1 ଏଙ୍ଗାଲେ ଡାଗାଡାଇଙନ୍‌ ସସିରାଡାନ୍‌ ଡ ଜନ୍‌ରୋମ୍‌ଗାଜନ୍‌ ଆଡିଡ୍‌ ତରୁବନ୍‌, ତିଅନ୍ତମ୍‌ ଉଲ୍ଲୁନ୍‌ଆଡଙ୍‌ ଅନବ୍‌ଗୁଗୁନ୍‌ ମନଙ୍‌ତଡ୍‌ । 2 ଏଙ୍ଗାଲେ ସୟ୍‌ସିଙ୍‌ତିଡନ୍‌ ଆବ୍ରୁଲ୍ଲେତେନ୍‌ ଆଡିଡ୍‌ ଡ ଜେଲ୍‌କଡନ୍‌ ଆରେଙେଙ୍‌ଡାତନ୍‌ ଆଡିଡ୍‌, ତିଅନ୍ତମ୍‌ କାଜ୍ଜାନ୍‌ନିୟ୍‌ ଆସନୟ୍‌ପ ଅମଙ୍‌ବାବେନ୍‌ ଅଜିରାୟ୍‌ । 3 କୁର୍ତାନ୍‌ ଆସନ୍‌ ସାମକାନ୍‌; ଗୋଡୋଁୟନ୍‌ ଆସନ୍‌ ଲାଗାମ୍‌, ଆରି ଉଲ୍ଲୁନ୍‌ ଆକିଣ୍ତୋଙ୍‌ ଆସନ୍‌ ଡାଙ୍ଗୋନ୍‌ । 4 ଆମନ୍‌ ଉଲ୍ଲୁନ୍‌ଆଡଙ୍‌ ଆନୁଲ୍ଲୁନ୍‌ ଅନ୍ତମ୍‌ ଜାଲଙ୍‌ଡଙ୍‌, ଜାଲଙେନ୍‌ଡେନ୍‌ ଆମନ୍‌ ଜାୟ୍‌ ଆନିନ୍‌ ଅନ୍ତମ୍‌ ଡେତମ୍‌ । 5 ଆମନ୍‌ ଉଲ୍ଲୁନ୍‌ଆଡଙ୍‌ ଆନୁଲ୍ଲୁନ୍‌ ଅନ୍ତମ୍‌ ଜାଲଙା, ଇଜ୍ଜାଡେନ୍‌ ଆନିନ୍‌ ଆ ଗନିୟ୍‌ଗିୟ୍‌ଲୋଙନ୍‌ ଗିଆନଡମ୍‌ ଅବ୍‌ଗିୟ୍‌ତନେ । 6 ଉଲ୍ଲୁନ୍‌ ଆସିଲୋଙ୍‌ ଆନା କବରନ୍‌ ଆପ୍ପାୟ୍‌ତେ, ଆନିନ୍‌ ଆନିନ୍‌ଡମ୍‌ ଆତାଲ୍‌ଜଙ୍‌ ଆମନକୁନ୍‌ ଅଡ୍‌ଲେ ଅମ୍ମୋସାତେ । 7 ଗାଡ଼େମରନ୍‌ ଆଜଙ୍‌ ଏଙ୍ଗାଲେ ରିଡ଼େଡ୍‌ରାଡ଼େଡ୍‌, ଏର୍‌ଗିଆନନ୍‌ ଆତଅଡ୍‌ ମନଙ୍‌ ଞନଙ୍‌ବରନ୍‌ ଆବର୍ନେ ତିଅନ୍ତମ୍‌ । 8 ଅନାଙ୍ଗତିଡ୍‌ଲୋଙନ୍‌ ଅରେଙ୍‌ ଆଡନକ୍କୋ ଏଙ୍ଗାଲେ, ତିଅନ୍ତମ୍‌ ଆନା ଉଲ୍ଲୁନ୍‌ଆଡଙ୍‌ ଡନେନ୍‌ ତିୟ୍‌ତେ । 9 ବନୁଲ୍‌ମରନ୍‌ ଆସିଲୋଙ୍‌ ଅବ୍ବାନ୍‌ ଆଞନମ୍‌ ଏଙ୍ଗାଲେ, ଉଲ୍ଲୁମରଞ୍ଜି ଆତଅଡ୍‌ ଞନଙ୍‌ଞଙ୍‌ବର୍‌ ଆବର୍ନେ ତିଅନ୍ତମ୍‌ । 10 ବେନ୍ତାମରନ୍‌ ଏଙ୍ଗାଲେ ଇନିଜନଙ୍‌ ଅବ୍‌ପାରାତେ, ତିଅନ୍ତମ୍‌ ତି ଆମନ୍‌ରା, ଉଲ୍ଲୁମରନ୍‌ ଡ ତଙର୍‌ଗଡ୍‌ ତଙିୟ୍‌ଲନ୍‌ ଆଜିର୍ତେନ୍‌ ଆମନ୍‌ରା ଓଡ୍ଡେଲେ ବଡିନ୍‌ ତିୟ୍‌ଲେ କାବ୍ବାଡ଼ାନ୍‌ ଆବରାଁୟ୍‌ତେନ୍‌ ଆମନ୍‌ରା ତିଅନ୍ତମ୍‌ । 