Lucas 19

Jezu gâ ndə Zashe

1 Alɔ ə̂në Jezu lî gâ lə gala Jerikɔ nə kɔ, tshə sə̂ kə ro lə gala nə. 2 Ə̈bə̈ koshe sə̂ je ə̂në əɨrɨ ye kə də̂ Zashe ə̂në tshə sə̂ tə âgbɔ̂ əzü nə̂ aaworɔ ngendja lapɔ ə sə tə əyïrishi kɔ. 3 Tshə prâ äwä ndə kə wu ə pa Jezu sə tə əde. Äwä ndə kə wu ətshə gûta gû ne mbrə ə̂kpû azü nə, mbrə ə̂në Zashe sə̂ tə ə̈ndö əzü. 4 Tshə kpê mâ ətshinə ə ô gâ lə ə̈bə̈ ayɔ ə̂në əndje djî əɨrɨ nə sikɔmɔrə kɔ, mbrə ə̂në Jezu sə kə ro tə̂ äwä səkɔ. 5 Alɔ ə̂në Jezu wûtu gâ tə̂ ətshe səkɔ, tshə lîshi gâ lafɔ ə pâ kə ətshə ə pa: «Zashe, jërə katshä! Mbrə ə̂në kpəsəye, mə sə kə sho mâ lə anda nə̂ zə.»

6 Zashe nə jêrə katshä ə wə̂ra ətshə də ə̂rû tə̂ lɔsu ye. 7 Azü nɔ̂ ə̂në əndje wû aərə səkɔ, əndje pâ tə̂ Jezu nə ə pa: «Jezu nâ ə shô mâ ndə ə̈bə̈ əyïnyaka!»

8 Bale, Zashe nə kâ gâ lafɔ ə pâ kə Âgbɔ̂ Əyïngerə nə ə pa: «Âgbɔ̂ Əyïngerə, mə sə kə kru tshelə aərə nə̂ əmə kpə ə̂grû nə ə ko ə̈bə̈ nə kə alayïəyo. Kədə mə kô ngendja nə̂ ə̈bə̈ əzü tə̂ äwä əterə, mə sə kə ko əndʉ nə kə ətshə äwä vəna.» 9 Bale, Jezu pâ kə ətshə ə pa: «Kpəsəye, Ndjapä she azü tshelə anda səye gâ ye, mbrə ə̂në Zashe sə ndje tə ə̈bə̈ ätä Abraamo. 10 Mbrə ə̂në Əgblə nə̂ Əzü nâ ndə kə pra azü ə̂në əndje yû gâ ye kɔ ndə kə tshɔ əndje lə kuzu.»