1 ଦାଉଦନ୍‌ ଆ ଡାଙ୍ଗଡ଼ାଅନ୍‌ ଇସ୍ରାଏଲନ୍‌ ଆରାଜା ସୋଲ୍‌ମନନ୍‌ ଆମନଙ୍‌ ଞନଙ୍‌ଞଙ୍‌ବର୍‌,

2 ଗିଆନନ୍‌ ଡ ଞନଙ୍‌ବରନ୍‌ ଆଜନନା ଆସନ୍‌; ଗିଆନବରନ୍‌ ଆବର୍ନେ ଆନିୟମ୍‌ ଆସନ୍‌; 3 ମନଙ୍‌ ଞଣ୍ତ୍ରମ୍‌ନେନ୍‌, ବୟ୍‌ଲେଗଡନ୍‌ ଡ ମନଙ୍‌ ଅନିୟମନ୍‌ ଆରି ନିଆୟନ୍‌ ଆ ବିସୟଲୋଙ୍‌ ଞନଙନ୍‌ ଆଜନା ଆସନ୍‌, 4 ଆନିଞ୍ଜି ଏର୍‌ଜନନାନ୍‌ ଆମନ୍‌ରାଜିଆଡଙ୍‌ ଅବ୍‌କିଲ୍‌କିଲ୍‌ତଜି,ଆରି ବେଣ୍ତିଆସିଜଞ୍ଜି ଏଙ୍ଗାଲେ ପଡ଼େନେନ୍‌ ଡ ମନଙ୍‌ ଅନିୟମନ୍‌ ଡେତେ, ତିଆତେ ରପ୍ତି ଞଙ୍‌ଞଙ୍‌ତଜି; 5 ଏଙ୍ଗାଲେ ଗିଆନମରନ୍‌ ତିଆତେ ଅମ୍‌ଡଙ୍‌ଲେ ପଣ୍ତିତଲୋଙନ୍‌ ଗୋଗୋୟ୍‌ତେ ଆରି ବୁଡ୍ଡିମରନ୍‌ ମନଙ୍‌ ଞନଙ୍‌ଞଙ୍‌ବରନ୍‌ ଞାଙ୍‌ତେ, 6 ଆରି ଅବୟ୍‌ ଞନଙ୍‌ବରନ୍‌ ଡ ଅବୟ୍‌ ସୋବ୍‌ସୋବ୍‌ବରନ୍‌ ଆରି ପଣ୍ତିତଞ୍ଜି ଆବର୍ନେ ଡ ଆ ଜରୁବରଞ୍ଜି ଗନ୍‌ଲୁଡ୍‌ତବେନ୍‌ ।

7 ପ୍ରବୁନ୍‌ ଆବର୍ନେ ଆବନତଙ୍‌, ଗିଆନନ୍‌ ଆସନୁସୁ, ବନ୍‌ଡ ଏର୍‌ବୁଡ୍ଡିମରଞ୍ଜି ଗିଆନନ୍‌ ଡ ଞନଙ୍‌ବରନ୍‌ ଆଲ୍ଲେତଜି ।

8 ଏ ଅ ଅନ୍‌ଞେନ୍‌, ଆପ୍ପେୟ୍‌ନମ୍‌ ଆ ଞନଙ୍‌ବର୍‌ ଅମ୍‌ଡଙା ଆରି ଅୟୁଙ୍‌ନମ୍‌ ଆବନାଁୟ୍‌ ଅମ୍‌ରେଙ୍‌ଡଙେ । 9 ଇନିଆସନ୍‌ଗାମେଣ୍ତେନ୍‌ ତିଆତେ ଅବବ୍‌ନମ୍‌ ଆସନାୟୁମ୍‌ ରନୁବ୍ବବ୍‌ ଆରି ସଙ୍କାଲୋଙନ୍‌ ସୁନ୍ନାନ୍‌ ଆ ରନୁରୁ ଅନ୍ତମ୍‌ ଡେତେ ।

