1 ଦାୱୁଦ ମୀର୍‌ଏସି ଇସ୍ରାୟେଲତି ରାଜା ସଲମନତି ନେହିଁ ଜା଼ପିନି ବ଼ଲୁ।

2 ବୁଦି ଅ଼ଡ଼େ ବୁଦି ୱେହ୍‌ନାଣି ତେଲ୍‌ହାଲି; ବୁଦିଗାଟି ବ଼ଲୁ ଅଣ୍‌ପାଲି; 3 ନେହିଁ ମାଣ୍‌କି, ଦାର୍ମୁ ଅ଼ଡ଼େ ନେହିଁ ଅଣ୍‌ପୁ ଅ଼ଡ଼େ ନୀହାଁୟିତି ନେହିଁ ଜା଼ପ୍‌ନି କାତା ଆବାଲି; 4 ସ଼ଜେତି ଲ଼କୁଇଁ ଜାଗ୍ରାତା ଅ଼ଡ଼େ ଦାଂଗ୍‌ଣା ଲ଼କୁକି ଜା଼ପିନାଣି ଅ଼ଡ଼େ ବୁଦିତି କାମାତା ସୁଲ୍‌ୱୁ ହୀହାଲି; 5 ଏ଼ନିକିଁ ବୁଦିଗାଟି ଲ଼କୁ ଏ଼ଦାଆଁ ୱେଞ୍ଜାହାଁ ହା଼ରେକା ବୁଦି ବେଟାଆ଼ନେସି ଅ଼ଡ଼େ ତେଲ୍‌ହିନି ଲ଼କୁ ନେହେଁ ଜା଼ପ୍‌ନି ବ଼ଲୁ ବେଟାଆ଼ନେସି; 6 ଇଞ୍ଜାଁ, ର଼ ନେହିଁ ଜା଼ପିନି କାତା ଅ଼ଡ଼େ ର଼ ପୁଣ୍‌ମ୍ବିକିନି କାତା ଅ଼ଡ଼େ ବୁଦିଗାଟାରି ବ଼ଲୁ ଅ଼ଡ଼େ ଏ଼ୱାରି ଡ଼ୁଗାମାନି ବ଼ଲୁ ତେଲ୍‌ହାଲି ଆ଼ଡିନେସି।

7 ପ୍ରବୁ କାତାତି ଆଜିନାୟି ବୁଦିତି ମା଼ଟ୍‌ନାୟି; ସାମା ବୁଦି ହିଲାଆ ଲ଼କୁ ବୁଦି ଅ଼ଡ଼େ ଜା଼ପ୍‌ନାଣି ହୀଣି କିନେସି।

8 ହେ଼ ନା଼ ମୀର୍‌ଏଣା, ନୀ ତାଞ୍ଜିତି ଜା଼ପ୍‌ନି ବ଼ଲୁ ୱେନାମୁ ଅ଼ଡ଼େ ନୀ ତାଲିନି ହୁକୁମି ପିହ୍‌ଆନି। 9 ଇଚିହିଁ ଏ଼ଦି ନୀ ତା଼ର୍ୟୁଁ ତାକି କାର୍ମାତି ଟ଼ପେରି ଅ଼ଡ଼େ ହେର୍‌କିତି ପୂସାୟାଁ ସମାନା ଆ଼ନେ।

10 ହେ଼ ନା଼ ମୀର୍‌ଏଣା, ପା଼ପୁ ଗାଟାରି ନିଙ୍ଗେ ନା଼ଡ଼ି କିୟାସାରେ, ନୀନୁ ଏ଼ୱାରି କାତା ଆହ୍‌ଆନି। 11 ଏ଼ୱାରି ନିଙ୍ଗେ ଏଲେଇଞ୍ଜାନେରି, "ମା଼ ତଲେ ୱା଼ମୁ, ମା଼ର ପା଼ୟାଲି କା଼ଚାହାଁ ଡ଼ୟିନ, ଦ଼ହ ହିଲାଆଗାଟାଣାଇଁ ଆସାଲି ମେଣେଏ ଡ଼ୁଗାହାଁ ଡ଼ୟିନ; 12 ହା଼କିତି ଗା଼ଡ଼୍‌ୟୁ ସମାନା ମା଼ର ଏ଼ୱାରାଇଁ ଜୀୱୁ ତଲେ ନା଼ସା କିନ ଅ଼ଡ଼େ ଗା଼ଡ଼୍‌ୟୁତା ମୁସାମାନି ଲ଼କୁ ସମାନା ଏ଼ୱାରି ବାରେତି ନା଼ସା କିନ; 13 ଏଚେଟିଏ ମା଼ର ବାରେ କୂଡ଼ାତି ଦାରାଗାଟି ଦ଼ନ ବେଟାଆ଼ନାୟି, ଦୂହିତି ଆ଼ସ୍ତି ତଲେ ଜାହା ଜାହାରା ଇଲୁ ନେଞ୍ଜିକିନ, 14 ନୀନୁ ମା଼ ବିତ୍ରା ଆଣ୍ତାଦି; ମା଼ ବାରେତି ରଣ୍ତିଏ ମ଼ଣା*1:14 ମ଼ଣା/ବା଼ଗା ଆ଼ନେ।"

