1 ଆମନ୍‌ ପେଲ୍ଲାମରଞ୍ଜି ଆଡଅଙ୍‌ ଇସ୍କତ୍ତାଡଙ୍‌, ଆରି ଆନିନ୍‌ ସରିନ୍‌ ଗଡ଼ିନେନ୍‌ ଆସନ୍‌ ସାୟ୍‌ଡଙେ । 2 ଇନିଆସନ୍‌ଗାମେଣ୍ତେନ୍‌ ଆ ଉଗରଞ୍ଜି ସଙ୍ଗତ୍ତାନ୍‌ ଇୟମ୍‌ତଜି,ଆରି ଆ ଉସାଲ୍‌ତମ୍‌ ଅନବ୍‌ସେଡ୍‌ବରନ୍‌ ବର୍ତନ୍‌ । 3 ଗିଆନନ୍‌ ବାତ୍ତେ ଅସିଙନ୍‌ ତନୁବନ୍‌ ଡେତେ ଆରି ବୁଡ୍ଡିନ୍‌ ବାତ୍ତେ ତିଆତେ ଗନବ୍‌ରିନ୍‌ ଡେତେ; 4 ଗିଆନନ୍‌ ବାତ୍ତେ ବକ୍ରାସିଙନ୍‌ ଅଡ଼୍‌କୋନ୍‌ ମଡ଼ଗାଡମ୍‌ ଆରି ମରଅଁୟ୍‌ଡାନ୍‌ ଆଜନବ୍‌ଜି ବାତ୍ତେ ବରିୟ୍‌ତେ । 5 ଗିଆନଡମନ୍‌ ଆମନ୍‌ରା ବପ୍ପୁଡମ୍‌, ଆରି ପଣ୍ତିତମରନ୍‌ ବୋର୍ସାନ୍‌ ଅବ୍‌ଗୋଗୋୟ୍‌ତେ । 6 ଆମନ୍‌ ମନଙ୍‌ ଞନଙ୍‌ଞଙନ୍‌ ବାତ୍ତେ ଜୁଜ୍ଜେନା; ଆରି, ଗୋଗୋୟ୍‌ ଞନଙ୍‌ଞଙ୍‌ମରଞ୍ଜି ବାତ୍ତେ ଡନୋବନ୍‌ ଡେତେ । 7 ଏର୍‌ଗିଆନମରନ୍‌ ଆସନ୍‌ ଗିଆନବରନ୍‌ ମାଡ ଡେଙ୍ଗା; ଆନିନ୍‌ ଗଡ଼ାନ୍‌ ଆଡୁଆରାଲୋଙ୍‌ ଇନ୍ନିଙ୍‌ ଅବର୍ନେ । 8 ଅଙ୍ଗା ଆମନ୍‌ରା ପରାନ୍‌ସାତ୍ତିନ୍‌ ଆଲନୁମ୍‌ ଆସନ୍‌ ଇୟମ୍‌ତେ, ମନ୍‌ରାଞ୍ଜି ଆନିନ୍‌ଆଡଙ୍‌ ଲଗାଜୋଡ଼ାମର୍‌ ଗାମ୍‌ଲେ ବର୍ତଞ୍ଜି । 9 ଏର୍‌ଗିଆନମରନ୍‌ ଆନିୟମ୍‌ ଇର୍ସେଡମ୍‌; ଆରି, ନିଣ୍ତୟ୍‌ମରନ୍‌ ଆଡଅଙ୍‌ ମନ୍‌ରାଞ୍ଜି ଏଡ଼ୁର୍‌ମଡ୍‌ତଜି । 10 ତନଙଡ୍‌ ଡିନ୍ନାଇଙନ୍‌ ଆମ୍ୱେନ୍‌ ଅସମଁୟ୍‌ ବୋର୍ସାତଡ୍‌ ଡେଲମ୍‌ଡେନ୍‌, ତିଡେନ୍‌ ବୋର୍ସାନମ୍‌ ଅସୋୟ୍‌ଡମ୍‌ ଗାମ୍‌ଲେ ନଜାତଜି । 