1 ସୋଲମନନ୍‌ ଆ ମନଙ୍‌ ଞନଙ୍‌ଞଙ୍‌ବର୍‌,

ଗିଆନ ଡାଙ୍ଗାଡ଼ାଅନନ୍‌ ଆପ୍ପେୟନ୍‌ଆଡଙ୍‌ ଅବ୍‌ସର୍ଡାତେ; ବନ୍‌ଡ ଏର୍‌ବୁଡ୍ଡି ଡାଙ୍ଗାଡ଼ାଅନନ୍‌ ଆୟୋଙନ୍‌ଆଡଙ୍‌ ଅବ୍‌ଡୁକ୍କତେ ।

2 ପେଲ୍ଲାନ୍‌ ବାତ୍ତେ ଆନର୍ଜେ ଆ ରନ୍ନା ଇନ୍ନିଙ୍‌ ବରାଞ୍‌ବାଞ୍‌ତଡ୍‌, ବନ୍‌ଡ ଡରମ୍ମଗଡନ୍‌ ରନବୁନ୍‌ ସିଲଡ୍‌ ଡୋବ୍‌ତେ ।

3 ପ୍ରବୁନ୍‌ ଡରମ୍ମମରନ୍‌ ଆପରାନ୍ନାଆଡଙ୍‌ ଡୋଲଜନ୍‌ ବାତ୍ତେ ବପ୍ପୁତଡ୍ ଅଃନମେଏ; ବନ୍‌ଡ ପେଲ୍ଲାମରନ୍‌ ଆଇସ୍ସୁମ୍‌ ଅଃଗବ୍‌ଡେଲେ ।

4 ଅଙ୍ଗା ଆମନ୍‌ରା ବଲାୟ୍‌ସିନ୍‌ ବାତ୍ତେ କାବ୍ବାଡ଼ାତନ୍‌ ଆନିନ୍‌ ଡୋଲେୟ୍‌ମର୍‌ ଡେତେ, ବନ୍‌ଡ କାବ୍ବାଡ଼ାମରନ୍‌ ଆସି ଗମାଙ୍‌ତେ ।

5 ଡାଗାଡାଇଙନ୍‌ ଆନା ତର୍ତୁମ୍‌ତେ ଆନିନ୍‌ ବୁଡ୍ଡିଡମନ୍‌ ଆଡାଙ୍ଗଡ଼ାଅନ୍‌; ବନ୍‌ଡ ଗଗ୍ଗଡ୍‌ନେଇଙନ୍‌ ଆନା ଲୁଡ୍‌ତେ, ତି ଆଡାଙ୍ଗାଡ଼ାଅନ୍‌ ଗରୟ୍‌ତେ ।

6 ଡରମ୍ମମରନ୍‌ ଆବବ୍‌ଲୋଙ୍‌ ଆସିର୍ବାଦନ୍‌ ଅଡ଼ୁତାୟ୍‌; ବନ୍‌ଡ ପେଲ୍ଲାନ୍‌ ଆ ତଅଡ୍‌ ସଙ୍ଗତାନ୍‌ ସତେ ।

7 ଡରମ୍ମମରନ୍‌ ଆମନନ୍ନେ ସନେନ୍‌ସେନ୍‌ଡମ୍‌, ବନ୍‌ଡ ପେଲ୍ଲାନ୍‌ ଆଞୁମ୍‌ ସତନେ ।

8 ଆନା ଉଗ୍ଗର୍‌ଲୋଙନ୍‌ ଗିଆନ ଆନିନ୍‌ ବନାଁୟ୍‌ବରନ୍‌ ଜାତେ । ବନ୍‌ଡ ଏର୍‌ଗିଆମରନ୍‌ ଅସେଡ୍‌ତେ ।

9 ଲବଡ୍ଡିମରନ୍‌ ଏର୍‌ବନ୍ତଙନ୍‌ ତଙିୟ୍‌ତନ୍‌, ବନ୍‌ଡ ଅଡିଅତାନ୍‌ ଆତ୍ରଙିୟ୍‌ତନ୍‌ ଆମନ୍‌ରା ଞନମ୍‌ଡାତେ ।

10 ଆନା ଅମଡନ୍‌ ବାତ୍ତେ ଇଡ୍‌ମଡ୍‌ତେ, ଆନିନ୍‌ ଡୁକ୍କନ୍‌ ତର୍ତୁମ୍‌ତେ,ଆରି ଏର୍‌ଗିଆନନ୍‌ ବାତ୍ତେ ଆବର୍ତନ୍‌ ଆମନ୍‌ରା ଅସେଡ୍‌ତେ ।

11 ଡରମ୍ମମରନ୍‌ ଆତଅଡ୍‌ ଅନମେଙନ୍‌ ଡୁଙ୍‌ଡମ୍‌ନେଡାନ୍‌ ଡୁଙ୍‌ତନାୟ୍‌, ବନ୍‌ଡ ପେଲ୍ଲାନ୍‌ ଆତଅଡ୍‌ ସଙ୍ଗତାନ୍‌ ବରନ୍‌ ଡୁଙ୍‌ତନାୟ୍‌ ।

