1 ଆନା ଆନିନ୍‌ଡମନ୍‌ଆଡଙ୍‌ ଆଙ୍‌ସାତେ, ଆନିନ୍‌ ଆମନନଙନ୍‌ ଆସନ୍‌ ଲୁମ୍‌ତେ,ଆରି ଏର୍ଜାଡ଼ିକାନ୍‌ ଆମନଙ୍‌ ଗିଆନ ବିରୁଦଲୋଙ୍‌ ଗୋଡ଼େତନ୍‌ । 2 ଉଲ୍ଲୁମରନ୍‌ ବୁଡ୍ଡିଲୋଙନ୍‌ ଅସର୍ଡାଏ, ଆନିନ୍‌ଡମ୍‌ ଆ ମନନ୍‌ ଆବର୍ନେ ଆନପ୍ପୁଙ୍‌ ଲଡୟ୍‌ତେ । 3 ପେଲ୍ଲାନ୍‌ ଜିର୍ରାୟ୍‌ଡେନ୍‌ ଅନାଲ୍ଲେନ୍‌ ଜିର୍ତାୟ୍‌, ଆରି ଗନ୍‌ଡ୍ରୟ୍‌ଜନ୍‌ ସରିନ୍‌ ନିଣ୍ତୟନ୍‌ ଜିର୍ତାୟ୍‌ । 4 ମନ୍‌ରାନ୍‌ ଆତଅଡ୍‌ ଆବର୍ନେ ଜରୁ ଡାଆନ୍‌ ଅନ୍ତମ୍‌, ଆରି ଗିଆନନ୍‌ ଆ ପନଡାବ୍‌ ଡରକୋନେ ଆପନେଡାନ୍‌ ଅନ୍ତମ୍‌ । 5 ପେଲ୍ଲାନ୍‌ ଆ ଡ୍ଡନୁଲ୍‌ମଡ୍‌ ଅଡ଼େ ପନ୍‌ସୁଆତିଲୋଙନ୍‌ ଡରମ୍ମନ୍‌ ଆଡଅଙ୍‌ ଅନିଆୟ୍‌ ଆନମେ ମନଙ୍‌ତଡ୍‌ । 6 ଉଲ୍ଲୁନ୍‌ ଆ ଉସାଲ୍‌ତମ୍‌ ଅଲ୍‌ବାଡ୍ଡେଲୋଙନ୍‌ ସୁସ୍‌କାୟ୍‌ତେ,ଆରି ଆତଅଡନ୍‌ ତନୁଡନ୍‌ ଆଞନାଙ୍‌ ଆସନ୍‌ ଓଡ୍ଡେତେ । 7 ଉଲ୍ଲୁନ୍‌ ଆତଅଡ୍‌ ଆନସେଡନ୍‌ମା,ଆରି ଆ ଉସାଲ୍‌ତମନ୍‌ ଆନିନ୍‌ଡମ୍‌ ଆପରାନ୍ନା ଅନୋଡ଼େଙନ୍‌ ଅନ୍ତମ୍‌ । 8 ନମିନ୍‌ ନମିନ୍‌ ଆବର୍ତନ୍‌ ଆମନ୍‌ରା ଆବର୍ନେ ଜବୁଙ୍‌ ଜନୋମନ୍‌ ଅନ୍ତମ୍‌, ତିଆତେ ଉଗ୍ଗରନ୍‌ ଆଅମ ଜିର୍ତେ । 9 ଆନିନ୍‌ଡମ୍‌ ଆକାବ୍ବାଡ଼ାଲୋଙ୍‌ ଆନା ଆଡ଼ସାତନ୍‌, ଆନିନ୍‌ ଅନସେଡନ୍‌ ଆବୋଞାଙ୍‌ । 10 ସଦାପ୍ରବୁନ୍‌ ଆଞୁମ୍‌ ରଡୋ ମରେଲ୍‌ସିଙନ୍‌; ଡରମ୍ମମରନ୍‌ ତେତ୍ତେ ଜିର୍ରେ ଡନୋବନ୍‌ ଞାଙ୍‌ତେ । 11 ଗମାଙ୍‌ମରନ୍‌ ଆନର୍ଜେ ଆ ରଡୋ ଗଡ଼ାନ୍‌, ଆରି ଆ ଜନନାଲୋଙନ୍‌ ଡେଙ୍ଗା କାନ୍ତିନ୍‌ ଅନ୍ତମ୍‌ । 12 ଅନସେଡନ୍‌ ଆତେମଡ୍‌ଲୋଙ୍‌ ମନ୍‌ରାନ୍‌ ଆ ମନ କଙ୍କ୍ରିତନ୍‌, ଆରି ଲବଡ୍ଡିନ୍‌ ମନାନ୍ନେନ୍‌ ଆତେମଡ୍‌ଲୋଙ୍‌ ଡକୋ । 13 ଆନା ଅନ୍‌ରଙ୍‌ ଅମ୍‌ଡଙେନ୍‌ ଆମ୍ମୁଙ୍‌ ଜାଲଙ୍‌ତେ, ତିଆତେ ଆନିନ୍‌ଡମନ୍‌ ଆସନ୍‌ ଏର୍‌ଗିଆନନ୍‌ ଡ ଗନ୍‌ଡ୍ରୟ୍‌ଜନ୍‌ ଅନ୍ତମ୍‌ । 