1 ଲମୁୟେଲ ରାଜାତି କାତା, ଇଚିହିଁ, ତାମି ଇୟା ଏ଼ୱାଣାଇଁ ଏ଼ନାଆଁ ଜା଼ପ୍‌ହାମାଚେ, ଏ଼ କାତା।

2 ହେ଼ ନା଼ ମୀର୍‌ଏଣା, ହେ଼ ନା଼ ବାଣ୍ତିତି ମୀର୍‌ଏଣା, ହେ଼ ନା଼ ଆ଼ଞ୍ଜିତି ମୀର୍‌ଏଣା, ନା଼ନୁ ନିଙ୍ଗେ ଏ଼ନାଆଁ ୱେସ୍ତାଇଁ ? 3 ନୀନୁ ଆୟାସିକାକି ନୀ ବା଼ଡ଼୍‌ୟୁ ହୀଆନି, ଇଞ୍ଜାଁ ରାଜାୟାଁ ଏମ୍ବିୟା ନା଼ସା ଆ଼ନେରି, ଏମ୍ବାଆଁ ହାଲାଆନି। 4 ହେ଼ ଲମୁୟେଲ, ରାଜାୟାଁ ଅଙ୍ଗୁରି ରାସା ଗହ୍‌ନାୟି ନେହେଁ ଆ଼ଏ, ରାଜାୟାଁକି ନେହେଁ ଆ଼ଏ; କି କା଼ଡ଼ୁ ଏମ୍ବିୟା ଇଞ୍ଜିଁ ଇନାୟି ସା଼ଲୱି କିନାରାକି ନେହେଁ ଆ଼ଏ। 5 ଏ଼ୱାରି ଗସ୍ତିସାରେ, ମେ଼ରା ବା଼ଣା ଆ଼ହାଁ ଦୁକୁ କା଼କୁଲି ଲ଼କୁତି ବିଚାରା ଏଟ୍‌କା କିନେରି। 6 ହା଼ନି ଲେହେଁତି ଲ଼କୁକି କା଼ଡ଼ୁ ହୀମୁ ଅ଼ଡ଼େ ନିସାରାଗାଟି ଲ଼କୁକି ଅଙ୍ଗୁରିରାସା ହୀମୁ। 7 ଏ଼ୱାସି ଗସାହାଁ ଜାହାରା କା଼କୁଲି ବା଼ଣା ଆ଼ପେସି ଅ଼ଡ଼େ ତାନି ଦୁକୁ ଏ଼ୱାସି ମ଼ନତା ଅଣ୍‌ପାଆପେସି।

8 ଗୁଲା ଲ଼କୁ ୱାକିଟି ଅ଼ଡ଼େ ବାରେ ସାହା ହିଲାଆ ଲ଼କୁ ୱାକିଟି ନୀ ଗୂତି ଏ଼କ୍‌ମୁ। 9 ଗୂତି ଏ଼କ୍‌ହାଁ ସାତାତି ବିଚାରା କିମୁ, ଇଞ୍ଜାଁ, ଦୁକୁ କା଼କୁଲି ଲ଼କୁଣି ନେହେଁ ବିଚାରା କିମୁ।

10 ଗୂଣୁଗାଟି ଆୟା ଆମ୍ବାଆସି ବେଟାଆ଼ହାଲି ଆ଼ଡିନେସି ? ଦାରାଗାଟି ଅପ୍‌ନି ୱାଲି କିହାଁ ତାନି ଦାରା ହା଼ରେକା।

11 ତାନି ଡକ୍ରାତି ହିୟାଁ ତାନି ତା଼ଣା ବା଼ର୍ସୁ କିନେ, ଇଞ୍ଜାଁ, ତାନି ଲା଼ବାତି ଊଣା ଆ଼ଏ।

12 ଏ଼ଦି ନୀଡାମାନି ପାତେକା ଡକ୍ରାତି ଲାଗେଏ କିଆନା ନେହିଁ କିନେ।

13 ଏ଼ଦି ମେ଼ଣ୍ତା ବା଼ଣାୟାଁ ଅ଼ଡ଼େ ମେସ୍ତା* ପାରାହାଁ ରା଼ହାଁଟି ତାନି କେୟୁ ତଲେ କାମା କିନେ।

14 ଏ଼ଦି ବେ଼ବାରା କିନି ଜା଼ଜା ସମାନା; ଏ଼ଦି ହେକ ହେକଟି ତାନି କା଼ଦି ତାନେ।

15 ଏ଼ଦି ୱେ଼ୟାଆମାନାଟିଏ ନିଙ୍ଗିନେ ଅ଼ଡ଼େ ତାନି ଇଲୁ କୁଟମି ବାରେ ତାକି ରା଼ନ୍ଦା ୱାଜିନେ ଅ଼ଡ଼େ ହ଼ଲେଣିସିକାକି ତାମି କାମା ହେର୍‌ପିନେ।

16 ଏ଼ଦି ବୂମିତି କାତା ତେଲ୍‌ହାଁ ଏ଼ଦାଆଁ କଡିନେ, ଏ଼ଦି ତାନି କେୟୁତି କସ୍ତ ତଲେ ଅଙ୍ଗୁରି ବା଼ଡ଼ା ଉହିନେ।

