1 ଆନ୍ନିଙ୍‌ ଅଗଙ୍‌ଜଙ୍‌ଲଜି ଜନଙ୍‌ଡେନ୍‌ ପେଲ୍ଲାନ୍‌ ଜିର୍ତେ; ବନ୍‌ଡ ଡରମ୍ମମରଞ୍ଜି ସିଅଁକିଡନ୍‌ ଅନ୍ତମ୍‌ ଅବ୍‌ନୋମଙ୍‌ଲନ୍‌ ଡକୋତଞ୍ଜି । 2 ଡେସାନ୍‌ ଏର୍‌ଡରମ୍ମ ଆସନ୍‌ ଆମ୍ମୁଙ୍‌ଗଡ୍‌ମରଞ୍ଜି ଗୋଗୋୟ୍‌ତଜି; ବନ୍‌ଡ ବୁଡ୍ଡିଡମନ୍‌ ଡ ଗିଆନଡମନ୍‌ ଆମନ୍‌ରାଜି ବାତ୍ତେ ତିଆତେ ଗୋଗୋୟ୍‌ ଅୟମ୍‌ ଜାୟ୍‌ ଗନବ୍‌ରିନ୍‌ ଡେତେ । 3 ଅଙ୍ଗା ଡୋଲେୟ୍‌ମରନ୍‌ ଅରିର୍ସୋୟମ୍‌ଡାନ୍‌ଆଡଙ୍‌ ଜୁରୁତେ, ଆନିନ୍‌ ରିଙ୍ଗେତିରନ୍‌ ଅନ୍ତମ୍‌; ସିଲଡ୍‌ତ୍ତେ ଜନୋମନ୍‌ ଅସୋୟ୍‌ତେ । 4 ବନାଁୟ୍‌ବରନ୍‌ ଆରମ୍‌ରେଙ୍‌ତେଞ୍ଜି ଆମନ୍‌ରାଜି ପେଲ୍ଲାଞ୍ଜିଆଡଙ୍‌ ସେଙ୍କେତଜି,ଆରି ବନାଁୟ୍‌ବରନ୍‌ ଆମରାନ୍ନେତେଞ୍ଜି ଆମନ୍‌ରାଜି ଆନିଞ୍ଜି ସରିନ୍‌ ବିରୁଡତଜି । 5 ପରାନ୍‌ସାତ୍ତିନ୍‌ ଆମନ୍‌ରାଜି ନିଆୟନ୍‌ ଅଃଜ୍ଜନାଏଜି, ବନ୍‌ଡ ପ୍ରବୁନ୍‌ ଆସରାୟ୍‌ଡଙ୍‌ତେଞ୍ଜି ଆମନ୍‌ରାଜି ଅଡ଼୍‌କୋନ୍‌ ଆ ବିସୟ ଜନାତଜି । 6 ବାଗୁ ତଙର୍‌ଗଡନ୍‌ ଆତ୍ରଙିୟ୍‌ତନେନ୍‌ ନିଣ୍ତୟ୍‌ଡାଗୋ ଆ ଗମାଙ୍‌ମର୍‌ ସିଲଡ୍‌, ଆର୍ପାୟ୍‌, ସତଙ୍‌ ତଙର୍‌ଗଡନ୍‌ ଆତ୍ରଙିୟ୍‌ତନେନ୍‌ ଆ ଡୋଲୟ୍‌ମର୍‌ ମନଙ୍‌ । 7 ଆନା ବନାଁୟ୍‌ବରନ୍‌ ମାନ୍ନେତେ, ଆନିନ୍‌ ବୁଡ୍ଡି ଡାଙ୍ଗଡ଼ାଅନ୍‌; ଆରି, ଆନା ଅବ୍‌ରୋଜୋମ୍‌ମରଞ୍ଜି ସରିନ୍‌ ଗଡ଼ିତନ୍‌, ଆନିନ୍‌ ଆ ଲତ୍ତେଙ୍‌ଲୋଙ୍‌ ଆପେୟନ୍‌ ଗରୟ୍‌ମଡ୍‌ତେ । 