10 ଏ ଡାଙ୍ଗଡ଼ାଅଞେନ୍‌, ଇର୍ସେମରଞ୍ଜି ଆମନ୍‌ଆଡଙ୍‌ ତୋର୍ରମ୍‌ଜିଡେନ୍‌, ତିଆତେ ଆମନ୍‌ ଡର୍‌ଡଙ୍‌ନେ । 11 ଆନିଞ୍ଜି ଅଙ୍ଗାଆଡିଡ୍‌ ବର୍ତଞ୍ଜି, "ଇନ୍‌ଲେନ୍‌ ସରିନ୍‌ ଜିରାୟ୍‌, ଇନ୍‌ଲେଞ୍ଜି ସନମ୍ବବନ୍‌ ଆସନ୍‌ ଡଲ୍‌ଲେ ଏଡକୋତନାୟ୍‌, ଏର୍‌ଡୋସାମରଞ୍ଜିଆଡଙ୍‌ କାଜ୍ଜାନିୟ୍‌ ଆଞନମ୍‌ ଆସନ୍‌ ଆସସଲୋଙନ୍‌ ସଲନ୍‌ ଏଡକୋତନାୟ୍‌ 12 ପାତାଡ଼ନ୍‌ ଅନ୍ତମ୍‌ ଇନ୍‌ଲେନ୍‌ ଆନିଞ୍ଜିଆଡଙ୍‌ ଆମେଙ୍‌ଆମେଙ୍‌ ଏମତାୟ୍‌ ଆରି ଲୋଓଙ୍‌ଲୋଙନ୍‌ ଆରସେଡ୍‌ତେନ୍‌ ଆମନ୍‌ରାଜି ଅନ୍ତମ୍‌ ଆନିଞ୍ଜିଆଡଙ୍‌ ଆବସାଣ୍ଡନ୍‌ ଏମତାୟ୍‌; 13 ସିଲଡ୍‌ତ୍ତେ ଇନ୍‌ଲେଞ୍ଜି ଏର୍ଜାଡ଼ିକାନ୍‌ ମଡ଼ଗାଡମନ୍‌ ଆନର୍ଜେଜି ଞାଙ୍‌ତବୋ ଆରି ରାଉଲନ୍‌ ଜନୁରୁ ଜନବ୍‌ଲୋଙନ୍‌ ତର୍ଡମ୍‌ ତର୍ଡମ୍‌ ଆସିଙ୍‌ଲୋଙ୍‌ ଏବବ୍‌ରିୟ୍‌ବା, 14 ଆମ୍ୱେନ୍‌ ଅମଙ୍‌ଲୋଙ୍‌ଲେନ୍‌ ଏମାୟ୍‌ତନ୍‌; ଅଡ଼୍‌କୋଲେନ୍‌ ଆତେ ଆବସରିନ୍‌ ଆବନ୍ତା ଡେତେ ।" 15 ଏ ଡାଙ୍ଗଡ଼ାଅଞେନ୍‌, ଆମନ୍‌ ଆନିଞ୍ଜି ସରିନ୍‌ ତି ଆତଙର୍‌ଗଡ୍‌ ତଙିୟ୍‌ଡଙ୍‌ନେ, ଆତଙରଞ୍ଜି ସିଲଡ୍‌ ଅଜଙ୍‌ନମ୍‌ ଡୋବା; 16 ଇନିଆସନ୍‌ଗାମେଣ୍ତେନ୍‌ ଆଜଙଞ୍ଜି ଏର୍‌ମନଙ୍‌ କାବ୍ବାଡ଼ାନ୍‌ ଲନୁମନ୍‌ ଆସନ୍‌ ଇର୍ତେ ଆରି ସନମ୍ବବନ୍‌ ଆସନ୍‌ ଅପୁଡ୍‌ ଇର୍ତେ । 17 ଇନ୍ନିଙ୍‌ ଅନ୍ତିଡ୍‌ ଆତେମଡ୍‌ ଜନ୍ତାନ୍‌ ଆଡ୍ରାତବନ୍‌ କାଜ୍ଜାନ୍‌ ଡେତେ । 18 ଆନିଞ୍ଜି ତର୍ଡମ୍‌ ତର୍ଡମ୍‌ ଆ ସନମ୍ବବ୍‌ ଆସନ୍‌ ଜଗ୍ଗେଲେ ଡକୋତଞ୍ଜି ଆରି ଆ ପରାନ୍ନାଞ୍ଜିଆଡଙ୍‌ ଆଞନମ୍‌ ଆସନ୍‌ ଆସସଲୋଙନ୍‌ ସଲନ୍‌ ଡକୋତଞ୍ଜି । 19 ଅଡ଼୍‌କୋ ଅନର୍ଜେନ୍‌ ଆ ଲୋବମର୍‌ ଆତଙର୍‌ କେନ୍‌ ଅନ୍ତମ୍‌; ଅନର୍ଜେନ୍‌ ଆରର୍ଜେତେନ୍‌ ଆମନ୍‌ରା ଆପୁରାଡ଼ା ଅବ୍‌ସେଡ୍‌ତେ ।