17 ଏ଼ଦି ବା଼ଡ଼୍‌ୟୁ ଆ଼ହାଲି ତାନି ଟେଡେଲି ଜାଟି ଦହ୍‌ନେ ଅ଼ଡ଼େ ତାନି ବାହା ବା଼ଡ଼୍‌ୟୁ କିନେ।

18 ଏ଼ଦି ତାନି ବେ଼ବାରାତି ଲା଼ବା, ଈଦାଆଁ ପୁନେ; ଇଞ୍ଜାଁ, ଲା଼ଆଁୟାଁ ବେ଼ଲାତା ତାନି ଦୀୱଁ ଡୁମ୍ବେଏ।

19 ଏ଼ଦି ତାନି କେୟୁ ତଲେ ଲୂଲୁ ବେଟି ରୂପିନେ ଅ଼ଡ଼େ ତାନି କେୟୁ ତଲେ ହିମ୍ବରିକା ହୁଚିନେ।

20 ଏ଼ଦି ଦୁକୁ ଲ଼କୁ ତାକି ମୁଟି ଦେଚାହାଁ ହୀନେ ଅ଼ଡ଼େ କା଼କୁଲି ଲ଼କୁ ତାକି ତାନି କେୟୁ ଦା଼ହ୍‌ନେ।

21 ଏ଼ଦି ପେଣ୍ତି ରିନି ବେ଼ଲାତା ତାନି ଇଲୁ କୁଟମିତି କାତା ଅଣ୍‌ପେଏ; ଇଚିହିଁ ତାନି ବାରେ ଇଲୁ କୁଟମି ଉସମି ବାସ୍ତେରି ତୁର୍‌ନେରି।

22 ଏ଼ଦି ତାଙ୍ଗେ ତାକି ସିତ୍ରା କା଼ବ୍ରା ପର୍‌ନି ହିମ୍ବରିକା ହୁଚିନେ, ଇଞ୍ଜାଁ ଏ଼ଦି ଦବ୍‌ଲା ପା଼ତାଡ଼ା ହିମ୍ବରିକା ଅ଼ଡ଼େ ହେୟାଁ ୱା଼ଣା ବାସ୍ତେରି ତୁର୍‌ନେ।

23 ତାନି ଡକ୍ରା ଦେ଼ସାତି କାଜାରି ତଲେ ଗା଼ଡ଼ା ଦୁୱେରିତା କୁଗିନି ବେ଼ଲାତା ମା଼ନି ବେଟାଆ଼ନେସି।

24 ଏ଼ଦି ପା଼ତାଡ଼ା ହିମ୍ବରିକା ତିୟାରା କିହାଁ ପା଼ର୍‌ନେ, ଇଞ୍ଜାଁ ବେ଼ବାରା କିନାରା କେୟୁତା ବୁଡ଼୍‌ପାମା଼ଡ଼ା ପା଼ର୍‌ନେ।

25 ବା଼ଡ଼୍‌ୟୁ ଅ଼ଡ଼େ ମା଼ନି ତାନି ବାସ୍ତେରି ସମାନା; ଇଞ୍ଜାଁ ୱା଼ନି ଦିନାତି କାତାତା ଏ଼ଦି ଆଜେଏ।

26 ଏ଼ଦି ବୁଦି ତଲେ ତାନି ଗୂତି ଏ଼କ୍‌ନେ; ତାନି ଗୂତିତା କାର୍ମାତି ମେ଼ରା ଡ଼ୟିନେ।

27 ଏ଼ଦି ତାନି ଇଲୁ କୁଟମିତି ମାଣ୍‌କିତା ମ଼ନ ହୀନେ, ଇଞ୍ଜାଁ ନିସ୍ତା ତଲେ ରା଼ନ୍ଦା ତିନେଏ।

28 ତାନି ମୀର୍‌କା ମା଼ସ୍‌କା ଏ଼ଦାନି ନେହାୟି ନେହାୟି ଇନେରି ଅ଼ଡ଼େ ତାନି ଡକ୍ରା ଜିକେଏ ଇଲେକିହିଁଏ ଏ଼ଦାଣି ଗା଼ୱୁରମି କିନେସି।

29 "ହା଼ରେକା ଆୟାସିକା ଏ଼ ଗୂଣୁ ତ଼ସାମାନୁ, ସାମା ନୀନୁ ଏ଼ୱାସିକା କିହାଁ ହା଼ରେକା ନେହାଁତି।"

30 ତାନି ଅ଼ଜୁତା ମ଼ହ ଆ଼ନାୟି ନା଼ଡ଼ି ଆ଼ନାୟି ଅ଼ଡ଼େ ଅ଼ଜୁ ଉଜେଏତାୟି; ସାମା ଏମିନି ଆୟା ପ୍ରବୁଇଁ ଆଜିନେ, ଏ଼ଦି ଗା଼ୱୁରମି ବେଟାଆ଼ନେ।

31 ତାନି କାମାତି ପା଼ଡ଼େୟି ଏ଼ଦାନାକି ହୀଦୁ, ଇଞ୍ଜାଁ ତାନି କାମା ଗା଼ଡ଼ା ଦୁୱେରିତା ତାନି ଗା଼ୱୁରମି ଆ଼ପେ।