1 ଅଙ୍ଗା ଆଡୋଲେୟ୍‌ମର୍‌ ସତଙନ୍‌ ବାତ୍ତେ ତଙିୟ୍‌ତନେ, ଆନିନ୍‌ ପାତ୍ୟାନ୍‌ ଡ ପେଲ୍ଲାମରନ୍‌ ସିଲଡ୍‌ ମନଙ୍‌ ।

2 ପରାନ୍ନାନ୍‌ ପଡ଼େନେନ୍‌ ଅବୟ୍‌ତଡ୍‌ଡେନ୍‌ ମନଙ୍‌ତଡ୍‌; ଆରି ଅଙ୍ଗା ଆମନ୍‌ରା ତୋୟ୍‌ତାୟ୍‌ତୋୟ୍‌ଲମ୍‌ ତଙିୟ୍‌ତନ୍‌ ଆନିନ୍‌ ଇର୍ସେନ୍‌ ଲୁମ୍‌ତେ ।

3 ମନ୍‌ରାନ୍‌ ଆମଙ୍‌ବା ଜନନାନ୍‌ ଅବୟ୍‌ତଡ୍‌ଡେନ୍‌ କାବ୍ବାଡ଼ାନ୍‌ ବାତ୍ତେ ଆନିନ୍‌ଡମ୍‌ ଅସେଡ୍‌ତେ ଆରି ତିଆସନ୍‌ ଆ ମନ୍ନଲୋଙନ୍‌ ଇସ୍ୱରନ୍‌ଆଡଙ୍‌ ଅବ୍‌ଡୋସାତେ ।

4 ଗମାଙ୍‌ମରନ୍‌ ଗୋଗୋୟ୍‌ ଗଡ଼ିଞ୍ଜି ଞାଙ୍‌ତେ, ବନ୍‌ଡ ଡୋଲେୟ୍‌ମରନ୍‌ ଆ ଗଡ଼ିନ୍‌ ସିଲଡ୍‌ ଅନାନ୍ନାନ୍‌ ଡେତେ ।

5 କଣ୍ଡାୟ୍‌ ସାକିମରନ୍‌ ପନବ୍‌ରଡନ୍‌ ଞାଙ୍‌ତେ,ଆରି ପାତ୍ୟାମରନ୍‌ ଅଃନଡ଼ୁରେ ।

6 ସନାୟ୍‌ସିମରନ୍‌ ଆମଙ୍‌ସିଲଡ୍‌ ସନାୟୁମନ୍‌ ଆଞନାଙ୍‌ ଆସନ୍‌ ଅଡ଼୍‌କୋ ମନ୍‌ରାନ୍‌ ଏର୍‌ତଜିଗୋୟ୍‌ତଜି; ଡିଲେ ମନ୍‌ରାନ୍‌ ତନିୟ୍‌ତିୟ୍‌ମରନ୍‌ ଆଗଡ଼ି ଆଡନେ ଆସନ୍‌ ଇସ୍ସୁମ୍‌ତଜି ।

7 ଡୋଲେୟ୍‌ମରନ୍‌ ଅଡ଼୍‌କୋନ୍‌ ଆ ବୋଞାଙଞ୍ଜି ଆନିନ୍‌ଆଡଙ୍‌ ଏଡ଼ୁର୍‌ମଡ୍‌ତଜି; ଆଗଡ଼ିଞ୍ଜି ଆମଙନ୍‌ ସିଲଡ୍‌ ଜବ୍ର ସଙାୟ୍‌ ଅଜିରେଜି ପଙ୍‌ ! ଆନିନ୍‌ କଡାଡ଼ିନେନ୍‌ ଏର୍ତେଗୋୟ୍‌ତେ, ବନ୍‌ଡ ଆନିଞ୍ଜି ଆମଙନ୍‌ ଅବୟ୍‌ତଡ୍‌ଜି । 8 ଅଙ୍ଗା ମନ୍‌ରା ବୁଡ୍ଡିନ୍‌ ଞାଙ୍‌ତେ ଆନିନ୍‌ ଆପରାନ୍ନାନ୍‌ ଡୁଙ୍‌ୟମ୍‌ତେ; ଆନା ଜନନାନ୍‌ ଆସନ୍‌ ଲଡୟ୍‌ତେ, ଆନିନ୍‌ ଆସିର୍ବାଦନ୍‌ ଞାଙ୍‌ତେ ।

9 କଣ୍ଡାୟ୍‌ ସାକିମରନ୍‌ ପନବ୍‌ରଡନ୍‌ ଞାଙ୍‌ତେ,ଆରି ପାତ୍ୟାମରନ୍‌ ଅସେଡ୍‌ତେ ।

10 ଉଲ୍ଲୁମରନ୍‌ ଗମାଙ୍‌ଲେ ଉଗୁରିୟ୍‌ ଆଡକୋନେ ମନଙ୍‌ତଡ୍‌; ଆରି, ସୋଡ଼ାମରଞ୍ଜି ଆତୋଣ୍ତୋ କମ୍ବାରିନ୍‌ ଆଡନେଗଡ୍‌ ଗୋଗୋୟ୍‌ ମନଙ୍‌ତଡ୍‌ ।

