Atos 2

Bituru nyanwanɛ

14 Bituru yulapa a gãsi jashɔnɛyini kopi a tu gbete a gaa mooyi nyanwarinɛrɛ a gãgãni a shanɛː <<Mazɔ̃ Yadawayi a shɔ gbeteyi ɔ̃nɛ a Urushalimayɛ, ɔ wesho pɛ ang nya ɔ nta vigbete n gelɔɔ pɛ.>> 15 Shɔmiyi ɓa mii rii yuurɛ ɓa, ɓa nagbete ɔ pɔ̃ aa sisɨnyɛ ɓa; dɔdɔrim gadi dɔɔɗa gɨnnɛ ntatɛ mannɛɛ sheeli. 16 Shɔmpɛ, vigbete janyagadi Joyeli nwanya au yuuni shanɛ: 17 A lee gbete dii yɛ sɔ̃nyayɛ, Ɗalapa shanɛː

N yɛn tɛ̃ɛ̃riyi ko ko-piya n Suru tɔ.

Mɛjaayi vɔshɔyi a soroyini i yɛ geli shɔ vi gbete n geliyi n-tɛ i shayɛtɔ;

A jakasayi i yɛ zɛ vitɔ a nɔrinɛni, wɔsɔ̃n a shɔpẽniyi i yɛ nɔritɔ. 18 Ko n jawɛrɛyi, vɔshɔyi a soroyini,

N yɛn tɛ̃ɛriyi n Suru tɔ a leeuni,

ai yɛ nwan ruubiitɔ.

19 N yɛn pɛli vibiizaanɛyi a kunyasi lapa

a vitasinɛyini a kootipi.

Kpaa yɛ ɔ̃tɔ, a yaani, wɔsɔ̃n zɨnri ɓiti-ɓitini;

20 Ɗalapa yɛ pɔ̃rɛ ɗaa yɛ tonya ɓa, a shɛlɛni yɛ rii naa kpaa,

vim yɛ pɛlipɛtɔ Uɓeyelapa dii bassinɛ ɓɛɛ anɛ. 21 Kɛɗɔn, shɔu gbete kɛ ɓaanyanɛ a Uɓeyelapa bi nɛu pɔ̃sinnaa yɛ raautɔ.

22 Ɔ wesho a ruum, n shɔbiiyi shɔ Israila! Yesɔ shɔ Nazara ukɔ ɔ̃rɛ shɔ gbete Ɗalapa tasɔɔ u kaka suru wasa-wasa yɛ, a nyaba vibiizaanɛ a vitasinɛni gbete Ɗalapa pɛli awɔ ɗɔbii au kabiiyɛ. Ɔ yuu ɔ zɛ vim tɛttɔ, aruviya pɛli ji awɔ tetemkɔ. 23 Ji nagbete Ɗalapa kasiu vipɛlinɛyɛ pɔ̃ tɛttɔ gboti au sisɨnɛ yɛ ãwɔ Yesɔ tɔ; awɔ yɛ pɔ̃ shɔruuviniyi i nyourɛ a nyaba naɓaanɛlaa. 24 Ama Ɗalapa kaka kaliu naarɛ a yusiu a suruni, aruviya yɛ pɛli ɓa vɔrɔ yɛ sã ɓa u ɔ̃ naa shɔ jaahm ɓa. 25 Dauda sha au yuunɛ:

N zɛ Uɓeyelapa kopiɗaviya ang ɗekɨn;

u a nkɔni ɗɔɔli, n yɛn yɔriyuu ɓa.

26 Arumkɔ n nta sisɨn purutɛ fɛ̃ɛm,

n nya a ɗɔ soo sisɨn puru tɔ̃nɛ fɛ̃ɛm.

n yɛn ɔ̃ atette sisɨn pɔ̃nɛ a Ɗa bi,

27 aruviya a yɛ yamɓa a kootipi shɔ gbete vɔtɔm ɓa,

a yɛ yaa jagbete tɔ̃vɨn ɓa u suru u pmrɛ a sàà ni ɓa.

