28 Baho, walume wolondeka kuweng'ha wende wehe zao kama nhuli zao wenyego. Yomwing'ha wende mwehe wake iyo koing'ha wende mwenyego. 29 Habule munhu yoyose yowihila lukuli lwake, badili ya kuwihila, koulisa na kuuvaza. Ivo ivija Kilisito viyawasang'hanila goya bumbila da wamtogole Kilisito, 30 kwavija cheye cha vilungo va lukuli lwake. 31 Kama Mayandiko vigandikigwe, "Kwambuli iyo mulume komleka tata na mami yake, koilumba na mwehe wake, nawo waidi wokua lukuli lumwe." 32 Hana ukweli uifisile mui mbuli ino, nanie noona ni kwambuli ya Kilisito na bumbila da wamtogole Kilisito. 33 Mbali ivija na kwambuli yenu. Chila mulume kolondeka yamwing'he wende mwehe wake kama viyoing'ha wende mwenyego, nayo mwehe kolondeka yamtegeleze mulumaake.