11 ରନବୁନ୍‌ ଆସନ୍‌ ଅନୋରୋଙନ୍‌ ଆଡ୍ରେତେଞ୍ଜି ଆମନ୍‌ରାଜିଆଡଙ୍‌ ଡୋବ୍‌ବା ଆରି ରନବ୍ବୁନ୍‌ ଆସନ୍‌ ଆରୋରୋଙ୍‌ତେଞ୍ଜି ଆମନ୍‌ରାଜିଆଡଙ୍‌ ଡୋବ୍‌ଡୋବନ୍‌ ଆସନ୍‌ ଏଅବ୍‌ଡିଙ୍‌ଡଙ୍‌ନେ । 12 ଗିଜା, ଞେନ୍‌ ତିଆତେ ଜନାତଡ୍‌ ଗାମେଣ୍ତେନ୍‌, ତିଡେନ୍‌ ଉଗ୍ଗରନ୍‌ ଆତନୁଡ଼େମର୍‌ ତିଆତେ ଅଃଜନାଏ ପଙ୍‌ ? ଆରି, ପରାନ୍ନାନମ୍‌ ଆ ଡନୋବ୍‌ମର୍‌ ଇନି ତିଆତେ ଅଃଜନାଏ ପଙ୍‌ ? ଆରି, ଆନିନ୍‌ ଇନି ଡିଲେ ମନ୍‌ରାଆଡଙ୍‌ ରମ୍ମଙ୍‌ ଆକାବ୍ବାଡ଼ା ଅନ୍ତମ୍‌ ବଡିନ୍‌ ଅଃତିୟେ ପଙ୍‌ ? 13 ଏ ଡାଙ୍ଗଡ଼ାଅନ୍‌ଞେନ୍‌, ଆମନ୍‌ ଆଡଙ୍‌ଡାନ୍‌ ଜୋମା, ଇନିଆସନ୍‌ଗାମେଣ୍ତେନ୍‌ ତିଆତେ ମନଙ୍‌; ଆରି, ଆତଡ଼ାର୍‌ଡଙନ୍‌ ଜୋମା, ଇନିଆସନ୍‌ଗାମେଣ୍ତେନ୍‌ ତିଆତେ ତଅଡନ୍‌ ଜବୁଙ୍‌ ଡେତେ । 14 ଗିଆନନ୍‌ ପରାନ୍ନାନମ୍‌ ଆଡଅଙ୍‌ ତି ଅନ୍ତମ୍‌ ଗାମ୍‌ଲେ ଆମନ୍‌ ଜନାତମ୍‌; ଆମନ୍‌ ତିଆତେ ଞାଙେନ୍‌ଡେନ୍‌, ଓଞୋଲ୍‌କୁଜନ୍‌ ଡକୋନ୍‌ ଆସନ୍‌ ଅରାସାନେନମ୍‌ ଡନେଡନ୍‌ ଅଡ୍ଡେଏ । 15 ଏ ପେଲ୍ଲାମର୍‌, ଆମନ୍‌ ଡରମ୍ମମରନ୍‌ ଆଡ୍ରକୋନେ ବିରୁଡଲୋଙ୍‌ ଡଲ୍‌ଲେ ଡକୋଡଙ୍‌ନେ; ଆ ଲରୋଲୋନେ ଡରକୋନେନ୍‌ ଅବ୍‌ଗୁରୁଡ୍ଡେଡଙେ । 16 ତିଆସନ୍‌ ଡରମ୍ମମରନ୍‌ ସାତ ତର ଅକୁଡେନ୍‌ ଜନଙ୍‌ଡେନ୍‌ ଡୋତନେ ବନ୍‌ଡ ପେଲ୍ଲାମରଞ୍ଜି ତନଙଡ୍‌ଲୋଙନ୍‌ ତୁଡ୍ଡୁବ୍‌ତେ । 17 ବନେରାନମ୍‌ ଗଲୋଏନ୍‌ଡେନ୍‌ ସର୍ଡାଡଙ୍‌ନେ,ଆରି ଆନିନ୍‌ ତୁଡ୍ଡୁବେନ୍‌ଡେନ୍‌, ଉଗ୍ଗର୍‌ନମ୍‌ ମଅଁୟ୍‌ଡଙ୍‌ନେତଡ୍‌ । 