11 ଆନିନ୍‌ଡମନ୍‌ ଆ ବନୟ୍‌ କିନ୍‍ସଡନ୍‍ ଏଙ୍ଗାଲେ ୟର୍ରନ୍‌ ଜୋମ୍‌ନ୍ତେ, ଆବ୍‌ଡିଡ୍‌ ଆବ୍‌ଡିଡ୍‌ଲେ ଏର୍‌ଗିଆନନ୍‌ ବାତ୍ତେ ଆକାବ୍ବାଡ଼ା ଆଲନୁମ୍‌ ଆ ଉଲ୍ଲୁମର୍‌ ତିଅନ୍ତମ୍‌ । 12 ଆନା ଆଗନିୟ୍‌ଗିୟ୍‌ଲୋଙନ୍‌ ଗିଆନଡମ୍‌, କେନ୍‌ଅନ୍ତମ୍‌ ଆମନ୍‌ରାଆଡଙ୍‌ ଏଗିୟ୍‌ତେ ପଙ୍‌? ଆନିନ୍‌ ସିଲଡ୍‌ ଉଲ୍ଲୁନ୍‌ ଆମଙ୍‌ଲୋଙ୍‌ ଗୋଗୋୟ୍‌ ଆସାନେନ୍‌ ଡକୋ । 13 ଆଡ଼ସାମରନ୍‌ ବର୍ତନ୍‌, "ତଙର୍‌ଲୋଙନ୍‌ ସିଅଁକିଡନ୍‌ ଡକୋ, ପାଡ଼ାର୍‌ଲୋଙନ୍‌ ସିଅଁକିଡନ୍‌ ଡକୋ ।" 14 ଏଙ୍ଗାଲେ ଗୋର୍ଜୋଲୋଙନ୍‌ ସନଙନ୍‌ ବୁଲ୍ଲେତେ, ତିଅନ୍ତମ୍‌ ଆଡ଼ସାମରନ୍‌ ଆର୍‌ଲୁଡ୍‌ଲୁଡ୍‌ଲୋଙନ୍‌ ଡକୋଲନ୍‌ ଅଡିଅତାନ୍‌ ଗଡ଼ାୟ୍‌ତନ୍‌ । 15 ଆଡ଼ସାମରନ୍‌ ସଡ଼ୁଆଲୋଙନ୍‌ ଓବ୍‌ଲେ ଆରି ବତର ଆତଅଡ୍‌ବାନ୍‌ ଆସିନ୍‌ ଆପନାଙ୍‌ ମଙ୍ଗାତେ । 16 ସାତ ଜଣ ମନଙ୍‌ ଆଜନାଲଙ୍‌ ଆତରିୟ୍‌ତେନ୍‌ ଆମନ୍‌ରା ଆପାଲ୍‌ତେଙ୍‌ ଆଡ଼ସାମରନ୍‌ ଆନିନ୍‌ଡମ୍‌ ଆ ଗନିୟ୍‌ଗିୟ୍‌ଲୋଙ୍‌ ଗିଆନଡମ୍‌ । 17 ଅଙ୍ଗା ଆମନ୍‌ରା ତଙରନ୍‌ ଆଜିର୍ତେନ୍‌ ଆଡିଡ୍‌ ଆନିନ୍‌ ସରିନ୍‌ କୁଲମ୍‌ତଡନ୍‌ ଆମନ୍‌ରାଜି ଅଲ୍ଲବାଡ୍ଡେଲୋଙ୍‌ ଇୟ୍‌ତେ ବରାବ୍‌ତନେ, ଆନିନ୍‌ କିନ୍‍ସଡନ୍‍ ଆଲୁଡ୍‌ ଆଞରମ୍‌ତେନ୍‌ ଆମନ୍‌ରା ଅନ୍ତମ୍‌ । 18 କାଡ଼ାସିତୋଡନ୍‌, ଅଆମନ୍‌ ଡ ରନବ୍ବୁନ୍‌ ଆରାପ୍ପାୟ୍‌ତେନ୍‌ ଆବାୟାମର୍‌ ଏଙ୍ଗାଗୋ; 19 ଅଙ୍ଗା ଆମନ୍‌ରା ଆନିନ୍‌ଡମ୍‌ ଆ ତୟ୍‌ଲିସିଙ୍‌ମରନ୍‌ ସବ୍‌ଡିଡ୍‌ଲେ ବର୍ତେ, ଞେନ୍‌ ଏତିକ୍କଲାୟ୍‌ଲମ୍‌ ପଙ୍‌ ? ଆନିନ୍‌ ତିଅନ୍ତମ୍‌ । 