ଡୋଲେୟ୍ମରଞ୍ଜିଆଡଙ୍ ନିଇମିଆନ୍ ଆଉପ୍ରେଙ୍ ଡୁକାନ୍ ଏତିୟ୍ଡଙ୍
1 ତିସିଲଡ୍ ଜିଉଦି ବୋଞାଙଞ୍ଜି ଆ ବିରୁଦଲୋଙ୍ ମନ୍ରାଞ୍ଜି ଡ ଆଡୁକ୍ରିଞ୍ଜି ନିଣ୍ଡୟ୍ଲେ ବର୍ରଞ୍ଜି । 2 ଇନିଆସନ୍ଗାମେଣ୍ତେନ୍ ଆନା ଆନା ବର୍ରଞ୍ଜି, "ଇନ୍ଲେଞ୍ଜି, ଡାଙ୍ଗାଡ଼ାଅନ୍ଲେନ୍ ଡ ଡାଙ୍ଗଡ଼ିଅନଞ୍ଜି ସରିନ୍ ଗୋଗୋୟ୍ ମନ୍ରା ଡେତଲେନ୍; ତିଆସନ୍ ଇନ୍ଲେଞ୍ଜି ଜନ୍ରୋମନ୍ ପାଙ୍ଲେ ଜୋମ୍ଲେ ଅମେଙ୍ଲଙ୍ନେତୋ ।" 3 ଆରି ଆନା ଆନା ବର୍ରଞ୍ଜି, "ଇନ୍ଲେଞ୍ଜି ରମ୍ମଙ୍ ରମ୍ମଙ୍ ଆଜନ୍ରୋମାଲ୍ ଡ ଦ୍ରାକ୍ୟାକୋତାନ୍ ଡ ଅସିଙନ୍ ଏଙ୍ଗାଲେ କାନ୍ତାରାନ୍ ଆଡିନ୍ନାଲୋଙ୍ ଇନ୍ଲେଞ୍ଜିଆଡଙ୍ ଜନ୍ରୋମନ୍ ଆଞନାଙ୍ ଆସନ୍ ଏବଣ୍ତାଲାୟ୍ ।" 4 ଆରି, ଲାଙ୍ଲେନ୍ନେ ବର୍ରଞ୍ଜି, "ଇନ୍ଲେଞ୍ଜି ରାଜାନ୍ ଆପାନୁ ଆତନିୟ୍ ଆସନ୍ ରମ୍ମଙ୍ ରମ୍ମଙ୍ ଆଜନ୍ରୋମାଲ୍ ଡ ଦ୍ରାକ୍ୟାକୋତ୍ତାନ୍ ବଣ୍ତାଲେ ଡାବ୍ବୋନ୍ ଏସାଉଲନାୟ୍ ।" 5 ବନ୍ଡ ଡଅଙ୍ଲେନ୍ ଡ ବୋଞାଙ୍ଲେଞ୍ଜି ଆଡଙ୍ ଆବସରିନ୍, ଅଅନ୍ଲେଞ୍ଜି ଡ ଆଅନଞ୍ଜି ଆବସରିନ୍; ଡେଲୋଜନଙ୍ଡେନ୍ ଗିୟ୍ବା, ଇନ୍ଲେଞ୍ଜି ରମ୍ମଙ୍ ରମ୍ମଙ୍ ଆଡାଙ୍ଗାଡ଼ାଅନ୍ ଡ ଡାଙ୍ଗଡ଼ିଅନଞ୍ଜିଆଡଙ୍ କମ୍ୱାରି କାବ୍ବାଡ଼ାନ୍ ଆଲନୁମ୍ ଆସନ୍ ଏତମ୍ଲାୟ୍, ଆରି ଡାଙ୍ଗଡ଼ିଅନ୍ଲେଞ୍ଜି ସିଲଡ୍ ଆନା ଆନା କମ୍ୱାରିବଜନ୍ ଡେଏଞ୍ଜିନି; ଅସିଲୋଙ୍ଲେନ୍ ଆରି ଇନ୍ନିଙ୍ ଅବୟ୍ତଡ୍; ଇନିଆସନ୍ଗାମେଣ୍ତେନ୍ ଆନ୍ନାମରଞ୍ଜି ଜନ୍ରୋମାଲ୍ଲେନ୍ ଡ ଦ୍ରାକ୍ୟାକୋତ୍ତାନ୍ ରୁୟ୍ଲେ ପାଙାଜେଞ୍ଜି ।
