1 ଜାକିରନ୍‌ ଆଡାଙ୍ଗଡ଼ାଅନ୍‌ ଅଗୁରନ୍‌ ଆବର୍ନେଜି କେନ୍‌; ତି ଆମନ୍‌ରା ଇତିଏଲନ୍‌ଆଡଙ୍‌, ଆଗରାମ୍‌ଗାମ୍‌ ଇତିଏଲନ୍‌ ଡ ଉଲକନ୍‌ଆଡଙ୍‌ ବର୍ତଜି; 2 ଆଜାଡ଼ିଡମ୍‌ ଆନ୍ନାମରଞ୍ଜି ଆମଙ୍‌ ସିଲଡ୍‌ ଞେନ୍‌ ଉଲ୍ଲୁଡମ୍‌, ଆରି ଅମଙ୍‌ଞେନ୍‌ ମନ୍‌ରାନ୍‌ ଅନ୍ତମ୍‌ ଅନିୟମନ୍‌ ଅବୟ୍‌ତଡ୍‌ । 3 ଞେନ୍‌ ଗିଆନନ୍‌ ଏର୍‌ଞଙ୍‌ନେ,ଆରି ଇସ୍ୱରନ୍‌ ଆବିସୟ୍‌ ଆ ପଡ଼େନେ ଅମଙ୍‌ଞେନ୍‌ ଅବୟ୍‌ତଡ୍‌ । 4 ଆନା ରୁଆଙନ୍‌ ଜିରାନ୍‌ଜିର୍ରେ ତେତ୍ତେ ସିଲଡ୍‌ ପଡ୍‌ଲନାୟ୍‌ ? ଆନା କୁନ୍‌ରୁବ୍‌ସିଲନ୍‌ ରିଙ୍ଗେନ୍‌ ଅବ୍‌ରୁକ୍କୁତେ ? ଆନା ଆ ସିନ୍‌ରିଲୋଙନ୍‌ ଅଡ଼୍‌କୋନ୍‌ ଆଡାଆ ଜିରାଏ ? ଆନା ପୁର୍ତିନ୍‌ ଆସଣ୍ତି ଅଡ଼୍‌କୋନ୍‌ ତୁବେନ୍‌ ? ଆଞୁମନ୍‌ ଇନି ? ଆ ଡାଙ୍ଗଡ଼ାଅନନ୍‌ ଆଞୁମ୍‌ ଇନି ? ଅସମଁୟ୍‌ କେନ୍‌ଆତେ ଜନାଡେନ୍‌ ବର୍ନା । 5 ଇସ୍ୱରନ୍‌ ଆବର୍ନେଲୋଙ୍‌ ଇନ୍ନିଙ୍‌ ଡୋସାନ୍‌ ଅବୟ୍‌ତଡ୍‌; ଅଙ୍ଗା ଆମନ୍‌ରାଜି ଆମଙନ୍‌ ଡର୍ତଞ୍ଜି, ଆନିନ୍‌ ଆ ଡରଙ୍‌ନେଞ୍ଜି । 6 ଆବର୍ନେଲୋଙ୍‌ ଇନ୍ନିଙ୍‌ ଏମାୟ୍‌ଡଙ୍‌, ମାୟେନ୍‌ଡେନ୍‌ ଆନିନ୍‌ ଆମନ୍‌ଆଡଙ୍‌ କଁୟ୍‌ତମ୍‌, ଆରି ଆମନ୍‌ ପାତ୍ୟାମରନ୍‌ ଗାମ୍‌ଲେ ଜନାତମ୍‌ । 7 ଞେନ୍‌ ଆମନ୍‌ଆଡଙ୍‌ କେନ୍‌ ବାଗୁ ଆବିସୟ ବେଲମ୍‌, ଞେନ୍‌ ଅନ୍‌ରଙ୍‌ ରବ୍ବୁଇଁୟନ୍‌ ଆମ୍ମୁଙ୍‌ ଞେନ୍‌ଆଡଙ୍‌ ତନିୟନ୍‌ ଆସନ୍‌ ଅସାଡଙେ । 8 ଏର୍‌ମନଙ୍‌ବରଞ୍ଜି ଡ ପାତ୍ୟାବରଞ୍ଜି ଅମଙ୍‌ଞେନ୍‌ ସିଲଡ୍‌ ସବ୍‌ଙାଜା; ଞେନ୍‌ଆଡଙ୍‌ ଡୋଲୟ୍‌ମର୍‌ ଅଡ଼େ ଗମାଙ୍‌ମର୍‌ ଅମ୍ମେଡଙ୍‌; ବନ୍ତାଞେନ୍‌ ଞେନ୍‌ଆଡଙ୍‌ ତିୟିଁୟ୍‌ । 