1 ଏ ଅଅନ୍‌ଞେନ୍‌, ଅସମଁୟ୍‌ ଆମନ୍‌ ତୟ୍‌ଲିସିଙ୍‌ନମ୍‌ ଆମନ୍‌ରା ଆସନ୍‌ ଜାମନିଲନ୍‌ଡେନ୍‌, ଆରି ଆମନ୍‌ ଆନ୍ନାମରନ୍‌ ଆସନ୍‌ ସିବ୍‌ଡୟ୍‌ଲେ, 2 ତିଡେନ୍‌ ଆମନ୍‌ ତଅଡ୍‌ନମ୍‌ ଆବର୍ନେ ଅନ୍ତମ୍‌ ଆପାସଲୋଙ୍‌ ଗଲୋଲମ୍‌ ଆରି ମୁକ୍କାନମ୍‌ ଆବର୍ନେ ବାତ୍ତେ ଞନମ୍‌ଡାଲମ୍‌ । 3 ଏ ଡାଙ୍ଗଡ଼ାଅଞେନ୍‌, ଆମନ୍‌ ନମିଞେନ୍‌ କେନ୍‌ ଆକାବ୍ବାଡ଼ା ଲୁମା, ଆମନ୍‌ଡମନ୍‌ଆଡଙ୍‌ ଡୋବା; ଇନିଆସନ୍‌ଗାମେଣ୍ତେନ୍‌ ଆମନ୍‌ କୁଲମ୍‌ନମ୍‌ ଆସିଲୋଙ୍‌ ଆମନ୍‌ ଡକୋ; ଆମନ୍‌ଡମନ୍‌ଆଡଙ୍‌ ଲବ୍‌ଗଃଡମ୍‌ଲନ୍‌ ତୟ୍‌ଲିସିଙ୍‌ନମ୍‌ ଆମଙ୍‌ବା ନମିନ୍‌ ନମିନ୍‌ କାକୁର୍ତିନା । 4 ଅମଡ୍‌ନମ୍‌ ଡିମଡ୍‌ନେନ୍‌ ତିୟ୍‌ଡଙ୍‌, ଅଡ଼େ ଉସାଲ୍‌ମଡ୍‌ନମ୍‌ ମବ୍‌ମବ୍‌ଡାନ୍‌ ତିୟ୍‌ଡଙ୍‌ । 5 ଆମନ୍‌ଡମ୍‌ଆଡଙ୍‌ ଅଲବନ୍‌ ଆନୋଡ଼େଙ୍‌ ଅସିନ୍‌ ସିଲଡ୍‌, ଅନ୍ତିଡନ୍‌ ଅନ୍ତମ୍‌ ଜନ୍ତାନ୍‌ ଆନୋଡ଼େଙ୍‌ ସିଲଡ୍‌ ଡୋବିଁୟ୍‌ ।

6 ଏ ଆଡ଼ସା, ଆମନ୍‌ ମୁୟ୍‌ଡାନ୍‌ ଆମଙ୍‌ବା ଇୟା, ଆ କାବ୍ବାଡ଼ାନ୍‌ ଇଃୟମା ଆରି ଗିଆନନ୍‌ ଞାଙା । 7 ଆ ପନ୍‌ସୁଆତିମରନ୍‌ ଅଡ଼େ ଆ ସୋଡ଼ାମରନ୍‌ ଅଡ଼େ ଆ ପ୍ରବୁନ୍‌ ଆନ୍ନିଙ୍‌ ଅଃଡକୋଲୋ ବନ୍‌ଡ ଆନିନ୍‌ ଡାଗାଡାଇଙନ୍‌ ଆଜନୋମନ୍‌ ଆସନ୍‌ ତର୍ତୁମ୍‌ତେ, 8 ଆରି ଜନ୍‌ରୋମନ୍‌ ଆଡିଡ୍‌ ଜନୋମନ୍‌ ତର୍ତୁମ୍‌ତେ । 9 ଏ ଆଡ଼ସାମର୍‌, ଆମନ୍‌ ଡିଅଙ୍ଗା ଜାୟ୍‌ ଲୁଡ୍‌ଲେ ଡକୋତନ୍‌ ? ଆମନ୍‌ ଆଙ୍ଗା ମଡ଼େଲନ୍‌ ଡୋତନ୍‌ ? 