1 ଆମ୍ୱେନ୍‌ ବିଅଡ଼େଃ ଆସନ୍‌ ଡର୍ପବରନ୍‌ ଏବର୍‌ଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ବଡିନ୍ନାଲୋଙ୍‌ ଇନି ଡେତେ, ତିଆତେ ଆମ୍ୱେଞ୍ଜି ଜନାତଡ୍‌ । 2 ଆନ୍ନାମରନ୍‌ ଆମନ୍‌ଆଡଙ୍‌ ସେଙ୍କେଏତୋ, ବନ୍‌ଡ ତଅଡ୍‌ନମ୍‌ ତିଆତେ ବର୍ଡଙ୍‌ନେତଡ୍‌; ଆନ୍ନାମରନ୍‌ ତିଆତେ ବର୍ନେତୋ, ବନ୍‌ଡ ଉସାଲ୍‌ତମ୍‌ନମ୍‌ ତିଆତେ ବର୍ଡଙ୍‌ନେତଡ୍‌ । 3 ଅରେଙନ୍‌ ଡ ଲକିଜନ୍‌ ଲଗିନ୍‌ଡମ୍‌; ବନ୍‌ଡ ଉଲ୍ଲୁମରନ୍‌ ଆବନ୍‌ଡ୍ରାବ୍‌ ତି ବାଗୁନ୍‌ ସିଲଡ୍‌ ଲଗିନ୍‌ଡମ୍‌ । 4 ବରାବନ୍‌ ଆଜିର୍ତାଞନ୍‌ ଆଡିଡ୍‌ ଇନ୍ନିଙ୍‌ ଅଃନିର୍ସୋୟମ୍‌ଡାଏ ଆରି ବନ୍‌ଡ୍ରାବନ୍‌ ଗଗଡାନ୍‌ ଅନ୍ତମ୍‌; ବନ୍‌ଡ ଇସ୍କତ୍ତାନ୍‌ ଆମୁକ୍କାବା ଆନା ତନଙ୍‌ଲେ ରପ୍ତିଏ ? 5 ଆସସ ଡନୁଙ୍‌ୟମନ୍‌ ସିଲଡ୍‌ ଅବ୍‌ରାଙ୍‌ଡାଲନ୍‌ ଆ ସାଞେଙ୍‌ବରନ୍‌ ମନଙ୍‌ । 6 ଡନୁଙ୍‌ୟମ୍‌ମରନ୍‌ ଆପନାରା ଡର୍ନେଡମ୍‌; ବନ୍‌ଡ ବନେରାନ୍‌ ଆ କୋର୍‌କୋର୍‌ତମ୍‌ ଗୋଗୋୟ୍‌ ପନାରାନ୍‌ ଡକୋ । 7 ଆବୋଓନ୍‌ ଆମନ୍‌ରା ଆଡଙ୍‌ଡାନ୍‌ ଏଡ଼ୁର୍‌ମଡ୍‌ତେ; ବନ୍‌ଡ ଆଡୋଲଜନ୍‌ ଆମନ୍‌ରା ଅସାଙ୍‌ ଜନବନ୍‌ ଅଡ଼୍‌କୋନ୍‌ ଜବୁଙ୍‌ ଅବ୍‌ଡିସୟ୍‌ତେ । 8 ଅଙ୍ଗା ଆମନ୍‌ରା ଆ ଡରକୋନେନ୍‌ ଅମ୍‌ରେଙ୍‌ଲେ ବୁଲ୍ଲେତେ, ଆନିନ୍‌ ଅସିଙନ୍‌ ସିଲଡ୍‌ ଆ ବ୍ରୁଲ୍ଲେତେନ୍‌ ଆଅନ୍ତିଡ୍‌ ଅନ୍ତମ୍‌ । 9 ମିଞଲନ୍‌ ଡ ଲଙିଡ୍‌ ତରୋମ୍ମୋଡନ୍‌ ଉଗରନ୍‌ଆଡଙ୍‌ ଅମଅଁୟ୍‌ତେ, ମନନ୍‌ ଆ ଞନଙ୍‌ଞଙ୍‌ବର୍‌ ସିଲଡ୍‌ ସାଙ୍ଗନ୍‌ ଆ ଡନୁଙ୍‌ୟମ୍‌ ତିଅନ୍ତମ୍‌ ଲୁମ୍‌ତେ । 