9 ଇଜ୍ଜାଡେନ୍‌ ଞେନ୍‌ ଅବୋଓଲନ୍‌ ଆମନ୍‌ଆଡଙ୍‌ କରୋଡାତିଁୟ୍‌, ସଦାପ୍ରବୁନ୍‌ ଆନା ? ଅଡ଼େ ଡୋଲୟ୍‌ମର୍‌ ଡେଲିଁୟ୍‌ଡେନ୍‌ ରାଉଲନ୍‌ ଇସ୍ୱରଞେନ୍‌ ଆଞୁମ୍‌ କଣ୍ତାୟ୍‌ତାୟ୍‌ । 10 ଅନ୍ନିଙ୍‌ କମ୍ୱାରିନ୍‌ଆଡଙ୍‌ ଆ ସାଉକାରନ୍‌ ଆତେମଡ୍‌ଲୋଙ୍‌ ଏଗବ୍‌ରୟ୍‌ମଡ୍‌ଡଙ୍‌; ଏଗବ୍‌ରଜେନ୍‌ଡେନ୍‌ ଆନିନ୍‌ ଆମନ୍‌ଆଡଙ୍ ସୟ୍‌ପତମ୍‌ ଆରି ଆମନ୍‌ ଡୋସାମର୍‌ ଗାମ୍‌ଲେ ଡନିଡିନ୍‌ ଡେତମ୍‌ । 11 କେନ୍‌ ଅନ୍ତମ୍‌ ଲାଙ୍‌ଲେଡ୍‌ ମନ୍‌ରାଞ୍ଜି ଡକୋ ଡ ଆପେୟଞ୍ଜିଆଡଙ୍‌ ସୟ୍‌ପତଜି,ଆରି ଆୟୋଙଞ୍ଜିଆଡଙ୍‌ ଆସିର୍ବାଦନ୍‌ ଅଃତିୟେଜି, କେନ୍‌ଅନ୍ତମ୍‌ ଅବୟ୍‌ କେଜ୍ଜାନ୍‌ ଡକୋ । 12 କେନ୍‌ ଅନ୍ତମ୍‌ ଲାଙ୍‌ଲେଡ୍‌ ମନ୍‌ରାଞ୍ଜି ଡକୋଜି, ଆଗନିୟ୍‌ଗିୟ୍‌ଲୋଙଞ୍ଜି ମଡ଼ିର୍‌ଡମ୍‌ ଗାମ୍‌ଲେ ଅବ୍‌ଡିସୟ୍‌ତଜି, ଡେଲୋଜନଙ୍‌ଡେନ୍‌ ଆନିଞ୍ଜି ଆଡିଲ୍‌ଡମଞ୍ଜି ସିଲଡ୍‌ ଅନ୍‌ରଙ୍‌ ଗିୟ୍‌ଡାନେଜି । 13 କେନ୍‌ ଅନ୍ତମ୍‌ ଲାଙ୍‌ଲେଡ୍‌ ମନ୍‌ରାଞ୍ଜି ଡକୋଜି, ୟାଙ୍ଗୋୟ୍‌, ଆନିଞ୍ଜି ଆଗନିୟ୍‌ଗିୟ୍‌ଲୋଙଞ୍ଜି ଜବ୍ର ସୋଡ଼ାଡମ୍‌ ଅବ୍‌ଡିସୟ୍‌ତଜି ଆରି ଆନିଞ୍ଜି ଆନ୍ନାମରଞ୍ଜିଆଡଙ୍‌ ଏଡ଼ୁର୍‌ମଡ୍‌ଲେ ଆଙ୍ଗାଙ୍‌ତଜି । 14 କେନ୍‌ ଅନ୍ତମ୍‌ ଲାଙ୍‌ଲେଡ୍‌ ମନ୍‌ରାଞ୍ଜି ଡକୋଜି, ଡୁକ୍କମରଞ୍ଜିଆଡଙ୍‌ ଡ ଡୋଲେୟ୍‌ମରଞ୍ଜିଆଡଙ୍‌ ପୁର୍ତିନ୍‌ ସିଲଡ୍‌ ଆନବ୍‌ଗୁରୁଡ୍ଡେ ଆସନ୍‌ ଇସ୍ସୁମ୍‌ତଜି, ଆଜିଞ୍ଜି କଡ଼ିବନ୍‌ ଅନ୍ତମ୍‌ ଆରି ତନାଡ଼ାଜିନ୍‌ କୁଣ୍ତିନ୍‌ ଅନ୍ତମ୍‌ । 