11 ଏଚେଟିଏ ମ଼ସା ତାନି ପ୍ରବୁ ମାହାପୂରୁଇଁ ବାତିମା଼ଲିହିଁ ଏଲେଇଚେସି, "ହେ଼ ପ୍ରବୁ, ନୀନୁ ନୀ ଏମିନି ଲ଼କୁଣି ହା଼ରେକା ବା଼ଡ଼୍ୟୁଗାଟି କେୟୁତଲେ ମିସର ଦେ଼ସାଟି ହ଼ପ୍ହା ତାଚାମାଞ୍ଜି, ନୀନୁ ଏ଼ୱାରି କ଼ପାଟି ଏ଼ନାଆଁ ତାକି କାର୍ବି ଆ଼ଦି ? 12 ଏ଼ୱାସି ହ଼ର୍କା ଦେ଼ସାତା ଏ଼ୱାରାଇଁ ନା଼ସା କିହାଁ ଦାର୍ତିଟି ମ୍ଣେକ୍ହାଲି ତାକି, ଏ଼ୱାରାଇଁ ଲାଗେଏ କିହାଲି ହ଼ପ୍ହା ତାତେସି, ଇଲେତି କାତା ମିସରତି ଲ଼କୁ ଏ଼ନାଆଁତାକି ଏଲେଇନେରି ? ନୀନୁ ନୀ ହା଼ରେକା କାର୍ବିଟି ୱେଣ୍ତାମୁ ଅ଼ଡ଼େ ନୀ ଲ଼କୁତି ଲାଗେଏତି ଅଣ୍ପୁଟି ସାପି ଆ଼ମୁ। 13 ନୀ ହ଼ଲେଏସି ଅବ୍ରାହାମ, ଇସାହାକ ଅ଼ଡ଼େ ଜାକୁବଇଁ ଅଣ୍ପାମୁ, ନୀନୁ ନୀ ଜାହାରା ଦ଼ରୁ ତଲେ ପାର୍ମାଣା କିହିଁ ଏ଼ୱାରାଇଁ ୱେସାମାଞ୍ଜି, ନା଼ନୁ ହା଼ଗୁତି ହୁକାୟାଁ ଲେହେଁ ମୀ କୂଡ଼ାତି ଏ଼ପା କିଇଁ ଅ଼ଡ଼େ ଏମିନି ବାରେ ଦେ଼ସାତି କାତା ଏଲେଇଞ୍ଜାତେଏଁ, ଏ଼ଦାଆଁ ମୀ କୂଡ଼ାତାକି ହୀଇଁ, ଏ଼ୱାରି କା଼ଲେଏ ତାକି ଏ଼ ଦେ଼ସାତି ଅଦିକାରା କିନେରି।" 14 ଏ଼ଦାଆଁତାକି ପ୍ରବୁ ତାନି ଲ଼କୁଣି ଏମିନି ନା଼ସା କିନି କାତା ଏଲେଇଞ୍ଜାମାଚେସି, ଏମ୍ବାଟି ସାପି ଆ଼ତେସି।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)