1 ଏ ଅଅନ୍‌ଞେନ୍‌, ଆମନ୍‌ ଞନଙ୍‌ଞେନ୍‌ କରୋଡାଡଙମ୍‌, ବନ୍‌ଡ ଉଗର୍‌ଲୋଙ୍‌ନମ୍‌ ବନାଁୟ୍‌ବର୍‌ଞେନ୍‌ ଅଡ଼୍‌କୋନ୍‌ ଡକ୍କୋଆ । 2 ଇନିଆସନ୍‌ଗାମେଣ୍ତେନ୍‌ ତି ବାତ୍ତେ ଆମନ୍‌ ଗୋଗୋୟ୍‌ ଡିନା ଅମେଙ୍‌ତମ୍‌ ଆରି ଅନମେଙ୍‌ ବର୍ସେଙନ୍‌ ଆଡନିଡି ଡ ସନୟୁନ୍‌ ଗୋଗୋୟ୍‌ତେ । 3 ସନାୟୁମନ୍‌ ଡ ଆଜାଡ଼ିନ୍‌ ଆମନ୍‌ଆଡଙ୍‌ ଅମ୍‌ରେଙ୍‌ଡଙମ୍‌ତଡ୍‌; ସଙ୍କାଲୋଙ୍‌ନମ୍‌ ବାଗୁନ୍‌ ଜିବାଡା ଆରି ଉଗ୍ଗର୍‌ନମ୍‌ ପଟାଲୋଙ୍‌ ଇଡ୍‌ଲେ ଡକ୍କୋଆ । 4 ଏତ୍ତେଲେ ଏଲୁମେଣ୍ଡେନ୍‌, ଆମ୍ୱେନ୍‌ ଇସ୍ୱରନ୍‌ ଡ ମନ୍‌ରାନ୍‌ ଆଗନିୟ୍‌ଗିୟ୍‌ଲୋଙ୍‌ ସନାୟୁମନ୍‌ ଡ ମନଙ୍‌ ଅନିୟମନ୍‌ ଏଞାଙ୍‌ତେ ।

5 ଆମନ୍‌ ଅଡ଼୍‌କୋ ଉଗ୍ଗର୍‌ନମ୍‌ ବାତ୍ତେ ପ୍ରବୁନ୍‌ ଆମଙ୍‌ଲୋଙ୍‌ ଡର୍ନା ଆରି ଆମନ୍‌ଡମନ୍‌ ଆ ମନଙ୍‌ ଅନିୟମ୍‌ଲୋଙନ୍‌ ଇଙ୍‌ଡର୍‌ଡଙ୍‌ନେ । 6 ଅଡ଼୍‌କୋନ୍‌ କାବ୍ବାଡ଼ାରେଙ୍‌ନମ୍‌ ଆନିନ୍‌ଆଡଙ୍‌ ମନ୍ନେଆ, ଏତ୍ତେଲ୍‌ଡେନ୍‌ ଆନିନ୍‌ ତଙର୍‌ନମ୍‌ ଅଡ଼୍‌କୋନ୍‌ ବୁବ୍‌ଙୟ୍‌ତେ । 7 ଆମନ୍‌ ଗନିୟ୍‌ଗିୟ୍‌ଲୋଙ୍‌ନମ୍‌ ଗିଆନମରନ୍‌ ଗାମ୍‌ଡଙ୍‌ନେ; ପ୍ରବୁନ୍‌ଆଡଙ୍‌ ବତଙା ଆରି ପରାନ୍‌ସାତ୍ତିନ୍‌ ସିଲଡ୍‌ ସବ୍‌ଙାୟ୍‌ନା । 8 କେନ୍‌ ଆତେ ଡଅଙ୍‌ନମ୍‌ ଆସୁକ୍କା ଡେତେ ଆରି ଅଜାଙ୍‌ଲୋଙ୍‌ନମ୍‌ ଆ ସର୍ରଙ୍‌ସଙ୍‌ ଡେତେ । 9 ଆମନ୍‌ ଅନର୍ଜେଲୋଙ୍‌ନମ୍‌ ଡ ଅଡ଼୍‌କୋନ୍‌ ଆପର୍ତମ୍ମୁ ଜଅନ୍‌ ବାତ୍ତେ ପ୍ରବୁନ୍‌ଆଡଙ୍‌ ମାନ୍ନେଆ । 