1 Sandaga mapa ə̂në əndje mâ mâ də əyï nə ne kɔ, ə̂në əndje djî əɨrɨ nə ə pa Pakə kɔ ndô trö. 2 Aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə sə̂ kə pra äwä ndə kə wo Jezu, mbrə ə̂në əndje mâ awa azü əgɔ nə ə mâ. 3 Kandää, Sataa lî gâ lə Judasə ə̂në əndje ê ətshə ə pa Isəkariɔtə kɔ, ə̈bə̈ əzü-awla bale lə takpa tə̂ əndje morofo amanə bishi nə. 4 Judasə nə nâ ə djî tə̂ ye də aâgbɔ̂ azü nə̂ aawotokrɔ nə də akapita nə̂ atrugu gâ pâ äwä ə̂në tshə sə kə ka də Jezu nə kə əndje kɔ. 5 Tshelə əndje mɔ̂ â əndje yîndə nə ndə kə ko ngendja kə ətshə. 6 Judasə nə yîndə nə kə əndje â sə̂ kə pra ə̈bə̈ ə̂rɔ̂ äwä ndə kə ka Jezu kə əndje ndə kə pa azü nə wusə̂ nə wu ne.

7 Əlo sandaga mapa ə̂në əndje mâ mâ də əyï nə ne kɔ lî gâ ye. Tə̂ əlo nə səkɔ, ə lî ndə əndje wo andalimi ndə kə mbrə də sandaga Pakə nə. 8 Jezu wlâ a-Piarə də Zââ ə pâ kə əndje ə pa: «E nä ə gämba rəgo Pakə nə ndə kə pa a zɨ.» 9 Əndje yû ətshə ə pa: «Bə yində nə ə pa ä gamba rəgo Pakə nə mâta a?» 10 Tshə kîrə əpʉ kə əndje ə pa: «Alɔ ə̂në e yi kumu e gâ lə gala nə, e sə kə te ə̈bə̈ koshe ə̂në tshə zâ ləsû ə̂ngû gâ lə kumu ye. E zä äwä ye ndjɔ mâ lə anda ə̂në tshə sə kə li gâ lə nə kɔ, 11 e pä kə əyïnga anda nə ə pa: "Awoyisə̂ ərə yu əbə ə pa tshelə anda ə̂në əmə də atrawaya nə̂ əmə sə kə zɨ rəgo Pakə lə nə kɔ sə kotâ a?" 12 Tshə sə kə yisə̂ ə̈bə̈ əgerə tshelə anda kə e djoko lafɔ ə̂në əndje gâmba agbarə gâ lə nə nɔ̂ gâ ye kɔ. Kôto də̂ e sə kə gamba rəgo Pakə nə.» 13 Əndje nâ ə sɔ̂tə̂ aərə nə Lïndə̂ əpʉ ə̂në tshə pâ kə əndje kɔ â gâmba rəgo Pakə nə.

14 Ə̂në alɔ kə zɨ rəgo nə lî gâ ye kɔ, Jezu vɔ̂tə̂ kə zɨ rəgo äwä bale də azü-awla nə̂ ye nə. 15 Tshə pâ kə əndje ə pa: «Əgo ndə kə pa mə zɨ rəgo Pakə səye də e mi əmə wââ angbʉlînə ndə kə pa mə wu əyo. 16 Mbrə ə̂në, mə pa kə e, mə sə sə kə kwatə̂mə ə zɨ nə ne ʉrrr tshelə âdâ rəgo Pakə nə sə kə wutu nə lə Əgɔngerə nə̂ Ndjapä gâ ye kane.»

17 Mandânə, tshə zâ kopo duva ə zâ mərshe kə Ndjapä ə pâ: «E zä kopo səye ə krü tshelə nə lə takpa tə̂ e. 18 Mbrə ə̂në, mə pa kə e, mə sə sə kə ndju kwatə̂mə ə̂ngû ə̂lê ayɔ vinyə mandânə səye ne ʉrrr Əgɔngerə nə̂ Ndjapä ə wutu gâ ye kane.»

19 Mandânə, tshə zâ mapa ə zâ mərshe kə Ndjapä ə ngɔ̂ tshelə nə ə kô kə əndje ə pâ: «Ə sə tə tshekotə̂ əmə ə̂në mə zâ mbrə e. E mbrə̈ ərə səye ndə kə pa e li tshelə e tə̂ əmə.»

20 Äwä bale ndje, mandâ rəgo nə, tshə zâ kopo duva ə pâ: «Kopo səye sə tə tafa mbʉkʉ tə̂ äwä ə̈ndjï əmə ə̂në ə tû mbrə e. 21 Bale, e wü-a: əzü ə̂në tshə sə kə ka əmə kɔ, tshə sə kotəye ä də ətshə kə zɨ rəgo nə kɔ. 22 Djatra əpʉ, Əgblə nə̂ Əzü sə kə tshu nə mata ə̂në Ndjapä yîndə nə gâ ye kɔ, bale, əyo gâ pâ əzü nə ə̂në tshə sə kə ka ətshə kɔ.»

