1 ଗିଆନ୍‌ ଆସିଙନ୍‌ ତୁବେନ୍‌, ଆନିନ୍‌ ସାତଟା ସୋଣ୍ତାଙନ୍‌ ଅବ୍‌ଜାଡାଏନ୍‌ । 2 ଆନିନ୍‌ ଆ ଜନ୍ତୁନ୍‌ ଅଡ଼୍‌କୋନ୍‌ ରବ୍ବୁଏନ୍‌, ଆନିନ୍‌ ଆ ଦ୍ରାକ୍ୟାଡାନ୍‌ ମାୟ୍‌ମାୟେନ୍‌, ଆନିନ୍‌ ଆ ମେଜନ୍‌ ଜାୟ୍‌ ଅବ୍‌ଜାଡାଏନ୍‌ । 3 ଆନିନ୍‌ ଆ କମ୍ୱାରିବଜଞ୍ଜିଆଡଙ୍‌ ଆପ୍ପାୟେନ୍‌, ଆନିନ୍‌ ଗଡ଼ାନ୍‌ ଆଡେଙ୍ଗା ଡରକୋନେନ୍‌ ସିଲଡ୍‌ ଓଡ୍ଡେଲେ ବର୍ତନେ, 4 "ଅଙ୍ଗା ଆମନ୍‌ରା ଏର୍‌ଗିଆନ, ଆନିନ୍‌ ତେନ୍ନେ ଜିରାୟ୍‌ତୋ," ଆରି ଅଙ୍ଗା ଆମନ୍‌ରା ଏର୍‌ବୁଡ୍ଡି ଆନିନ୍‌ ଆନିନ୍‌ଆଡଙ୍‌ ବର୍ତେ, 5 "ଜିରାୟ୍‌ବା, ଜନୋମ୍‌ଞେନ୍‌ ଜୋମ୍‌ବା ଆରି ଆମାୟ୍‌ମାୟନ୍‌ ଦ୍ରାକ୍ୟାଡାଞେନ୍‌ ଗାବା । 6 ଏ ଏର୍‌ବୁଡ୍ଡିମର୍‌ଜି, ଏର୍‌ବୁଡ୍ଡିମରଞ୍ଜି ଆଗଡ଼ି ଅମ୍‌ରେଙ୍‌ଲେ ଅମେଙମ୍‌ତୋ । ଆରି ମନଙ୍‌ ଅନିୟମ୍‌ ତଙର୍‌ଗଡ୍‌ ତଙିୟ୍‌ନାବା ।"

7 ଆନା ନିଣ୍ତୟ୍‌ମରନ୍‌ଆଡଙ୍‌ ଞନଙନ୍‌ ତିୟ୍‌ତେ, ଆନିନ୍‌ ଆନିନ୍‌ଡମ୍‌ ଗରୟ୍‌ତେ । ଆରି ଆନା ପେଲ୍ଲାମରନ୍‌ଆଡଙ୍‌ କନେଁୟ୍‌ ଞନଙ୍‌ଞଙ୍‌ବରନ୍‌ ବର୍ତେ, ଆନିନ୍‌ ଆନିନ୍‌ଡମନ୍‌ ଡୋସାତେ । 8 ନିଣ୍ତୟ୍‌ମରନ୍‌ଆଡଙ୍‌ ସାଞେଙ୍‌ବରନ୍‌ ଏବର୍‌ଡଙେ; ଆନିନ୍‌ ଆମନ୍‌ଆଡଙ୍‌ ଏଡ଼ୁର୍‌ମଡ୍‌ତମ୍‌ । ଗିଆନମରନ୍‌ ସାଞେଙ୍‌ବରନ୍‌ ବରା, ଆନିନ୍‌ ଆମନ୍‌ଆଡଙ୍‌ ଡୁଙ୍‌ୟମ୍‌ତମ୍‌ । 9 ଗିଆନମରନ୍‌ଆଡଙ୍‌ ଏଞଙ୍‌ଞଙେନ୍‌ଡେନ୍‌ ଆନିନ୍‌ ଆରି ଗିଆନତେ । ଆରି ଡରମ୍ମମରନ୍‌ଆଡଙ୍‌ ଞନଙନ୍‌ ତିୟେଣ୍ଡେନ୍‌ ଆ ଗିଆନନ୍‌ ଗୋଗୋୟ୍‌ତେ ।