15 ଇଲମନ୍‌ ବାଗୁ ଡାଙ୍ଗଡ଼ିଅନନ୍‌ ଡକୋ, ଆନିଞ୍ଜି ବର୍ତଞ୍ଜି, ତିୟିଁୟ୍‌, ତିୟିଁୟ୍‌ । ୟାଗି ଜନବନ୍‌ ଡକୋ ଆନିଞ୍ଜି ଆଙ୍ଗିୟ୍‌ଜା ଅଃବୋଓଏଜି, ଓଓ, ଉଞ୍ଜି ଜନବଞ୍ଜି ଅବର୍ନେଜି, ଡିୟ୍‌ତେ ସରି ଅଃଗାମେ । 16 ପାତାଡ଼ନ୍‌ ଡ ଆଞ୍ଜେବଜନ୍‌, ଡାଆନ୍‌ ଅଃଗୁଙେନ୍‌ ଆ ଲବ, ଡ ତଗୋନ୍‌ ଡିୟ୍‌ତେ ସରି ଅଃଗାମେ । 17 ଅଙ୍ଗା ଆମଡ୍‌ ଆପେୟନ୍‌ଆଡଙ୍‌ ସୟ୍‌ସୟ୍‌ମୁତେ ଆରି ଆୟୋଙନ୍‌ ଆବର୍ନେ ଆଲ୍ଲେତେ, ଗର୍ଡଞ୍ଜି ଆକାକାଜି ତବ୍‌ଲେ ପାଙ୍‌ତଜି କି ଅଡ଼ାଙନ୍‌ ଆ ଅନଞ୍ଜି ଜୋମ୍‌ତଜି । 18 ୟାଗି ବର୍ନେନ୍‌ ଞେନ୍‌ ସାନ୍ନି ଡେତିଁୟ୍‌, ଆରି ଉଞ୍ଜି ବର୍ନେନ୍‌ ଜାୟ୍‌ ଞେନ୍‌ ଅଗନ୍‌ଲୁଡିଁୟ୍‌; 19 ରୁଆଙ୍‌ଲୋଙନ୍‌ ଅଡ଼ାଙନ୍‌ ଆ ଏଙେଙ୍‌ଡାନେ, ଅରେଙ୍‌ଲୋଙନ୍‌ ଜାଆଡନ୍‌ ଆଜନିର୍‌, ସମେଁୟ୍‌ଣ୍ଡ୍ରାଲୋଙନ୍‌ ଜାଜନ୍‌ ଆଜନିର୍‌, ଆରି ଡାଙ୍ଗଡ଼ିବଜନ୍‌ ଆମଙ୍‌ବା ମନ୍‌ରାନ୍‌ ଆନିୟ୍‌ । 20 ତିଅନ୍ତମ୍‌ ଡାରିବଜନ୍‌ ଆମଙ୍‌ବା ଆଜନିର୍‌, ଆନିନ୍‌ ଜୋମ୍‌ଲେ ଗଗଡ୍‌ତମ୍‌ଲନ୍‌ ବର୍ତନ୍‌, ଞେନ୍‌ ଇନ୍ନିଙ୍‌ ଡୋସାନ୍‌ ଅଃଲୁମ୍‌ଲାୟ୍‌ । 21 ୟାଗି ବର୍ନେନ୍‌ ବାତ୍ତେ ପୁର୍ତିନ୍‌ ତକର୍ତେ,ଆରି ଉଞ୍ଜି ବର୍ନେନ୍‌ ଜାୟ୍‌ ଆନିନ୍‌ ସଏଲେ ଅରପ୍ତିଏ; 22 ରାଜାଗଡନ୍‌ ଆଞରାଙ୍‌ତେନ୍‌ ଆକମ୍ୱାରିମର୍‌ ଡ ଜନୋମ୍‌ଲୋଙନ୍‌ ଆବ୍ରୋଓତେନ୍‌ ଆଉଲ୍ଲୁମର୍‌; ବିବାନେନ୍‌ ଅସାଜେନ୍‌ ଆଇବୟ୍‌; 23 ଆରି, ଆଙ୍ଗା ଆକମ୍ୱାରିବଜନ୍‌ ସାଉକାରବଜନ୍‌ ଅଦିକାର ଆଞରାଙ୍‌ତେନ୍‌ ଆବୁଡ଼ାର୍‌ ଲଙିନ୍‌ଡମ୍‌ । 