1 Kutanga kweNdebo iMbuya yaJesu Kristo, Mwananhulumyana waMwali, 2 Sobuzwakakwalwa mumpolofita Izaya, kuwhi:

"Ndinotuma untumwa wangu pambeli papo,

unookukungubulila inzila yiyo,

3 Iwhi lyounoshomeja mugwegulu liti,

‘Kungubulani inzila yaTezi,

lulamisani inzila yiye.’ "

4 Joni umbhabhatizi wakakezha mugwegulu ebhaunula umbhabhatizo wokushanduka kuti luchinyo lulekejelwe. 5 Banhu banji bakabeva mudunhu lyeJudiya akale nomuguta lyeJelusalema bakenda kuna Joni akababhabhatiza muJolodani belebulula zwibi zwabo.

6 Akale Joni wakabembala chimbalo chobukuse bwekamela nebhanti lyebhapata munshana, wakabelya imhashu nobuchi bweshango. 7 Wakabhaunula eti, "mashule mwangu kunoozha umwe unesimba kupinda lyangu, wandisinokwelela kukotama kuti ndisupule unchili weshangu jije. 8 Imi ndakamubhabhatiza nevula, koga iye unoomubhabhatiza noMpepo uNchena."

9 Mumazhuba yayo, Jesu wakezha eva kuNazaleta mudunhu lyeGalili, akabhabhatizwa naJoni muJolodani. 10 Pakalepo echinobhuda muvula, wakabona idenga lizhulika, akale uMpepo waluba senjiba ubhelukila paali. 11 Akale iwhi lyakava kudenga, "Iwi uMwananhulumyana wangu unodikana, nawi ndilokushantilwa kasa."

12 Pakalepo umpepo wakonsenga mugwegulu. 13 Wakagala mugwegulu mazhuba makumi mana ekwejwa naGuluzhanje, egala nemhuka jeshango, ingilozi jakondinda.

14 Wakati asungwa Joni, Jesu wakenda kuGalili epupula iNdebo iMbuya yaMwali, 15 eti, "Unshaji wazhajikijwa bushe bwaMwali bwaswika; shandukani, mudimbwe iNdebo iMbuya!"

16 Wakati ekwenda mumbali mwegungwa lyeGalili, wakabona Simoni elinonuna uwe Endulu, beposa ivubo mugungwa, nokuti baluba bavubi behobe. 17 Jesu wakati kwabali, "Nditobeleni ndomuta kuti mube bavubi babanhu." 18 Pakalepo bakasiya ivubo jabo, bakontobela.

19 Wakati akwenda unshizho umfupi wakabona Jemusi, mwananhulumyana waZebhediya naJoni ununa uwe, beli mubwato benamatija ivubo. 20 Pakalepo, wakabashoba, bakasiya tate babo Zebhediya mubwato belinozwishingi, ibo bakontobela.

21 Bakenda kuKapenaumi, nezhuba lyeSabata, pakalepo bakenda kusinagogi Jesu akalayija. 22 Bakashamiswa nokulayija kukwe, nokuti wakabalayija sonhu unesimba, esinota sabakwali.

23 Pakalepo musinagogi lyabo mwaluba nonhu wakabeli nompepo umbi, 24 wakashomeja eti "Tinani nawi Jesu weNazaleta? Wezha kotipalaja isu. Ndinokuziba kuti ndiwi aani: Unchena waMwali!"

25 Koga Jesu wakonkalalila, eti: "Whilijila, bhuda mwaali"

26 Umpepo umbi wakonsuntula, ukalila newhi lyopezhulu, ukabhuda mwaali. 27 Banhu bose bakachenama bakatanga kubhuzana beti: "Ini yezwi? Indayijo impya na yeyi? Inesimba lyokukalalila umpepo umbi akale uuwhilila!" 28 Pakalepo inyaya yezwo zwaakata, yakawhika kumapazu ose enyika yeGalili.

29 Pabakabhuda musinagogi, bakangwina mungumba yaSimoni naEndulu, beli naJemusi naJoni. 30 Amezwale baSimoni bakaba belilele belwala bepisa umbili. Pakalepo Jesu wakabujwa nezwabo. 31 Wakenda kwabali akababhata luboko, akabamusa bulwaji bukava bwapela. Bakamilika bakabashingila.

32 Madekwana, izhuba limila, bakabuza kwaali bose banolwala naabo banamadimoni. 33 Iguta lyose lyakabungana pankoba. 34 Wakachija banji bakabelwala malwaji alosiyanasiyana, akabhisa madimoni; aajakavumija madimoni kuti elebeleke, nokuti akabeziba kuti Jesu ndiyani.

35 Kumijelo, kuchi kutema, wakamuka akabhuda, akenda kubugalo busina banhu, akanonamata kwakale. 36 Simoni naabo baluba naye, bakontobela, 37 pabakati bongwana Jesu, bakati kwaali, "Bose banhu bakumukupota."

38 Asi Jesu wakati kwabali, "Andeni kunaimwe misha kuti ndinopupula kwakaleko nokuti ndizwo zwindakezhila."

39 Wakakwendela iGalili yose ebhaunula mumasinagogo abo, akale ebhisa madimoni.

40 Unhu unamapelembuji wakenda kwaali, akafhigama pambeli pape, akabweta kwaali eti, "Kana uda, ungandishampuluja."

41 Jesu wakonwhileshe, akatambunuja luboko lulwe, akonguma, akati kwaali, "Ndinoda, cheneswa." 42 Pakalepo mapelembuji akava apela, akashambijika. 43 Jesu wakondaya, akoondeka akenda. 44 Akati kwaali, "Whilila, usibuje unhu, koga inda unozwitondejela kuntebuji, akale upile untebulo wokushampulujwa kukwo, sechisumikijo chokuchila kuko sokulaya kwaMozesi."

45 Wakabhuda akabuja banhu banji epupula, inyaya yiye yakawhikwa nabanhu banji zwikatisa kuti Jesu wakaba esichinotubula kungwina muguta, asi wakenda kubugalo bokuzhe kwamakuta, koga banhu bakenda kwaali, beva kumapazu wose.