10 "ଆରି ଅସୋୟ୍‌ ଲୁଡେନ୍‌ଡେନ୍‌, ଆରି ଅସୋୟ୍‌ ମବେଣ୍ଡେନ୍‌, ଆରି ଅସୋୟ୍‌ ଡିମଡ୍‌ନେନ୍‌ ଆସନ୍‌ ଞଙ୍‌ଲନ୍‌ଗିଡ୍‌ଲଣ୍ଡେନ୍‌ ।" 11 ଡୋଲେୟ୍‌ନମ୍‌ ବେମଡ୍‌ମରନ୍‌ ଅନ୍ତମ୍‌ ଡ ଅରିର୍ସୋୟମରଞ୍ଜି ଅନ୍ତମ୍‌ ଅଡ଼ୋତାୟ୍‌ ।

12 ଇର୍ସେନ୍‌ ଆର୍‌ଲୁମ୍‌ତେନ୍‌ ଆମନ୍‌ରା, ଡ ଡୋସାନ୍‌ ଆର୍‌ଲୁମ୍‌ତେନ୍‌ ଆମନ୍‌ରା, ଆନିନ୍‌ ପାତ୍ୟାବରନ୍‌ ବର୍ରନ୍‌ ତଙିୟ୍‌ତନ୍‌ । 13 ଆନିନ୍‌ ଅମଡନ୍‌ ବାତ୍ତେ ଇଡ୍‌ମଡ୍‌ତେ, ଆନିନ୍‌ ଅଜଙନ୍‌ ବାତ୍ତେ ବର୍ନେନ୍‌ ବର୍ତନ୍‌, ଆନିନ୍‌ ଅଣ୍ତେର୍‌ସିନ୍‌ ବାତ୍ତେ ରସିଲେ ଅବ୍‌ତୁୟ୍‌ତେ, 14 ଆ ଉଗ୍ଗର୍‌ଲୋଙନ୍‌ ପେଲ୍ଲାନ୍‌ ଡକୋ, ଆନିନ୍‌ ଆଏଡ଼ର୍‌ ଅନବ୍‌ସେଡ୍‌ ବରନ୍‌ ଇୟମ୍‌ତେ, ଆନିନ୍‌ ଗୋଡ଼େ ଜମ୍ମଲନ୍‌ ବିଡ୍‌ତେ । 15 ତିଆସନ୍‌ ଆ ତନଙଡନ୍‌ ଏରବ୍ବୋମଙ୍‌ ଅଡ଼ୋତାୟ୍‌, ଆରି ଆନିନ୍‌ ସନାୟ୍‌ସିନ୍‌ ଏର୍‌ଞନାଙନ୍‌ ଏରବ୍ବୋମଙ୍‌ ଅସେଡ୍‌ତେ ।

16 ତୁଡ୍ରୁ ବିସୟନ୍‌ଆଡଙ୍‌ ପ୍ରବୁନ୍‌ ଏଡ଼ୁର୍‌ମଡ୍‌ତେ; ସାତ ଜନବନ୍‌ ନିୟ୍‌ ଆନିନ୍‌ ଏଡ଼ୁର୍‌ମଡ୍‌ତେ । 17 କଙ୍କ୍ରି ଗନିଜନ୍‌, ପାତ୍ୟା ଅଲାଙନ୍‌ ଡ ଏର୍‌ଡୋସାମରନ୍‌ ଆ ସନମ୍ୱବ୍‌ ଆସି, 18 ଅନବ୍‌ସେଡ୍‌ ଅନିୟମ୍‌ ଉଗ୍ଗରନ୍‌, ଏର୍‌ମନଙ୍‌ କାବ୍ବାଡ଼ାନ୍‌ ଆଲନୁମ୍‌ ଆସନ୍‌ ଅପ୍ପୁଡ୍‌ ଅଜଙନ୍‌; 19 କଣ୍ତାୟ୍‌ ସାକିନ୍‌ ଆନା ପାତ୍ୟା ବର୍ତନ୍‌ ଆରି ଆନା ବୋଞାଙଞ୍ଜି ଆମଙ୍‌ଲୋଙ୍‌ ଗୋଡ଼େ ଜମ୍ମଲନ୍‌ ବିଡ୍‌ତେ ।

