Lucas 5

Ya pagtawag ni Jisus sa manga mangisda-ay

1 Na, sambuk na allaw, nyindeg si Jisus adti baklayan na Danaw na Génésarét na migpalna-u sa manga utaw, aw mig-insekay silan migpalapit adti kanan kay kaliman nilan magpakanyeg sa tingeg na Tyumanem. 2 Aw kyinitaꞌ ni Jisus ya duwa ya balangay adti ligad na danaw, manang ya manga mangisda-ay, nyanog pa silan pada mag-ugas sa kanilan manga pukut. 3 Na, ya sambuk na balangay si Simon ya tagtun. Yanagaw nyanik dun si Jisus, aw piglongan nan si Simon na tulud tagbiꞌ ya balangay lekat adti ligad. Aw nyingkud si Jisus dun ni balangay aw pigpalna-uwan nan ya manga utaw.

4 Pagkatigkas da nan magpalna-u, piglongan nan si Simon, "Pagpalawud kamu aw tontona mayu ya manga pukut pada makakamang kamu sa isdaꞌ." 5 Aw tyumubag si Simon, "Kay Magpalna-uway, sanggabi pa nami ya nyamukut aw walaꞌ ya nyakamang nami! Manang asuntu na ikaw ya miglong kanami, tontonun pa nami uman salut ya manga pukut." 6 Sa pagtonton da nilan sa kanilan manga pukut, madég to-o ya manga isdaꞌ na nyakamang nilan, aw nyangkakéséꞌ da galu ya kanilan manga pukut. 7 Yanagaw pigkapay nilan ya manga eped nilan adti sambuk na balangay pada tumabang kanilan. Aw migpalapit ya manga eped nilan aw pig-atmuꞌ nilan na isdaꞌ ya duwa ya balangay aw agpet da galu malened asuntu sa kadég na nyakamang nilan. 8 Pagkitaꞌ ni Simon sa nya-imoꞌ yeiy, lyumuhud sakanan dun ni asdangan ni Jisus aw piglongan nan, "Kay Magpalna-uway, pagpa-awat kaw beg kanakeꞌ kay makasasalaꞌ aku!" 9 Piglong yeiy ni Simon kay nya-enneng-enneng sakanan aw ya kanan manga eped asuntu sa kadég na isdaꞌ na nyakamang nilan. 10 Aw ya manga eped ni Simon na si Santiago aw si Juan na alag mangayseꞌ ni Zibidiyo, nya-enneng-enneng uman silan. Aw miglong si Jisus kan Simon, "Diliꞌ kaw magkallek. Lekat adun imo-un da ta kaw mangisda-ay sa manga utaw." 11 Pagkatigkas yan, pigguyud nilan ya kanilan manga balangay adti ligad na danaw aw pig-ayawan nilan ya kadég aw nyagad silan kan Jisus.