1 Jesu wakangwina akale muSinagogi, kwakabeli nonhulume wakabakakokonyala luboko. 2 BaFalisi bakondingisisa, bedakubona kuti uchonchilisa nezhuba lyeSabata, beda kuumpa undandu. 3 Jesu wakati kunhulume woluboko lulokokonyala, "Izha yopano." 4 Wakati kwabali, "Zwilokwelela ngezwipi kuta zwibuya nezhuba lyeSabata kana kuta zwibi? Kuchija kana kubulaya?"

Apana wakadabila. 5 Wakabalinga bose akanyema akaba neshungu ebona bukukutu bwemyoyo yabo, wakati kunhulume ,"Tambunuja luboko lulo." Wakatambunuja luboko lukakololoka. 6 Pakalepo baFalisi bakabhuda bakenda kunogowana naba Helodi, bepyanga inzila yokuuncheta.

7 Jesu nabatobeli babe bakabhuda bakenda kugungwa; Banhu banji bokuGalili nabo kuJudiya bakontobela, 8 nabokuJelusalema, nabokuIdumiya nabakava museli mweJolodani, nabokuTaya neSidoni bakezha belibanjibo kowha zwinhu zwaakabata. 9 Wakabuja balayijwa babe kuti belonganyile bwato bwokushingisa, kuti luvute lwabanhu lusumpwanyilile; 10 nokuti wakachija banhu banji, nezwo bose bakabeli namalwaji bakomanikija beda kuunguma. 11 Mipepo mibi yakabeti ingombona yakabewila pasi ishobelela iti, "lwi uMwananhulumyana waMwali."

12 Wakaba eyinyalaja, kuti isibuje banhu nozuzwe.

13 Feno wakatanha mudunhu akashobela kwaali sokuda kukwe bakenda kwaali. 14 Pakalepo wakashala bali gumi nababili, kuti bebenaye akale kuti ebatume kunopupula, 15 akale kuti ebape masimba okutata mipepo mibi.

16 Yaya ndiwo mazina abaligumi nababili baakashala; Simoni wakonshoba kuti ndiPita 17 Jemusi mwana waZebhedi nonuna uwe Joni baakashoba eti Bhonajisi, zwinoleba kuti Banabanhulumyana Bontimbo; 18 naEndulu, naFilipu, naBhatilomeyo, naMateo, naTomasi, naJemusi mwananhulumyana waAlufiyasi, naTadeyosi, naSimoni unKenani, 19 naJudasi Isikaliyoti, uli iye wakoncheta.

20 Wakenda kungumba, asi banhu banji bakabungana kabili, nezwo abajakaba nonshaji wokuti belya. 21 Banakwaina babe pabakazwiwha yezwi bakenda kuti benontola nokuti banhu bakabeti, "Unopenga!"

22 Bakwali bakava kuJelusalema bakati ,"unanaBheluzabheli unchinda wamadimoni, ndizwo ebhisa madimoni."

23 Wakabashobela kwaali akalebeleka nabo eshingisa unkwejaniso akati, Guluzhanje angatatamila chini Guluzhanje? 24 Kana bushe bulwisana bwogabwoga, yobo bushe abungasime. 25 Kana imhuli isakabhatana ili mumakapo anolwisana, yeyo imhuli aingasime. 26 Kana Guluzhange angozwikamula mumakapo mabili, apana kwanonda unopalala.

27 Apana unhu angangwina mungumba, mweni elimo, kova etola zwibiya madilo, yezwi zwingatikana chete, kana mweni asungililwa, ndipo paangatole zwibiya mumba.

28 Chokomende ndinomubuja banhu banolekejelwa zwose zwibi nokutuka kwabanota, 29 koga ani nani unotuka uMpepo uNchena aatowana lulekejelo nokuti waaba noluchinyo lusinopela. 30 Nokuti bakabeti una nolupepo lubi.

31 Pakalepo amai baJesu nabanuna babe bakaswika bakama pazhe, bakatumila iwhi kuti bonshobe. 32 Bakabeli naye mungumba bakombuja kuti mai babo nabakazwaji babo bechinhulume bakumukushaka.

33 Iye wakabashandula eti "amai bangu ndiyani? kana kuti banuna bangu ndibapi?" 34 Wakalinga luvute lwabanhu bakaba konkomboloja akati, "yaba ndibo amai bangu, yaba ndibo banuna bangu. 35 Iye unota chido chaMwali ndiye ununa wangu, ndiye unkazwaji wangu akale ndiye amai bangu."