10 ଏତ୍ତେଲ୍‌ଡେନ୍‌ କୁତିର୍‌ଲୋଙ୍‌ନମ୍‌ ଜବ୍ର ଆରନ୍ନା ବରିୟ୍‌ତେ ଆରି କୁଣ୍ତଲୋଙ୍‌ନମ୍‌ ରଙ୍‌ ଦ୍ରାକ୍ୟାଡାନ୍‌ ଡଃଲାଲେ ଅଲାତେ । 11 ଏ ଅଅନ୍‌ଞେନ୍‌, ପ୍ରବୁନ୍‌ ଆକନେଁୟ୍‌ବର୍‌ ଆଲ୍ଲେଡଙ୍‌ ଆରି ଆ ସାସନଲୋଙନ୍‌ ମଙ୍ଗାଡଙମ୍‌ । 12 ଇନିଆସନ୍‌ଗାମେଣ୍ତେନ୍‌ ଏଙ୍ଗାଲେ ଆପ୍ପେୟନ୍‌ ଆ ଡନୁଙ୍‌ୟମ୍‌ ଡାଙ୍ଗଡ଼ାଅନନ୍‌ଆଡଙ୍‌, ତିଅନ୍ତମ୍‌ ପ୍ରବୁନ୍‌ ଆ ଡରୁଙ୍‌ୟମ୍‌ତେଆଡଙ୍‌ ସାସନତେ । 13 ଅଙ୍ଗା ଆମନ୍‌ରା ଗିଆନନ୍‌ ରବାଙ୍‌ତେ ଆରି ବୁଡ୍ଡିନ୍‌ ଞାଙ୍‌ତେ, ଆନିନ୍‌ ସନେନ୍‌ସେନ୍‌ । 14 ଇନିଆସନ୍‌ଗାମେଣ୍ତେନ୍‌ ରୁପ୍ପାନ୍‌ ଆବେପାର ସିଲଡ୍‌ ଆ ବେପାରନ୍‌ ମନଙ୍‌, ଆରି ମନଙ୍‌ ସୁନ୍ନାନ୍‌ ସିଲଡ୍‌ ତିଆତେ ଆଞନାଙ୍‌ ମନଙ୍‌ଡମ୍‌ । 15 ତିଆତେ ମୁକ୍ତାନ୍‌ ସିଲଡ୍‌ ଜବ୍ର ମଡ଼ଗା, ଆରି ଅନ୍ନିଙ୍‌ ଆ ଜନବ୍‌ଜି ବାତ୍ତେ ଆନିନ୍‌ ଅନ୍ତମ୍‌ ଅବ୍‌ଜଙ୍‌ଲେ ଅଃରପ୍ତିନେ । 16 ଆ ଅର୍ଜଡ଼ୋମ୍‌ସିଗଡ୍‌ ଗୋଗୋୟ୍‌ ବର୍ସେଙ୍‌ ଅନମେଙନ୍‌, ଆ ଅର୍କାବଡ଼ିସିଗଡ୍‌ ଆରନ୍ନା ଡ ଅନବ୍‌ଗୁଗୁନ୍‌ ଡକୋ । 17 ଆ ତଙରନ୍‌ ଅଡ଼୍‌କୋନ୍‌ ଏରାମ୍ମୁୟ୍‌ ଆତଙର୍‌ ଆରି ଆତଙର୍‌ଗଡନ୍‌ ଅଡ଼୍‌କୋନ୍‌ ଏରାମ୍ମୁୟ୍‌ଡମ୍‌ । 18 ଅଙ୍ଗା ଆମନ୍‌ରା ଆମଙ୍‌ବାନ୍‌ ଲୋଲୋତଞ୍ଜି, ଆନିଞ୍ଜି ଆସନ୍‌ ଆନିନ୍‌ ଅନମେଙ୍‌ ଆତ୍ରିୟ୍‌ତେନ୍‌ ଆରାନୁବ୍‌ ଅନ୍ତମ୍‌; ଅଙ୍ଗା ଆମନ୍‌ରା ତିଆତେ ଞମ୍‌ଲେ ଡକ୍କୋତେ ଆନିନ୍‌ ସନେନ୍‌ସେନ୍‌ ।

