1 ଅଙ୍ଗା ଆମନ୍‌ରା ସାସନନ୍‌ ଲଡୟ୍‌ତେ, ଆନିନ୍‌ ଗିଆନନ୍‌ ଲଡୟ୍‌ତେ, ବନ୍‌ଡ ଆନା କନେଁୟ୍‌ ଞନଙ୍‌ବରନ୍‌ ଏଡ଼ୁର୍‌ମଡ୍‌ତେ, ଆନିନ୍‌ ଜନ୍ତୁନ୍‌ ଅନ୍ତମ୍‌ ।

2 ମନଙ୍‌ମରନ୍‌ ପ୍ରବୁନ୍‌ ଆମଙ୍‌ସିଲଡ୍‌ ସନାୟୁମନ୍‌ ଞାଙ୍‌ତେ, ବନ୍‌ଡ ଏର୍‌ମନଙ୍‌ ଅନିୟମ୍‌ମରନ୍‌ଆଡଙ୍‌ ଆନିନ୍‌ ଅବ୍‌ଡୋସାତେ ।

3 ପେଲ୍ଲାନ୍‌ ବାତ୍ତେ ଆନ୍ନିଙ୍‌ ଆମନ୍‌ରା ଅଗରିଏ, ବନ୍‌ଡ ଡରମ୍ମମରନ୍‌ ଆଜଡ୍‌ ଡନେଡନ୍‌ ଅଃଡେଏ ।

4 ଗୁନବଜନ୍‌ ଆନିନ୍‌ ଆଅୟ୍‌ତବନ୍‌ ଆ ରନୁବ୍ବବ୍‌ ଅନ୍ତମ୍‌; ବନ୍‌ଡ ଗରନ୍‌ରୟ୍‌ଡାନ୍‌ ଆଇବୟ୍‌ ଆଅୟ୍‌ତବନ୍‌ ଆଜାଙ୍‌ ଅଡ଼୍‌କୋନ୍‌ ରସମ୍‌ତେ ।

5 ଡରମ୍ମମରନ୍‌ ଆନିୟମ୍‌ ଆଜାଡ଼ିଡମ୍‌; ବନ୍‌ଡ ପେଲ୍ଲାମରଞ୍ଜି ଆ ଞନଙ୍‌ଞଙ୍‌ ବୁର୍ଡନ୍‌ ଆବରିୟ୍‌ ।

6 ପେଲ୍ଲାମରଞ୍ଜି ସନମ୍ବବନ୍‌ ଆସନ୍‌ ଜଗ୍ଗେଲେ ଆଡକୋନେ ଆବର୍ନେ ବର୍ତଞ୍ଜି, ବନ୍‌ଡ ଲଗଡ୍‌ମରଞ୍ଜି ଆତଅଡ୍‌ ଆନିଞ୍ଜିଆଡଙ୍‌ ଡୋବ୍‌ତେ ।

7 ପେଲ୍ଲାମରଞ୍ଜି ପୁୟ୍‌ଲେ ସନେଡନ୍‌ ଡେତେ ଆରି ଅଃଡକୋଏଜି, ବନ୍‌ଡ ଡରମ୍ମମରଞ୍ଜି ଆସିଙ୍‌ ଆଏଡ଼ର୍‌ ଡକୋତନ୍‌ ।

8 ମନ୍‌ରାନ୍‌ ଆ ମନଙ୍‌ ବୁଡ୍ଡିନ୍‌ ବାତ୍ତେ ସନେଙ୍କେନ୍‌ ଞାଙ୍‌ତେ, ବନ୍‌ଡ ଅସାଙ୍‌ୟମ୍‌ ଉଗ୍ଗରନ୍‌ ଗନବ୍‌ରଜନ୍‌ ଡେତେ ।

9 ଅଙ୍ଗା ଆମନ୍‌ରା ଆମଙନ୍‌ ଜନୋମନ୍‌ ଅବୟ୍‌ତଡ୍‌ ବନ୍‌ଡ ଆନିନ୍‌ଡମ୍‌ ସେନ୍‌ଡମ୍‌ତନେ ତି ଆମନ୍‌ରା ସିଲଡ୍‌ ଅଙ୍ଗା ଆମନ୍‌ରା ଗନବ୍‌ରଜନ୍‌ ଞାଙ୍‌ତେ ବନ୍‌ଡ କମ୍ବାରିମରଞ୍ଜି ବନ୍‌ଲେ ଡକ୍କୋତେ ତି ଆମନ୍‌ରା ସୋଡ଼ା ।