23 Bale, əndje vɔ̂tə̂ kə yu tə̂ əndje lə takpa tə̂ əndje gâ pâ əzü nə ə̂në tshə sə kə ma marä tə̂ ərə rəkɔ.

24 Atrawaya nə vɔ̂tə̂ kə pa ashera tə bandanə ndə kə wu əzü ə̂në tshə sə tə âgbɔ̂ əzü lə takpa tə̂ əndje nɔ̂ kɔ. 25 Jezu pâ kə əndje ə pa: «Alayïngerə aəgɔ sə kə gi əyo tə̂ azü ə̂në əndje sə gâ pâ əndje kɔ. Əgbro azü əgɔ yində nə ə pa azü e alane tə aawombrə aə̂rɔ̂ aərə kə azü. 26 E lï lï ndə kə ma marä tə̂ ərə rə lə takpa tə̂ e ne. Bale, əzü ə̂në tshə sə tə əgerə əzü lə takpa tə̂ e lï ndə kə mbrə tə̂ ye tə əngʉ əzü. Ətshə ə̂në tshə sə gâ pâ azü, tshə sə mata əyïkosəra. 27 Ənə̂ e, əde kə sə tə âgbɔ̂ əzü? Əzü ə̂në tshə sə gâ tʉ ə sə kə zɨ rəgo wala ətshə ə̂në tshə sə kə ko rəgo nə kə əzü nə kɔ a? Ə də̂ ətshə nə ə̂në tshə sə gâ tʉ ə sə kə zɨ rəgo nə kɔ də̂ ne a? Bale, ənə̂ əmə, mə sə lə takpa tə̂ e mata əyïkosəra. 28 E-e, e kânga tshelə e ə daka pə gâ ngotə̂ əmə alɔnɔ̂ lə aərə əyo nə̂ əmə. 29 Âdârə ə̂në mə za Əgɔngerə kə e mata ə̂në Abä əmə zâ kə əmə gâ ye kɔ, 30 ndə kə pa a də a-e zɨ ərə ə ndju ərə lə Əgɔngerə nə̂ əmə, e sə kə sə gâ pâ ambata ngerə ndə kə wa ngbanga gâ lə kumu amarä morofo amanə bishi nə̂ əgɔ Isərayalə.»

31 Mandânə, Âgbɔ̂ Əyïngerə nə pâ: «Shemɔ, Shemɔ! Ala zə në, Sataa yû tshuku äwä ndə kə pa tshə pe tshelə e mata ə̂në əndje sə kə pe tshelə ə̂lê rəgo kɔ. 32 Bale, mə yû Ndjapä mbrə əbə gâ ye ndə kə pa lɔsu zə te te ne. Bale, alɔ ə̂në bə do tə̂ zə ə gu gâ ndə əmə gâ ye, mbrə ndə kə pa lɔsu alaye zə gbɔgbɔ tə̂ ye.» 33 Piarə nə pâ kə ətshə ə pa: «Âgbɔ̂ Əyïngerə, mə sə trö ndə kə li anda kânga gâ ndə zə, a də aəmə ə tshu.» 34 Jezu pâ kə ətshə ə pa: «Piarə, mə pa kə əbə, angbʉlînə ndə kə pa kɔngatə kɨ kpəsəye, bə sə kə vʉsə̂ nə äwä vəta ə pa bə wusə̂ əmə wu ne.»

35 Jezu pâ kwatə̂ye kə əndje ə pa: «Alɔ ə̂në mə wlâ e, ə̂në e nâ na ye nâ də ngendja də ngbede gâ ndə tama ne kɔ, e sɔ̂tə̂ aərə sɔ̂ ə lî də e ne a?» Əndje pâ kə ətshə ə pa: «Ä sɔ̂tə̂ aərə ə lî də ä.» 36 Tshə pâ kə əndje ə pa: «Bale, mandânə səye, əzü ə̂në tshə sə də ngbede ngendja, tshə zä trale. Əzü ə̂në tshə sə də ngbede, tshə zä ndje. Əzü ə̂në tshə sə sə də ə̈ngrʉ̈ kamba ne, tshə zä əgerə ləba nə̂ ye yɔ ərə ə yɔ̈ də ə̈ngrʉ̈ kamba. 37 Mbrə ə̂në, mə pa kə e: əpʉ ərə ə̂në əndje tâ gâ lə Fraka nə̂ Ndjapä kɔ ə lï ndə kə pa ndəma nə mbrə tə̂ äwä əmə: "Əndje dɨ̂ ətshə gâ lə takpa tə̂ aəmbrʉ azü."* Əpʉ ərə ə̂në ə sə gâ pâ əmə kɔ ə ndô trö ndə kə pa ndəma nə mbrə.» 38 Atrawaya nə pâ kə ətshə ə pa: «Âgbɔ̂ Əyïngerə, wü-a, aə̈ngrʉ̈ akamba bishi kə səye.» Tshə pâ kə əndje ə pa: «Ə lî gâ ye.»

