Wakolinto 7

Mahala ga zengele

1 Sambi ima niwafambulile kwambuli zija mnyandikile,

Molonga kua, "Ihawile goya kama mulume yahalekile kusola," 2 mbali kwa vija hana mbuli nyingi za ugoni, baho, chila mulume na yasole mwehe wake mwenyego, na chila muke yawe na mulume wake mwenyego. 3 Mulume yatende gaja galondeka kwambuli ya mwehe wake, nayo mwehe yatende gaja galondeka kwambuli ya mulume wake. 4 Mwehe kabule ulamuzi kwambuli ya lukuli lwake mbali mulume wake kanao, na ivija mulume kabule ulamuzi kwa lukuli lwake mbali mwehe wake kanao. 5 Sekemuime, mbali kama muhaitogolela kutenda ivo kwa chipindi chiguhi tu, ili mpate nyafasi ya kumpula Mulungu, amala muibwelele kaidi ili Mwenembago seke yawageze kwa mbuli ya kuleka kufunyamoyo kwenu.