1 BaKolinte 12

Umbili Umwempela Una Imhingu Inji

12 Sezwo umbili uli umwempela koga una imhingu inji, akale jose ngijombili, kojoba jili inji, umbili umwempela, Kristo neebo uli alo. 13 Nokuti noMpepo umwempela isu tose takabhabhatizilwa mumbili umwempela, baJuda kana baGiliki, balanda kana balosupunuka, akale tose takanwiswa wakaleyo uMpepo umwempela. 14 Nokuti umbili autoba imhingu imwempela, koga inji. 15 Kana igumbo lingoti, "Nokuti anditoba luboko, anditoba imhingu yombili," yezwi azwingate kuti lisibe imhingu yombili. 16 Akale kana inzebe ingoti, "Nokuti anditoba izhisho, anditoba imhingu yombili," yezwi azwitota kuti isibe imhingu yombili. 17 Ngana umbili wose uli izhisho, kuwha kwaluba poni? Umbili wose ngana ulinzebe kunhuwija kwaluba poni? 18 Koga sezwazwili, Mwali wakabiga mumbili imhingu jilosiyanasiyana, imwe neimwe sokulonga kukwe. 19 Ngana imhingu jose jili imhingu imwempela, ngana umbili uli kupi? 20 Sezwazwili kuna imhingu inji asi umbili umwempela. 21 Izhisho alingati kuluboko, "Iwi imi anditokushaka," kana akale unsholo uti kumakumbo, "Imwi imi anditomushaka." 22 Koga, yejo imhingu jombili, jinoboneka jilinobutela, jilokosha, 23 akale imhingu jombili jisinokujika, tojikuja kasa, yejo imhingu jinopisa ishoni tojifuka nolulemeso, 24 zwisinodikana nemhingu jedu jinoyebeka. Koga Mwali wakabumba imhingu jilosiyanasiyana kuba umbili umwempela, epa lulemekejo lukulwana kumhingu jinoshundwa, 25 kutila kuti kusibe nokusowhisisana mumbili, koga kuti imhingu jilondotane. 26 Kana imhingu imwempela ingolwala, jose jinolwalabo, kana imhingu imwempela ingokujwa, jose jinoshantila pamwempela. 27 Ngweno imwi mumbili waKristo akale umwe noumwe imhingu yawo ilosiyana yawo.