1 A kɨntiu naa bawaanɛ yisinyatɛ, Bulus ɓaa Yesɔ jaɗɔɔyi nya a roori sisɨnrɛ, kɛɗɔn a yairɛ yɛkɛ Makidoniya. 2 Raki a tipiu kpai u a ɗɔgbete nwari shɔ Ɗa nyaruubii, kɛɗɔn a to tipi Girisi rɛ. 3 A ɔ̃ a tipiu kɔ shɛllɛ taati. Usi ɗɔbii mannɛ nɛn to latosi yɛnɛ tipi suriya. kɛɗɔn naa zɛtɛ Yahudawayi i maruu kɔ̃linɛtɛ au yuu; a kɔsi nyabarɛ yɛnɛ tipi Makidoniya. 4 Sufata ɓɛɛ jaa Faru a Biriya, i yɛ awuni; a Aristaku a Sakundu, shɔ Tasalonika, a Gayu gbete shɛ a Dabi; a Taikiku a Tarofimu, shɔ Asiyayi, wɔsɔ̃n Timoti i dɔ̃u dɔɔ rɛ. 5 I yɛ a ɗekɨn, i gau kɛ a Toruwa. 6 Ama u yurɛ a latosi a Filipi, akɨnti yumusinɛ borodi gbete yisiti ɓa ɗɔmɓayɛ, kɛɗɔn akɨnti dii maani u kpaayi kɛkn a Toruwa, a ɗɔwakɔ u ɔ̃ dii maanzii.

7 Alee susunɛ a darɛ u toli nya a ɗɔzɔɔ, aru vishaanɛ binyatɔ̃nɛ a zɔni. Kɛɗɔn Bulus nwariyi shɔ nyarɛ yɛnɛ tete zɨmba, aru gbete a dii ɓuru yɛ yaikɛtɔ. 8 Si Pitila aɗɔn waanɛ a wɛrɛ gbete shɔ maa wɔɔ au yuuni yɛ, a ɗɔgbete u si ɔ̃ yɛni. 9 Jakasa wɔɔ si a ɗɔuni u niinɛ Yutiku u si ɗɔ ɔ̃nɛ a shojàá, Aɗagbete Bulus u ɗɔgbeteu yɛ ɗekɨn a nyanwanɛniyɛ, noroo pɛli Yutikurɛ waanɛ, kɛɗɔn noroo seurɛ a nweserɛ a shojaa au shɔ maa wɔɔ au yuu taati, shɔ turɛ si vɔtɛ. 10 Ama Bulus noorɛ a sɔ̃sirɛ a kɔ̃tiu jaau naa bi, a shanɛ, <<Ɔkɔɔ yɔri yuunɛ u doo a suruniǃ>> 11 Kɛɗɔn a sɔɔ jaa gbete shɔ maa wɔɔ a lapaurɛ, a dali borodi rɛ shaarɛ. Akɨnti gbete Bulus nwanyatɛ ayini dɔkɔkɔ yɛ, dii kaarɛ a yaa ɗourɛ. 12 Shɔ tuu jakasaurɛ a suruni yɛnɛ wɛrɛ, i nta sisɨn purutɔ waanɛ.

13 Bulus rarɛ a tipi a yɛ komoo shɔ ɓaanɛ Asu, ɗɔ gbete kasiyɛ nɛ shɔ kpang aɗɔnyɛ nɛ shɔu tuurɛ, kɛɗɔn u to latosirɛ a yɛ ɗɔurɛ au to ɗɔurɛ u yau knti. 14 Naa Bulus kpautɛ a Asu, u turɛ a latosi yɛnɛ Militu. 15 Aɗɔwakɔ u yɛ dekɨn a ranɛni a latosi. Adii gadi u shɛrɛ a tipi Kiyo. Adii gadi wɔɔ u shɛ sɔ̃n a tipi Samo, adii gadi wɔɔ tot, u shɛ sɔ̃n a tipi Militu. 16 Si Bulus ji pɔ̃ sisɨn ɓa nɛn yɛ noo a tipi Afisa ɓa, aru nɛn yisi ɗarɛ a tipi Asiya. Nɛsirɛ au sisɨn nɛkɛ pɛlinɛtɔ nɛn kasi Urushalima tonɛ, a lee pentakos.

