1 ରାଜାନ୍‌ ଆ ଉଗ୍ଗର୍‌ ପ୍ରବୁନ୍‌ ଆସିଲୋଙ୍‌ ଅଲଡାନ୍‌ ଅନ୍ତମ୍‌, ଆନିନ୍‌ ଅଡ଼େଙ୍ଗା ଇସ୍ସୁମ୍‌ତେ ଅଡ଼େତ୍ତେଗଡ୍‌ ଆବ୍‌ଡିଡ୍‌ତେ ।

2 ମନ୍‌ରାନ୍‌ ଆଜନିର୍‌ ଅଡ଼୍‌କୋନ୍‌ ଆଗନିୟ୍‌ଗିୟ୍‌ଲୋଙନ୍‌ ମନଙ୍‌ଡମ୍‌, ବନ୍‌ଡ ସଦାପ୍ରବୁନ୍‌ ଉଗ୍ଗରନ୍‌ ଅଡ଼୍‌କୋନ୍‌ ତୁଡ଼େତେ ।

3 ଅନମଙନ୍‌ ସିଲଡ୍‌ ନିଆୟନ୍‌ ଡ ମନଙ୍‌ ପନ୍‌ସୁଆତିନ୍‌ ପ୍ରବୁନ୍‌ ଗୋଗୋୟ୍‌ ଲଡୟ୍‌ତେ ।

4 କଙ୍କ୍ରି ଗନିୟ୍‌ଗିଜନ୍‌, ପେଲ୍ଲା ଉଗ୍ଗରନ୍‌, ଡ ପେଲ୍ଲାମରନ୍‌ ଆପିଙ୍କତୋଡ୍‌ ଅନ୍ତମ୍‌ ଆରି ତିଆତେ ଇର୍ସେନ୍‌ ।

5 ଜୁବାୟ୍‌ଲେ ମନଙ୍‌ ଆକାବ୍ବାଡ଼ାମର୍‌ ଆନିୟମ୍‌ ସିଲଡ୍‌ ଗୋଗୋୟ୍‌ ଲାବନ୍‌ ଞାଙ୍‌ତେ; ବନ୍‌ଡ ତୁର୍‌ତୁରିଆଲଗୋ ଆକ୍ରାବ୍ବାଡ଼ାତନ୍‌ ଆମନ୍‌ରା ଡୋଲେୟ୍‌ଗଡନ୍‌ ଜିର୍ତେ ।

6 ପାତ୍ୟାମରନ୍‌ ଆଉସାଲ୍‌ତମ୍‌ ବାତ୍ତେ ଆଞରାଙ୍‌ତେ ଆନର୍ଜେ ଏଡ଼େତେଅଡ଼େନେ ଆଜିର୍ତେନ୍‌ ଆଓମା ଅନ୍ତମ୍‌, ଆନାଜି ତିଆତେ ସାୟ୍‌ତଜି ଆନିଞ୍ଜି ରନବୁନ୍‌ ସାୟ୍‌ତଜି ।

7 ପେଲ୍ଲାମରଞ୍ଜି ଆ ସଙ୍ଗତା ଆନିଞ୍ଜିଆଡଙ୍‌ ଅବ୍‌ସେଡ୍‌ତେ; ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ନିଆୟନ୍‌ ଅଃଲୁମେଜି ।

8 ଡୋସାମରନ୍‌ ଆତଙର୍‌ ବାଙ୍କଡ଼ୁଡମ୍‌; ବନ୍‌ଡ ମଡ଼ିର୍‌ମରନ୍‌ ଆକାବ୍ବାଡ଼ା ଆଜାଡ଼ିନ୍‌ ।

9 ଗୋଡ଼େବଜନ୍‌ ସରିନ୍‌ ସୋଡ଼ା ଅସିଙ୍‌ଲୋଙନ୍‌ ଆଡକୋନେ ସିଲଡ୍‌ ଅସିଙନ୍‌ ବକୁନେ ଆଡକୋନେ ମନଙ୍‌ ।

10 ପେଲ୍ଲାମରନ୍‌ ଆମନ୍ନ ଅନବ୍‌ସେଡନ୍‌ ଇୟମ୍‌ତେ; ବନ୍‌ଡ ଆ ତୟ୍‌ଲିସିଙନ୍‌ ଆମନ୍‌ରା ଆ ଗନିୟ୍‌ଗିୟ୍‌ଲୋଙ୍‌ ସନାୟୁମନ୍‌ ଅଃଞାଙେ ।

11 ନିଣ୍ତୟ୍‌ମରନ୍‌ ପନବ୍‌ରଡନ୍‌ ଡେଏଣ୍ଡେନ୍‌ ଏର୍‌ବୁଡ୍ଡିମରନ୍‌ ବୁଡ୍ଡିଡମ୍‌ ଡେତେ,ଆରି ବୁଡ୍ଡିମରନ୍‌ ଞନଙନ୍‌ ତିୟେଣ୍ଡେନ୍‌ ଆନିନ୍‌ ଗିଆନଡମ୍‌ ଡେତେ ।

