1 ଏମିନି ଲ଼କୁ ଅଲେ ଅଲେ ଦାକା ବେଟାଆ଼ତି ଜିକେଏ ଜାହାରା ହେର୍‌କି* ଆ଼ଟ୍‌ୱା କିନେସି, ଏ଼ୱାସି ନେହିଁ ଆ଼ଆନା ଦେବୁଣିଏ ନା଼ସା ଆ଼ନେସି।

2 ଦାର୍ମୁ ଲ଼କୁ ସା଼ଲୱି କିତିସାରେ, ଲ଼କୁ ରା଼ହାଁ କିନେରି; ସାମା ଲାଗେଏ ଲ଼କୁ ସା଼ଲୱି କିତିସାରେ, ଲ଼କୁ ଦୁକୁଟି ଡ଼ୀନେରି।

3 ଆମ୍ବାଆସି ବୁଦିତି ଜୀୱୁ ନ଼ନେସି, ଏ଼ୱାସି ତାମି ଆ଼ବାଇଁ ରା଼ହାଁ କିନେସି; ସାମା ଆମ୍ବାଆସି ଦା଼ରି କାମାତା ଡ଼ୟିନେସି, ଏ଼ୱାସି ତାନି ଦ଼ନ ଊପ୍‌ନେସି।

4 ରାଜା ନେହିଁ ବିଚାରା ତଲେ ଦେ଼ସାତି ସୂସ୍ତି କିନେସି, ସାମା ଆମ୍ବାଆସି ଲା଼ଞ୍ଚା ଜୀୱୁ ନ଼ନେସି, ଏ଼ୱାସି ତାନି ଦେ଼ସାତି ନା଼ସା କିନେସି।

5 ଏମିନି ଲ଼କୁ ତାମି ପା଼ଡ଼ି ଲ଼କୁତି ସାକ୍ରି କାତା ରେ଼ହ୍‌ନେସି, ଏ଼ୱାସି ତାନି ପାଃଆନା ତାକି ପା଼ନ୍ଦା ଅଗିନେସି।

6 ଲାଗେଏ ଲ଼କୁ ତାନି ଦ଼ହତି ପା଼ନ୍ଦାତା ହେର୍‌ନେସି; ସାମା ଦାର୍ମୁଗାଟାଣି ପା଼ଚୁ ରା଼ହାଁ କିନେ।

7 ଦାର୍ମୁଗାଟି ଲ଼କୁ କା଼କୁଲି ଲ଼କୁତି ବାତିମା଼ଲିନି କାତା ପୁନେସି; ସାମା ଏ଼ଦାଆଁ ପୁଞ୍ଜାଲି ତାକି ଲାଗେଏ ଲ଼କୁତି ବୁଦି ହିଲେଏ।

8 ନିନ୍ଦା କିନାରି ଗା଼ଡ଼ାତି ଲ଼କୁଣି ଉସ୍‌କୱି କିନେରି; ସାମା ବୁଦିଗାଟାରି କାର୍‌ବି ସାପି କିନେରି।

9 ବୁଦି ହିଲାଆ ଲ଼କୁ ତଲେ ବୁଦି ଲ଼କୁତି ଦାୱା ଆ଼ତିସାରେ, ଏ଼ୱାସି କାର୍‌ବି ଆ଼ତିହିଁ କି କାକ୍‌ହିହିଁ, ଏମ୍ବାଆଁ ହିତ୍‌ଡ଼ି ଡ଼ୟେଏ।

10 ଲ଼କୁଣି ପା଼ୟିନି ଲ଼କୁ ତୀର୍‌ପୁ ମାଣ୍‌ସିଇଁ ଅ଼ପଅରି; ଇଞ୍ଜାଁ, ଏ଼ୱାରି ସ଼ଜେ ଲ଼କୁତି ଜୀୱୁ ପାରିନେରି।

11 ବୁଦି ହିଲାଆ ଲ଼କୁ ତାନି ବାରେ କାର୍‌ବି ୱେ଼କ୍‌ନେସି; ସାମା ବୁଦିଗାଟାସି ଏ଼ଦାଆଁ ଅ଼ର୍‌ହାଁ ସାପି କିନେସି।

12 ସା଼ଲୱି କିନାସି ଏଚେ଼ତା ମିଚି କାତାତା କିର୍ୟୁଁ ଅଡିନେସି, ଆତିହିଁ ତାନି ତଲେ କାମା କିନାରି ବାରେ ଲାଗେଏତାରି ଆ଼ନେରି।

13 କା଼କୁଲିଗାଟାରି ଅ଼ଡ଼େ ଲାଗେଏ କାମା କିନାରି ରହେଁଏ ଆଣ୍ତିନେରି, ପ୍ରବୁ ଏ଼ ରିଆରି କାନୁତି ଉଜେଡ଼ି କିନେସି।

14 ଏମିନି ରାଜା ମା଼ନି ତଲେ କା଼କୁଲି ଲ଼କୁଣି ବିଚାରା କିନେସି, ଏ଼ୱାଣି ସିଂଗାସାଣି କା଼ଲେଏ ସୂସ୍ତି ତଲେ ଡ଼ୟିନେ।