20 ଏ ଡାଙ୍ଗଡ଼ାଅନ୍‌ଞେନ୍‌, ଆମନ୍‌ ଆପ୍ପେୟ୍‌ନମ୍‌ ଆବନାଁୟ୍‌ବର୍‌ ମାନ୍ନେଆ,ଆରି ଅୟୋଙ୍‌ନମ୍‌ ଆ ଞନଙ୍‌ଞଙ୍‌ ଅମ୍‌ରେଙ୍‌ଡଙ୍‌ । 21 ତିଆତେ ଆଏଡ଼ର୍‌ ଉଗ୍ଗର୍‌ଲୋଙ୍‌ନମ୍‌ ୟୁଡ୍‌ଲେ ଡକ୍କୋଆ,ଆରି ସଙ୍କାଲୋଙ୍‌ନମ୍‌ ଜିଆ । 22 ଆମନ୍‌ ତରଙିଁୟ୍‌ତନ୍‌ ଆଡିଡ୍‌ ତିଆତେ ଆମନ୍‌ଆଡଙ୍‌ ତଙରନ୍‌ ଅବ୍‌ତୁୟ୍‌ତମ୍‌, ଆରି ଆର୍‌ଲୁଡ୍‌ତ୍ତେନ୍‌ ଆଡିଡ୍‌ ତିଆତେ ଜନଗ୍ଗେମର୍‌ନମ୍‌ ଡେତେ, ଆମନ୍‌ ଆଡରୋତନ୍‌ ଆଡିଡ୍‌ ତିଆତେ ଆମନ୍‌ ସରିନ୍‌ କଡାଡ଼ିତନ୍‌ । 23 ଇନିଆସନ୍‌ଗାମେଣ୍ତେନ୍‌ ତି ଆବନାଁୟ୍‌ବର୍‌ ପିଙ୍କତୋଡ୍‌; ଆରି ତି ଆବନାଁୟ୍‌ ସାଆର୍‌; ଆରି ଞନଙ୍‌ଞଙ୍‌ କନେଁୟ୍‌ ଅନମେଙ୍‌ ତଙରନ୍‌ । 24 ଆନିନ୍‌ ଆମନ୍‌ଆଡଙ୍‌ ପେଲ୍ଲାବଜନ୍‌ ସିଲଡ୍‌ ଡ ବମନ୍‌ରା ଆଡୁକ୍ରି ଆତମୟ୍‌ଲାଙ୍‌ ସିଲଡ୍‌ ଡୋବ୍‌ତମ୍‌ । 25 ଉଗର୍‌ଲୋଙ୍‌ନମ୍‌ ଅସେଲ୍‌ ମୁକ୍କାନ୍‌ଆଡଙ୍‌ ଗିୟ୍‌ଲେ ଡୁଙ୍‌ୟମ୍‌ଡଙ୍‌; ଅଡ଼େ ଆ ଗନିୟ୍‌ଗିଜନ୍‌ ବାତ୍ତେ ଆମନ୍‌ଆଡଙ୍‌ ଆଞନମ୍‌ ଆସନ୍‌ ତିୟ୍‌ଡଙେ । 26 ଇନିଆସନ୍‌ଗାମେଣ୍ତେନ୍‌ ଜୋଣ୍ତଡ଼ିନ୍‌ ଆସନ୍‌ ମନ୍‌ରାନ୍‌ ଆଜନୋମ୍‌ଜୋମ୍‌ ଅସୋୟ୍‌ତେ,ଆରି ଡାରିବଜନ୍‌ ମନ୍‌ରାନ୍‌ ଆ ମଡ଼ଗା ପରାନ୍ନା ଆଞନମ୍‌ ଆସନ୍‌ ବେନ୍ତାତେ । 