19 ପ୍ରବୁନ୍‌ ଗିଆନନ୍‌ ବାତ୍ତେ ପୁର୍ତିନ୍‌ ଗବ୍‌ଡେଲେନ୍‌, ଆନିନ୍‌ ବୁଡ୍ଡିନ୍‌ ବାତ୍ତେ ରୁଆଙନ୍‌ ଗବ୍‌ରିଏନ୍‌ ।

20 ଆ ଗିଆନନ୍‌ ବାତ୍ତେ ଜରୁ ଡରକୋନେନ୍‌ ସିଲଡ୍‌ ଗୋଡ୍‌ସୋର୍ରେ ଡାଆନ୍‌ ଡୁଙ୍‌ତନାୟ୍‌, ଆରି ମେଗନ୍‌ ସିଲଡ୍‌ ସସିରାଡାନ୍‌ ଜଡ୍ଡୋୟ୍‌ଲେ ଅସେଡ୍‌ତାୟ୍‌ ।

21 ଏ ଅଅନ୍‌ଞେନ୍‌, ଆମନ୍‌ ଗିଆନନ୍‌ ଡ ବୁଡ୍ଡିନ୍‌ ଞମ୍‌ଲେ ଡକ୍କୋଆ, କେନ୍‌ ଅଡ଼୍‌କୋନ୍‌ ଗନିୟ୍‌ଗିୟ୍‌ଲୋଙ୍‌ନମ୍‌ ସିଲଡ୍‌ ସବ୍‌ଙାୟ୍‌ଡଙ୍‌ । 22 ତିଆତେ ପରାନ୍ନାନମ୍‌ ଆନମେଙ୍‌ ଆରି ସଙ୍କାଲୋଙନ୍‌ ଆସନ୍‌ ରନୁରୁନମ୍‌ ଡେତେ । 23 ଏତ୍ତେଲ୍‌ଡେନ୍‌ ଆମ୍ବେନ୍‌ ତଙର୍‌ଲୋଙ୍‌ନମ୍‌ ଏର୍‌ବନ୍ତଙନ୍‌ ଏତଙିୟ୍‌ତନ୍‌, ଆରି ଅଜଙ୍‌ନମ୍‌ ଅତୁଡ୍ଡୁବେ । 24 ଆର୍‌ଲୁଡ୍‌ତେନ୍‌ ଆଡିଡ୍‌ ଆମନ୍‌ ଏର୍‌ବନ୍ତଙନ୍‌ ଡକୋତନ୍‌, ଓଓ, ଆମନ୍‌ ଲୁଡ୍‌ତେ ଆରି ଡିମଡ୍‌ନେନମ୍‌ ସୁକ୍କା ଡେତେ । 25 ଏରବ୍ବୋମଙ୍‌ ଆଜିର୍ତାଞନ୍‌ ଆବନ୍ତଙ୍‌ ଅଡ଼େ ପେଲ୍ଲାମରଞ୍ଜି ଅନବ୍‌ସେଡନ୍‌ ଆସନ୍‌ ଆଜିର୍ତାଞଞ୍ଜି ଆଡିଡ୍‌ ଆବନ୍ତଙ୍‌ ବତଙ୍‌ଡଙ୍‌ବେନ୍‌ । 26 ଇନିଆସନ୍‌ଗାମେଣ୍ତେନ୍‌ ଅରିଙ୍‌ଡର୍‌ନେମନ୍‌ ଆସନ୍‌ ପ୍ରବୁନ୍‌ ଡକୋ, ଆନିନ୍‌ ଅତାଲ୍‌ଜଙ୍‌ବେନ୍‌ ଆ ଜନ୍ତାନ୍‌ ସିଲଡ୍‌ ଡୋବ୍‌ତବେନ୍‌ । 