6 ତିଆଡିଡ୍ ଞେନ୍ ଆୟନେଞ୍ଜି ଡ କେନ୍ ଆବର୍ନେ ଅଡ଼୍କୋନ୍ ଅମ୍ଡଙ୍ଲେ ଗୋଗୋୟ୍ ବରାବ୍ଲିଁ । 7 ଆରି, ମନଲୋଙ୍ଞେନ୍ ଇୟ୍ୟମ୍ଲାୟ୍, ଆରି ମନାନ୍ନେମରଞ୍ଜି ଡ ସୋଡ଼ାମରଞ୍ଜି ସରିନ୍ କଡାଡ଼ିଲନ୍ ଆନିଞ୍ଜିଆଡଙ୍ ବର୍ରାଜି, "ଆମ୍ୱେଞ୍ଜି ଡିଲେ ମନ୍ରାନ୍ ରମ୍ମଙ୍ ରମ୍ମଙ୍ ବୋଞାଙ୍ବେନ୍ ଆମଙ୍ସିଲଡ୍ ଆଅନ୍ଡାବନ୍ ଏପାଙ୍ତେ ।" ସିଲତ୍ତେ ଞେନ୍ ଆ ବିରୁଦଲୋଙଞ୍ଜି କାୟ୍କାୟ୍ଲାୟ୍ । 8 ଆରି, ଞେନ୍ ଆନିଞ୍ଜିଆଡଙ୍ ବର୍ରାୟ୍, "ଜିଉଦି ବୋଞାଙ୍ଲେଞ୍ଜି ବଡେସାବାୟ୍ଜି ଆମଙ୍ଲୋଙ୍ ତନମନ୍ ଡେଏଞ୍ଜି, ଇନ୍ଲେଞ୍ଜି ଆନିଞ୍ଜିଆଡଙ୍ ରନପ୍ତିଲୋଙ୍ଲେନ୍ ଏଉର୍ରାଜି, ଆମ୍ୱେଞ୍ଜି ନମି ଇନି ବୋଞାଙ୍ବେଞ୍ଜିଆଡଙ୍ ଏତମ୍ତେଜି ପଙ୍ ? ଆରି ଆନିଞ୍ଜି ଇନି ଅମଙ୍ବାଲେନ୍ ତନମନ୍ ଡେତଜି ?" ଆନିଞ୍ଜି ରିଙ୍ଲନ୍ ଡକୋଲଞ୍ଜି, ଇନ୍ନିଙ୍ ଜାଲଙ୍ଲେ ଅରପ୍ତିଲୋଜି । 9 ଆରି, ଞେନ୍ ବର୍ରନାୟ୍, "ଆମ୍ୱେଞ୍ଜି ଅଙ୍ଗା ଆକାବ୍ବାଡ଼ା ଏଲୁମ୍ତେ, ତିଆତେ ମନଙ୍ତଡ୍, ବନେରାମର୍ଲେଞ୍ଜି ବଡେସାବାୟ୍ଜି ଆଗନବ୍ରୟ୍ମଡ୍ ଆଡନଙ୍ ଆସନ୍ ଇସ୍ୱରଲେନ୍ ଆଡଙ୍ ବତଙ୍ଲେ ଅମେଙ୍ଲନ୍ ଆଡକୋନେ ଆସନ୍ ଅଲ୍ଲଡୟ୍ବେନ୍ ? 10 ଆରି ଜାୟ୍ ଞେନ୍, ବୋଞାଙ୍ଞେଞ୍ଜି ଡ କମ୍ୱାରିଞେଞ୍ଜି ଆଅନ୍ଡାବ୍ଲୋଙ୍ ଆନିଞ୍ଜିଆଡଙ୍ ଡାବ୍ବୋନ୍ ଡ ଜନ୍ରୋମନ୍ ସାଉନ୍ ଏତିୟ୍ତାଜି । ବନ୍ଡ ଇନ୍ଲେଞ୍ଜି କେନ୍ ଆସାଉ, ଆଅନ୍ଡାବନ୍ ପନାଙ୍ ଆସନ୍ ଡଙ୍ବା ।" 11 ଆମ୍ୱେଞ୍ଜି ଆଜନ୍ରୋମାଲଞ୍ଜି, ଆ ଦ୍ରାକ୍ୟାକୋତ୍ତାଞ୍ଜି, ଆ ଜିତ କୋତ୍ତାନ୍ ଡ ଆସିଙଞ୍ଜି, ଆରି ଆମଙଞ୍ଜି ସିଲଡ୍ ଡାବ୍ବୋନ୍ ଡ ଜନ୍ରୋମନ୍, ଦ୍ରାକ୍ୟାଡାନ୍ ଡ ମିଞଲନ୍ ଅଙ୍ଗା ଆଅନ୍ଡାବ୍ ଆମ୍ୱେଞ୍ଜି ଏପାଙେନ୍, ତିଆତେ ଲଙେ ଆନିଞ୍ଜିଆଡଙ୍ ଆବ୍ଡିଡ୍ବାଜି ।