39 Mandânə ə̂në tshə wûtu lə gala nə gâ ye kɔ, tshə nâ, mata ə̂në tshə sə kə ma alɔnɔ̂ kɔ, mâ pâ kaga aayɔ ə̂në əɨrɨ nə kə də̂ ɔlivə kɔ. Atrawaya nə̂ ye nə zâ äwä ye. 40 Alɔ ə̂në tshə yî kumu ye mâ je gâ ye kɔ, tshə pâ kə əndje ə pa: «E yü Ndjapä ndə kə pa e te te lə afrɔ ərə ne.» 41 Mandânə, tshə gî tə̂ ye ngrʉ̂ tə̂ əndje ə dɨ̂ mata kə wli badja ə gbə̂te ə yû Ndjapä 42 ə pa: «Abä, kədə ərə ə̂në tshelə zə yində nə kɔ kə sə̂ rə, gï kopo əyo səye gashe tə̂ əmə. Lə aərə nɔ̂, ə də̂ ərə ə̂në mə yində nə kɔ də̂ ka ə mbrə ne, ərə ə̂në bə yində nə kɔ ka ə mbrə.» 43 Bale, ə̈bə̈ trawaya nə̂ Ndjapä tô mâ lafɔ ə wûtu gâ tə̂ ye ndə kə pa əpʉ kə ətshə ka lɔsu ye gbɔgbɔ tə̂ ye. 44 Ə̂në əyo zâ ətshə rô pâ nə gâ ye kɔ, tshə kwâtə̂ye ə yû Ndjapä ʉrrr, â əlʉ tshekotə̂ ye sə̂ mata ə̈ndjï â sə̂ kə gra gâ tə̂ ashɔ.

45 Mandânə ə̂në tshə yû Ndjapä nə ə kâ gâ ye kɔ, tshə âfɔ gâ lafɔ ə nâ gâ tə̂ atrawaya nə ə wû əndje, əndje lô na ye gâ ye mbrə ə̂në əyo sə̂ tə̂ lɔsu əndje ə rô pâ nə. 46 Tshə pâ kə əndje ə pa: «E lo əlo mbrə yekɔ? E äfɔ ə yü Ndjapä kanika ə te te lə afrɔ ərə ne.»

47 Ə̂në Jezu sə̂ pə kə pa əpʉ kɔ, ə̂kpû azü nə wûtu gâ tə̂ ye. Ə̈bə̈ əzü-awla bale lə takpa tə̂ əndje morofo amanə bishi nə, ə̂në əɨrɨ ye kə də̂ Judasə kɔ sə̂ gâ ətshi ə̂kpû azü nə. Tshə nâ trö də Jezu ə ɔ̂ ama ye. 48 Bale, Jezu pâ kə ətshə ə pa: «Judasə, tə̂ äwä kə ɔ ama də̂ bə sə kə ka Əgblə nə̂ Əzü a?»

49 Azü ə̂në əndje sə̂ ngotə̂ Jezu nə kɔ wû ərə nə ə̂në azü nə yîndə kə mbrə tə̂ ye kɔ ə yû ətshə ə pa: «Âgbɔ̂ Əyïngerə, bə yində nə ə pa ä de əndje də ə̈ngrʉ̈ kamba a?» 50 Ə̈bə̈ nə bale lə takpa tə̂ əndje dê əyïkosəra nə̂ âgbɔ̂ awotokrɔ â dê ətu ye djoko ndə ndəkɔ kprû wli gâ tʉ. 51 Bale, Jezu zâ əpʉ ə pâ: «E kätə̂ nə, ə lî gâ ye!» Mandânə, tshə gôro ətu koshe nə â ətu ye nə tɔ̂ gâ mandânə. 52 Mandânə, Jezu pâ kə aâgbɔ̂ azü nə̂ aawotokrɔ nə də akapita nə̂ atrugu Anda Ndjapä nə gâ ndə aâgbɔ̂ azü nə ə̂në əndje nâ ndə kə za ətshə kɔ ə pa: «E nâ də aə̈ngrʉ̈ akamba də aayɔ ndə kə za əmə a pa də e na ndə kə za əyïangba. 53 Alɔnɔ̂ mə sə̂ lə takpa tə̂ e lə Anda Ndjapä, e zâ əmə zâ ne. Bale, alɔ nə̂ e də alɔ nə̂ aawlra tsheləbu lî gâ ye.»