10 ଡରମ୍ମମରନ୍‌ ଆ ଜନ୍ତୁନ୍‌ ଆପରାନ୍ନା ଜୁବାୟ୍‌ତେ, ବନ୍‌ଡ ପେଲ୍ଲାମରନ୍‌ ଆସନାୟୁମ୍‌ ତୋଙ୍ଗୋଡ଼ୋଡମ୍‌ ।

11 ଆନା ଆ ବସେଙନ୍‌ ଅର୍ତେ, ଆନିନ୍‌ ଜବ୍ର ଜନ୍‌ରୋମନ୍‌ ଞାଙ୍‌ତେ; ବନ୍‌ଡ ଆନା ଏର୍‌ମନଙ୍‌ କାବ୍ବାଡ଼ାଲୋଙନ୍‌ ମଗାଡ୍‌ଲନ୍‌ ଡକୋତନ୍‌, ଆନିନ୍‌ ବୁଡ୍ଡିତଡ୍‌ ।

12 ପେଲ୍ଲାମରନ୍‌ ଏର୍‌ମନଙ୍‌ କାବ୍ବାଡ଼ାମରଞ୍ଜି ଆ ଜନ୍ତା ଲଡୟ୍‌ତେ, ବନ୍‌ଡ ଡରମ୍ମମରନ୍‌ ଆଜଡ୍‌ ଜଅତେ ।

13 ପେଲ୍ଲାମରନ୍‌ ଆ ଇର୍ସେ ଉସାଲ୍‌ତମନ୍‌ ବାତ୍ତେ ଅନୋଡ଼େଙ୍‌ଲୋଙନ୍‌ ଗଲୋତେ, ଡରମ୍ମମରନ୍‌ ଡୁକ୍କନ୍‌ ସିଲଡ୍‌ ଅଡ଼ୁର୍‌ତେ ।

14 ମନ୍‌ରାନ୍‌ ଆତଅଡନ୍‌ ଆ ଜଅ ବାତ୍ତେ ସୁକ୍କା ଡକୋତନ୍‌; ଆରି ମନ୍‌ରାନ୍‌ ଆସିଡମନ୍‌ ଆଲନୁମ୍‌ ଆ ଜଅ ଆନିନ୍‌ଆଡଙ୍‌ ତନିୟନ୍‌ ଡେତେ ।

15 ଏର୍‌ଗିଆନନ୍‌ ଆତଙର୍‌ ଆନିନ୍‌ଡମନ୍‌ ଆଗନିୟ୍‌ଗିୟ୍‌ଲୋଙ୍‌ ସତଙ୍‌ । ବନ୍‌ଡ ଆନା ଗିଆନମରନ୍‌ ଆନିନ୍‌ ବର୍ନେନ୍‌ ଅମ୍‌ଡଙ୍‌ତେ ।

16 ଏର୍‌ଗିଆନମରନ୍‌ ଆବନ୍‌ରାବ୍‌ ଅବ୍‌ତାଡ଼ନ୍‌ ଗିୟ୍‌ତାତେ, ବନ୍‌ଡ ସାଲ୍ଲାକିମରନ୍‌ ଗନ୍‌ଡ୍ରୟ୍‌ଜନ୍‌ ସତେ ।

17 ଆଜାଡ଼ି ବର୍ନେମରନ୍‌ ଡରମ୍ମନ୍‌ ଅବ୍‌ଗିୟ୍‌ତେ; ବନ୍‌ଡ କଣ୍ତାୟ୍‌ ସାକିମରନ୍‌ ବୁର୍ଡନ୍‌ ଅବ୍‌ଗିୟ୍‌ତେ ।

18 ଲାଙ୍‌ଲେଡ୍‌ ଆମନ୍‌ରା ଇନ୍ନିଙ୍‌ ଏର୍‌ନିୟମନ୍‌ ଆବର୍ତଞ୍ଜି ଆବର୍ନେ କଡ଼ିବନ୍‌ ବାତ୍ତେ ଆପରତେନ୍‌ ଅନ୍ତମ୍‌, ବନ୍‌ଡ ଗିଆନମରନ୍‌ ଆଲାଙ୍‌ ସନାମଙ୍‌ଡାଗୋ ।