20 ଅଙଲନ୍‌ ଅଞିଡେନ୍‌ଡେନ୍‌ ତଗୋନ୍‌ ପଞିଡ୍‌ତେ, ତିକ୍କଲାୟ୍‌ବରନ୍‌ ନିଣ୍ତୟ୍‌ବରନ୍‌ ଅଃଡକୋଲୋଡେନ୍‌ ଗୋଡ଼େନ୍‌ ଅଞିଡ୍‌ତେ । 21 ଏଙ୍ଗାଲେ ଆରଡ଼େତୋଡନ୍‌ ଡ ଅସାଜନ୍‌ ଆରି ତଗୋନ୍‌ ଡ ଅଙଲନ୍‌, ତିଅନ୍ତମ୍‌ ଅଲ୍‌ବାଡ୍ଡେନ୍‌ ଆନବ୍‌ଗୋଗୋୟ୍‌ ଆସନ୍‌ ଲଗାଜୋଡ଼ାମରନ୍‌ । 22 ନିଣ୍ତୟ୍‌ବରନ୍‌ ଆବର୍ନେ ମାଡ ମନ୍ନା, ତିଆତେ କିମ୍ପୋଙନ୍‌ ଆଅମ ଜିର୍ତେ । 23 ଆମୟ୍‌ବରନ୍‌ ଆବର୍ତନ୍‌ ଉସାଲ୍‌ତମନ୍‌ ଡ ଏର୍‌ମନଙ୍‌ ଆବରିୟ୍‌ ଉଗ୍ଗରନ୍‌ ଏଙ୍ଗାଗୋ, ରୁପ୍ପାନ୍‌ ଆରାମ୍ମି ବାତ୍ତେ ଆଜବ୍‌ଲିଡନ୍‌ ଆଲବସୋଡ୍‌ ଅନ୍ତମ୍‌ । 24 ଏଡ଼ୁର୍‌ମଡ୍‌ମରନ୍‌ ଆ ଉସାଲ୍‌ତମ୍‌ଲୋଙନ୍‌ ଇସ୍କତ୍ତାତେ, ବନ୍‌ଡ ଆ ମନ୍ନଲୋଙନ୍‌ ବୁର୍ଡତେ । 25 ଆନିନ୍‌ ଜବୁଙ୍‌ ସର୍ରଙନ୍‌ ବାତ୍ତେ ବର୍ରନ୍‌ଡେନ୍‌, ଆନିନ୍‌ଆଡଙ୍‌ ଏଡର୍ରଡଙ୍‌ନେ, ଇନିଆସନ୍‌ଗାମେଣ୍ତେନ୍‌ ଆ ଉଗ୍ଗର୍‌ଲୋଙନ୍‌ ସାତଟା ଏଡ଼ୁର୍‌ମଡ୍‌ ବରନ୍‌ ଡକୋତନ୍‌ । 26 ଇସ୍କତ୍ତାନ୍‌ ବାତ୍ତେ ଆନିନ୍‌ଡମନ୍‌ଆଡଙ୍‌ ଞୁମ୍‌ଲନ୍‌ ଜନଙ୍‌ଡେନ୍‌ ଆ ପରାନ୍‌ସାତ୍ତିନ୍‌ ଅଡ଼୍‌କୋ ମନ୍‌ରାନ୍‌ ଆତେମଡ୍‌ଲୋଙ୍‌ ରାଙ୍‌ଡାତେ । 27 ଆନା ଲୋଓଙନ୍‌ ଗାୟ୍‌ତେ, ଆମନକୁନ୍‌ ଆନିନ୍‌ ତେତ୍ତେ ଅସେଡ୍‌ତେ; ଆରି, ଆନା ଅରେଙନ୍‌ ଗଡ଼ାୟ୍‌ତେ, ତିଆତେ ୟର୍‌ଡୋଲ୍‌ଲେ ଆନିନ୍‌ମା ଆଡଅଙ୍‌ ଗତର୍ତେ । 28 ପାତ୍ୟାମରନ୍‌ ଆଲାଙ୍‌ ଆନାଆଡଙ୍‌ ରବ୍‌ଡ଼ିତେ, ଆନିନ୍‌ଆଡଙ୍‌ ନିୟ୍‌ ଏଡ଼ୁର୍‌ମଡ୍‌ତେ; ଆରି, ତମୟ୍‌ବର୍‌ ତଅଡନ୍‌ ଅନବ୍‌ଗୁରୁଡ୍ଡେନ୍‌ ଅମ୍‌ଡୁଙ୍‌ତାୟ୍‌ ।