15 ହେ଼ ନା଼ ମୀର୍‌ଏଣା, ନୀନୁ ଏ଼ୱାରି ତଲେ ଏ଼ ଜିରୁତା ତା଼କାଆନି, ଏ଼ୱାରି ଜିରୁଟି ନୀ ପା଼ୱୁଲି ଆ଼ଙ୍ଗାମୁ; 16 ଇଚିହିଁ ଏ଼ୱାରି ପା଼ୱୁଲି ଲାଗେଏତି କାମା କିୟାଲି ହ଼ଡ଼୍‌ନେ ଅ଼ଡ଼େ ପା଼ୟାଲି କା଼ଲେଏ ତେଗାହାଁ ଡ଼ୟିନେ। 17 ଏ଼ନି ପଟା ନ଼କିତା ପା଼ନ୍ଦା ଅଗିନାୟି ଉଜେଏ ଆ଼ନେ। 18 ଏ଼ୱାରି ଜାହା ଜାହାରାଇଁ ପା଼ୟାଲି କା଼ଚାହାଁ ଡ଼ୟିନେରି ଅ଼ଡ଼େ ଜାହାରା ଜୀୱୁତି ଆସାଲି ତାକି ମେହ୍‌ଆ ଟା଼ୟୁତା ଡ଼ୁଗାହାଁ ଡ଼ୟିନେରି। 19 ବାରେ ଦ଼ନ ଜୂପ୍‌କା ଆ଼ନାରି ଜିରୁ ଈଦି; ଏ଼ଦି ବାତ୍‌କୁଗାଟି ଲ଼କୁତି ଜୀୱୁ ନା଼ସା କିନେ।

20 ବୁଦି କାଜା ଗିୟାଁ ତଲେ ଜିରୁତା ହା଼ଟିନେ; ଡେ଼ଡ଼ା ଜିରୁତା ତାନି ହା଼ଡା ୱେଣ୍‌ମ୍ବି କିନେ; 21 ଏ଼ଦି ଲ଼କୁ କୂଡ଼ାଆ଼ନି ଟା଼ୟୁତା ହା଼ଟିନେ; ଗା଼ଡ଼ାତି ଦୁୱେରିତି ହ଼ଡ଼୍‌ନି ଟା଼ୟୁତା ଅ଼ଡ଼େ ଗା଼ଡ଼ା ବିତ୍ରା ତାନି ବ଼ଲୁ ୱେ଼କ୍‌ହା ଏଲେଇନେ।