12 ସିଲତ୍ତେ ଆନିଞ୍ଜି ବର୍ରଞ୍ଜି, "ଇନ୍ଲେଞ୍ଜି ଇନିଜି ଏପାଙେନ୍ ତିଆତେଜି ଏଆବ୍ଡିଡ୍ତାୟ୍ ଆରି ଆନିଞ୍ଜିଆଡଙ୍ ଇନ୍ନିଙ୍ ଏବେଡାଜି; ଆମନ୍ ଏଙ୍ଗାଲେ ବର୍ତନେ, ଇନ୍ଲେଞ୍ଜି ତିଅନ୍ତମ୍ ଏଲୁମ୍ତାୟ୍ ।" ସିଲତ୍ତେ ଞେନ୍ ରାଓଡ଼ାଞ୍ଜିଆଡଙ୍ ଓଡ୍ଡେଲେ କେନ୍ ଆସନିବ୍ଡୟ୍ ଅନ୍ତମ୍ ଆନିଞ୍ଜି ଏଙ୍ଗାଲେ କାବ୍ବାଡ଼ାତଞ୍ଜି, ତିଆସନ୍ ଆନିଞ୍ଜିଆଡଙ୍ ଅଃପର୍ମାଡ଼ାଲାଜି । 13 ଆରି ଞେନ୍ କୁନ୍ଡୁବ୍ଞେନ୍ ୟୁର୍ରେ ବର୍ରନାୟ୍, "ଆନାଜାକିଁ କେନ୍ ସିବ୍ଡୟ୍ବରନ୍ ଅଃମ୍ମାନେଲଡେନ୍, ଇସ୍ୱରନ୍ ଆସିଙନ୍ ଡ ଆକ୍ରାବ୍ବାଡ଼ାନ୍ ଆବଡି ସିଲଡ୍ ଆନିନ୍ଆଡଙ୍ କେନ୍ଅନ୍ତମ୍ ୟୁରେତୋ; ଆନିନ୍ କେନ୍ଅନ୍ତମ୍ ୟନୁରନ୍ ଡେଏତୋ ଆରି ରିକାଏତୋ ।" ସିଲତ୍ତେ ଅଡ଼୍କୋନ୍ ଆ ରନୁକୁ ବର୍ରଞ୍ଜି "ଆମେନ୍" ଆରି ପ୍ରବୁନ୍ ଆଡଙ୍ ସେଙ୍କେନେଞ୍ଜି । ତିସିଲଡ୍ ମନ୍ରାଞ୍ଜି କେନ୍ ଆ ସନିବ୍ଡେୟ୍ବର୍ ଅନ୍ତମ୍ କାବ୍ବାଡ଼ାଲଞ୍ଜି ।
ଆନ୍ନାମରଞ୍ଜି ଆସନ୍ ନିଇମିଆନ୍ ଆନିୟମ୍
14 ଆରି, ଞେନ୍ ଜିଉଦା ଡେସାଲୋଙ୍ ଆସୋଡ଼ାମରଞ୍ଜି ତନବ୍ନଙନ୍ ଆଡ୍ରେଲିଞନ୍ ଆଡିଡ୍ ସିଲଡ୍, ଆଗ୍ରାମ୍ଗାମ୍, ଅର୍ତକସ୍ତର ରାଜାନ୍ ଆରାଜାଗଡ୍ ବକୁଡ଼ି ବର୍ସେଙ୍ ସିଲଡ୍ ବତିସି ବର୍ସେଙ୍ ଜାୟ୍ ବାର ବର୍ସେଙ୍ ଞେନ୍ ଡ ବୋଞାଙ୍ଞେଞ୍ଜି ସରିନ୍ ଡେସାନ୍ ଆସୋଡ଼ାମର୍ ଆଜନୋମ୍ ଏଃଜୋମ୍ଲାୟ୍ । 