18 ଓଡ୍ଡେନ୍‌ନଙ୍‌ ସଦାପ୍ରବୁନ୍‌ ତିଆତେ ଗିୟ୍‌ଲେ ବରାବ୍‌ତେ ଆରି ଆମଙନ୍‌ ସିଲଡ୍‌ ଆବନ୍‌ଡ୍ରାବନ୍‌ ଆବ୍‌ଡିଡ୍‌ତେ । 19 ପରାନ୍‌ସାତ୍ତିନ୍‌ ଆ କାବ୍ବାଡ଼ାମର୍‌ଜି ଆସନ୍‌ ବିଜାର ଡେଡଙମ୍‌; ଆରି, ପେଲ୍ଲାମରଞ୍ଜି ଆଡଅଙ୍‌ ଇସ୍କତ୍ତାଡଙ୍‌ । 20 ଇନିଆସନ୍‌ଗାମେଣ୍ତେନ୍‌ ପରାନ୍‌ସାତ୍ତିନ୍‌ ଆମନ୍‌ରା ଇନ୍ନିଙ୍‌ ଓଞୋଲ୍‌କୁଜନ୍‌ ଅଞାଙେ ଆରି ପେଲ୍ଲାମରଞ୍ଜି ଆ ପିଙ୍କ ପନବ୍‌ଞିଡନ୍‌ ଡେତେ । 21 ଏ ଡାଙ୍ଗଡ଼ାଅନ୍‌ଞେନ୍‌, ସଦାପ୍ରବୁନ୍‌ ଡ ରାଜାନ୍‌ଆଡଙ୍‌ ବତଙା,ଆରି ବିରୁଡମରଞ୍ଜି ସରିନ୍‌ ମଗାଡ୍‌ଡଙମ୍‌ । 22 ଇନିଆସନ୍‌ଗାମେଣ୍ତେନ୍‌ ଏରବ୍ବୋମଙ୍‌ଡାଗୋ ଆ ତନଙଡ୍‌ଜି ଗଟେତେ; ଆରି, ତି ବାଗୁନ୍‌ ଆ ବିକ୍କଡ଼ ଆବିସୟ ଆନା ଜନାଏ ?

23 କେନ୍‌ ଅଡ଼୍‌କୋନ୍‌ ଜାୟ୍‌ ଗିଆନମରଞ୍ଜି ଆବର୍ନେ । ପନ୍‌ସୁଆତିଲୋଙନ୍‌ ମନ୍‌ରାନ୍‌ ଆ ଡନୁଲ୍‌ମଡ୍‌ ମନଙ୍‌ତଡ୍‌ । 24 ପେଲ୍ଲାମରନ୍‌ଆଡଙ୍‌ ଅଙ୍ଗା ଆମନ୍‌ରା ଆମନ୍‌ ଡରମ୍ମମର୍‌ ଗାମ୍‌ଲେ ବର୍ତନ୍‌, ମନ୍‌ରାଞ୍ଜି ଆନିନ୍‌ଆଡଙ୍‌ ସୟ୍‌ପତଜି,ଆରି କେଜ୍ଜାମରଞ୍ଜି ଆନିନ୍‌ଆଡଙ୍‌ ଏଡ଼ୁର୍‌ମଡ୍‌ତଜି । 25 ବନ୍‌ଡ ଅଙ୍ଗା ଆମନ୍‌ରାଜି ଆନିନ୍‌ଆଡଙ୍‌ ସାଞେଙ୍‌ଲେ ବର୍ତଜି, ଆନିଞ୍ଜି ସର୍ଡାତଞ୍ଜି; ଆରି, ମନଙ୍‌ ଆସିର୍ବାଦନ୍‌ ଆନିଞ୍ଜି ଆତୋଣ୍ତୋ ଜିର୍ତାୟ୍‌ । 