17 A Militu Bulus sho nya yɛnɛ Afisa, nɛ shɔ ɓaarin shɔpẽniyi ai sisɨn ãnɛ aɗɔn a Ɗabii nɛi kpaantɔ. 18 Naa i totɛ au Bulus ɗɔbi a geliyi nɛ, Ɔ zɛ tɛttɔ nɔgbete n nyo dii nɗɔ ɔ̃nɛ a ɔkɔɔni kpai, sãnɛ dii gbete n to tipi Asiya yɛ. 19 N bassi Uɓeyelapatɔ a yuroorinɛni a muruni waanɛ, n pɛli n vishonɛ naa Uɓeyelapa jawɛrɛ, a vikɔ̃linɛ gbete gãsi Yahudawayi marɛ ang yuu n shi tɔ adɔɔ kaziti aru tari gbete i ɗasɨnɛyɛ. 20 Ɔ zɛ tɛttɔ n ji ɓusɔɔ vigbete tɔ̃vɨn geli ɓa, a ɗagbete n nwarɔɔ Ɗa nyaruubii n matɔɔ vi a ɓili ko wɛrɛ- wɛrɛ. 21 N nwari shɔ yahudawa a shɔ gbeteyi ɓa yahudawa ɓa nyatɔ kpai aru i yaa ruuvini pɛlinɛtɔ i a Ɗa ɗɔbii, i ã sisɨn au Uɓyelapa Yesu nii. 22 Dɔdɔrim n gɨn vigbete Ɗa suru ãsin-nyayɛ, n yɛkɛ Urushalima, n ji zɛ vigbete yɛ kpang a ɗɔwani ɓa. 23 Ama n zɛ tɛtɔ a komoo pɛ̃niba gbete n rakiyɛ kpai Ɗa suru gelin nɛ, jaahɨm a raɓoonɛ ni a ɗɔgbete gaan yɛ. 24 Ama n ji tun suru ɓa naa viwɔ ɓa; vigbete n kasi dɔdɔrim sheeli, ukɔ ɔ̃rɛ n yisinya vishonɛ gbete Uɓeyelapa Yesu ãng nɛn pɛliyɛ, wɔsɔ̃n n tasi shɔ ruu tɔ̃vɨn aru Ɗalapa tɔ̃vɨn pɛlinɛ. 25 <<N raki tɛttɔ awɔ tetteni kpai, n ɗɔgbete n nwarɔɔ ruu Ɗa kpati roonɛ. A dɔdɔrim n zɛtɛ shɔ wɔɔ yɛ zɛn toti awɔ tetteni ɓa. 26 Aru nankɔ nɛm gelɔɔtɛ: Shɔ wɔɔ kɛ niinɛ awɔ tetem, n naa ɓa ɗɔmɓa. 27 Aru ɔ kpai n nwarɔɔ nya tɛttɔ aru Ɗa ruubiini.>> 28 Ɔ Kɔyuutɔ awɔ jàà vivaani gbete Ɗa suru ãwɔ yɛ nɛu ɔ̃ awɔ nɔsisɨn, ɔ ɔ̃kɛ jagamɛrɛ shɔ gbeteyi ãsisɨn a Ɗa biiyɛ, gbete au woo a ɓɛɛ jaa kpaayɛ. 29 N zɛtɛ naa nkɛ yaa ɗɔnnɛ, shɔ kɔ̃linɛyi i yɛ towɔ tetetɔ, ama i yɛ yawɔɔ tetteu sɔ̃n ɓa. 30 Ɗaa kaanɛ shɔ gãsiyi awɔ tete i yurɛ a yelinya aru i ɗaki shɔ gbeteyi ãsisɨn i gɨnrɛ. 31 Ɔ shi dɔɔ kaziti, ɔ kpaa sisɨntɔ, saa taati n ɗɔ muru tɛ̃ɛ̃nɛ zɨmba a niti ni, n mati kopiya vi tɛttɔ.

32 Dɔdɔrim n ãwɔtɛ a Ɗa naa, au ruu tɔ̃vɨn pɛlinɛni, gbete yɛ pɔ̃rɛ ɔ sisɨn ãnɛ u barɛ u awɔ Ɗa vɔɔ susãri tasinɛ abi, shɔgbete Ɗalapa ãu shɔbiiyi kpai yɛ. 33 N ji pɔ̃ sisɨn ɓa a shɔ wɔɔ saa ko fãrã biini ɓa 34 Ɔ zɛ tɛttɔ nɛ, n pɛli vishonɛ ang naa n kpari n yuu vigbete n kasiyɛ ang shɔ dɔranɛyini kpai 35 N tasɔɔ a vim tɛttɔ kpai, ɔ̃tɛ kaka jazɨng akɔrɔ u pɔ̃si shɔ gbeteyi kaka vishonɛ ɓayɛ naatɔ, ɔ kpaa sisɨntɔ aru gbete Uɓeyelapa Yesu au yuu shayɛ nɛ, <<Shɔ gbeteyi ã shɔ vi Ɗa tasiyi susãritɔ bi fɛ̃ɛ̃m u tɛɛ shɔ gbeteyi viyɛtɔ.>>

36 Naa Bulus yisi nyanwanɛtɛ a ta a yugboti a gaki Ɗarɛ ayini. 37 Kɛɗɔn kopiya sɨnɛrɛ waanɛ, i kɔ̃ti Bulus naarɛ abi i vasiu-nyarɛ. 38 I kpai i sisɨn lɛsitɔ waanɛ aru gbete geliyinɛ i zɛu tokɨn ɓa dangdang. Kɛɗɔn i dɔ̃u dɔɔ rɛ yɛnɛ ɓuzɨn latosi.