15 ବନ୍ଡ ଞେନ୍ ଆମ୍ମୁଙ୍ ଡେସାନ୍ ଆସୋଡ଼ାମର୍ଜି ଆଜନୋମ୍ ବୁଡ଼ାର୍ ମନ୍ରାଞ୍ଜିଆଡଙ୍ ଜଃଜ୍ଜେଞ୍ଜି, ଆରି ଆନିଞ୍ଜି ବାକୁଡ଼ି ସେକଲ ରୁପା ଡାବାନ୍ ଡ ଜନୋମ୍ଜୋମନ୍ ଡ ଦ୍ରାକ୍ୟାଡାନ୍ ମନ୍ରାଞ୍ଜି ଆମଙ୍ ସିଲଡ୍ ପାଙେଞ୍ଜି; ଆଡିୟ୍ତେନ୍ ତୁମ୍ତଡ୍, ଆକମ୍ୱାରିଞ୍ଜି ମନ୍ରାଞ୍ଜିଆଡଙ୍ ଗୁୟ୍ଡାଏଞ୍ଜି; ବନ୍ଡ ଞେନ୍ ଇସ୍ୱରନ୍ ବରଙ୍ଡାଲେ ଞେନ୍ ତିଅନ୍ତମ୍ ଏଃଲୁମ୍ଲାୟ୍ । 16 ବନ୍ଡ ଞେନ୍ କିନ୍ତାଲନ୍ ଆବନଡ୍ଲୋଙ୍ ମଗାଡ୍ଲେ ଡକୋଲିଁ ଆରି ଇନ୍ଲେଞ୍ଜି ଇନ୍ନିଙ୍ ଆଲବ ଏଞିଲାୟ୍; ଆରି କମ୍ୱାରିଞେଞ୍ଜି ଅଡ଼୍କୋନ୍ କାବ୍ବାଡ଼ାଲୋଙନ୍ ତେତ୍ତେ ରୁକୁଲଞ୍ଜି । 17 ଡେଲୋଜନଙ୍ଡେନ୍ ଏର୍ରେ ଅମଙ୍ବାଲେନ୍ ବଡେସାବାୟ୍ଜି ଆମଙ୍ ସିଲଡ୍ ଅମଙ୍ବାଲେନ୍ ଆଜିରାଞ୍ଜି ଆମନ୍ରା ଅମ୍ରେଙ୍ଲେ ଜିଉଦିନ୍ ଡ ସୋଡ଼ାମରନ୍ ବସଅ ପସାସ ମନ୍ରା ଗରାଗାଲୋଙ୍ଞେନ୍ ତଙ୍କୁମେଞ୍ଜି । 18 ଆଏଡ଼ର୍ ତି ଆଡିଡ୍ ଅବୟ୍ ଜେଲ୍ଜେଲ୍ ଜନ୍ତୁନ୍ ଡ ତୁଡ୍ରୁ ଆସନେଡାନ୍ ମେଣ୍ଡା ଜେଲନ୍ ଡିଞେଞ୍ଜି; ଆରି ଞେନ୍ ଆସନ୍ ଲାଙ୍ଲେଡ୍ ଅନ୍ତିଡ୍ ଜେଲନ୍ ଡିଞେଞ୍ଜି ଡ ଦସଡିନ୍ନାନ୍ ବତର ତରଙ୍ଆନ୍ନା ଆ ଦ୍ରାକ୍ୟାଡା ଞନିନ୍ ଡେଏନ୍; ଡେଲୋଜନଙ୍ଡେନ୍ କେନ୍ ଅଡ଼୍କୋନ୍ ଆସନ୍ ଞେନ୍ ଡେସାନ୍ ଆସୋଡ଼ାମର୍ଜି ଆଜନୋମ୍ ଅନାଙାଙ୍ଲାୟ୍, ଇନିଆସନ୍ଗାମେଣ୍ଡେନ୍ କେନ୍ ଆମନ୍ରାଜି ଆତୋଣ୍ତୋଲୋଙ୍ କମ୍ୱାରିଲୁମନ୍ ଆବୁଡ଼ାର୍ ଗୋଗୋୟ୍ ଡକୋଏନ୍ । 19 ଏ ଇସ୍ୱରଞେନ୍, କେନ୍ ଆମନ୍ରାଜି ଆସନ୍ ଞେନ୍ ଅଙ୍ଗା ଅଙ୍ଗା ଆକାବ୍ବାଡ଼ା ଲୁମ୍ଲାୟ୍, ସନୁକ୍କାଞେନ୍ ଆସନ୍ ତି ଅଡ଼୍କୋନ୍ ମନେଆ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)