12 ଡରମ୍ମମରନ୍‌ ପେଲ୍ଲାମରନ୍‌ ଆସିଙ୍‌ ଆବର୍ନେ ଇୟମ୍‌ତେ, ତି ଆପେଲ୍ଲାମର୍‌ଜି ଏଙ୍ଗାଲେ ପାଡ଼ୋ ଡେତେ ଅସେଡ୍‌ତଜି କେନ୍‌ଆତେ ମନଙ୍‌ ଇୟମ୍‌ତେ ।

13 ଡୋଲେୟ୍‌ମରନ୍‌ ଆୟରେୟେଡାତନ୍‌ ଆଡିଡ୍‌ ଅଙ୍ଗା ଆମନ୍‌ରା ଡୁବ୍‌ଡୁବ୍‌ଲୁଡ୍‌ତନ୍‌, ଆନିନ୍‌ ଜାୟ୍‌ ଆମକୁନ୍‌ ଓଡ୍ଡେତେ, ବନ୍‌ଡ ଆନିନ୍‌ଆଡଙ୍‌ ଆନ୍ନିଙ୍‌ ଅଃଜାଲଙେଜି ।

14 ଅଜନା ତନିୟ୍‌ତିୟନ୍‌ ବନ୍‌ଡ୍ରାବନ୍‌ ସୟୁତେ,ଆରି କୁଣ୍ତୁବ୍‌ଲୋଙନ୍‌ ଆରବ୍‌ୟଗନ୍ତେନ୍‌ ଆତଙ୍କା ମାଡ୍ଡ ବନ୍‌ଡ୍ରାବନ୍‌ ସବ୍‌ୟୁତେ ।

15 ଆଜାଡ଼ି ପନ୍‌ସୁଆତିନ୍‌ ଗନବ୍‌ରିନ୍‌ ଡେଏଡେନ୍‌ ଡରମ୍ମମରଞ୍ଜି ସର୍ଡାତଞ୍ଜି; ବନ୍‌ଡ ଇର୍ସେ କାବ୍ବାଡ଼ାନ୍‌ ଆର୍‌ଲୁମ୍‌ତେଞ୍ଜି ଆମନ୍‌ରାଜି ଆସନ୍‌ ଅନସେଡ୍‌ଗୋ ।

16 ଆନା ବୁଡ୍ଡି ତଙରନ୍‌ ଅମ୍‌ରେଙ୍‌ଲେ ଆନ୍ନାଗଡ୍‌ ଜିର୍ତେ, ଆନିନ୍‌ ଆରବୁମରଞ୍ଜି ଆପୁରାଡ଼ା ଆ ରନୁକ୍କୁଲୋଙନ୍‌ ଡକୋତନ୍‌ ।

17 ଅଙ୍ଗା ଆମନ୍‌ରା ସୁକ୍କନ୍‌ ଲଡୟ୍‌ତେ, ଆନିନ୍‌ ଡୋଲେୟ୍‌ମର୍‌ ଡେତେ,ଆରି, ଆନା ଦ୍ରାକ୍ୟାଡାନ୍‌ ଡ ମିଞଲନ୍‌ ଲଡୟ୍‌ତେ, ଆନିନ୍‌ ଅଃଗମାଙେ ।

18 ପେଲ୍ଲାମରଞ୍ଜି ଡରମ୍ମମରଞ୍ଜି ଆସନ୍‌ ଅଙ୍ଗା ଆ ଡୁକ୍କ ଆପନାଙ୍‌ ଆସନ୍‌ ଏର୍‌ତଜିଗୋୟ୍‌ତଜି; ତିଆତେ ଆନିଞ୍ଜିଡମ୍‌ ଆତୋଣ୍ତୋ ପାଙ୍‌ତାୟ୍‌ଜି ।

19 ଗୋଡ଼େବଜନ୍‌ ଡ ବରାବିୟ୍‌ବଜନ୍‌ ସରିନ୍‌ ଆଡକୋନେ ଆପାଲ୍‌ତେଙ୍‌ ଆରିଙ୍‌ରିଙ୍‌ ଲବଲୋଙନ୍‌ ଆଡକୋନେ ଅଡ଼୍‌କୋନ୍‌ ସିଲଡ୍‌ ମନଙ୍‌ ।

20 ଗିଆନମରନ୍‌ ଆସିଙ୍‌ଲୋଙ୍‌ ଗୋଗୋୟ୍‌ ମଡ଼ଗାନ୍‌ ଆନର୍ଜେ ଡ ମିଞଲନ୍‌ ଡକୋତନ୍‌, ବନ୍‌ଡ ଉଲ୍ଲୁମରନ୍‌ ତିଆତେ କାଜ୍ଜାନ୍‌ ଅଃମୋସ୍ସାତେ ।

21 ଅଙ୍ଗା ଆମନ୍‌ରା ଡରମ୍ମଗଡନ୍‌ ଡ ସନାୟୁମନ୍‌ ସଣ୍ଡୋଙ୍‌ତେ, ଆନିନ୍‌ ଅନମେଙନ୍‌ ଡ ଡରମ୍ମଗଡନ୍‌ ଡ ମନାନ୍ନେନ୍‌ ଞାଙ୍‌ତେ ।