8 ଅଙ୍ଗା ଆମନ୍‌ରା ଗୋଗୋୟ୍‌ ଆଅନ୍‌ଡାବନ୍‌ ଡ ଲାବନ୍‌ ବାତ୍ତେ ଆନର୍ଜେନ୍‌ ଅବ୍‌ଗୋଗୋୟ୍‌ତେ, ଆନିନ୍‌ ଅରିର୍ସୋୟମ୍‌ଡାନ୍‌ ଆଡଅଙ୍‌ ଆସନାୟୁମ୍‌ ଆସନ୍‌ ତିଆତେ ତର୍ତୁମ୍‌ତେ । 9 ଅଙ୍ଗା ଆମନ୍‌ରା ବନାଁୟ୍‌ବରନ୍‌ ଏର୍‌ନମ୍‌ଡଙନ୍‌ ଆନ୍ନାଗଡ୍‌ ଡାଲୁଡ୍‌ତେ, ଆ ପାର୍ତନାନ୍‌ ଜାୟ୍‌ ଏଡ଼ୁର୍‌ମଡ୍‌ଡାଗୋ ଡେତେ । 10 ଅଙ୍ଗା ଆମନ୍‌ରା ଲବଡ୍ଡିନ୍‌ ମନ୍‌ରାନ୍‌ଆଡଙ୍‌ ପରାନ୍‌ସାତ୍ତିନ୍‌ ଆତଙର୍‌ଗଡ୍‌ ଆଜନିର୍‌ ଆସନ୍‌ ଅବ୍‌ତୁୟ୍‌ତେ, ଆନିନ୍‌ ଆନିନ୍‌ଡମନ୍‌ ଆଗରାୟେନ୍‌ ଆ ଲୋଓଙ୍‌ଲୋଙ୍‌ ଆମନକୁନ୍‌ ଗଲୋତେ; ବନ୍‌ଡ ସତଙ୍‌ମରନ୍‌ ସୁକ୍କାନ୍‌ ଅଦିକାରତେ । 11 ଗମାଙ୍‌ମରନ୍‌ ଆ ଗନିୟ୍‌ଗିୟ୍‌ଲୋଙନ୍‌ ଗିଆନଡମ୍‌; ବନ୍‌ଡ ବୁଡ୍ଡିଡମନ୍‌ ଅରିର୍ସୋୟମ୍‌ଡାନ୍‌ ଆମନ୍‌ରା ସେକୁଲ୍‌ତନେ । 12 ଡରମ୍ମମରଞ୍ଜି ଜିନୟେଞ୍ଜିଡେନ୍‌ ପନେମେଙନ୍‌ ଡେତେ; ବନ୍‌ଡ ପେଲ୍ଲାମରଞ୍ଜି ମରଙେଞ୍ଜିଡେନ୍‌ ମନ୍‌ରାଞ୍ଜି ସତନ୍‌ଞ୍ଜି । 13 ଆନା ଆନିନ୍‌ଡମ୍‌ ଆ ଇର୍ସେ ସତେ, ଆନିନ୍‌ ସୁକ୍କାନ୍‌ ଅଞାଙେ; ବନ୍‌ଡ ଅଙ୍ଗା ଆମନ୍‌ରା ତିଆତେ ବର୍ରନ୍‌ ଅମ୍‌ରେଙ୍‌ତେ, ଆନିନ୍‌ ସନାୟୁମନ୍‌ ଞାଙ୍‌ତେ । 14 ଅଙ୍ଗା ଆମନ୍‌ରା ଡିତାନ୍‌ ସଦାପ୍ରବୁନ୍‌ଆଡଙ୍‌ ବତଙ୍‌ତେ, ଆନିନ୍‌ ସନେନ୍‌ସେନ୍‌ଡମ୍‌; ବନ୍‌ଡ ଆନା ଆ ମନ୍ନଆଡଙ୍‌ ରବ୍‌ଡୋତେ, ଆନିନ୍‌ ତନଙଡ୍‌ଲୋଙନ୍‌ ଗଲୋତେ । 