20 ଗିଆନନ୍‌ ତଙର୍‌ଲୋଙନ୍‌ ବାବ୍ବାବ୍‌ଲେ ଓଡ୍ଡେତେ; ଆନିନ୍‌ ପାଡ଼ାର୍‌ରେଙନ୍‌ ଆ ସର୍ରଙନ୍‌ ସଡ୍ଡାତେ 21 ଆନିନ୍‌ ମନ୍‌ରାଞ୍ଜି ଆରୁକ୍କୁନେ ମୁଡ଼ ଡରକୋନେରେଙ୍‌ ଓଡ୍ଡେତେ; ଗଡ଼ାନ୍‌ ଡୁଆରାନ୍‌ ଆଗରନ୍ନେ ଡରକୋନେରେଙ୍‌ ଡ ଗଡ଼ାନ୍‌ ଆମଡ୍ଡି ଆବର୍ନେଡମନ୍‌ ବର୍ତନେ ।

22 "ଏ ଏର୍‌ବୁଡ୍ଡିମର୍‌ଜି, ଡିଅଙ୍‌ଡିନ୍ନା ଉଲ୍ଲୁନ୍‌ଆଡଙ୍‌ ଏଡୁଙ୍‌ୟମ୍‌ତେ ? ଏ ନିଣ୍ତୟ୍‌ମର୍‌ଜି,ଆରି ଡିଅଙ୍‌ଡିନ୍ନା ନିଣ୍ତୟ୍‌ଲୋଙନ୍‌ ଏସର୍ଡାତନେ ? ଏ ଉଲ୍ଲୁମର୍‌ଜି,ଆରି ଡିଅଙ୍‌ଡିନ୍ନା ପଡ଼େନେନ୍‌ ଏଡ଼ୁର୍‌ମଡ୍‌ତେ ? 23 କନେଁୟ୍‌ ଞନଙ୍‌ବର୍‌ଞେନ୍‌ ମନଙ୍‌ ଅମ୍‌ଡଙ୍‌ଲେ ୟର୍ନାୟ୍‌ବା; ଗିୟ୍‌ବା ଞେନ୍‌ ଉପ୍ରେଙ୍‌ବେନ୍‌ ପରାନ୍ନାଞେନ୍‌ ଲାତାୟ୍‌, ଞେନ୍‌ ବର୍ନେଡମ୍‌ଞେନ୍‌ ଅଡ଼୍‌କୋନ୍‌ ଆମ୍ୱେଞ୍ଜିଆଡଙ୍‌ ଅବ୍‌ଜନାତବେନ୍‌ । 24 ଇନିଆସନ୍‌ଗାମେଣ୍ତେନ୍‌ ଞେନ୍‌ ଓଡ୍ଡେଲବେନ୍‌, ବନ୍‌ଡ ଆମ୍ୱେନ୍‌ ଏଃନ୍ନଡ଼େଲୋ, ଞେନ୍‌ ତେକ୍କେସିଲନାୟ୍‌, ବନ୍‌ଡ ଆନ୍ନିଙ୍‌ ଏଃମ୍ମାନ୍ନେଲୋ । 25 ବନ୍‌ଡ ଆମ୍ୱେଞ୍ଜି ଞନଙ୍‌ଞଙ୍ଞେନ୍‌ ଅଡ଼୍‌କୋନ୍‌ ଏଆଲ୍ଲେଏନ୍‌, ଆରି ଅନ୍ନିଙ୍‌ କନେଁୟ୍‌ବର୍‌ଞେନ୍‌ଆଡଙ୍‌ ଏଃନାଙାଙ୍‌ଲୋ, 26 ତିଆସନ୍‌ ଆମ୍ୱେନ୍‌ ପରାନ୍‌ଡଣ୍ଡନ୍‌ ଆଡ୍ରେତବନ୍‌ ଆଡିଡ୍‌ ଞେନ୍‌ ଜାୟ୍‌ କିୟ୍‌ତାୟ୍‌, ଅମଙ୍‌ବାବେନ୍‌ ବରନ୍ତଙ୍‌ଡାନ୍‌ ଆରଡ଼ୋତାଞନ୍‌ ଆଡିଡ୍‌ ଞେନ୍‌ ତିକ୍କଲାୟ୍‌ତବେନ୍‌ । 