14 ମନ୍‌ରାନ୍‌ ଆପୁରାଡ଼ା ଆ ବତାନ୍‌ ସଏଲେ ରପ୍ତିତେ; ବନ୍‌ଡ ଆପଲାଙ୍‌ ପୁରାଡ଼ାନ୍‌ଆଡଙ୍‌ ଆନା ସଏଲେ ରପ୍ତିଏ ? 15 ବୁଡ୍ଡିଡମନ୍‌ ଆ ମନ ଗିଆନନ୍‌ ଅର୍ଜେତେ; ଆରି, ଗିଆନମରନ୍‌ ଆଲୁଡ୍‌ ଗିଆନନ୍‌ ସାୟ୍‌ତେ । 16 ମନ୍‌ରାନ୍‌ ଆ ତନିୟ୍‌ତିୟ୍‌ ଆନିନ୍‌ ଆସନ୍‌ ତଙରନ୍‌ ଅବ୍‌ଗାସାତେ,ଆରି ସୋଡ଼ାମରଞ୍ଜି ଆ ମୁକ୍କାବା ଆନିନ୍‌ଆଡଙ୍‌ ଓରୋଙ୍‌ତାୟ୍‌ । 17 ଅଙ୍ଗା ଆମନ୍‌ରା ଆମ୍ମୁଙ୍‌ ଅଲ୍‌ବାଡ୍ଡେନ୍‌ ଅବ୍‌ଜନାତେ, ଆନିନ୍‌ ଡରମ୍ମଡମ୍‌ ଗିୟ୍‌ତାତେ, ବନ୍‌ଡ ଆ ତୟ୍‌ଲିସିଙନ୍‌ ଆମନ୍‌ରା ଜିର୍ରେ ଆନିନ୍‌ଆଡଙ୍‌ ଅଲ୍ଲତେ । 18 ଅନବ୍‌କଡ଼ିନ୍‌ ଅଲ୍ଲବାଡ୍ଡେନ୍‌ ଆଙ୍‌ସାତେ ଆରି ବପ୍ପୁମରଞ୍ଜିଆଡଙ୍‌ ଆଙ୍‌ସାତେ । 19 ଆର୍ପାୟ୍‌ ରଡ୍ଡୋ ଗଡ଼ାନ୍‌ ଆ ଉପରେଙ୍‌ ଅବ୍‌ଜିନୟ୍‌ନେନ୍‌ ସଜ, ବନ୍‌ଡ ଆବରାବନ୍‌ ଆବୋଞାଙ୍‌ ଆରି ବତର ସନବ୍‌ୟୁନ୍‌ ମାଡ୍ଡ ଡଣ୍ଡ, କେନ୍‌ ଏନ୍ନେଗନ୍‌ ଅଲ୍‌ବାଡ୍ଡେନ୍‌ ଗଡ଼ାନ୍‌ ଆ ଅଙ୍କିଆ ଅନ୍ତମ୍‌ । 20 ମନ୍‌ରାନ୍‌ ଆ ତଅଡନ୍‌ ଆ ଜଅ ବାତ୍ତେ ଆ କିମ୍ପୋଙନ୍‌ ବରିୟ୍‌ତେ,ଆରି ଆ ଉସାଲ୍‌ତମ୍‌ଲୋଙନ୍‌ ଆନର୍ଜେ ବାତ୍ତେ ଆନିନ୍‌ ବୋଓତେ । 21 ରନବ୍ବୁନ୍‌ ଡ ଅନମେଙନ୍‌ ଅଲାଙନ୍‌ ଆଅଡିନ; ଅଙ୍ଗା ଆମନ୍‌ରାଜି ଆନିନ୍‌ଆଡଙ୍‌ ମନଙ୍‌ ଜନାତଜି, ଆନିଞ୍ଜି ତି ଆ ଜଅ ଞାଙ୍‌ତଜି । 22 ଅଙ୍ଗା ଆମନ୍‌ରା ଆଇବଜନ୍‌ ଞାଙ୍‌ତେ, ଆନିନ୍‌ ମନଙ୍‌ ଜନବନ୍‌ ଞାଙ୍‌ତେ ଆରି ପ୍ରବୁନ୍‌ ଆମଙ୍‌ସିଲଡ୍‌ ସନାୟୁମନ୍‌ ଞାଙ୍‌ତେ । 23 ଡୋଲୟ୍‌ମରନ୍‌ କାକୁର୍ତିତନ୍‌; ବନ୍‌ଡ ଗମାଙ୍‌ମରନ୍‌ ଡନୁଙ୍‌ୟମ୍‌ବରନ୍‌ ବାତ୍ତେ ଅଃଜାଲଙେ । 24 ଆନା ଗୋଗୋୟ୍‌ ମନ୍‌ରା ସାଙ୍ଗତେ, ଆନିନ୍‌ ଆନିନ୍‌ଡମ୍‌ ଆନବ୍‌ସେଡ୍‌ ଆସନ୍‌ ତିଆତେ ଲୁମ୍‌ତେ; ବନ୍‌ଡ ଅବୟ୍‌ ଡନୁଙ୍‌ୟମ୍‌ମରନ୍‌ ଡକୋ, ଆନା ବୋଞାଙନ୍‌ ସିଲଡ୍‌ ଗୋଗୋୟ୍‌ ଅବ୍‌ଡମ୍‌ଲନ୍‌ ଡକୋତଞ୍ଜି ।