22 ଗିଆନମରନ୍‌ ବୋର୍ସାମରନ୍‌ ଆଗଡ଼ାଲୋଙ୍‌ ଗନ୍‌ଲେ ରପ୍ତିତେ, ବନ୍‌ଡ ତେତ୍ତେ ଆନିନ୍‌ଆଡଙ୍‌ ଆରବ୍‌ବପ୍ପୁତେନ୍‌ ଆବୋର୍ସା ଜାୟ୍‌ତାନ୍‌ ଅବ୍‌ସେଡ୍‌ତେ ।

23 ଅଙ୍ଗା ଆମନ୍‌ରା ତଅଡନ୍‌ ଡ ଅଲାଙନ୍‌ ଡୋବ୍‌ତେ, ଆନିନ୍‌ ପନରଡନ୍‌ ସିଲଡ୍‌ ଆପରାନ୍ନାନ୍‌ ଡୋବ୍‌ତେ ।

24 କଙ୍କ୍ରିମରନ୍‌ ଡ ଆରବ୍‌ସୋଡ଼ାଡମ୍‌ତନ୍‌ ଆମନ୍‌ରା ନିଣ୍ଡୟ୍‌ମର୍‌ ଗାମ୍‌ଲେ ଆଞୁମନ୍‌ ଜନାତଜି,ଆରି ଆନିନ୍‌ କଙ୍କ୍ରିନ୍‌ ବାତ୍ତେ ବଡଗାଁୟ୍‌ ଲୁମ୍‌ତେ ।

25 ଆଡ଼ସାମରନ୍‌ ଆରାସାତନ୍‌ ଆନିୟମନ୍‌ ବାତ୍ତେ ଆନିନ୍‌ଡମ୍‌ ରବ୍ବୁତେ; ଇନିଆସନ୍‌ଗାମେଣ୍ଡେନ୍‌ କାବ୍ବାଡ଼ାନେନ୍‌ ଆସନ୍‌ ଆସିନ୍‌ ଅଲଡୟ୍‌ଜେ ।

26 ଲାଙ୍‌ଲେଡ୍‌ ମନ୍‌ରାନ୍‌ ତମ୍ପରୁବ୍‌ ଞନାଙନ୍‌ ଆସନ୍‌ ଲୋବତଞ୍ଜି ବନ୍‌ଡ ଡରମ୍ମମରନ୍‌ ତନିୟ୍‌ତିୟନ୍‌ ଆସନ୍‌ ଅଃଡାଲ୍‌ଗଡେ ।

27 ପେଲ୍ଲାମରଞ୍ଜି ଆନମଙ୍‌ ଏଡ଼ୁର୍‌ମଡ୍‌ଡାଗୋ, ବନ୍‌ଡ ଆନିନ୍‌ ଏର୍‌ମନଙ୍‌ ଅନିୟମନ୍‌ ବାତ୍ତେ ପାଙ୍‌ଲାୟ୍‌ଡେନ୍‌ ତିଆତେ ମାଡ୍ଡ ଗୋଗୋୟ୍‌ ଏଡ଼ୁର୍‌ମଡ୍‌ଗୋ ।

28 କଣ୍ଡାୟ୍‌ ସାକିମରନ୍‌ ଅସେଡ୍‌ତେ ବନ୍‌ଡ ଅଙ୍ଗା ଆମନ୍‌ରା ଅମ୍‌ଡଙ୍‌ତେ, ଆନିନ୍‌ ଡର୍ନେଡମନ୍‌ ଆବର୍ନେ ବର୍ତନ୍‌ ।

29 ପେଲ୍ଲାମରନ୍‌ ଆ ମୁକ୍କାନ୍‌ ରବ୍‌ଡୋତେ ବନ୍‌ଡ ଲଗଡ୍‌ମରନ୍‌ ଆତଙର୍‌ଡମନ୍‌ ଗବ୍‌ରିତେ ।

30 ସଦାପ୍ରବୁନ୍‌ ଆ ବିରୁଦଲୋଙ୍‌ ଅନ୍ନିଙ୍‌ ଗିଆନ୍‌ କି ଅନ୍ନିଙ୍‌ ଆବୁଡ୍ଡି କି ଅନ୍ନିଙ୍‌ ଆ ଞନଙ୍‌ଞଙ୍‌ବର୍‌ ଅବୟ୍‌ତଡ୍‌ ।

31 ଅଲ୍‌ଜୁଜ୍ଜେନ୍‌ ଆସନ୍‌ କୁର୍ତାନ୍‌ ଅବ୍‌ଜାଡାତଜି ବନ୍‌ଡ ଜନିନୟନ୍‌ ସଦାପ୍ରବୁନ୍‌ ଆମଙ୍‌ସିଲଡ୍‌ ଅଡ଼ୋତାୟ୍‌ ।