27 ଅଙ୍ଗାଆଡିଡ୍‌ ରିଙ୍ଗେତିରନ୍‌ ଅନ୍ତମ୍‌ ଅମଙ୍‌ବାବେନ୍‌ ବରନ୍ତଙ୍‌ଡାନ୍‌ ଅଡ଼ୋତାୟ୍‌ ଆରି ଆୟାମ୍‌ବଡ଼ଡ୍‌ ଅନ୍ତମ୍‌ ଅମଙ୍‌ବାବେନ୍‌ ଜିର୍ତାୟ୍‌, ଆରି ପରାନ୍‌ଡଣ୍ତନ୍‌ ଡ ବତ୍ତାନ୍‌ ଆମ୍ବେନ୍‌ ଏଞାଙ୍‌ତେ । 28 ତିଆଡିଡ୍‌ ଆନିଞ୍ଜି ଞେନ୍‌ଆଡଙ୍‌ ଓଡ୍ଡେତିଁୟ୍‌ଞ୍ଜି, ବନ୍‌ଡ ଞେନ୍‌ ଅଃଜାଲଙାଜି । ଆନିଞ୍ଜି ଜୁବାୟ୍‌ଲେ ଞେନ୍‌ଆଡଙ୍‌ ସାୟ୍‌ତିଁୟ୍‌ଞ୍ଜି, ବନ୍‌ଡ ଞେନ୍‌ଆଡଙ୍‌ ଅଃରବାଙିଁୟ୍‌ଜି । 29 ଇନିଆସନ୍‌ଗାମେଣ୍ତେନ୍‌ ଆନିଞ୍ଜି ପଡ଼େନେନ୍‌ ଏଡ଼ୁର୍‌ମଡେଞ୍ଜି ଆରି ପ୍ରବୁନ୍‌ ଆ ବନତଙ୍‌ ଅଃସେଡାଲଜି । 30 ଆନିଞ୍ଜି ଇନ୍ନିଙ୍‌ ଞନଙ୍‌ଞଙ୍‌ବର୍‌ଞେନ୍‌ ଅଃଜାଲଜି ଆରି କନେଁୟ୍‌ ଞନଙ୍‌ବର୍‌ଞେନ୍‌ ଅଡ଼୍‌କୋନ୍‌ ବିଜଲେଞ୍ଜି । 31 ତିଆସନ୍‌, ଆନିଞ୍ଜି ତର୍ଡମ୍‌ ତର୍ଡମ୍‌ ଆକାବ୍ବାଡ଼ା ଆବଡ୍ଡି ଞାଙ୍‌ତଜି,ଆରି ତର୍ଡମ୍‌ ତର୍ଡମ୍‌ ଏର୍‌ମନଙ୍‌ ଞନଙ୍‌ଞଙ୍‌ ଆବଡ୍ଡି ବୋଗେତଜି । 32 ଓଓ, ଏର୍‌ବୁଡ୍ଡିମରଞ୍ଜି ଆଡ଼ଡ୍‌ ତଙର୍‌ଗଡ୍‌ ଆଜନିର୍‌ ଆନିଞ୍ଜିଆଡଙ୍‌ ଅବ୍‌ସେଡ୍‌ତେ ଆରି ଏର୍‌ଗିଆନମରଞ୍ଜି ଆନର୍ଜେଲୋଙନ୍‌ ଗମାଙ୍‌ ଗାମ୍‌ଡମ୍‌ତଞ୍ଜି ଆନିଞ୍ଜିଆଡଙ୍‌ ରବ୍ବୁତେ । 33 ବନ୍‌ଡ ଅଙ୍ଗା ଆମନ୍‌ରା ବର୍ନେଞେନ୍‌ ଅମ୍‌ଡଙ୍‌ତେ, ଆନିନ୍‌ ଉଗୁରିୟ୍‌ ଡକୋତନ୍‌ । ଆରି ପନବ୍‌ରଡନ୍‌ ଆସନ୍‌ ଏର୍‌ବନ୍ତଙନ୍‌ ଲୋଲୋନେନ୍‌ ଞାଙ୍‌ତେ ।"