12 ସଙ୍ଗତାନ୍‌ ଗୋଡ଼େନ୍‌ ଅମ୍‌ଡୁଙ୍‌ତାୟ୍‌, ବନ୍‌ଡ ଡନୁଙ୍‌ୟମନ୍‌ ଏର୍‌ଡରମ୍ମନ୍‌ ଅଡ଼୍‌କୋନ୍‌ ରୁବ୍‌ତେ ।

13 ମନଙ୍‌ ଆରିୟ୍‌ତେନ୍‌ ଆମନ୍‌ରା ଆ ଉସାଲ୍‌ତମ୍‌ଲୋଙ୍‌ ଗିଆନନ୍‌ ଡକୋତେ, ବନ୍‌ଡ ଏର୍‌ଗିଆନନ୍‌ ଆ କିଣ୍ଡୋଙନ୍‌ ଆସନ୍‌ ଡାଙ୍ଗୋନ୍‌ ।

14 ଗିଆନମରଞ୍ଜି ପଡ଼େନେନ୍‌ ତର୍ତୁମ୍‌ତଜି, ବନ୍‌ଡ ଏର୍‌ଗିଆନମରଞ୍ଜି ଆତଅଡ୍‌ ଆରଡ଼ୋତାଞନ୍‌ ଆନବ୍‌ସେଡ୍‌ ଅନ୍ତମ୍‌ ।

15 ଗମାଙ୍‌ମରନ୍‌ ଆରନ୍ନା ଆନିନ୍‌ ଆସନ୍‌ ରଡ୍ଡୋ ଗଡ଼ାନ୍‌ ଅନ୍ତମ୍‌; ଡୋଲେୟ୍‌ମରଞ୍ଜି ଆଡୋଲେୟ୍‌ ଆନିଞ୍ଜି ଆସନ୍‌ ଅନସେଡନ୍‌ ।

16 ଡରମ୍ମମରନ୍‌ ଆକାବ୍ବାଡ଼ା ଅନମେଙନ୍‌ ତିୟ୍‌ତେ,ଆରି ଏର୍‌ଡରମ୍ମମରନ୍‌ ଆ ତନର୍ତୁମ୍‌ ଇର୍ସେଗଡନ୍‌ ଓରୋଙ୍‌ତେ ।

17 ମନଙ୍‌ ଞନଙ୍‌ଞଙ୍‌ବରନ୍‌ ଆନା ମାନ୍ନେତେ, ଆନିନ୍‌ ଅନମେଙ୍‌ ତଙର୍‌ଗଡ୍‌ ତଙିୟ୍‌ତନ୍‌, ବନ୍‌ଡ ଆନା ଞନଙ୍‌ବରନ୍‌ ଅଃଜାଏ, ଆନିନ୍‌ ଆଡ଼ତେ ।

18 ଆନା ସଙ୍ଗତାନ୍‌ ବରନ୍‌ ସତେ ଆ ଉସାଲ୍‌ତମନ୍‌ ପାତ୍ୟାନ୍‌ ବର୍ତନ୍‌ । ଆରି ଆନା ନିଣ୍ତୟନ୍‌ ବରନ୍‌ ବର୍ତନେ ଆନିନ୍‌ ଏର୍‌ଗିଆନ ।

19 ଗୋଗୋୟ୍‌ ବର୍ନେଲୋଙନ୍‌ ଏର୍‌ଡରମ୍ମବରନ୍‌ ଆବରିୟ୍‌ ଡକୋତେ । ବନ୍‌ଡ ଆନା ଆ ଉସାଲ୍‌ତମନ୍‌ ଡଙ୍‌ଡଙ୍‌ତେ, ଆନିନ୍‌ ବୁଡ୍ଡିଡମ୍‌ ।

20 ଡରମ୍ମମରନ୍‌ ଆଲାଙ୍‌ ଆସନେଡା ରୁପ୍ପାନ୍‌ ଅନ୍ତମ୍‌, ବନ୍‌ଡ ପେଲ୍ଲାନ୍‌ ଆ ଉଗ୍ଗର୍‌ ଅସୋୟ୍‌ ମଡ଼ଗା ।

21 ଡରମ୍ମମରନ୍‌ ଆ ଉସାଲ୍‌ତମ୍‌ ଗୋଗୋୟ୍‌ ମନ୍‌ରାନ୍‌ଆଡଙ୍‌ ସାକ୍କେତେ, ବନ୍‌ଡ ଏର୍‌ଗିଆନମରଞ୍ଜି ବୁଡ୍ଡିତଡନ୍‌ ଆସନ୍‌ ରବୁତଜି ।