27 ସନାୟ୍‌ସିନ୍‌ ଆସନ୍‌ ଏକୁସ୍ସାଡଙ୍‌ନେ ଅଙ୍ଗା ଆମନ୍‌ରା ଞନାଙନ୍‌ ଆସନ୍‌ ଜିଞ୍ଜିନ୍‌ ଆମନ୍‌ ଆନିନ୍‌ଆଡଙ୍‌ ଏର୍‌ସନାୟ୍‌ସିନ୍‌ ଡକ୍କୋଡଙ୍‌ନେ । 28 ଅମଙ୍‌ନମ୍‌ ଜନବନ୍‌ ଡକୋଏନ୍‌ଡେନ୍‌, ଜିରା, ଆରି ଜିରାୟ୍‌, ଞେନ୍‌ ବିଅଡ଼େଃ ତିୟ୍‌ତମ୍‌ କେନ୍‌ଆତେ ତୟ୍‌ଲିସିଙ୍‌ନମ୍‌ ଆମନ୍‌ରା ବର୍‌ଡଙେ । 29 ତୟ୍‌ଲିସିଙ୍‌ନମ୍‌ ଆମନ୍‌ରା ଅମଙ୍‌ବାନମ୍‌ ଏରାମ୍ମୁୟ୍‌ ଆଡ୍ରକୋତନ୍‌ ଆସନ୍‌ ଆ ବିରୁଡଲୋଙନ୍‌ ଏର୍‌ମନଙ୍‌ ଅନିୟମନ୍‌ ଏଇୟମ୍‌ଡଙ୍‌ । 30 ମନ୍‌ରାନ୍‌ ଆମନ୍‌ଆଡଙ୍‌ ଇନ୍ନିଙ୍‌ ଅଃନ୍ନବ୍‌ପ୍ପାରାଲମ୍‌ଡେନ୍‌, କାଜ୍ଜାନ୍‌ନିୟ୍‌ ଆନିନ୍‌ ସରିନ୍‌ ଏବିରୁଦଡଙ୍‌ । 31 ପେଲ୍ଲାମରନ୍‌ ଏଇସ୍କତ୍ତାଡଙ୍‌, ଆରି ଆ ତଙରନ୍‌ ଇନ୍ନିଙ୍‌ ଏସେଡାଡଙ୍‌ । 32 ଇନିଆସନ୍‌ଗାମେଣ୍ତେନ୍‌ ଗୋଡ଼େମରନ୍‌ଆଡଙ୍‌ ପ୍ରବୁନ୍‌ ଏଡ଼ୁର୍‌ମଡ୍‌ତେ, ବନ୍‌ଡ ଲବଡ୍ଡିମରଞ୍ଜି ସରିନ୍‌ ଗଡ଼ିଗୋ କଡାଡ଼ିତନ୍‌ । 33 ଇର୍ସେମରଞ୍ଜି ଆସିଙ୍‌ଲୋଙ୍‌ ପ୍ରବୁନ୍‌ ଆ ସନୟ୍‌ପ ଡକୋତେ, ବନ୍‌ଡ ଆନିନ୍‌ ଡରମ୍ମମରଞ୍ଜି ଆସିଙ୍‌ ଆସିର୍ବାଦତେ । 34 ଆନିନ୍‌ ନିଣ୍ତୟ୍‌ମରଞ୍ଜିଆଡଙ୍‌ ନିଣ୍ତୟ୍‌ତେ, ବନ୍‌ଡ ଆନିନ୍‌ ଲଗଡ୍‌ ମନ୍‌ରାଞ୍ଜିଆଡଙ୍‌ ସନାୟୁମନ୍‌ ତିୟ୍‌ତେ । 35 ଗିଆନମରନ୍‌ ଅନବ୍‌ଗୁଗୁନ୍‌ ଞାଙ୍‌ତେ, ବନ୍‌ଡ ଏର୍‌ଗିଆନମରନ୍‌ ଗନ୍‌ଡ୍ରୟ୍‌ଜନ୍‌ ଞାଙ୍‌ତେ ।