15 ବାଡ଼୍‌ଗା ଅ଼ଡ଼େ ଦାକା ହୀନାୟି ବୁଦି ହୀନେ; ସାମା କକାଣାଇଁ ତାନି ମ଼ନ ତଲେ ପିସ୍ତିସାରେ, ଏ଼ୱାସି ତାମି ଇୟାନି ଲାଜା ହୀନେସି।

16 ଲାଗେଏତି ଲ଼କୁ ହା଼ରେକା ଆ଼ତିସାରେ, ଲାଗେଏତାୟି ପାଡା ଆ଼ନେ; ସାମା ଦାର୍ମୁଗାଟାରି ଏ଼ୱାରି ନା଼ସା ଆ଼ନାଣି ମେହ୍‌ନେରି।

17 ଜାହାରା ମୀର୍‌ଏଣାଇଁ ସା଼ସ୍ତି ହୀତିସାରେ, ଏ଼ୱାସି ନିଙ୍ଗେ ହିତ୍‌ଡ଼ି ହିୟାନେସି; ଇଞ୍ଜାଁ, ଏ଼ୱାସି ନୀ ଜୀୱୁତି ସୁକୁ ହିୟାନେସି।

18 ଏମିନି ତା଼ଣାତି ଲ଼କୁ ମାହାପୂରୁତି କାତା ମା଼ନୱି ଆ଼ହିହିଲଅରି; ଏମ୍ବାତି ଲ଼କୁ ନା଼ସା ଆ଼ନେରି; ସାମା ଏମିନି ଲ଼କୁ ମେ଼ରାତି ମା଼ନୱି ଆ଼ନେସି, ଏ଼ୱାସି ନେହେଁ।

19 ର଼ ପଦୁତାକିଏ ହ଼ଲେଏସି ଲଂଗଅସି; ଇଚିହିଁ ଏ଼ୱାସି ତେଲ୍‌ହିତି ଜିକେଏ ମ଼ନ ହୀଅସି।

20 ମୀରୁ କି କାତାତା ପାର୍‌ସାଡ଼ା ଲ଼କୁଇଁ ମେସିମାଞ୍ଜି ? ଏ଼ୱାଣି କିହାଁ ବୁଦି ହିଲାଆ କାତାତା ହା଼ରେକା ବା଼ର୍ସୁ ମାନେ।

21 ଆମ୍ବାଆସି ଊଣା ୱେ଼ଡ଼ାଟିଏ ଜାହାରା ହ଼ଲେଏଣାଇଁ ଜୀୱୁ ନ଼ହାଁ ପ଼ହିକିନେସି; ଡା଼ୟୁ ଏ଼ ହ଼ଲେଏସି ତାନି ମୀର୍‌ଏସି ଆ଼ହାଁ ନିଙ୍ଗିନେସି।

22 କାର୍‌ବି ଲ଼କୁ ଗଡ଼୍‌ହା ନିକ୍‌ନେସି, ଇଞ୍ଜାଁ ହା଼ରେକା କାର୍‌ବିଗାଟି ଲ଼କୁ ପା଼ପୁ କିନେସି।

23 ମାଣ୍‌ସିତି ଆଙ୍କାରା ଏ଼ୱାଣାଇଁ ଊଣା କିନେ; ସାମା ଆମ୍ବାଆରି ଜୀୱୁ କ଼ପା ହିଲାଆଗାଟାୟି, ଏ଼ୱାସି ମା଼ନି ବେଟାଆ଼ନେସି।

24 ସ଼ରୁ ତଲେ ଆଣ୍ତିନାସି ଜାହାରା ଜୀୱୁତି ଅ଼ପଅସି, ଏ଼ୱାସି ମା଼ନିକିନି କାତା ଜିକେଏ ୱେନେସି, ସାମା ଏ଼ନାଆଁ ୱେ଼କ୍‌ଅସି।

25 ଲ଼କୁଣି ଆଜିନାୟି ପା଼ନ୍ଦା ସମାନା, ସାମା ଆମ୍ବାଆସି ପ୍ରବୁ ତା଼ଣା ବା଼ର୍ସୁ ଇଟିନେସି, ଏ଼ୱାସି ଗେଲ୍‌ପି ଆ଼ନେସି।

26 ହା଼ରେକା ସା଼ଲୱି କିନାରି ତା଼ଣାଟି କାର୍ମା ବେଟାଆ଼ହାଲି ମ଼ନ କିନେରି ସାମା ମାଣ୍‌ସିତି ବିଚାରା ପ୍ରବୁ ତା଼ଣାଟି ଆ଼ନେ।

27 ଲାଗେଏ କାମା କିନି ଲ଼କୁ ଦାର୍ମୁ ଲ଼କୁତି ଅ଼ପାଆଗାଟାୟି, ଇଞ୍ଜାଁ ସ଼ଜେତି ଜିରୁତା ହାନାୟି ଲାଗେଏ ଲ଼କୁତି ଅ଼ପାଆ କାତା ଆ଼ନେ।