22 "ହେ଼ ବୁଦି ହିଲାଆ ଲ଼କୁ, ଏଚର କା଼ଲା ଲାଗେଏତାଣି ଜୀୱୁନ଼ଦି ? ହେ଼ ନିନ୍ଦା କିନାତେରି, ଅ଼ଡ଼େ ଏଚର କା଼ଲା ନିନ୍ଦା କିହାଲି ରା଼ହାଁ ଆ଼ଦେରି ? ହେ଼ ବୁଦି ହିଲାଆଗାଟି ଲ଼କୁତେରି ଏଚର କା଼ଲା ବୁଦିତି ଅ଼ପାଆନା ଡ଼ୟିଦେରି ? 23 ନା଼ ଲା଼ଗିନି ତା଼ଣା ମ଼ନ ୱେଟ୍‌ଦୁ; ମେହ୍‌ଦୁ, ନା଼ନୁ ମୀ ଲାକ ନା଼ ଜୀୱୁ*1:23 ଜୀୱୁ, ଅଣ୍‌ପୁ ବାରେ ୱା଼କ୍‌ହାଇଁ, ନା଼ନୁ ନା଼ ବ଼ଲୁ ବାରେ ମିଙ୍ଗେ ୱେସ୍ତାଇଁ। 24 ଇଚିହିଁ ନା଼ନୁ ହା଼ଟାତେଏଁ, ଇଞ୍ଜାଁ, ମୀରୁ କୂତେରି; ନା଼ନୁ କେୟୁ ଦା଼ସ୍ତେଏଁ, ଆମ୍ବାଆତେରି ମା଼ନୱି ଆ଼ଆତେରି। 25 ସାମା ମୀରୁ ନା଼ ବାରେ ଜା଼ପ୍‌ନାଣି ହୀଣି କିତେରି, ଇଞ୍ଜାଁ ନା଼ ଏ଼ନି ଦାକା ହୀନାଣି ଅ଼ପାଆତେରି; 26 ଏ଼ଦାଆଁତାକି ନା଼ନୁ ଜିକେଏ ମୀ କସ୍ତ ବେ଼ଲାତା କାକ୍‌ହାଇଁ, ମୀ ଆଜି ୱା଼ନି ବେ଼ଲାତା ନା଼ନୁ ଲାଜା କିୟାଇଁ। 27 ଏଚିବେ଼ଲା ହା଼ରେକା ଗା଼ଲି ପିୟୁ ସମାନା ମୀ ଆଜି ଏଗାୱା଼ନେ ଅ଼ଡ଼େ ରୁୱା ଗା଼ଲି ସମାନା ମୀ ବା଼ଦା ୱା଼ନେ; ଏଚିବେ଼ଲାତା କସ୍ତ ଅ଼ଡ଼େ ଦୁକୁ ମିଙ୍ଗେ ତାକି ଆ଼ନେ; 28 ଏଚିବେ଼ଲାତା ଏ଼ୱାରି ନାଙ୍ଗେ ହା଼ଟାନେରି, ସାମା ନା଼ନୁ କାତାଆ଼ଅଁ; ଏ଼ୱାରି ହା଼ରେକା ଜାତ୍‌ନୁ ତଲେ ନାଙ୍ଗେ ପାରାନେରି, ସାମା ନାଙ୍ଗେ ବେଟାଆୟଅରି। 29 ଇଚିହିଁ ଏ଼ୱାରି ବୁଦିତି ଅ଼ପାଆତେରି ଅ଼ଡ଼େ ପ୍ରବୁ କାତାତି ଆଜି ଆ଼ଚାଆତେରି। 30 ଏ଼ୱାରି ନା଼ ଏ଼ନି ଜା଼ପ୍‌ନାଣି ଆବାଆତେରି ଅ଼ଡ଼େ ନା଼ ବାରେ ଦାକା ହୀନାଣି ହେଲା କିତେରି। 31 ଏ଼ଦାଆଁତାକି ଏ଼ୱାରି ଜାହା ଜାହାରା କାମାତି ପା଼ଡ଼େୟି ବେଟାଆ଼ନେରି ଅ଼ଡ଼େ ଜାହା ଜାହାରା ଲାଗେଏ ୱେହ୍‌ନି କାତାତି ବାରେ ପା଼ଡ଼େୟି ବେଟାଆ଼ନେରି। 32 ହାଅ, ବୁଦି ହିଲାଆଗାଟାରି ଏଟ୍‌କା ଜିରୁ ହାନାୟି ଏ଼ୱାରାଇଁ ନା଼ସା କିନେ ଅ଼ଡ଼େ ବୁଦି ହିଲାଆଗାଟାରାଇଁ ତାମି ରା଼ହାଁ ଏ଼ୱାରାଇଁ ନା଼ସା କିନେ। 33 ସାମା ଏମିନି ଲ଼କୁ ନା଼ କାତା ୱେନେସି, ଏ଼ୱାସି ଆଜାଆ ରେଟୁ ବାସା କିନେସି ଅ଼ଡ଼େ କସ୍ତ ବେ଼ଲାତା ଏ଼ନାଆଁ ଅଣ୍‌ପାଆନା ସୁକୁଟି ଡ଼ୟିନେସି।"