Ka Di Poglkwa 7

God ye Israel yoba 144,000 muno gane ere togwa

1 Ana na taragl yegl mere kan kodidre, ta ama kaniga i, dumo makan yei pi, uglo yogwa i, bage 4-pela yogwa. Yomara i, angelo 4-pela adigl moglsre, ir ede suna u dinabedi ake kegl di meglko, kaniga. Ir ta ade umara mo ade beimara mo nigl bre beye mogl udre, dumo makan mo mudi nigl mo ede swara ta ir si dinabedi ake kegl digwa. 2,3 Ana angelo 4-pela i, God ye dumo makan ya mudi nigl ere kide ere tenaiglmedi yobuglo togwa ba angelo pere ta ama ade umara ede egli udre, ka podo di, angelo 4-pela i yegl di togwa, Ene kan molo! No God niglmo kogonmo yoba meglkwa i, mabro mina muno gane ere padigl te kodumdre, ene dumo makan, mudi nigl, ya ede pra, okuo ere kide eraiglmiwe dugwa. Te, angelo i, taragl ta ake moglkwa i, God kor aimadi moglkwa i, ye yobama muno ganemo ere tenabuka taragl i, ake moglkwa.

4 Ana angelo i yegl dugo, ye angelo tau bogl yoba muno gane ere padigl teigo, na yoba siramna mere muno gane igwa i, digo, prika. Ye digwa i, yoba 144,000 muno gane ime digwa. Yoba 144,000 muno gane igwa i, ye Israel yoba yugobunono swara swarade mina meglkwa. 5 Juda yoba yugobunono i mina 12,000 meglko, te, Ruben yoba yugobunono mina 12,000 meglko, Gat yoba yugobunono mina 12,000 ama meglkwa. 6 Te, Aser yoba yugobunono mina 12,000 meglko, Naptali yoba yugobunono mina 12,000 meglko, Manase yoba yugobunono mina 12,000 meglkwa. 7 Yegl meglko, te, Simeon yoba yuguobunono mina 12,000 meglko, Livai yoba yugobunono mina 12,000 meglko, Isakar yoba yugobunono mina 12,000 ama meglkwa. 8 Te, Sebulun yoba yugobunono mina 12,000 meglko, Josep yoba yugobunono mina 12,000 meglko, Benjamin yoba yugobunono mina 12,000 ama meglkwa. Israel yoba yegl mere, yugobuno 12-pela meglkwa i, i swara ede, 144,000 muno gane igwa.