16 Aw sekaten ku adti Ama na padala͡an kamu nan na mag-apitay na magpalna-u kamayu kalyu kanak, aw agad-agadan kamu nan na walaꞌ ya tyamanan. 17 Ya mag-apitay yeiy, yan ya Ispiritu Santo, aw alag matinaw ya paglongun nan. Ya manga utaw na walaꞌ pangintu-u sa Tyumanem diliꞌ nilan mabatug dawaten ya Ispiritu Santo, kay walaꞌ nilan sakanan kita-a aw ka-ede-i. Manang kamu nya-edeꞌ da kanan kay gayed sakanan awun ni kamayu, aw meyaꞌ pa dun ni anenganeng mayu.

18 "Diliꞌ ta kamu pabaya-an kasiling na manga manélu. Kay lumikuꞌ aku saba asini kamayu. 19 Dakman tagbiꞌ ya udas aw diliꞌ da aku na manga utaw kita-en. Manang kamu, kumitaꞌ pa kanak. Aw asuntu na awun ginawa ku na walaꞌ ya katigkasan, kamu uman awun ginawa na walaꞌ ya katigkasan. 20 Yanagaw dun ni allaw na kita-en aku mayu salut, ka-ede-an da mayu na aku awun ni Ama. Aw ka-ede-an mayu uman na nyaka-akup kamu kanak, aw aku awun gayed ni kamayu. 21 Aw ya utaw na dayaw dyumalug sa manga suguꞌ ku, yan ya utaw na tengteng gyuminawa kanak. Aw ya utaw na gyuminawa kanak, ginawa͡an uman na kanaken Ama. Aw maynan uman, ginawa͡an ku sakanan aw bukasan ku adti kanan kun singalan aku pada to-o nan kalabetan."

22 Pagkatigkas yan, nyusip kan Jisus ya sambuk na umagakan nan na pigngalanan na si Judas, bekeꞌ na Judas Iskariyoti. Miglong si Judas, "Kay Magpalna-uway, anangaꞌ oloꞌ kami ya pigpa-edeꞌ mu aw bekeꞌ na kadég na manga utaw?" 23 Aw tyumubag si Jisus kanan, "Pangkay singalan ya gyuminawa kanak, dalugun nan ya palna-u ku. Aw ginawa͡an sakanan na kanak Ama, aw meyaꞌ kami ya Ama ku adti kanan. 24 Manang ya utaw na walaꞌ ya pagginawa kanak, walaꞌ nan uman daluga ya manga palna-u ku. Aw ya pigpalna-u ku na pigdengeg mayu, walaꞌ lekat adti kanak manang lekat adti Ama na migpadala kanak.

25 "Piglong ku yeiy kamayu talana ini pa aku ni tampid mayu. 26 Manang ya mag-apitay na un padala na Ama dun ni kanak ngalan, yan ya Ispiritu Santo na un magpalna-u aw magpa-anenganeng kamayu sa kadég na piglong ku.