19 ଆଜାଡ଼ିବରନ୍‌ ଆବର୍ତନ୍‌ ଆଉସାଲ୍‌ତମ୍‌ ଆଏଡ଼ର୍‌ ଡକୋତନ୍‌; ବନ୍‌ଡ ପାତ୍ୟାମରନ୍‌ ଆଲାଙ୍‌ ବରନିୟାବ୍‌ମଡ୍‌ ଅନ୍ତମ୍‌ ।

20 ଏର୍‌ମନଙ୍‌ ଅନିୟମ୍‌ମରନ୍‌ ଆ ଉଗର୍‌ଲୋଙ୍‌ ପାତ୍ୟାନ୍‌ ଡକୋ, ବନ୍‌ଡ ସୟୁ ଞନଙ୍‌ଞଙ୍‌ମରଞ୍ଜି ସର୍ଡାତଜି ।

21 ଡରମ୍ମମରନ୍‌ଆଡଙ୍‌ ଇନ୍ନିଙ୍‌ ତନଙଡନ୍‌ ଅଃଗଟେଏ; ବନ୍‌ଡ ପେଲ୍ଲାମରନ୍‌ ଡନଣ୍ଡାୟନ୍‌ ଆବରିୟ୍‌ ଡକୋତନ୍‌ ।

22 କଣ୍ତାୟ୍‌ ବର୍ନେମରନ୍‌ ଆ ଉସାଲ୍‌ତମ୍‌ ପ୍ରବୁନ୍‌ ଏଡ଼ୁର୍‌ମଡ୍‌ତେ, ବନ୍‌ଡ ଅଙ୍ଗା ଆମନ୍‌ରାଜି ଆଜାଡ଼ିନ୍‌ ଞଣ୍ତ୍ରମ୍‌ତଞ୍ଜି ଆନିଞ୍ଜି ଆନିନ୍‌ଆଡଙ୍‌ ଅମଅଁୟ୍‌ତେ ।

23 ସାଲ୍ଲାକିମରନ୍‌ ଗିଆନନ୍‌ ଅବ୍‌ସସତେ, ବନ୍‌ଡ ଏର୍‌ବୁଡ୍ଡିମରନ୍‌ ଆ ମନ ଏର୍‌ଗିଆନନ୍‌ ଅବ୍‌ଗିୟ୍‌ତେ ।

24 କାବ୍ବାଡ଼ାମରନ୍‌ ଆସି ରାଜାତନ୍‌; ବନ୍‌ଡ ଆଡ଼ସାମରନ୍‌ କମ୍ୱରାନ୍‌ ଲୁମ୍‌ତେ ।

25 ମନ୍‌ରାନ୍‌ ଆମନଲୋଙ୍‌ ଆନିୟମ୍‌ ଆନିନ୍‌ଆଡଙ୍‌ ଅଃଲଡ୍‌ନେତେ; ବନ୍‌ଡ ମନଙ୍‌ବରନ୍‌ ଆନିନ୍‌ଆଡଙ୍‌ ଅବ୍‌ମଅଁୟ୍‌ତେ ।

26 ଡରମ୍ମମରନ୍‌ ଆ ତୟ୍‌ଲିସିଙ୍‌ମରନ୍‌ ତାଙର୍‌ତେ; ବନ୍‌ଡ ପେଲ୍ଲାମରନ୍‌ ଆ ତଙର୍‌ ଆନିଞ୍ଜିଆଡଙ୍‌ ଅଃବାଡ଼ତେ ।

27 ଆଡ଼ସାମରନ୍‌ ବେନ୍ତାନ୍‌ ସିଲଡ୍‌ ଆଞରାଙେନ୍‌ ଆ ଜନ୍ତୁ ଆଜେଲୁ ଅଃବାଲେ, ବନ୍‌ଡ ମନ୍‌ରାଞ୍ଜି ମଡ଼ଗାଡମନ୍‌ ଆନର୍ଜେ କାବ୍ବାଡ଼ାମରନ୍‌ ଞାଙ୍‌ତେ ।

28 ଡରମ୍ମଗଡନ୍‌ ଆ ତଙର୍‌ଗଡ୍‌ ଅନମେଙନ୍‌ ଡକୋ; ବନ୍‌ଡ ତି ଆ ତଙର୍‌ଗଡ୍‌ ରନବୁନ୍‌ ଅଃଡକୋଏ ।