି, ଲେବିଅ ମର୍‌ଲେଞ୍ଜି ଡ ରାଓଡ଼ା ମର୍‌ଲେଞ୍ଜି ତିଆତେ ସିଲୁଏଞ୍ଜି ।