27 ଅନ୍ନିଙ୍‌ ଆମନ୍‌ରା ଅସମଁୟ୍‌ ଆ ମାୟଙ୍‌ଲୋଙନ୍‌ ତଗୋନ୍‌ ଡକ୍କୋଏଣ୍ଡେନ୍‌, ଏତ୍ତେଲ୍‌ଡେନ୍‌ ଇନି ଆସିନ୍‍ରିନ୍‍ ଅଜୋମ୍‌ତୋଡେ ପଙ୍‌ ? 28 ଅଡ଼େ ଆନ୍ନିଙ୍‌ ଆରଡ଼େତୋଡ୍‌ଲୋଙନ୍‌ ତଙିୟ୍‌ଲନ୍‌ଣ୍ଡେନ୍‌, ଇନି ଆତାଲ୍‌ଜଙନ୍‌ ଅଃବାଲ୍‌ସଏ ପଙ୍‌ ? 29 ଅଙ୍ଗା ଆମନ୍‌ରା ତୟ୍‌ଲିସିଙ୍‌ମରନ୍‌ ଆଡୁକ୍ରି ଆମଙ୍‌ବା ଇୟ୍‌ତେ, ଆନିନ୍‌ ତି ଅନ୍ତମ୍‌; ଆନା ଆନିନ୍‌ଆଡଙ୍‌ ସୁଙେତେ, ଆନିନ୍‌ ଡନଣ୍ଡାୟନ୍‌ ଞାଙ୍‌ତେ । 30 ଆପରାନ୍ନାନ୍‌ ଆଡନୋବ୍‌ ଆସନ୍‌ ରାଉମରନ୍‌ ଡୋଲଜନ୍‌ ଆସନ୍‌ ରାଉଲନ୍‌ଡେନ୍‌ ମନ୍‌ରାନ୍‌ ଆନିନ୍‌ଆଡଙ୍‌ ଅନେଡ଼ୁର୍‌ମଡେଜି । 31 ବନ୍‌ଡ ଆନିନ୍‌ ଞନମ୍‌ଡାଏଣ୍ଡେନ୍‌, ଆନିନ୍‌ ସାତ ଗୁନ ଅନାବ୍‌ଡିଡନ୍‌ ଡେତେ, ଆସିଙନ୍‌ ଆନର୍ଜେ ଅଡ଼୍‌କୋନ୍‌ ଆନିନ୍‌ଆଡଙ୍‌ ତିୟ୍‌ତେ । 32 ବନ୍‌ଡ ଜୋଣ୍ତଡ଼ାମରନ୍‌ ଆଜାଡ଼ିନ୍‌ ଏର୍‌ବୁଡ୍ଡି; ଆନିନ୍‌ଡମ୍‌ ଆ ପରାନ୍ନାନ୍‌ ଅନବ୍‌ସେଡନ୍‌ ଆସନ୍‌ ଆନିନ୍‌ ତିଆତେ ଲୁମ୍‌ତେ । 33 ଆନିନ୍‌ ତନୁଡନ୍‌ ଡ ଗନବ୍‌ରଜନ୍‌ ଞାଙ୍‌ତେ; ଆରି ଆ ଡୋସାନ୍‌ ଗନିୟ୍‌ଡାନ୍‌ ଅଡ୍ଡେଏ । 34 ଇନିଆସନ୍‌ଗାମେଣ୍ତେନ୍‌ ଆଇବୟ୍‌ଲୋଙନ୍‌ ଆବର୍ନେ ସଙ୍ଗତାମରନ୍‌ ଜବ୍ର ବରାବ୍‌ତେ; ଆଡ୍ରୁଲ୍‌ତିଡ୍‌ତନ୍‌ ଆଡିଡ୍‌ ଆନିନ୍‌ ଇନ୍ନିଙ୍‌ ଅକେମାଏ । 35 ଆନିନ୍‌ ଇନ୍ନିଙ୍‌ ଆ ତନାଣ୍ତେ ଅଃନଡ଼େଏ; ଆରି ଆମନ୍‌ ଗୋଗୋୟ୍‌ ତଙ୍କାନ୍‌ ତିୟେନ୍‌ ଜାକିଁୟ୍‌ଡେନ୍‌ ଆନିନ୍‌ ଅଃମ୍ମାନ୍ନେଏ ।