10 କୁଲମ୍‌ନମ୍‌ଆଡଙ୍‌ ଡ ଆପେୟନ୍‌ ଆକୁଲମ୍‌ଆଡଙ୍‌ ଏଅମ୍‌ରେଙ୍‌ଡଙ୍‌; ଆରି, ତନଙଡ୍‌ ଡିନାଇଙ୍‌ନମ୍‌ ବୋଞାଙ୍‌ନମ୍‌ ଆସିଙ୍‌ ଇୟ୍‌ଡଙ୍‌; ସଙାୟ୍‌ ବୋଞାଙନ୍‌ ସିଲଡ୍‌ ତୁୟା ତୟ୍‌ଲିସିଙ୍‌ମରନ୍‌ ମନଙ୍‌ । 11 ଏ ଡାଙ୍ଗଡ଼ାଅଞେନ୍‌, ଗିଆନମରନ୍‌ ଡେଆ ଆରି ମନଲୋଙ୍‌ଞେନ୍‌ ଅବ୍‌ସର୍ଡାଇଙ୍‌; ଏତ୍ତେଲ୍‌ଡେନ୍‌ ଞେନ୍‌ ନିଣ୍ତୟ୍‌ମର୍‌ଞେନ୍‌ଆଡଙ୍‌ ଜାଲଙ୍‌ଲେ ରପ୍ତିତାୟ୍‌ । 12 ସାଲ୍ଲାକିମରନ୍‌ ତନଙଡନ୍‌ ଗିୟ୍‌ଲେ ଆନିନ୍‌ଡମନ୍‌ଆଡଙ୍‌ ସତେ; ବନ୍‌ଡ ଉଲ୍ଲୁମରନ୍‌ ଆମ୍ମୁଙ୍‌ଲନ୍‌ ପନବ୍‌ରଡନ୍‌ ଞାଙ୍‌ତେ । 13 ଅଙ୍ଗା ଆମନ୍‌ରା ଏର୍‌ନମ୍ମଡନ୍‌ ଆମନ୍‌ରା ଆସନ୍‌ ଜାମନିତନ୍‌, ଆସିନ୍‍ରିନ୍‍ ପାଙ୍‌ବା; ଆରି, ଅଙ୍ଗା ଆମନ୍‌ରା ବମନ୍‌ରା ଆଡୁକ୍ରି ଆସନ୍‌ ଜାମନିତନ୍‌, ଆନିନ୍‌ଆଡଙ୍‌ ବଣ୍ତାନ୍‌ ଡକ୍କୋବା । 14 ଅଙ୍ଗା ଆମନ୍‌ରା ଅନ୍‌ରଙ୍‌ ଡୋତାନ୍‌ ଡୋଲନ୍‌ ଆ ସାଙ୍ଗନ୍‌ଆଡଙ୍‌ ଆକ୍ରାନ୍‌ ବାବ୍ବାବ୍‌ଲେ ଆସିର୍ବାଦତେ, ତି ଏତ୍ତେଲେ ଆବର୍ନେ ବାତ୍ତେ ଆଡଅଙନ୍‌ ସନୟ୍‌ପଗୋ ଡେତେ । 15 ଜବ୍ର ତରୁବନ୍‌ ଆଡିଡ୍‌ ସିର୍ପିୟ୍‌ତିରନ୍‌ ଡ ଗୋଡ଼େବଜନ୍‌, କେନ୍‌ ବାଗୁନ୍‌ ଆବସରିନ୍‌ । 16 ଆନା ଆନିନ୍‌ଆଡଙ୍‌ ଡଙ୍‌ତେ, ଆନିନ୍‌ ରିଙ୍ଗେନ୍‌ଆଡଙ୍‌ ଡଙ୍‌ତେ ଆରି ଅର୍ଜଡ଼ୋମ୍‌ସିଗଡ୍‌ ମିଞଲନ୍‌ ଆଞନମ୍‌ ଅନ୍ତମ୍‌ । 17 ଏଙ୍ଗାଲେ ଲଆଙନ୍‌ ମା ଲଆଙନ୍‌ଆଡଙ୍‌ ଅବ୍‌ସୁବ୍‌ତେ, ତିଅନ୍ତମ୍‌ କୁଲମନ୍‌ ଆ ମନଙ୍‌ ଞନଙ୍‌ଞଙ୍‌ବର୍‌ ବାତ୍ତେ ମୁକ୍କାନ୍‌ ଅବ୍‌ସର୍ଡାତେ । 18 ଅଙ୍ଗା ଆମନ୍‌ରା ଲୁଆନୁବନ୍‌ ଜୁବାୟ୍‌ତେ, ଆନିନ୍‌ ଆଜନ୍‌ ଜୋମ୍‌ତେ; ଆରି, ଅଙ୍ଗା ଆମନ୍‌ରା ଆ ସାଉକାରନ୍‌ ଆବର୍ନେ ମାନ୍ନେତେ, ଆନିନ୍‌ ପନେମେଙନ୍‌ ଞାଙ୍‌ତେ । 