1 Bakati baswendela kuJelusalema pelyo neBhetifaji neBhetani kudunhu linowhi Olivi, wakatuma balayijwa babe babili. 2 Akati kwabali, "Indani kunsha ulolingisana namwi, kana mwaswika kwauli munowana mwana wedonki ukasungililwa usanu watanwa nonhu, muunsupule, mumbuze." 3 Kana unhu eti kunamwi. "Munotilani yezwi," muti "She unounda pakalepo unountumila yokuno." 4 Bakenda bakawana mwana wedonki ukasungililwa pankoba pazhe mungwagwa; bakonsupula. 5 Bamwe bakaba belimile yopo bakati kwabali, "Mumutani musupula mwana wedonki?"

6 Bakalebeleka kwabali sokuleba kwaJesu; bakabavumija. 7 Bakabuza mwana wedonki kunaJesu, bakabiga zwimbalo zwabo pezhulu, akagala pezhulu. 8 Banji bakawala zwimbalo zwabo munzila, bamwe bakatema inhabi jina mazhani jibakabatema muminda, bakawala munzila 9 Bakaba bekwenda mbeli, nabakabetobela bakashomeja beti Hosana. Ulokombolelwa iye unozha muzina lyashe. 10 "Bulokombolelwa bushe bwatate bedu Davidi bukumuzha. Hosana wopezhuluzhulu." 11 Wakangwina muJelusalema akenda mutempeli; wakati alinga zwinhu zwose sezwo kwaluba madekwana, wakabhuda akenda kuBhetani pamwe nabegumi linababili.

12 Nezhuba linotobela, pakubhuda kwabo kuBhetani wakaba nenzhala. 13 Wakabona unkuyu unamazhani echikule, akenda kwauli eti pamwe angawana zwokulya kwauli. Paakaswika wakawana pesina chinhu, koga mazhani oga chete nokuti aujakabeli unshaji wokuti ihuyu jibe ipo. 14 Wakalebeleka eti kwauli, "Kusibe noucholya zwizwalo zwizwo kuswikila nalini." Balayijwa babe bakazwiwha.

15 Bakaswika kuJelusalema. Wakangwina mutempeli akatanga kutatamila yabo bakabetengesa nayabo bakabetenga beli mutempeli, akakudumula zwitala zwabo bakabechincha imali, nezwigalo zwabalutengesa injiba; 16 aajakavumila kuti unhu angangwina mutempeli ekanyamula zwibiya. 17 Wakabalayija akati kwabali, "Azwijakakwalwa kani kuti, ‘ingumba yangu inoowhi ingumba yokunamata yenduji jose.’ Koga imwi mwaita ingumba lyembava."

18 Batebuji bakulwana nabakwali bomulawo bakazwiwha, bakada kushaka inzila yokuti bombulaye; koga bakontya nokuti banhu bose bakashamiswa nokulayija kukwe.

19 Madekwana bakabhuda muguta.

20 Zhingwanangwana bakati bepinda, bakabona unkuyu wakakoma nemiji yose. 21 Pita wakalangalila akati, "She lingani unti umwafizha wakoma."

22 Jesu wakashandula akati kwabali, "Akati ibani nokudimbwa kunaMwali." 23 Chokomende ndinoti kunamwi, umwe nomwe unoti kudunhu yeli, "nyamulwa uposelwe mugungwa," esinokahajika mumwoyo uwe koga edimbwa kuti zwaanoleba zwinotikana, zwinoba alo. 24 Nokudalo ndinomubuja nditi zwinhu zwose zwamunokumbila pakunamata dimbwani kuti mozwitambula, zwinoba alo. 25 Pose pamunomilika munamata, lekejelani bwose bamunandandu nabo, kutila kuti Tate benu bokudenga bemulekejele luchinyo lwenu.

27 Bakabuya bakaswika kuJelusalema. Echinokwendenda mutempeli, batebuji bakulwana nabakwali bomulawo nabatungamili bakezha kwaali, 28 bakati kunaiye, "Zwinhu yezwi unozwita nesimba lipi kana kuti ndiyani wakakupa isimba yeli lyokuta yezwi?"

29 Jesu wakashandula akati kwabali, "Nami ndinomubhuza umbhuzo, mundishandule nami ndichamubuja masimba andinoshingisa kuta yezwi. 3 Umbhabhatizo waJoni wakava kudenga kana kuti kubanhu? Ndishanduleni."

31 Bakanyenyejana beti, "Kana tikati kwakava kudenga," uchati, "Ini musakadimbwa kunaiye?" 32 Koga titi, "Kwakava kubanhu?" Bakatya banhu nokuti bose bakati Joni waluba umpolofeti wechokomende. 33 Bakonshandula Jesu bakati, "Atitoziba." Jesu wakati kwabili, "Namibo anditomubuja masimba andinota nawo yezwi zwinhu."