26 ଆନା ଆଜାଡ଼ିନ୍‌ ବାତ୍ତେ ଜାଲଙ୍‌ତେ, ଆବର୍ନେନ୍‌ ଉସାଲ୍‌ତମ୍‌ଲୋଙନ୍‌ ଆ ଜୋର୍ଜୋତେନ୍‌ ଅନ୍ତମ୍‌ । 27 ଡୁଆରାନ୍‌ କାବ୍ବାଡ଼ାନମ୍‌ ଅବ୍‌ଜାଡା, ଲବଲୋଙନ୍‌ ଆମନ୍‌ଡମନ୍‌ ଆସନ୍‌ ତିଆତେ ଅବ୍‌ଜାଡାଆ; ସିଲଡ୍‌ତ୍ତେ ଅସିଙ୍‌ନମ୍‌ ତୁବା । 28 କାଜ୍ଜାନ୍‌ନିୟ୍‌ ତୟ୍‌ଲିସିଙ୍‌ନମ୍‌ ଆ ବିରୁଦଲୋଙ୍‌ ସାକ୍କିନ୍‌ ତନଙ୍‌ଡଙ୍‌ ଆରି ଉସାଲ୍‌ତମ୍‌ନମ୍‌ ବାତ୍ତେ କଣ୍ତାୟ୍‌ବରନ୍‌ ବର୍ଡଙ୍‌ନେ । 29 ଆନିନ୍‌ ଞେନ୍‌ଆଡଙ୍‌ ଏଙ୍ଗାଲିଁୟ୍‌, ଆନିନ୍‌ଆଡଙ୍‌ ଜାୟ୍‌ ଞେନ୍‌ ତିଅନ୍ତମ୍‌ ଅମେତାୟ୍‌ ଆରି ଆଲନୁମନ୍‌ ଅନ୍ତମ୍‌ ଞେନ୍‌ ଆନିନ୍‌ଆଡଙ୍‌ ପବ୍‌ରଡ୍‌ତାୟ୍‌, କେନ୍‌ଅନ୍ତମ୍‌ ଏବର୍‌ଡଙ୍‌ନେ । 30 ଞେନ୍‌ ଆଡ଼ସାମରନ୍‌ ଆବସେଙ୍‌ ଡ ଉଲ୍ଲୁମରନ୍‌ ଦ୍ରାକ୍ୟାକୋତ୍ତାଗଡ୍‌ ଜିରେନ୍‌ । 31 ଆରି ଗିୟ୍‌ବା, ସମ୍ପରା କୋତ୍ତାନ୍‌ ଅବ୍ବାନ୍‌ ମରଙେନ୍‌ ଆରି ଜନଗାବ୍‌ତରନ୍‌ ଲାର୍ରନେ, ପାଡ଼ିଅରନ୍‌ ଅଡ଼୍‌କୋନ୍‌ ଆରୁଡ଼ାଙାୟ୍‌ । 32 ସିଲଡ୍‌ତ୍ତେ ଞେନ୍‌ ଗିୟ୍‌ଲାୟ୍‌, ଆରି ଡାଲୁଡ୍‌ଲେ ଅମ୍‌ଡଙ୍‌ଲାୟ୍‌; ଞେନ୍‌ ଗିୟ୍‌ଲାୟ୍‌ ଆରି ଞନଙନ୍‌ ଞାଙ୍‌ଲାୟ୍‌ । 33 ଆରି ଅଜିଡ୍‌ ଲୁଡ୍‌ଲାୟ୍‌ଡେନ୍‌, ଆରି ଅଜିଡ୍‌ ମବ୍‌ଲାୟ୍‌ଡେନ୍‌, ଆରି ଅଜିଡ୍‌ ଡିମଡ୍‌ନେନ୍‌ ଆସନ୍‌ ଅସିନ୍‌ ଞଙ୍‌ଞଙ୍‌ଲନାୟ୍‌ଡେନ୍‌, 34 ଡୋଲୟ୍‌ଡାନମ୍‌ ବେମଡ୍‌ମରନ୍‌ ଅନ୍ତମ୍‌, ଆରି ଡୋଲୟ୍‌ନମ୍‌ ଅନବ୍‌ଜାଡାନ୍‌ ଆ ରାଉମର୍‌ ଅନ୍ତମ୍‌ ଅଡ଼ୋତାୟ୍‌ ।