22 ପ୍ରବୁନ୍‌ ଆସିର୍ବାଦ ବାତ୍ତେ ଗବ୍‌ମାଙ୍‌ତେ,ଆରି ଆନିନ୍‌ ତି ସରିନ୍‌ ଡୁକ୍କନ୍‌ ଅମାୟେ ।

23 ଏର୍‌ମନଙ୍‌ କାବ୍ବାଡ଼ାନ୍‌ ଆଲନୁମ୍‌ ବାତ୍ତେ ଏର୍‌ଗିଆନନ୍‌ ସର୍ଡାତନେ, ତିଅନ୍ତମ୍‌ ଗିଆନମରନ୍‌ ବୁଡ୍ଡିନ୍‌ ଞାଙ୍‌ଲେ ସର୍ଡାତନ୍‌ ।

24 ପେଲ୍ଲାମରନ୍‌ ଅଙ୍ଗାତେ ବତଙ୍‌ତେ, ତିମା ଆତେ ଆନିନ୍‌ଆଡଙ୍‌ ଗଟେତେ; ବନ୍‌ଡ ଡରମ୍ମମରନ୍‌ ଅଙ୍ଗାଆତେ ସାୟ୍‌ତେ ଆନିନ୍‌ ତିଆତେ ତନିୟନ୍‌ ଡେତେ ।

25 ଆୟାମ୍‌ବଡ଼ଡନ୍‌ ରିଙ୍ଗେଏଣ୍ଡେନ୍‌ ପେଲ୍ଲାମରନ୍‌ ଅଡ୍‌କୋଏ, ବନ୍‌ଡ ଡରମ୍ମମରନ୍‌ ଆଏଡ଼ର୍‌ ରଡ୍ଡୋ ଜିମ୍ମିତାଲନ୍‌ ଅନ୍ତମ୍‌ ।

26 ଏଙ୍ଗାଲେ ଅଜିନ୍‌ ଆସନ୍‌ ସବୁର୍‌ଡାନ୍‌ ଡ ଅମଡନ୍‌ ଆସନ୍‌ ଓମୋଡନ୍‌, ତିଅନ୍ତମ୍‌ ଆରାପ୍ପାୟ୍‌ତେଞ୍ଜି ଆମନ୍‌ରା ଆସନ୍‌ ଆଡ଼ସାମରନ୍‌ ।

27 ପ୍ରବୁନ୍‌ ଆବର୍ନେ ଆବନ୍ତଙ୍‌ ଡିନାନ୍‌ ଅବ୍‌ଗୋଗୋୟ୍‌ତେ, ବନ୍‌ଡ ପେଲ୍ଲାମରନ୍‌ ଆବର୍ସେଙ୍‌ ଅବ୍‌ସୋୟ୍‌ତେ ।

28 ଡରମ୍ମମରନ୍‌ ଆରାସାନେ ସର୍ଡାଡମ୍‌ ଡେତେ, ବନ୍‌ଡ ପେଲ୍ଲାମରନ୍‌ ଆରାସାନେ ଗୁରୁଡ୍ଡେତେ ।

29 ପ୍ରବୁନ୍‌ ଆତଙର୍‌ ଲବଡ୍ଡିମରଞ୍ଜି ଆସନ୍‌ ରଡ୍ଡୋ ଗଡ଼ାନ୍‌; ବନ୍‌ଡ ପରାନ୍‌ସାତ୍ତିନ୍‌ ଆର୍‌ଲୁମ୍‌ତେଞ୍ଜି ଆମନ୍‌ରାଜି ଆସନ୍‌ ତିଆତେ ଅବ୍‌ଗୁରୁଡ୍ଡେତେ ।

30 ଡରମ୍ମମରନ୍‌ ଆଙ୍ଗିୟ୍‌ ଜାକିଁୟ୍‌ ଡନେଡନ୍‌ ଅଃଡେଏ; ବନ୍‌ଡ ପେଲ୍ଲାମରନ୍‌ ଡେସାଲୋଙନ୍‌ ନଗ୍ରି ଅଃଡେଏ ।

31 ଡରମ୍ମମରନ୍‌ ଆତଅଡ୍‌ଗଡ୍‌ ଗିଆନ ବରନ୍‌ ଡୁଙ୍‌ତନାୟ୍‌, ବନ୍‌ଡ ପରାନ୍‌ସାତ୍ତିନ୍‌ ବରନ୍‌ ଆବର୍ତନ୍‌ ଆଲାଙ୍‌ ଅନବ୍‌ମୋସ୍ସାନ୍‌ ଡେତେ ।

32 ଡରମ୍ମମରନ୍‌ ଆ ଉସାଲ୍‌ତମ୍‌ ମନଅଁୟ୍‌ଡାନ୍‌ ଆବର୍ନେ ବର୍ତନେ, ବନ୍‌ଡ ପେଲ୍ଲାମରନ୍‌ ଆତଅଡ୍‌ ସିଲଡ୍‌ ଇସ୍କତ୍ତାବରନ୍‌ ବର୍ତନ୍‌ ।