54 Mandânə ə̂në əndje têgbɔ Jezu gâ ye kɔ, əndje gû də ətshə ə nâ də ətshə mâ lə anda nə̂ âgbɔ̂ awotokrɔ. Piarə nə sə̂ ngrʉ̂ ə sə̂ kə za äwä əndje. 55 Azü nə djê əwo mâ lə bəngʉ nə â sə̂ gâ ndʉ nə. Piarə nə sə̂ gâ tʉ gâ lə takpa tə̂ əndje. 56 Ə̈bə̈ əyïkosəra tə yashe wû ətshə ə̂në tshə sə̂ gâ tʉ gâ ndʉ əwo nə kɔ. Yashe nə shêkɔ ətshə ʉrrr ə pâ: «Koshe səye sə̂ ndje tə ə̈bə̈ trawaya nə̂ ye.» 57 Bale, Piarə nə vʉ̂sə̂ nə ə pa: «Yashe, mə wusə̂ ye wu ne.»

58 Teashe mandânə, ə̈bə̈ koshe wû Piarə nə ə pâ kə ətshə ə pa: «Əbə ndje, bə sə tə ə̈bə̈ trawaya nə̂ ye.» Bale, Piarə nə pâ kə ətshə ə pa: «Mə sə ədje əmə sə tə əzü nə̂ ye ne.»

59 Ə mâ mata ə̈nü alɔ bale mandânə, ə̈bə̈ ata əzü kwâtə̂ye ə shêra ə pa: «Banda əpʉ, koshe səye sə ndje tə əzü nə̂ ye, mbrə ə̂në tshə sə tə əzü əgɔ Galile.» 60 Bale, Piarə nə kîrə əpʉ ə pa: «Əbə, mə wusə̂ əpʉ ə̂në bə yində kə pa nə kɔ wu ne.»

Pa nə ə̂në tshə sə̂ pə kə pa əpʉ səkɔ, kɔngatə kɨ̂. 61 Âgbɔ̂ Əyïngerə nə dô tə̂ ye ə shêkɔ Piarə nə. Ə̂sə̂ əpʉ sə̂ ə̂në Âgbɔ̂ Əyïngerə nə pâ kɔ ə tê gâ lə Piarə nə: «Angbʉlînə ndə kə pa kɔngatə kɨ kpəsəye, bə sə kə vʉsə̂ əpʉ əmə äwä vəta.» 62 Piarə nə wûtu gashu ə kɨ̂ tə bandanə.

63 Azü nə ə̂në əndje sə̂ kə bata Jezu nə kɔ, əndje sə̂ kə mɔ ətshə â sə̂ kə da ətshə. 64 Əndje î ala ye də ləba ə yû ətshə ə pa: «Tə awopandəma Ndjapä, pä kə ä: əde kə dâ əbə kɔ?» 65 Azü nə gû ətshə də ə̂gû wââ.

66 Alɔ ə̂në ətshe nə krâ gâ ye kɔ, aâgbɔ̂ azü nə̂ Ajuwufu də aâgbɔ̂ azü nə̂ aawotokrɔ gâ ndə aawoyisə̂ âgbɔ̂ əpʉ nə̂ Mayïzə ngbô tə̂ əndje gâ tə̂ nə. Əndje pâ əndje na də Jezu nə gâ ətshi aangbɔ ngbanga nə̂ alane. 67 Əndje yû ətshə ə pa: «Kədə bə sə tə Kristə* nə, pä ndə nə kə ä.» Tshə kîrə əpʉ kə əndje ə pa: «Kədə mə pa ndə nə kə e, e sə sə kə yində nə də lɔsu e bale ne. 68 Kədə mə yu e də ə̈bə̈ əpʉ, e sə sə kə kirə də əpʉ kə əmə bale ne. 69 Bale, mandânə səye, Əgblə nə̂ Əzü sə kə sə gâ tʉ gâ ndə ndəkɔ Ndjapä ə̂në tshə sə tə Əyïworɔgbɔ nɔ̂ kɔ.» 70 Azü nə nɔ̂ pa: «Bale, rəkɔ bə sə tə Ɨrɨ Ndjapä a?» Tshə kîrə əpʉ kə əndje ə pa: «Ə sə mata ə̂në e pa kɔ, mə də̂ ətshə.» 71 Bale, əndje pâ: «A sə kə kwatə̂zə ə yu ətshə də ə̈bə̈ əpʉ mbrə yekɔ? A djî də ə̂tə̂ əzə̂ əpʉ ə̂në tshə pâ də ama ye kɔ gâ ye.»