15 ଆଗ୍ରୁରୁମ୍‌ତେନ୍‌ ଆ ସିଅଁକିଡ୍‌ ଡ ଆବ୍ରୁଲେତେନ୍‌ ଆ କମ୍ୱୁଡ୍‌ ଏଙ୍ଗାଗୋ; ଅରିର୍ସୋୟମ୍‌ଡାନ୍‌ ଆମନ୍‌ରାଜି ଆତୋଣ୍ତୋ ପେଲ୍ଲା ସାଉକାରନ୍‌ ତିଅନ୍ତମ୍‌ । 16 ଅଙ୍ଗା ଆସୋଡ଼ାମର୍‌ ବୁଡ୍ଡିତଡ୍‌, ଆନିନ୍‌ ଜାୟ୍‌ ମାଡ ଅନିଆୟନ୍‌ ଲୁମ୍‌ତେ, ବନ୍‌ଡ ଆନା ଲୋବନ୍‌ଆଡଙ୍‌ ଏଡ଼ୁର୍‌ମଡ୍‌ତେ, ଆନିନ୍‌ ଗୋଗୋୟ୍‌ ଡିନ୍ନା ଅମେଙ୍‌ତେ । 17 ଅଙ୍ଗା ଆମନ୍‌ରା ଅବୟ୍‌ ମନ୍‌ରାଆଡଙ୍‌ ସମ୍ୱବ୍‌ଡାଲେ ଡୋସାଡାତେ, ଆନିନ୍‌ ଲୋଓଙନ୍‌ ଜାୟ୍‌ ଜିର୍ତେ; ଆନିନ୍‌ଆଡଙ୍‌ ଆନ୍ନିଙ୍‌ ଏରଙ୍‌ଡଙେ । 18 ଅଙ୍ଗା ଆମନ୍‌ରା ସବ୍‌ତଙ୍‌ଲନ୍‌ ତଙିୟ୍‌ତନ୍‌, ଆନିନ୍‌ ଡନୋବନ୍‌ ଞାଙ୍‌ତେ; ବନ୍‌ଡ ସଙ୍ଗତ୍ତାମର୍‌ ତଙର୍‌ଲୋଙନ୍‌ ଏରବ୍‌ବୋମଙ୍‌ ଅସେଡ୍‌ତେ । 19 ଆନା ଆବସେଙନ୍‌ ଅର୍ତେ, ଆନିନ୍‌ ଜବ୍ର ଜନ୍‌ରୋମନ୍‌ ଞାଙ୍‌ତେ; ବନ୍‌ଡ ଅଙ୍ଗା ଆମନ୍‌ରା ଆଡ଼ସାମରଞ୍ଜିଆଡଙ୍‌ ସଣ୍ତୋଙ୍‌ତେ ଆନିନ୍‌ ଡୋଲୟ୍‌ମର୍‌ ଡେତେ । 20 ଡର୍ନେଡମନ୍‌ ଆମନ୍‌ରା ଗୋଗୋୟ୍‌ ଆସିର୍ବାଦନ୍‌ ଞାଙ୍‌ତେ; ବନ୍‌ଡ ଅଙ୍ଗା ଆମନ୍‌ରା ଗମାଙ୍‌ମର୍‌ ଆଡନେ ଆସନ୍‌ ମାଡ ଏର୍ତେଗୋୟ୍‌ତେ, ଆନିନ୍‌ ପନବ୍‌ରଡନ୍‌ ଏର୍‌ଞନାଙନ୍‌ ଅଃଡକୋନେ । 