12 Kwaivo malozo sekegawagaze kaidi mzing’huli zenu izo zidanganika, naivo sekeziwatende kuzitegeleza maya zake. 13 Hebu sekemlave hata hanhu hamwe mzing’huli zenu chiwe chilungo cha kusang’hana ubananzi na malozo. Badili yake, muilavile mweye wenyego kwa Mulungu kama wanhu wazilibuligwe, ilaveni wenyego kwa Mulungu kwambuli ya kutogoligwa nayo. 14 Baho malozo hagawagazeni kaidi, manake hamlongozigwa na ndagizi, mbali kwa unovu wa Mulungu.

15 Baho, chilonge choni? Ivo, chisang’hane malozo kwavija hachilongozigwa na ndagizi ila kwa kulongozigwa na unovu wa Mulungu? Hambee! 16 Mvimanya kua mhailava wenyego kama watumwa na kumtegeleza munhu, mokua watumwa wake kweli munhu iyo, hebu mwahailava wenyego kua watumwa wa malozo gaja hachikomelezo chenu ni ifa, hebu kwa kutegeleza Mulungu haichikomelezo motogoligwa nayo. 17 Baho mwaka mkala watumwa wa malozo, mbali sambi nomwing’ha hewela Mulungu, kwavija mtogola mmoyo kutegeleza mahala gamwing’higwe. 18 Mkomboligwa kulawa muutumwa wa Malozo, muwa watumwa wa gatogoligwa na Mulungu.