11 ମନ୍‌ରାନ୍‌ ଆ ମନଙ୍‌ ବୁଡ୍ଡିନ୍‌ ବାତ୍ତେ ଆନିନ୍‌ ବନ୍‌ଡ୍ରାବନ୍‌ ଲବ୍‌ଗଡ୍‌ତେ । ଆରି ଡୋସାନ୍‌ ଆନୁମ୍‌ରେଙ୍‌ ଆ ଗନୁଗୁନ୍‌ ।

12 ରାଜାନ୍‌ ଆବନ୍‌ରାବ୍‌ ସିଅଁକିଡନ୍‌ ଆ ଗନୁରୁମନ୍‌ ଅନ୍ତମ୍‌, ବନ୍‌ଡ ଆ ସନାୟୁମନ୍‌ ଅଜିଙ୍‌ଲୋଙନ୍‌ ଡକୋନ୍‌ ଆସସିରା ଅନ୍ତମ୍‌ ।

13 ପେଲ୍ଲା ଡାଙ୍ଗଡ଼ାଅନନ୍‌ ଆପ୍ପେୟନ୍‌ ଆ ଡନଣ୍ଡାୟ୍‌ଗୋ ଡେତେ । ଆରି, ଗୋଡ଼େବଜନ୍‌ ଡିତାନ୍‌ ଆ ଜରତତ୍ତେନ୍‌ ଆ ଡାଆ ଅନ୍ତମ୍‌ ।

14 ଅସିଙନ୍‌ ଡ ଅନର୍ଜେନ୍‌ ଆପ୍ପେୟନ୍‌ ଡ ଅୟୋଙନ୍‌ ଆମଙ୍‌ସିଲଡ୍‌ ଞାଙ୍‌ତନେ, ବନ୍‌ଡ ବୁଡ୍ଡିଡମନ୍‌ ଆଡୁକ୍ରି ପ୍ରବୁନ୍‌ ଆମଙ୍‌ସିଲଡ୍‌ ଞାଙ୍‌ତନେ ।

15 ଆଡ଼ସାନ୍‌ ଜବ୍ର ମବ୍‌ମବ୍‌ଡାନ୍‌ ପାଙ୍‌ତାୟ୍‌; ବନ୍‌ଡ ଆଡ଼ସାମରନ୍‌ ଡୋଲଜନ୍‌ ପାଙ୍‌ତାୟ୍‌ ।

16 ଇସ୍ୱରନ୍‌ ବନାଁୟ୍‌ବରନ୍‌ ଆମରାନ୍ନେତେନ୍‌ ଆମନ୍‌ରା ଆନିନ୍‌ ଆପରାନ୍ନାନ୍‌ ଡଙ୍‌ଡଙ୍‌ତେ; ବନ୍‌ଡ ଅଙ୍ଗା ଆମନ୍‌ରା ଆନିନ୍‌ଡମ୍‌ ଆଜନିର୍‌ ତଙରନ୍‌ ଏଡ଼ୁର୍‌ମଡେନ୍‌ଡେନ୍‌, ଆନିନ୍‌ ରବୁତେ ।

17 ଆନା ଡୋଲେୟ୍‌ମରନ୍‌ଆଡଙ୍‌ କାନକାରମ୍‌ ଗାମ୍‌ତେ, ଆନିନ୍‌ ପ୍ରବୁନ୍‌ଆଡଙ୍‌ ସାଉନ୍‌ ତିୟ୍‌ତେ,ଆରି ପ୍ରବୁନ୍‌ ଆ ମନଙ୍‌ କାବ୍ବାଡ଼ାନ୍‌ ଆସନ୍‌ ଆବ୍‌ୟର୍ତେ ।

18 ଡାଙ୍ଗଡ଼ାଅନନ୍‌ଆଡଙ୍‌ ମନଙ୍‌ ଞଙ୍‌ଞଙା, ଇନିଆସନ୍‌ଗାମେଣ୍ତେନ୍‌ ଅରାସାନେନ୍‌ ଡକୋ; ଆରି, କେନ୍‌ ଏନ୍ନେଲେ ଏଲୁମ୍‌ଲଡେନ୍‌ ଆମ୍ବେନ୍‌ ଆନିଞ୍ଜିଆଡଙ୍‌ ଅନସେଡ୍‌ଗଡନ୍‌ ଆଜନିର୍‌ ଆସନ୍‌ ଆମ୍ବେନ୍‌ ଡୋସାତବେନ୍‌ ।

19 ମାଡ୍ଡ ବରାବ୍‌ ମରନ୍‌ ପନବ୍‌ରଡନ୍‌ ଞାଙ୍‌ତେ, ଇନିଆସନ୍‌ଗାମେଣ୍ଡେନ୍‌ ଆମନ୍‌ ଆନାଆଡଙ୍‌ ବତର ଡଙ୍‌ଡଙ୍‌ତେ, ତିଆତେ ଆରିବତର ଆମନ୍‌ ଲୁମ୍‌ତେ ।