24 ଉଞ୍ଜି ପରାନ୍ନାନ୍‌ ପୁର୍ତିଲୋଙନ୍‌ ସନ୍ନାଡମ୍‌, ବନ୍‌ଡ ଜବ୍ର ଗିଆନଡମ୍‌, 25 ମୁୟ୍‌ଡାଞ୍ଜି ବପ୍ପୁଜିତଡ୍‌, ଡେଲୋଜନଙ୍‌ଡେନ୍‌ ଡାଗାଡାଇଙନ୍‌ ଆଡିଡ୍‌ ଜନୋମନ୍‌ ତର୍ତୁମ୍‌ତଜି । 26 ସିମ୍ମାକୁମଞ୍ଜି ବୋର୍ସାଜିତଡ୍‌, ଡେଲୋଜନଙ୍‌ଡେନ୍‌ ଆନିଞ୍ଜି ଜଲେଙ୍‌ଲୋଙନ୍‌ ରମ୍ମଙ୍‌ ରମ୍ମଙ୍‌ ଆସନ୍‌ ଡରକୋନେ ଅସିଙନ୍‌ ତୁବ୍‌ତଜି । 27 ପପ୍ପରଞ୍ଜି ଆ ରାଜା ଆନ୍ନୁଙ୍‌ତଡ୍‌, ଡେଲୋଜନଙ୍‌ଡେନ୍‌ ଅଡ଼୍‌କୋଞ୍ଜି ଆନିଞ୍ଜି ରୁକ୍କୁଲନ୍‌ ଏଙ୍‌ତଜି । 28 ଆରି, କଃର୍ଡେଡନ୍‌ ଅସିନ୍‌ ବାତ୍ତେ ଞମ୍‌ଲେ ରପ୍ତିତବୋ, ଡେଲୋଜନଙ୍‌ଡେନ୍‌ ଆନିନ୍‌ ରାଜାନ୍‌ ଆମେଡ଼ସିଙ୍‌ଲୋଙ୍‌ ଡକୋତନ୍‌ । 29 ୟାଗି ପରାନ୍ନା ମନଙ୍‌ଡମ୍‌ ତଙିୟ୍‌ତଞ୍ଜି,ଆରି ଉଞ୍ଜି ପରାନ୍ନା ମନଙ୍‌ଡମ୍‌ ତଙିୟ୍‌ତଞ୍ଜି; 30 ସିଅଁକିଡନ୍‌ ଜନ୍ତୁଞ୍ଜି ଆମଙ୍‌ଲୋଙ୍‌ ଜବ୍ର ବପ୍ପୁ ଆରି ଆନ୍ନିଙ୍‌ ଆତେମଡ୍‌ ସିଲଡ୍‌ ବତଙ୍‌ଲେ ଅଃୟର୍ନାୟ୍‌ । 31 ତାଡ୍ଡାରନ୍‌; ବୋଡ୍ଡାମେଡନ୍‌ ଡ ସିପ୍ପାୟନ୍‌ ବୟନ୍‌ ରୁକ୍କୁଲନ୍‌ ଅବ୍‌ଜାଡାଲନ୍‌ ଆଡ୍ରକୋତନ୍‌ ଆରାଜା ଆ ବିରୁଦଲୋଙ୍‌ ଆନ୍ନିଙ୍‌ ଅଡୋନେ । 32 ଅସମଁୟ୍‌ ଆମ୍ୱେନ୍‌ଡମନ୍‌ଆଡଙ୍‌ ଅନବ୍‌ସୋଡ଼ାନ୍‌ ଆସନ୍‌ ଏର୍‌ବୁଡ୍ଡି କାବ୍ବାଡ଼ାନ୍‌ ଏଲୁମ୍‌ତେ, ଅଡ଼େ ଅସମଁୟ୍‌ ଏର୍‌ମନଙ୍‌ ଅନିୟମନ୍‌ ଏଇଃୟମ୍‌ତେ, ତିଡେନ୍‌ ତଅଡ୍‌ଲୋଙ୍‌ବେନ୍‌ ଅସିନ୍‌ ଡକୋବା । 33 ଇନିଆସନ୍‌ଗାମେଣ୍ତେନ୍‌ ଏଙ୍ଗାଲେ ଆଡ଼ୁବନ୍‌ ଗସିଡ୍‌ଲବୋଡେନ୍‌ ଦଇନ୍‌ ଡୁଙ୍‌ତନାୟ୍‌, ଆରି ଅମ୍ମୁନ୍‌ ଗସିଡ୍‌ଲବୋଡେନ୍‌ ମିଞାମନ୍‌ ଡୁଙ୍‌ତନାୟ୍‌, ତିଅନ୍ତମ୍‌ ବନ୍‌ଡ୍ରାବନ୍‌ ଗସିଡ୍‌ଲବୋଡେନ୍‌ ଅଲ୍‌ବାଡ୍ଡେନ୍‌ ଡୁଙ୍‌ତନାୟ୍‌ ।