19 ଏଙ୍ଗାଲେ ଡାଆନ୍‌ ମୁକ୍କାନ୍‌ ଆଉମୁଲ୍‌ ମୁକ୍କାନ୍‌ ଅବ୍‌ତୁୟ୍‌ତେ, ତିଅନ୍ତମ୍‌ ମନ୍‌ରାନ୍‌ ଆଉଗ୍ଗରନ୍‌ ମନ୍‌ରାନ୍‌ଆଡଙ୍‌ ଅବ୍‌ତୁୟ୍‌ତେ । 20 ଏଙ୍ଗାଲେ ପାତାଡ଼ନ୍‌ ଡ ଗୁରୁଡ୍ଡେ ଡରକୋନେନ୍‌ ଆଙ୍ଗିୟ୍‌ଜା ଅବ୍ବୋଓଏ, ତିଅନ୍ତମ୍‌ ମନ୍‌ରାନ୍‌ ଆମଡ୍‌ ଆଙ୍ଗିୟ୍‌ଜା ଅବ୍ବୋଓଏ । 21 କୋଇଲୋଙନ୍‌ ରୁପ୍ପାନ୍‌, ଉମ୍ମାୟ୍‌ଲୋଙନ୍‌ ସୁନ୍ନାନ୍‌ ଅନବ୍‌ଲେଏମନ୍‌ ଡେତେ, ତିଅନ୍ତମ୍‌ ମନ୍‌ରାନ୍‌ ସେଙ୍କେଲୋଙନ୍‌ ଅନଲ୍ଲନ୍‌ ଡେତେ । 22 ଆମ୍ୱେନ୍‌ ଜନ୍‌ରୋମନ୍‌ ସରିନ୍‌ ଏର୍‌ଗିଆନନ୍‌ଆଡଙ୍‌ ଅନଲ୍‌ଲୋଙନ୍‌ ଡେଙ୍କିନ୍‌ ବାତ୍ତେ ଏତଙେନ୍‌ ଜନଙ୍‌ଡେନ୍‌ ଏର୍‌ଗିଆନନ୍‌ ଅମ୍‌ରେଙ୍‌ଲେ ଅଜିରେ । 23 ଗୋସ୍ସାମେନ୍‌ନମ୍‌ଜି ଏଙ୍ଗାଗୋ ଡକୋ ତିଆତେ ଆଜନନା ଆସନ୍‌ ଏର୍ବାଗୋୟ୍‌ବା,ଆରି ମଣ୍ତାନମ୍‌ ଆଜନ୍ତୁ ଆସନ୍‌ ମନଙ୍‌ ତୁରା । 24 ଇନିଆସନ୍‌ଗାମେଣ୍ତେନ୍‌ ଅନର୍ଜେନ୍‌ ଆଏଡ଼ର୍‌ ଆସନ୍‌ ତଡ୍‌ ଆରି ରନୁବ୍ବବନ୍‌ ଅଡ଼୍‌କୋ ଅର୍ସଡୋଙ୍‌କୋଡ୍‌ ଜାୟ୍‌ ଡକୋତେ ପଙ୍‌ ? 25 ଅଜିଙନ୍‌ ଗାଡ୍‌ଲବୋ ଜନଙ୍‌ଡେନ୍‌ ଆରି ଅଜିଙନ୍‌ ଲେଡେଙ୍‌ତେ,ଆରି ବରୁଞ୍ଜି ଅଗାବ୍‌ ଅଡ଼୍‌କୋନ୍‌ ତନର୍ତୁମନ୍‌ ଡେତେ । 26 ଆଅନ୍‌ମେନଞ୍ଜି ଆମନ୍‌ଆଡଙ୍‌ ସିନ୍‌ରିନ୍‌ ତିୟ୍‌ତମ୍‌ଞ୍ଜି; ଆରି, କିମେଡନ୍‌ ବସେଙ୍‌ନମ୍‌ ଆମୁଲ ଅନ୍ତମ୍‌ ଡେତେ । 27 ଆରି, କିମେଡନ୍‌ ଆଡ଼ୁବ୍‌ ଆମନ୍‌ ଡ ଅସିଙ୍‌ମର୍‌ନମ୍‌ ଆଜନୋମ୍‌ ଆସନ୍‌ ସରିତେ; ଆରି, କମ୍ୱାରିବୟ୍‌ନମ୍‌ଞ୍ଜି ଆନମେଙ୍‌ ଆସନ୍‌ ତୁଲେତେ ।