28 A tasin nyaba gbete n ti suru tɛttɔ,

a ɔ̃nɛ a nkɔni yɛ pɔ̃nrɛ n ɔ̃ atette yɛti puruni. 29 N-shɔbiiyi shɔ Isireila, ɔ̃rintɛ kaka jazɨng akɔrɔ n nwarɔɔ nyatɔ ɓa tete ɓusinɛ ɓa, ayuu u ɓɛuru Dauda, Vɔrɛ shɔ gbãrɛ, u yusàà doo au ɗɔbiim 30 U si janyagadi, zɛ vigbete Ɗalapa ma a wuniyɛ tɛttɔ: Ɗalapa tee tɛttɔ nɛn yɛ pɔ̃ shɔzɛ gbete u ɔ̃ kpati a Dauda laduru, nagbete Dauda u si jiyɛ. 31 Dauda zɛ vigbete Ɗalapa yɛ pɛli a ɗekɨn, kɛɗɔn nwanya aru shɔshɔraanɛ yunɛ a sàà a shanɛ:

<<Ɗalapa ji yau ɓa a sàà ni ɓa;

u bi ji pm ɓa sàà ni ɓa.>> 32 Ɗalapa yuusi Yesɔm lapatɛ a suruni, u kpai ukɔ ɔ̃rɛ shɔ shinɛ akɨnti a rumni. 33 Ɗalapa yusiurɛ au pɔu au ka nakɨn, pɛ Ɓeye, tɛ Ɗa Suru tɛttɔ au ɗɔbii, ji nagbete ma siyɛ. Vigbete ɔ zɛ dɔdɔrim a vigbete ɔ ntayɛni pɛjiu vi ãnɛkɔ au tẽẽriu Ɗa suru ɓa bim. 34 Ɓa Dauda kɔ gẽ kolaparɛ ɓa; ama au yuu shanɛ,

<<Ɗalapa Uɓeyelapa gelin Uɓeyelapanɛ:

Ɔ̃ yɛm ang nakɨn

35 setɛ n pɔ̃ a shɔnopɔ̃yitɛ aa tɛlidɔɔ.>> 36 <<Aru nankɔ shɔ Israila kpai, i zɛkɛkɨn nɛ, Yesɔ gbete ai ɓau nalaam, ukɔ ɔ̃rɛ shɔ gbete Ɗalapa pɔ̃rɛ nɛu ɔ̃ Uɓeyelapa a shɔ shɔraanɛni!>> 37 Naa shɔ nta vimtɛ, ɓai a sisɨn gbikiri-gbikiri ai geli Bituru a jashonɛ gãsiyini nɛ, <<Nshɔbiiyi u yɛ pɛlikɛpikoviya?>> 38 Bituru geliyinɛ, <<Kopiya awɔ tete ɔ̃riutɛ kaka jazɨng akɔrɔ ɔ kɔsi sisɨn ɔ yaa ruuvini pɛlinɛtɔ, shɔu pɛlɔɔ Batizima a Yesɔ Kirisi nii, nɔ gbete Ɗalapa yɛ yasɔɔ ruuvini kɛkn; ɔ yɛ tɛ Ɗalapa vi ãnɛtɔ, Ɗa Suru. 39 Ɗalapa ruu mana ji awɔ yuukɔ a mɛjayini, a shɔ gbete i kpɛlɛni kpai, shɔ gbeteyi Uɓeyelapa u Ɗalapa ɓai nya anɛ u ɗɔbii kpai.>>

40 Bituru gɔ̃yi yusho, a geliyi ruu fɛ̃ɛm; a gakiyi rɛ shanɛ, <<Ɔ rawɔɔ yuutɔ a yukɔnɛ gbete kaanɛ jakɨntimiyiniǃ>> 41 Kɛɗɔn shɔzɛ waanɛ i ã sisɨnrɛ au ruuni, shɔ pɛliyi Batizima rɛ, a leeu shɔzɛ si mɛnɛ laa ziti atu kopi ɓa taati shɔ ɓasirɛ a kn shɔ gbeteyi gɨn Ɗalapa yɛ.