11 Ndizo ke, saku tiziba kuti ini hla He, totetedza banhu; koga tjatili itjo tjozibgwa neNdzimu, kakale ndogalabgwe kuti namwi bo tjatili itjo motjiziba muhana dzenyu. 12 Atitozwikudza kumuli kakale, koga tomuzibisa tjinothama mukazwida nekwedu, kuyetila kuti mutubule handula ibabo banozwiloba fuba nekwemamo enhu kusi nekwemoyo uwe. 13 Hapa tilahikigwa nenkumbulo, ndekweNdzimu; hapa mikumbulo yedu yakatambunuka, kobhatsha imwi. 14 Kana ludo gwaKhirisitu gotilawula, ngobe tokubvuma kuti un’ompela wakafila bose; ndizo kobva kuti bose bakafa. 15 Kakale wakafila banhu bose, kudze ibabo banotjila basitjazwitjilile koga batjilile iye wakabafila akamusiwa kakale.

16 Kubvisila ngwenuwali, ndizo ke, akuna watitjaziba ngehhiho lenyama; nekene takatongoziba Khirisitu ngehhiho lenyama, akuzotjajalo. 17 Ndizo ke, hapa umwe eli muna Khirisitu, watjibe mbumbiko ndzwa; whulukugwi yatjipinda, lingani, ndzwa yatjihha. 18 Kose ikoku kobva kuNdzimu, iye wakati bgwililulanya naye ehingisa Khirisitu kakale akatipa n’hingo webgwililulanya; 19 kubva kuti, muna Khirisitu Ndzimu waka ebgwililulanya hango kuwunli, asingababalile matjinyo abo, kakale wakatipa ngekutigalabgwe ndebo webgwililulanya.

20 Ndizo tibamilili baKhirisitu, Ndzimu eta tjikumbilo tjitje ehingisa iswi. Tomukumbilisisa muzina laKhirisitu, bgwililulanyiwani kuNdzimu. 21 Ngentha yedu wakawunthama akaba jinyo iye waka asingazibe jinyo, kuyetila kuti muwunli tingaba bakalulama beNdzimu.