Lucas 10

30 Aw tyumubag si Jisus magi sa pundinganan, "Awun sambuk na utaw na Judiyu na tyumubang lekat adti Jérusalim na migpasinan adti Jériko. Talana nan nyanaw, byanganan sakanan na manga mangkatakaw. Pigluwasan nilan sa kadégkadég aw pyangamang nilan ya manga pametang nan. Aw tigkas yan, pigbadasan nilan pyamunalan aw pig-ayawan nilan na dakman tag sambuk ya ginawa. 31 Yan uman na udas, nyaka-agi dun ya sambuk na magdadugsu-ay na lekat adti Témplo na Tyumanem. Sa pagkitaꞌ nan sa utaw na nyakakulang adti kilid na dalan, pig-aliwes nan baling aw nyagi adti sangkilid na dalan. 32 Maynan uman ya sambuk na buwadbuwad ni Libi na magtabang sa imo-unun adti Témplo. Sa pagkitaꞌ nan sa utaw na nyakakulang dun ni kilid na dalan, pig-aliwes nan uman. 33 Manang awun uman sambuk na utaw na Samariyanen*10:33 Ya manga Samariyanen, bekeꞌ silan na tengteng utaw na Judiyu, kay asini muna migpan-ikamangay ya manga Héntil aw ya manga Judiyu, aw ya buwadbuwad nilan nya-imoꞌ manga Samariyanen. Yanagaw ya manga Judiyu diliꞌ silan magkalim pagsambukan na manga Samariyanen. na nyaka-agi dun ni dalan. Aw sa pagkitaꞌ nan sa utaw na nyakakulang, to-o sakanan nyallat. 34 Yanagaw, pigdulud nan ya utaw aw pigbulung nan. Pig-asagan nan na bino aw lana ya manga paliꞌ aw dayaw nan bedbedi. Tigkas yan, syagupu nan aw pigpasakay adti kanan asnu aw pigdala nan adti balay na bantukanan aw to-o nan pigdiyaga͡an. 35 Pagkasalut da na allaw, pig-atagan nan ya tagtun sa balay na duwangka dinariyo ya kuwalta aw law nan, ‘Dayaw kanak diyagayi ya utaw ini. Aw kun diliꞌ pa maka-umbaꞌ ya pigbayad ku kanmu, sa paglikuꞌ ku asini dugangan da ku.’ "

36 Pagkatigkas ni Jisus maglong sa pundinganan, pig-usip nan ya magpalna-uway sa Uldin, "Na, dun ni kanmu anenganeng, ayin sa tulu kanilan ya tengteng mig-imoꞌ sa pag-imo-un na sumbalay nan?" 37 Aw tyumubag ya magpalna-uway, "Ya idtu na nyallat kanan." Aw miglong si Jisus, "Yanagaw, imo-a uman ya maynan."