10 ପ୍ରବୁନ୍‌ ଆବର୍ନେ ଆବନତଙ୍‌ ଗିଆନନ୍‌ ଆସନୁସୁ,ଆରି ଡରମ୍ମନ୍‌ ଆବର୍ନେ ଗିଆନନ୍‌ ଞାଙେନ୍‌ ଡେନ୍‌ ମନଙ୍‌ ଅନିୟମନ୍‌ ଜିର୍ତାୟ୍‌ । 11 ଇନିଆସନ୍‌ଗାମେଣ୍ତେନ୍‌ ଞେନ୍‌ ଅମ୍ମେଲେ ଡିନାବେନ୍‌ ଗୋଗୋୟ୍‌ତେ ଆରି ଅନମେଙ୍‌ ବର୍ସେଙ୍‌ବେନ୍‌ ଗୋଗୋୟ୍‌ତେ । 12 ଆମ୍ୱେନ୍‌ ଗିଆନମରନ୍‌ ଡେଲବେଣ୍ଡେନ୍‌ ଆମ୍ୱେନ୍‌ଡମ୍‌ ଆସନ୍‌ ଗିଆନମରନ୍‌ ଡେତବେନ୍‌, ଏନିଣ୍ତୟେନ୍‌ଡେନ୍‌, ଆନିନ୍‌ଡମ୍‌ ତିଆତେ ବୋଗତେ । 13 ଏର୍‌ଗିଆନବଜନ୍‌ ଗୋଡ଼େତନ୍‌, ଆନିନ୍‌ ଏର୍‌ବୁଡ୍ଡି ଆରି ଇନ୍ନିଙ୍‌ ଜନାତଡ୍‌ । 14 ଆନିନ୍‌ ଆସିଙନ୍‌ ଆଡୁଆରାବା ଆରି ଗଡ଼ାନ୍‌ ଡେଙ୍ଗା ଡରକୋନେଲୋଙନ୍‌ ସପାନ୍‌ ବେଲ୍‌ଲେ ତଙ୍କୁମ୍‌ତେ । 15 ତି ଆତଙର୍‌ଗଡ୍‌ ତର୍ଡମ୍‌ ତର୍ଡମ୍‌ ଆତଙର୍‌ଗଡ୍‌ ଆଜରିର୍ତେନ୍‌ ଆମନ୍‌ରାଜିଆଡଙ୍‌ ଓଡ୍ଡେଲେ ବର୍ତେ, 16 "ଆନା ଏର୍‌ବୁଡ୍ଡି, ଆନିନ୍‌ ତେନ୍ନେ ଜିରାୟ୍‌ତୋ ।" ବୁଡ୍ଡିତଡନ୍‌ ଆମନ୍‌ରାଆଡଙ୍‌ ଆନିନ୍‌ କେନ୍‌ ଆବର୍ନେ ବର୍ତେ, 17 "ରାଉଲନ୍‌ ଆପନାଙ୍‌ ଆଡାଆ ଜବୁଙ୍‌ଡମ୍‌ ଆରି ଲୟ୍‌ଁଲେଡ୍‌ ଆଜନୋମ୍‌ ଆଡାରେୟ୍‌ ମନାଡମ୍‌ ।" 18 ବନ୍‌ଡ ତି ଆମନ୍‌ରା ଅଃଜ୍ଜନାଏ ଆରବ୍ବୁମରଞ୍ଜି ତେତ୍ତେ ଡକୋତଞ୍ଜି, ଆରି ଆନୋଡ୍ଡେମରଞ୍ଜି ପାତାଡ଼ନ୍‌ ଆଜରୁ ଡରକୋନେଲୋଙ୍‌ ଡକୋଜି ।