21 ଡନୁଲ୍‌ମଡନ୍‌ ମନଙ୍‌ତଡ୍‌ । ଅଡ଼େ ଅବୟ୍‌ ରୁଟିନ୍‌ ଆସନ୍‌ ଏର୍‌ଡରମ୍ମନ୍‌ ଆଲନୁମ୍‌ ମନଙ୍‌ତଡ୍‌ । 22 ଏର୍‌ମନଙ୍‌ ଗନିୟ୍‌ଗିୟ୍‌ମରନ୍‌ ଅନର୍ଜେନ୍‌ ଆଞନାଙ୍‌ ଆସନ୍‌ ଆସାୟ୍‌ଲେ ଡେତେ, ବନ୍‌ଡ ଆନିନ୍‌ ଅବାବ ଡେତେ ତିଆତେ ଆନିନ୍‌ ଅଜନାଏ । 23 ଅଲାଙ୍‌ଲୋଙନ୍‌ ତମୟ୍‌ବରନ୍‌ ଆବର୍ତନ୍‌ ଆମନ୍‌ରା ସିଲଡ୍‌ ସାଞେଙ୍‌ବରନ୍‌ ଆବର୍ତନ୍‌ ଆମନ୍‌ରା ତିକ୍କି ଗୋଗୋୟ୍‌ ସନାୟୁମନ୍‌ ଞାଙ୍‌ତେ । 24 ଆନା ଆପେୟନ୍‌ ଅଡ଼େ ଆୟୋଙନ୍‌ ଆଜନବ୍‌ ରାଉଲନ୍‌ ପାଙ୍‌ତେ କି ବର୍ତନ୍‌, ତେନ୍ନେ ଇନ୍ନିଙ୍‌ ଇର୍ସେତଡ୍‌, ଆନିନ୍‌ ରନବ୍ବୁମରନ୍‌ ଆଗଡ଼ି । 25 ଲୋବମରନ୍‌ ଗୋଡ଼େନ୍‌ ଅମ୍‌ଡୁଙ୍‌ତାୟ୍‌, ବନ୍‌ଡ ଆନା ପ୍ରବୁନ୍‌ ଆମଙ୍‌ଲୋଙ୍‌ ଡର୍ତନେ, ଆନିନ୍‌ ଜବ୍ର ଜେଲ୍‌ଜେଲ୍‌ତେ । 26 ଆନା ଆନିନ୍‌ଡମ୍‌ ଆ ଉଗର୍‌ଲୋଙ୍‌ ଆସାଲନ୍‌ ଡକୋତନ୍‌, ଆନିନ୍‌ ଉଲ୍ଲୁ; ବନ୍‌ଡ ଆନା ଗିଆନନ୍‌ ବାତ୍ତେ ତଙିୟ୍‌ତନ୍‌, ଆନିନ୍‌ ଡନୋବନ୍‌ ଞାଙ୍‌ତେ । 27 ଆନା ଡୋଲୟ୍‌ମରନ୍‌ଆଡଙ୍‌ ତନିୟ୍‌ତିୟନ୍‌ ତିୟ୍‌ତେ, ଆନିନ୍‌ ଇନ୍ନିଙ୍‌ ଅନସୋଜେ; ବନ୍‌ଡ ଅଙ୍ଗା ଆମନ୍‌ରା ଡୋଲେୟ୍‌ମରନ୍‌ଆଡଙ୍‌ ଅନାଙ୍ଗାଙେ, ଆନିନ୍‌ ଗୋଗୋୟ୍‌ ସୟ୍‌ପନ୍‌ ଞାଙ୍‌ତେ । 28 ପେଲ୍ଲାମରଞ୍ଜି ମରଙେଞ୍ଜିଡେନ୍‌, ମନ୍‌ରାଞ୍ଜି ସତନ୍‌ଞ୍ଜି; ବନ୍‌ଡ ଆନିଞ୍ଜି ଗୁରୁଡେଏଞ୍ଜିଡେନ୍‌, ଡରମ୍ମମରଞ୍ଜି ଗୋଗୋୟ୍‌ତଜି ।