20 ଆତନିକ୍କି ଆମନ୍‌ ଏଙ୍ଗାଲେ ଜନନାମର୍‌ ଡେତମ୍‌ ତିଆସନ୍‌ ଞନଙନ୍‌ ଅମ୍‌ଡଙା ଆରି ଞନଙ୍‌ଞଙ୍‌ବରନ୍‌ ଜାଆ ।

21 ମନ୍‌ରାନ୍‌ ଆମନ୍ନଲୋଙ୍‌ ଏର୍ଜାଡ଼ିକାନ୍‌ ଆନିୟମ୍‌ଜି ଡକୋ, ବନ୍‌ଡ ପ୍ରବୁନ୍‌ ଆ ଞନଙ୍‌ଞଙ୍‌ବର୍‌ ବାତ୍ତେ ଗନବ୍‌ରିନ୍‌ ଡେତେ ।

22 ମନ୍‌ରାନ୍‌ ଆଏଡ଼ର୍‌ ସନାୟୁମନ୍‌ ଇସ୍ସୁମ୍‌ତେ ଆରି ପାତ୍ୟାମରନ୍‌ ସିଲଡ୍‌ ଡୋଲେୟ୍‌ମରନ୍‌ ମନଙ୍‌ ।

23 ଅଙ୍ଗା ଆମନ୍‌ରା ପ୍ରବୁନ୍‌ଆଡଙ୍‌ ବତଙ୍‌ଲେ ମାନ୍ନେତେ ଆନମେଙନ୍‌ ତବ୍‌ଙର୍ତେ*, ଆନିନ୍‌ ଉଗୁରିୟ୍‌ ଡକୋତନ୍‌ ବନ୍ତଙନ୍‌ ଆମଙ୍‌ଗଡନ୍‌ ଅଃଜିରେ ।

24 ଆଡ଼ସାମରନ୍‌ ଆ ସଡ଼ୁଆଲୋଙନ୍‌ ଡକୋନ୍‌ ଆଡାରେୟ୍‌ଲୋଙ୍‌ ଆସିନ୍‌ ଓବ୍‌ଲେ ଆରି ଆତଅଡ୍‌ବାନ୍‌ ଆପନାଙ୍‌ ଆସନ୍‌ ଅନିନ୍‌ ଅଃନିସୁମେ ।

25 ନିଣ୍ଡୟ୍‌ମରନ୍‌ଆଡଙ୍‌ ତିଡେଣ୍ଡେନ୍‌ ଉଲ୍ଲୁମରନ୍‌ ଆବ୍ବୟ୍‌ଲନ୍‌ ଆଡକୋନେ ଆସନ୍‌ ଞଙ୍‌ତନେ ଆରି ବୁଡ୍ଡିମରନ୍‌ଆଡଙ୍‌ କନେଁୟ୍‌ ଞନଙ୍‌ବରନ୍‌ ବରେଣ୍ଡେନ୍‌ ଆନିନ୍‌ ଗିଆନନ୍‌ ଞାଙ୍‌ତେ ।

26 ଅଙ୍ଗା ଆ ଡାଙ୍ଗାଡ଼ାଅନ୍‌ ଆପ୍ପେୟବ୍‌ ଆନର୍ଜେ ଅଃମ୍ମୋସାତେ ଆରି ଆୟୋଙନ୍‌ଆଡଙ୍‌ ଗଙ୍‌ତେ ଆନିନ୍‌ ଗନ୍‌ଡ୍ରୟ୍‌ଜନ୍‌ ଡ ଗନବ୍‌ରଜନ୍‌ ଞାଙ୍‌ତେ ।

27 ଏ ଡାଙ୍ଗଡ଼ାଅନ୍‌ଞେନ୍‌ ଅଙ୍ଗା ଆଞନଙ୍‌ ଜନନାନ୍‌ ସିଲଡ୍‌ ଆମନ୍‌ଆଡଙ୍‌ ଅବ୍‌ନାଡ଼ତମ୍‌ ତି ଆବର୍ନେଲୋଙ୍‌ ଡାଲୁଡ୍‌ଡଙ୍‌,

28 କଣ୍ଡାୟ୍‌ ସାକିମରନ୍‌ ଆଜାଡ଼ି ପନ୍‌ସୁଆତିନ୍‌ ନିଣ୍ଡୟ୍‌ତେ ଆରି ପେଲ୍ଲାମରନ୍‌ ଆମୁକ୍କା ଏର୍‌ଡରମ୍ମନ୍‌ ମତେ ।

29 ନିଣ୍ଡୟ୍‌ମରନ୍‌ ଆସନ୍‌ ପନବ୍‌ରଡନ୍‌ ଆରି ପେଲ୍ଲାମରଞ୍ଜି ଆକିଣ୍ଡୋଙ୍‌ ଆସନ୍‌ ତନିଡନ୍‌ ଆବ୍‌ଜାଡା ଡକୋ ।